Nebukaneza paāselele bamfumu ba Yuda wāenda nabo ku Babiloni, wāpele mwingidi umo wa mu kipango witwa bu Ashepenaza mwingilo wa kwibatala. Nebukaneza wāsapwidile Ashepenaza akimbe mobadi bankasampe bana-balume bakomo mu ngitu kadi ba ñeni. Bano bankasampe bana-balume bādi ba kufundijibwa mu myaka isatu. Buno bufundiji bwādi bwa kwibateakanya mwa kwikadila bengidi ba bulēme mu Babiloni. Bano bankasampe bādi bafwaninwe kufunda kutanga, kulemba, ne kwisamba Kiakadia, ludimi lwa mu Babiloni. Kadi bādi bafwaninwe kudya byakudya byādi bidya mulopwe ne bengidi ba mu kipango. Bano bankasampe baná i ba Danyele, Hanania, Mishaele, ne Azadia. Ashepenaza wēbenikile majina angi a bene Babiloni: Beleteshazale,  Shadelake, Meshake, ne Abedenengo. Le ulanga bano bana-balume bālekele’byo kwingidila Yehova mwanda wa buno bufundiji?

Bano bankasampe baná bādi basuminwe kukōkela Yehova. Bādi bayukile amba kebafwaninwepo kudya byakudya bya mulopwe, mwanda Bijila bya Yehova byādi binena’mba byakudya bimo i bya disubi. O mwanda bāsapwidile Ashepenaza amba: ‘Tubakwisāshila, koketupa byakudya bya mulopwe.’ Ashepenaza wēbanena’mba: ‘Shi kemudile’byopo, mulopwe amone amba mubaanza kunyana, usa kungipaya!’

Danyele wāikele’po na mulangwe. Wāsapwila muntu wādi wibalama’wa amba: ‘Tubakwisāshila, witupe’tu’nka munamuna ne mema mu bula bwa mafuku dikumi. Kupwa witudingakanye na bankasampe badya byakudya bya mulopwe.’ Mulami’wa wāitabija.

Mafuku dikumi pa kubwana, Danyele ne balunda nandi basatu bajika kupita bankasampe bakwabo bonso. Yehova wāsangele mwanda bāmukōkele. Yehova wāpele’nka ne Danyele tunangu twa kwivwanija bimonwa ne bilotwa.

Bano bankasampe pobāpwile kufundijibwa, Ashepenaza wākebatūla kudi Nebukaneza. Mulopwe pa kwisamba nabo wāmona’mba ba Danyele, Hanania, Mishaele, ne Azadia badi na ñeni, kadi i bakosoke kupita bankasampe bonso. Nebukaneza wātonga bano bankasampe baná banze kumwingidila mu kipango kyandi kya bulopwe. Divule mulopwe wādi wibalomba madingi mu myanda mikatampe. Yehova wēbekadije ke batunangu kupita bana-balume bonso ba tunangu ne ba majende ba mulopwe.

Nansha ba Danyele, Hanania, Mishaele, ne Azadia byobādi mu ntanda ya bweni, kebāidilwepo amba i bantu ba Yehova. Le nobe ukavuluka nyeke Yehova, nansha shi kudipo na bobe bambutwile?