1, 2. Mu 2018, le i kinkumenkume’ka kisa kwitulungila mu bumo mu muswelo wa pa bula, ne mwanda waka? (Tala kifwatulo ku ngalwilo.)

MU MAFUKU 31 Kweji 3, 2018, bantu midiyo ne midiyo kujokoloka ntanda yonso basa kukatanwa ku kinkumenkume kilongekanga dimo pa mwaka. Pa kupwa kwa kupona kwa dyuba, Batumoni ba Yehova ne bantu bakwabo bavule basa kwibunga mwanda wa kuvuluka kitapwa kyāpēne Yesu pa mwanda wetu. Mwaka ne mwaka, Kivulukilo kya lufu lwa Yesu kilungilanga bantu mu bumo mu muswelo utulumukwa kupita kinkumenkume kyo-kyonso pano pa ntanda.

² Ba Yehova ne Yesu basangalanga bya binebine pa kumona bantu midiyo ne midiyo bakatanwa ku kino kinkumenkume nsá ne nsá pano pa ntanda ponso. Bible wisambila pa “kibumbo kikatampe kya bantu, kekikokejapo kubalwa na muntu nansha umo, batambile mu mizo yonso ne bisaka ne bantu ne ndimi,” banena’nka kunena’mba: “Lupandilo lwetu lutambanga kudi Leza wetu, ushikete pa lupona, ne kudi Kana ka Mukōko.” (Kusokwelwa 7:9, 10) Bine ku Kivulukilo kya mwaka ne mwaka, bantu bavule batendelanga  Yehova ne Yesu pa bintu bikatakata byobalongele!

3. Lelo i bipangujo’ka byotusa kubandaula mu kino kishinte?

³ Mu kino kishinte, tusa kutana’mo malondololo ku bino bipangujo biná: (1) Lelo i muswelo’ka ombwanya kwiteakanya ku Kivulukilo pa kusaka’mba mwene’mo ne pa mfulo? (2) Le Kivulukilo kikwashanga namani bantu ba Leza bekale mu bumo? (3) Le i bika byombwanya kulonga mwanda wa kusonshila ku bumo bwa bantu ba Leza? (4) Lelo kukekala Kivulukilo kya mfulo? Shi i amo, le kikekala’ko kitatyi’ka?

4. Mwanda waka kutanwa ku Kivulukilo i kwa kamweno kotudi?

⁴ Mwanda waka kutanwa ku Kivulukilo i kwa kamweno kotudi? Bubinga bumo bidi botutaninwanga ku kupwila, i mwanda wa kutōta Yehova. Tukulupilei amba ba Yehova ne Yesu bamonanga bukomo bulonga umo ne umo mwanda wa kutanwa ku kuno kupwila kwa mvubu mpata pa mwaka. Tusakanga ba Yehova ne Yesu bamone amba tuloñanga bukomo bwa kukatanwa ku Kivulukilo nansha shi i bikomo namani. Shi tulombola kupityila ku bilongwa byetu amba kupwila kudi na mvubu kotudi, nabya tupanga Yehova bubinga bukatampe bwa kulamina dijina dyetu mu “mukanda wa kivulukilo.” Uno mukanda utelwanga ne bu “mukanda wa būmi.” Mo mudi majina a bantu bonso bakapebwa būmi bwa nyeke na Yehova.​—Malaki 3:16; Kusokwelwa 20:15.

