1, 2. Le mutumibwa Polo wālombwele namani amba ufwijanga’ko pa mwanda wa kanye kakatampe ka Leza?

MUTUMIBWA Polo wānene pampikwa budimbidimbi amba: “Kanye [ka Leza] kakatampe kondi kekadipo ka bitupu.” (Tanga 1 Kodinda 15:9, 10.) Polo wādi uyukile amba kadipo kyaingile pa kufwaninwa lusa lukatampe lwa Leza. Wādi upangapanga bene Kidishitu.

² Polo paādi kadi kubwipi na kufwa, wāsonekēle Temote amba: “Mfwijanga’ko Kidishitu Yesu Mfumwetu, waumpele bukomo, mwanda waumwene amba ne mukōkele pa kumpa uno mwingilo.” (1 Temote 1:12-14) Le i mwingilo’ka? Polo wāsapwidile bakulumpe ba mu kipwilo kya Efisesa amba: “Inoko nkimwenepo muya wami bu kintu kya mvubu kondi, poso’nka mvuye lwendo lwami ne mwingilo onapelwe na Mfumwetu Yesu, wa kusapula ne pa mfulo bukamoni bwa myanda miyampe ya kanye kakatampe ka Leza.”​—Bilongwa 20:24.

3. I mwingilo’ka wa pa bula wāpelwe Polo? (Tala kifwatulo ku ngalwilo.)

³ Le “myanda miyampe” yādi isapula Polo i myanda’ka,  ne yādi ilombola namani kanye kakatampe ka Yehova? Polo wānene bene Kidishitu ba mu Efisesa amba: “Mwaivwene myanda ya bukalama bwa kanye kakatampe ka Leza bwaumpelwe pa mwanda wenu.” (Efisesa 3:1, 2) Yesu wāsoñenye Polo kusapula myanda miyampe ku boba ke Bayudapo. Kino kyāpele bantu ba mizo mukenga wa kubadilwa mu Umbikalo uludikwa na Meshiasa. (Tanga Efisesa 3:5-8.) Polo wāsapwile na bupyasakane ne kushīla bene Kidishitu ba dyalelo kimfwa kiyampe. Wālombwele amba kanye kakatampe ka Leza kekādipo “ka bitupu” nansha bwa kasupakanibwa padi.

4, 5. Mwanda waka tunena’mba “myanda miyampe ya Bulopwe” yo yonka “myanda miyampe ya kanye kakatampe ka Leza”?

⁴ Mu kino kitatyi kya ku mfulo, bantu ba Yehova bapelwe mwingilo wa kusapula “myanda miyampe ya Bulopwe . . . pa ntanda yonso ikelwe na bantu mwanda wa bukamoni ku mizo yonso.” (Mateo 24:14) Ino myanda miyampe ya Bulopwe yo yonka “myanda miyampe ya kanye kakatampe ka Leza.” Namani le? Mwanda madyese onso otukatambula kupityila ku Bulopwe bwa Leza, tukeatambwila pa kanye ka Yehova. (Efisesa 1:3) Polo wāfwijije’ko Yehova pa kanye kandi kakatampe na kusapula na bupyasakane. Le tulondanga kimfwa kya Polo?​—Tanga Loma 1:14-16.

⁵ Mu kishinte kibadikile, twamwene miswelo mivule yotumwenanga mu kanye kakatampe ka Yehova batwe babipya-mambo. Byotumwenine’mo namino, tudi na kiselwa kya kufundija bakwabo mulombwela Yehova buswe ne muswelo obabwanya kumwena’mo. I muswelo’ka otubwanya kukwasha bakwabo bafwije’ko Leza pa kanye kandi kakatampe?

6, 7. Potushintulwila bantu myanda ya kinkūlwa, tusalajanga namani myanda miyampe ya kanye kakatampe ka Leza?

