Kyelekejo kyasekunwine Yesu kya mwana mujimine kyo kino kyatulumwije basonkeji ba musonko, basonekeji, ne Bafadiseo amba Leza witabije kulekela babipya-mambo besāsa. (Luka 15:1-7, 11) Pano Yesu kaesambe na bana bandi ba bwanga. Waingidija kyelekejo kikwabo, pano’ko i kitala mpeta wajingulula’mba mwingidi wandi wa njibo nansha kalama, kakingilangapo biyampe.

Yesu usekununa’mba yao kalama i musambilwe bu wingidijanga bibi bintu bya mfumwandi. Ebiya mfumwandi wanena’mba uno kalama usa kutalulwa pa kaji. Kalama’wa kawiipangula’mba: “Le nsa kulonga namani, pasa kuntalula mfumwami bu kalama? Nkidipo na bukomo bwa kukola nshi, kadi ngidi na bumvu bwa kulomba.” Aye pa kulangulukila pa bīya kumeso, wakwata mulangwe amba: “Aan! Nayuka kya kulonga mwanda wa kunena’mba shi abantalula bu kalama, bantu bakantambule kwabo.” Ponka’po waityija boba badi bakongwele, kaebepangula’mba: “Le waapwile mfumwami inga?”​—Luka 16:3-5.

Umbajinji walondolola’mba: “Bipimo katwa bya māni a mpafu.” Ko kunena’mba i kintu kya malitele 2 200 a māni. Uno mwapudi padi wadi na bitongo bikatampe bya impafu, nansha padi wadi nsunga upoteja māni. Kalama wamunena’mba: “Yata mukanda obe wa kwiivwanika, shikata, bukidi lemba’po 50 [malitele 1 100].”​—Luka 16:6.

Kalama waipangula mukwabo amba: “Abe nobe, waapwile inga?” Aye amba i: “Bipimo katwa bikatampe bya ñano.” Ko kunena’mba i kintu kya malitele 22 000 a bintu byūmu. Kalama wamunena’mba: “Yata mukanda obe wa kwiivwanika, lemba’po 80.” Ko kunena’mba watyepeja māpu andi na 20 pa katwa.​—Luka 16:7.

Pano kalama ukitala lupeto lonso lwa mfumwandi, o mwanda mungya bijila ukidi na lupusa lwa kutyepejeja bakwabo badi bapwile mfumwandi. Kalama pa kutyepeja ndeni ya badi bapwile, welongela balunda ba kumukwasha shi kaji kabapu.

Difuku dimo mfumwandi waivwana byaalonga. Nansha byaalonga i bya kumujimijija bintu, ino mfumwandi watulumuka pa uno kalama ne kumutendela amba nansha “byaadi mukondame, . . . walonga bya tunangu twa kamweno.” Yesu ubweja’ko amba: “Bana ba ino ngikadilo ya bintu badi na tunangu twa kamweno mu lukongo lwabo kupita mwikadile bana ba kitōkeji.”​—Luka 16:8.

Yesu kaninyepo bunwanwa bwa uno kalama, nansha kukankamika budimbañani mu bya busunga, mhm. Penepa byasaka i bika? Wasoñanya bandi bana ba bwanga amba: “Mwilongelei balunda na bupeta bukondame mwanda wa kunena’mba shi bubapu, bakemutambule mu bīkalo bya nyeke.” (Luka 16:9) Bine pano padi ñeni yotuboila’ko ya kwikala muntu umona kulampe ne wingidija tunangu. Bengidi ba Leza, “bana ba kitōkeji,” bafwaninwe kwingidija bintu byabo na tunangu, koku bavuluka būmi bwa nyeke.

 Enka Yehova Leza ne wandi Mwana bo babwanya kutambula muntu mu Bulopwe bwa mūlu nansha mu Paladisa pano pa ntanda mu buludiki bwa Bulopwe. Tufwaninwe kutamija kipwano kikomo nabo na kwingidija bintu byotudi nabyo na kukwatakanya tumweno twa Bulopwe. Nabya tukelamina būmi bwetu bwa kumeso kitatyi kikōneka nansha kikapwa olo, ndalama, bintu ne byabupeta bikwabo.

Kadi Yesu walombola’mba boba balama ne kwingidija na kikōkeji byabupeta ne bya ku ngitu byobadi nabyo bakekala na kikōkeji mu kuvuija mingilo ya mvubu mpata. Yesu wavuya’mba “Nanshi, shi kemwikelepo bakōkele mu myanda ya bupeta bukondame, le i ani ukemupa bwa binebine [kimfwa tumweno twa Bulopwe]?”​—Luka 16:11.

Yesu wasapwila bandi bana ba bwanga amba bakalombwa bivule shi basaka kutambulwa “mu bīkalo bya nyeke.” Muntu kabwanyapo kwikala mwingidi wa bine wa Leza koku kadi umpika wa bukondame, ke bupeta bwa ku ngitu kadi. Yesu wafule na kunena’mba: “I kutupu mwingidi ukokeja kwikala umpika wa bamfumwandi babidi, mwanda ukashikwa’ko umo wasanswa’ko mukwabo nansha kadi ukalamata umo ne kupēleka mukwabo. Kemukokejapo kwikala bapika ba Leza koku kadi bapika ba Bupeta.”​—Luka 16:9, 13.