5. Mu mayenga abadikile Kivulukilo, le i muswelo’ka obwanya ‘kwitompa nyeke shi udi mu lwitabijo’?

⁵ Mu mayenga abadikile Kivulukilo, tubwanya kupityija’mo kitatyi kivule na kulombela ne kulangulukila na katentekeji pa mwikadile kipwano kyetu na Yehova. (Tanga 2 Kodinda 13:5.) Mutumibwa Polo wāsapwidile bene Kidishitu amba: “Mwitompei nyeke shi mudi mu lwitabijo.” Le i muswelo’ka otubwanya kwitompa? Tubwanya kwiipangula’mba: ‘Le na bubine nkulupile amba buno bo bulongolodi bumo kete butongelwe na Yehova mwanda wa kulonga kiswa-mutyima kyandi? Lelo noñanga bukomo bwa kusapula ne kufundija myanda miyampe? Le bilongwa byami bilombolanga’mba, nkulupile bya binebine amba tudi mu mafuku a mfulo ne amba mfulo ya buludiki bwa Satana ibafwena pabwipi? Le kikulupiji kyami mudi Yehova ne mudi Yesu kikidi kikomo na mokyadi kikadile ponashilwile kwingidila Yehova?’ (Mateo 24:14; 2 Temote 3:1; Bahebelu 3:14) Kulangulukila pa malondololo a bino bipangujo kusa kwitukwasha ‘tujingulule nyeke’ motwikadile.

6. (a) Lelo i muswelo’ka umo kete otukatambwila’mo būmi bwa nyeke? (b) Le i muswelo’ka witeakanyanga mukulumpe umo ku Kivulukilo mwaka ne mwaka, ne i muswelo’ka obwanya nobe kulonga namino?

⁶ Muswelo umo wa kwiteakanya ku Kivulukilo i kutanga ne kulangulukila pa bishinte bishintulula mvubu ya kino kinkumenkume. (Tanga Yoano 3:16; 17:3.) Kuyuka Yehova ne kwikala na lwitabijo mudi wandi Mwana Yesu, o muswelo umo kete otukatambwila’mo būmi bwa nyeke. Pa kwiteakanya ku Kivulukilo, tubwanya kutandika mpangiko ya kwifunda iketukwasha twibafwene bininge. Bino ye biloñanga tutu umo ke mwingile bu mukulumpe mu bula bwa kitatyi kilampe. Mu bula bwa myaka mivule, ukongakanyanga bishinte bya mu Kiteba kya Mulami bisambila pa Kivulukilo ne pa buswe bwālombwele ba Yehova ne Yesu kotudi. Mu mayenga abadikile Kivulukilo utangululanga bino bishinte ne kulangulukila na katentekeji pa mvubu ya kino kinkumenkume. Kyaba kimo ubwejanga’ko kishinte kimo nansha bibidi. Kadi utañanga ne kulangulukila na mushike pa butangi bwa Bible bwa Kivulukilo. Uno mukulumpe unena’mba wifundanga bintu bipya mwaka ne mwaka kupityila ku  kulonga bino bintu. Kya mvubu mpata, kwifunda uno muswelo i kumulengeje asanswe ba Yehova ne Yesu bininge. Nobe shi wifunda uno muswelo, nabya ukasanswa bininge ba Yehova ne Yesu. Kadi ukatamija mutyima obe wa kufwija’ko pa byobakulongele, ne kumwena mu Kivulukilo ne pa mfulo.

7. (a) Lelo Yesu wālombēle pangala pa bika mu bufuku bubajinji bwa Bidibwa bya Kyolwa bya Mfumwetu? (b) I bika bilombola’mba Yehova i mulondolole milombelo ya Yesu?

⁷ Mu bufuku bubajinji bwa Bidibwa bya Kyolwa bya Mfumwetu, Yesu wālombele’mo milombelo ya pa bula. Wālombele pangala pa bumo bwa kutendelwa bobadi’mo aye na Shandi. Kadi Yesu wālombele amba bandi bana ba bwanga bonso badi ba kwikala mu bumo uno muswelo. (Tanga Yoano 17:20, 21.) Yehova i mulondolole ino milombelo ya wandi Mwana muswedibwe. Kutabuka kupwila ko-konso, Kivulukilo kilombolanga patōka’mba Batumoni ba Yehova badi mu bumo. Mu dino difuku, bantu midiyo ne midiyo ba mu matanda palapala ne ba nkoba mishileshile bebuñanga pamo kujokoloka ntanda yonso ne kulombola’mba bakulupile amba Yehova wātumine wandi Mwana. Mu bifuko bimo, bantu ba nkoba mishileshile kebapwidilangapo pamo, kadi nansha shi abapwidila pamo, bantu bakwabo bebimonanga’mba ke byendele’mopo. Inoko ba Yehova ne Yesu kebebimonengapo uno muswelo. Kobadi, bumo bwetu bwa pa Kivulukilo budi na mvubu mpata.