⁶ Dyalelo, bantu bavule shi abaluba, kebemonangapo amba abapi mambo, o mwanda kebemvwanijepo mwanda waka bantu basakilwa kinkūlwa. Abo’ko bendanga bajingulwila’ko amba mwikadilo wabo wa umbūmi kewibaletelangapo nsangaji. Kadi shi kebasapwidilwe na Batumoni ba Yehova, kebayukangapo bubi bwine i bika, mobwikadile na lupusa potudi, ne byotufwaninwe kulonga pa kunyongololwa mu bupika bwa bubi. Bantu ba mityima myoloke pobayukanga mwine mwikadile bubi, bafwijanga’ko Yehova pa kutuma wandi Mwana pano pa ntanda etunyongolole mu bubi ne mu lufu. Shi Yehova wālongele kino kintu i pa mwanda wa buswe ne kanye kandi kakatampe.​—1 Yoano 4:9, 10.

⁷ Tala byānene Polo pa Mwana muswe wa Yehova: “Mudi aye twi banyongololwe na kinkūlwa kupityila pa mashi andi, bine, twi balekelwe bilubo byetu, mwendele bupeta bwa kanye kandi kakatampe.” (Efisesa 1:7) Kitapwa kya kinkūlwa kya Kidishitu i bukamoni bukatampe bwa buswe bwituswele Leza, kadi kilombola mubaile kanye kakatampe ka Leza. Bine, tuseñwanga mpata pa kuyuka’mba shi tulombole lwitabijo mu kitapwa kya Yesu, bubi bwetu buketulekelwa kadi tukekala na mutyima wa mundamunda utōka! (Bahebelu 9:14) Bine ino i myanda miyampe ya kusapwila bakwabo!

8. Mwanda waka bantu ba bubi basakilwa kupwanijibwa na Leza?

⁸ Shi bantu kebetabijepo mu kitapwa kya Yesu, Leza wibamonanga bu balwana nandi. Nanshi, tudi na kiselwa kya  kwibasapwila’mba babwanya kwikala balunda na Leza. Mutumibwa Yoano wāsonekele amba: “Yewa ulombola lwitabijo mudi Mwana udi na būmi bwa nyeke; yewa kakōkelapo Mwana kakamonepo būmi, ino bukalabale bwa Leza budi nyeke padi.” (Yoano 3:36) Tudi na nsangaji mwanda kitapwa kya Kidishitu kitulengejanga tupwane na Leza. Polo wānene’kyo uno muswelo amba: “Bine, banwe badi basonsoloke kadi balwana mwanda ñeni yenu yadi itele ku mingilo mibi, pano wemupwanya kupityila ku umbidi wa ngitu wa uno’u ponka pa lufu lwandi, amba emufikije ku meso andi mwikele bajila kadi bampikwa kakoba ne bampikwa mambo a kutopekwa.”​—Kolose 1:21, 22.

9, 10. (a) Le Kidishitu i mupe banababo bashingwe māni kiselwa’ka? (b) Le “mikōko mikwabo” ikwashanga’ko bashingwe māni muswelo’ka?

⁹ Kidishitu i mupe banababo bashingwe māni pano pa ntanda “mwingilo wa kupwanya.” Polo wēbasapwidile amba: “Inoko bintu byonso i bitambe kudi Leza, wetupwenye na aye mwine kupityila kudi Kidishitu, wetupa ne mwingilo wa kupwanya, ko kunena’mba, Leza wadi upwanya ino ntanda na aye mwine, kupityila kudi Kidishitu, pampikwa kubala bilubo byabo, kadi wetupele musapu wa kupwanya. Nanshi twi mikendi pa kyaba kya Kidishitu, pamo’nka bwa Leza uzenza kupityila kotudi. Twisāshilanga bantu pa kyaba kya Kidishitu amba: “Pwanai na Leza.”​—2 Kodinda 5:18-20.

¹⁰ “Mikōko mikwabo” idi na dyese dya kukwasha’ko bashingwe māni ku uno mwingilo. (Yoano 10:16) Byobadi bu “batumwe” nansha bu mikendi, ino “mikōko mikwabo” ingilanga bininge mu uno mwingilo mukatampe, ifundija bantu bubine ne kwibakwasha bapwane bininge na Yehova. Uno nao ubadilwa mu myanda mikatampe yotusapwila myanda miyampe ya kanye kakatampe ka Leza.