8. Lelo Yehova wāpele Ezekyele musapu’ka?

⁸ Byotudi bantu ba Yehova, o mwanda ke kya kutulumukapo shi tudi mu bumo uno muswelo. Yehova wālaile buno bumo mu musapu waāpele Ezekyele. Wāsapwidile Ezekyele ayate mityi ibidi, mutyi umo “wa Yuda” ne mukwabo nao “wa Yosefa,” ne kwiibambakanya pamo ke mutyi umo. (Tanga Ezekyele 37:15-17.) “Bipangujo bya Batangi” bya mu Kiteba kya Mulami kya Kweji 7, 2016, mu Falanse kyashintulwile amba: “Yehova wālaile kupityila kudi mupolofeto Ezekyele amba bantu bandi bakajokela mu Ntanda ya Mulao ne amba bakekala monka mu bumo bu muzo umo. Kadi buno bupolofeto bwālaile amba boba bakatōta Leza mu mafuku a mfulo, nabo bakekalanga mu bumo.”

9. Mwaka ne mwaka ku Kivulukilo, le i muswelo’ka otwimwenanga bumo bwālailwe mu bupolofeto bwa Ezekyele?

⁹ Tamba mu mwaka wa 1919, Yehova washilwile bityebitye kuteakanya monka bashingwe māni ne kwibabungakanya pamo. Badi pamo bwa mutyi “wa Yuda.” Kupwa, bantu bavule badi na lukulupilo lwa kwikala nyeke pano pa ntanda bashilula kwilunga pamo na bashingwe māni. Bano bantu badi na lukulupilo lwa kwikala pano pa ntanda badi pamo bwa mutyi “wa Yosefa.” Yehova wālaile kubambakanya ino mityi ibidi pamo ne “kwiilonga ke mutyi umo” mu dikasa dyandi. (Ezekyele 37:19) I mulunge bashingwe māni ne “mikōko mikwabo” ke “luombe lumo.” (Yoano 10:16; Zekadia 8:23) Dyalelo, bino bisumpi byonso bibidi bingidilanga Yehova mu bumo. Kadi baludikwanga na Mulopwe umo, Yesu Kidishitu, mwine utelelwe mu bupolofeto bwa Ezekyele bu “Davida,” mwingidi wa Leza. (Ezekyele 37:24, 25) Mwaka ne mwaka potwibuñanga ku Kivulukilo mwanda wa kuvuluka lufu lwa Yesu, twimwenanga bumo bwa bino bisumpi bibidi enka na mokyālailwe kupityila kudi Ezekyele. Ino le i bika bibwanya kulonga umo ne umo motudi mwanda wa kulama ne kusonshila ku bumo bwa bantu ba Leza?

10. Lelo i muswelo’ka otubwanya kusonshila ku bumo bwa bantu ba Leza?

¹⁰ Le i muswelo’ka mubajinji wa kusonshila ku bumo bwa bantu ba Leza? I na kulonga bukomo bwa kwityepeja. Yesu paādi  pano pa ntanda, wāsapwidile bandi bana ba bwanga’mba bafwaninwe kwikala betyepeje. (Mateo 23:12) Divule bantu ba mu ino ntanda bemonanga’mba badi na mvubu mpata kupita bakwabo. Ino shi twi betyepeje, nabya tukalēmeka batutu betutangidile kumeso mu kipwilo, kadi tukakōkela bwendeji bwabo. Mu uno muswelo, kipwilo kikekala mu bumo. Kadi kya mvubu mpata, shi twi betyepeje, tukasangaja Yehova, mwanda aye “ulwanga na boba bezunzula, ino upānanga kanye kakatampe ku boba betyepeje.”​—1 Petelo 5:5.