11, 12. Mwanda waka kulombola bantu amba babwanya kulomba Yehova i mwanda muyampe?

¹¹ Bantu bavule balombelanga mwanda’tu wa beimvwane biyampe, ino kebakulupilepo amba Leza wimvwananga milombelo yabo. Basakilwa kuyuka’mba Yehova i Aye “wivwananga kulombela.” Davida, mulembi wa mitōto wāsonekele amba: “Ē! abe wivwananga kulombela, kudi abe ko kukāya bantu bonso. Myanda ya bubi ībanekenya ami; kadi kujilula bijila kwetu nako ukakendejangako.”​—Ñimbo ya Mitōto 65:2, 3.

¹² Yesu wānenene bandi bana ba bwanga amba: “Shi mulombe Tata kintu kyo-kyonso ukemupa’kyo mu dijina dyami.” (Yoano 16:23) Kino kishintulula’mba tubwanya kulomba “kintu kyo-kyonso” kikwatañene na kiswa-mutyima kya Yehova. Yoano wālembele amba: “Kino kyo kikulupiji kyotumukulupile, amba, wivwane tumulombe kintu kyonso, shi kika shi kika, mwendele kiswa-mutyima kyandi, witwivwananga.” (1 Yoano 5:14) Bine buya’byo’po kukwasha bantu bemvwanije amba milombelo ke kintupo’tu kibalengeja beimvwane biyampe, inoko i muswelo wa kufwena ku “lupona lwa kanye kakatampe” lwa Yehova! (Bahebelu 4:16) Potufundija bantu bayuke muswelo muyampe wa kulombela, Muntu mwine obafwaninwe kulombela’ko, ne bintu byoloke bya kulomba, twibakwashanga bapwane na Yehova ne kusengibwa kitatyi kyobasusuka.​—Ñimbo ya Mitōto 4:1; 145:18.

13, 14. (a) I mingilo’ka mikatampe ikengila bashingwe māni kumeso’ku? (b) I mwingilo’ka utendelwa mpata bashingwe māni obakengidila bantu?

¹³ Yehova ukalombola bininge kanye  kandi kakatampe mu “ngikadilo ya bintu ikāya’ko.” Namani le? Leza ukapa ba 144 000 bene bakaludika na Kidishitu momwa mūlu, mwingilo wa kutendelwa. Polo wālombwele mwikadile mwingilo’wa na kulemba’mba: “Ino Leza i mpeta mu lusa, kadi pa mwanda wa buswe bwandi bukatampe bwaetusenswe, wetupele būmi pamo na Kidishitu, nansha byotwadi bafwe mu bilubo​—nenu mwapandijibwe pa kanye kakatampe. Ne kadi, wetusangwile pamo ne kwitushikatyija pamo mu bifuko bya mūlu umbumo na Kidishitu Yesu, amba mu ngikadilo ya bintu ikāya’ko alombole mubaile bupeta bwa kanye kandi kakatampe mu buntu bwandi padi batwe umbumo na Kidishitu Yesu.”​—Efisesa 2:4-7.

¹⁴ I bikomo kufwatakanya mwikadile bintu bya kutendelwa Yehova byalongolwedile bene Kidishitu bashingwe māni pobakaludika na Kidishitu momwa mūlu. (Luka 22:28-30; Fidipai 3:20, 21; 1 Yoano 3:2) Yehova ukalombola “mubaile bupeta bwa kanye kandi kakatampe” ko badi mu muswelo wa pa bula. Bakekala bu “Yelusalema mupya,” musongwa wa Kidishitu. (Kusokwelwa 3:12; 17:14; 21:2, 9, 10) Bakengilanga pamo na Yesu pa ‘kundapa mizo.’ Bakakwashanga ku mwingilo wa kunyongolola bantu mu lupungu lwa bubi ne lufu kadi ne kwibakwasha bekale babwaninine.​—Tanga Kusokwelwa 22:1, 2, 17.

15, 16. Le Yehova ukalombola namani kanye kandi kakatampe ku “mikōko mikwabo” kumeso’ku?

¹⁵ Efisesa 2:7 unena’mba Leza ukalombola kanye kakatampe mu “ngikadilo ya bintu ikāya’ko.” Mu kine kitatyi’kya, muntu ense pano pa ntanda ukemwena “mubaile bupeta bwa kanye kandi kakatampe.” (Luka 18:29, 30) Muswelo umo mukatampe ukalombola’mo Yehova kanye kandi kakatampe pano pa ntanda i lusangukilo lwa bantu badi mu “bibundu.” (Yoano 5:28, 29) Le i ani le ukasangulwa? I bana-balume ne bana-bakaji ba kikōkeji bāfwile kumeso kwa lufu lwa Kidishitu ne “mikōko mikwabo” ifwa na kikōkeji kudi Yehova mu ano mafuku a mfulo. Bano bantu ba kikōkeji bakajokejibwa ku būmi ke bendelela kwingidila Yehova.

 ¹⁶ Midiyo ya bantu bāfwile pampikwa kuyuka Leza, nabo bakasangulwa. Yoano wāsonekele amba: “Namwene bafwe, bakatampe ne batyetye, bemene kumeso kwa lupona, ebiya mivungo ya mikanda yavungululwa. Ino muvungo mukwabo wavungululwa; i muvungo wa mukanda wa būmi. Penepo bafwe’ba batyibilwa mambo mungya byobya bilembelwe mu mivungo ya mikanda mwendele bilongwa byabo. Ebiya dijiba dyaaluja bafwe badi’mo, ne lufu ne Kibundu byaaluja bafwe badi’mo, penepo kebatyibilwa mambo muntu ne muntu mwendele bilongwa byandi.” (Kusokwelwa 20:12, 13) Boba bakasangulwa bakekala na mukenga wa kwifunda myanda ya Yehova ne kwitabija buludiki bwandi. Bakafunda ne kwingidija misoñanya ya mu Bible ne bulombodi bukwabo bukatanwa mu “mivungo ya mikanda.” Bulombodi bukwabo’bwa i muswelo mukwabo ukalombola’mo Yehova kanye kandi kakatampe.

17. I bika byotufwaninwe kuvuluka potwingila mwingilo wa kupāna bukamoni?

¹⁷ Kusapula myanda miyampe ya Bulopwe kubaikala na mvubu kutabuka pano pafwena mfulo! (Mako 13:10) Tuvulukei amba kitungo kyetu potusapula i kutumbija Yehova. Le tukabwanya’kyo namani? Tufwaninwe kulombola bantu amba madyese onso otukamona mu ntanda impya tukeatambwila enka pa mwanda wa kanye ka Yehova ka kutendelwa.

18, 19. Le tutumbijanga namani Yehova pa mwanda wa kanye kandi kakatampe?

¹⁸ Potusapwila bantu, tubwanya kwibashintulwila amba Bulopwe bwa Kidishitu pobusa kwendeja, bantu basa kutambula byabuyabuya byonso bya kinkūlwa ne kufikila bityebitye pa bubwaninine. Bible unena’mba: “Bipangwa bine nabyo bikakūlwe mu bupika bwa kubola ne kwikala na bwanapabo bwa ntumbo budi na bana ba Leza.” (Loma 8:21) Kino nakyo kikabwanika enka kupityila ku kanye kakatampe ka Yehova.

¹⁹ Tudi na dyese dya kusapwila bantu bonso uno mulao ukunka mutyima udi mu Kusokwelwa 21:4, 5: “[Leza] ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.” Kadi Yehova, mwine ushikete pa lupona wanena’mba “Talai! Nalonga bintu byonso ke bipya.” Wanena kadi monka’mba: “Lemba, mwanda ino myanda’i i ikulupilwa kadi ya bine.” Bine, shi tusapula na bupyasakane ino myanda miyampe ku bantu, tutumbijanga Yehova pa mwanda wa kanye kandi kakatampe!