11. Lelo kulangulukila pa mukate ne vinyu bingidijibwanga pa Kivulukilo kwitukwashanga namani tusonshile ku bumo bwetu?

¹¹ Le i muswelo’ka wa bubidi wa kusonshila ku bumo? I na kulangulukila na mushike pa nshintulwilo ya mukate ne vinyu. Tufwaninwe kulonga uno muswelo kumeso kwa Kivulukilo ne nakampata mu kine kyolwa’kya. (1 Kodinda 11:23-25) Mukate wampikwa kiyujo welekeja umbidi mubwaninine wa Yesu waāpēne bu kitapwa. Vinyu ityila yelekeja mashi andi. Inoko bitulomba kulonga bintu bivule pa kyaba’tu kya kwimanina’nka pa ino nshintulwilo kete. Tufwaninwe kuvuluka’mba mu kitapwa kya kinkūlwa kya Yesu mubadilwa bilongwa bibidi bikatampe bya buswe. Yehova wētupele wandi Mwana, Yesu nandi wāitabija na mutyima tō kupāna būmi bwandi pa mwanda wetu. Shi tulangulukila pa buswe bobetuswele, nabya kino kiketutonona netu twibasanswe. Kadi buswe botuswele Yehova bukaningija bumo bwetu.

12. Mu mānga ya mulopwe umo ne bapika bandi, lelo Yesu wālombwele namani patōkelela’mba Yehova witusakilanga tulekele bakwetu?

¹² Le i muswelo’ka wa busatu wa kusonshila ku bumo? I na kulekela bakwetu. Shi tulonga uno muswelo, nabya tulombolanga’mba tufwijanga’ko Yehova mwanda witulekelanga bubi bwetu kupityila ku kitapwa kya Yesu. Pa kulombola mvubu ya lulekelo, Yesu wāsekunwine mānga ya mulopwe umo ne bapika bandi. Bine tanga’po bidi Mateo 18:23-34 ne kwiipangula’mba: ‘Lelo ngidi na mutyima wa kwingidija bufundiji bwa Yesu? Lelo ngivwananga ne kutūkijija batutu ne bakaka mutyima? Lelo ngidi na mutyima wa lubilo wa kulekela boba bandubila?’ Na bubine bubi bumo bwikalanga bukatampe kupita bukwabo. Kadi batwe bantu bampikwa kubwaninina tubwanya kumona bubi bumo bu bukomo  kulekelañana. Inoko mānga ya Yesu itufundija byobya bitusakila Yehova kulonga. (Tanga Mateo 18:35.) Yesu wālombwele patōkelela’mba Yehova kaketulekelapo shi netu ketulekelapo bakwetu shi abesāsa bya binebine. Na bubine kino i kintu kyotufwaninwe kulangulukila’po bininge. Pa kulama bumo bwetu, tufwaninwe kulekela bakwetu enka na mwāfundijije’kyo Yesu.

13. Le i muswelo’ka otubwanya kusonshila ku bumo shi tulama ndoe na bakwetu?

¹³ Shi tulekela bakwetu, nabya tukalama ndoe na batutu ne bakaka. Mutumibwa Polo wānenene amba tufwaninwe kulonga bukomo pa kusaka’mba twikale mu bumo ne mu ndoe batwe bene na bene. (Efisesa 4:3) O mwanda mu kitatyi kya Kivulukilo, nakampata mu kine kyolwa’kya, langulukila na mushike pa muswelo omona bantu bakwabo. Wiipangule amba: ‘Lelo bantu bandyukile amba nkikalelangapo bantu bandubila? Lelo bantu bamonanga’mba noñanga bukomo bwa kulonga ndoe ne kusonshila ku bumo?’ Bino i bipangujo bya mvubu byotufwaninwe kulangulukila’po.

14. Le tukalombola namani amba ‘twitūkijijanga mutyima na buswe batwe bene na bene’?

¹⁴ Le i muswelo’ka wa buná wa kusonshila ku bumo? I na kwiula buswe bwa Yehova. (1 Yoano 4:8) Ketufwaninwepo kunena nansha dimo amba, “Mbwanya kusanswa banabetu, inoko kwibasangela mpika.” Shi tulange uno muswelo, nabya tukatunya kulonda madingi a Polo a ‘kwitūkijija mutyima na buswe batwe bene na bene.’ (Efisesa 4:2) Polo kānenenepo’tu amba tufwaninwe ‘kwitūkijija mutyima batwe bene na bene’ ino wānenene amba tufwaninwe kulonga namino na “buswe.” Padi kwishila. Mu kipwilo mudi bantu ba miswelo palapala kadi Yehova i mwibakokele kwadi. (Yoano 6:44) Nanshi Yehova udi na bubinga bwendele’mo bwa kwibasanshilwa. Shi Leza usenswe batutu ne bakaka, penepa le tubwanya’tu namani kunena’mba ketufwaninwepo kwibasanswa? Tufwaninwe kwibasanswa’nka na musakila Yehova.​—1 Yoano 4:20, 21.

15. Le tubayuka namani amba kudi difuku dyotukalonga Kivulukilo kya mfulo?

¹⁵ Difuku dimo, tukatanwanga ku Kivulukilo kya mfulo. Le tubekiyuka namani? Polo wāsapwidile bene Kidishitu bashingwe amba pobavulukanga lufu lwa Yesu mwaka ne mwaka, basapulanga “nyeke lufu lwa Mfumwetu, enka ne byaiya.” (1 Kodinda 11:26) Yesu nandi wēsambile pa ‘kwiya kwandi’ mu bupolofeto bwandi butala kitatyi kya mfulo. Kadi Yesu pa kwisambila pa kyamalwa kikatampe kisa kufika panopano ponka wānenene amba: “Kiyukeno kya Mwanā muntu kikamweka mūlu, ponkapo bisaka bya pano panshi bikeyaya ne mutyima kupepa kadi bikamona Mwanā muntu wiya pa makumbi a mūlu na bukomo ne ntumbo mikatampe. Nandi ukatuma bamwikeulu bandi na diwi dya kimpungidi dikatampe, nabo bakabungakanya batongwe bandi kutamba ku mvula iná, tamba ku mfulo imo ya madiulu kutūla ku mfulo mikwabo.” (Mateo 24:29-31) Yesu ukabungakanya “batongwe bandi” kitatyi kyakaselela mūlu bene Kidishitu bonso bashingwe māni bashele’ko pano pa ntanda. Kino kikalongeka pa kupwa kwa kyamalwa kikatampe kushilula, inoko kumeso kwa divita dya Amakedona. Mu dino divita, Yesu ne ba 144 000, bakalwa balopwe ba pano pa ntanda ne kwibanekenya. (Kusokwelwa 17:12-14) Kivulukilo kyotukalonga kumeso’tu kwa Yesu ‘kwiya’ kubungakanya bashingwe māni, kyo kya mfulo.

16. Mwanda waka wi musumininwe kukatanwa ku Kivulukilo kya uno mwaka?

¹⁶ Sumininwa kukatanwa ku Kivulukilo kisa kulongwa mu mafuku 31 Kweji 3, 2018. Kadi lomba Yehova akukwashe usonshile ku bumo bwa bantu bandi. (Tanga Ñimbo ya Mitōto 133:1.) Dyakadilwe kantu, tukatanwanga ku Kivulukilo kya mfulo. Kufika’nka ne mu dino difuku, tulombolei amba bumo bwetu bwa kutendelwa botwimwenanga mwaka ne mwaka ku Kivulukilo i bwa mvubu mpata kotudi.