1-2. Mwanda waka tutanwanga ku Kivulukilo mwaka ne mwaka?

 YESU wāpēne būmi bwandi pano kepadi kintu kya myaka 2000, wētushitwila kibelo kya kukamona būmi bwa nyeke. Bufuku bukya Yesu kafu, wāsoñenye balondi badi kuvuluka kilongwa kyandi kya buswe mu muswelo’tu upēla, na mukate ne vinyu.—1 Ko. 11:23-26.

² Tukōkelanga musoñanya wa Yesu mwanda tumusenswe bininge. (Yoa. 14:15) Mwaka ne mwaka mu kitatyi kya Kivulukilo, tulombolanga kufwija’ko kwetu pa byobya byētulongēle Yesu na kwitūdila’ko kitatyi kya kulangulukila pa bulēme bwa lufu lwadi ne milombelo ponka. Kadi tusapulanga bininge na nsangaji, twita bantu bavule bāye batanwe ku kino kinkumenkume kya pa bula. Ne kadi tusumininwanga amba kintu nansha kimo kekyaketulengeja tutunye kutanwa ku Kivulukilo.

3. Le i bika byotusa kwisambila’po mu kino kishinte?

³ Mu kino kishinte, tusa kwisambīla’mo pa miswelo isatu iloñanga’mo bantu ba Yehova bukomo bwa kuvuluka lufu lwa Yesu: (1) na kulonga Kivulukilo mu muswelo wāsoñenye’byo Yesu balondi bandi, (2) na kwita bantu bakwabo batanwe ku Kivulukilo, ne (3) na kuvuluka lufu lwandi nansha ke pobadi mu ngikadilo mikomo.

4. Le i bubine’ka botwifundanga mwaka ne mwaka ku Kivulukilo, ne mwanda waka tufwaninwe kukwata buno bubine na bulēme bukatampe? (Luka 22:19, 20)

⁴ Mwaka ne mwaka ku Kivulukilo, tutejanga’ko mwisambo wimanine pa Bible mwine mobetupanga malondololo a patōka  ku bipangujo bivule. Twifundanga’ko mwanda waka bantu basakilwa kinkūlwa ne muswelo ubwanya lufu lwa muntu umo kupūta bubi bwa bavule. Betuvulujanga’ko mukate ne vinyu byelekeja bika, ne i bāni bafwaninwe kudya ku mukate ne kutoma ku vinyu. (Tanga Luka 22:19, 20.) Kadi tulangulukilanga pa madyese abīkīlwe boba badi na lukulupilo lwa kukekala pano pa ntanda. (Isa. 35:5, 6; 65:17, 21-23) Tufwaninwe kukwata buno bubine na bulēme bukatampe. Bantu midiyo ne midiyo kebayukilepo bino bintu, kadi kebevwanijepo bulēme budi na kitapwa kya Yesu. Ne kadi kebavulukangapo lufu lwa Yesu kukwatañana na mwaāsoñaninye’byo balondi bandi. Mwanda waka?

5. Le bantu bāshilwile kuvuluka lufu lwa Yesu namani kinondanonda na pāfwile kisengele batumibwa bonso?

⁵ Kinondanonda na pāfwile kisengele batumibwa bonso ba Yesu, bene Kidishitu ba bubela bātwelele mu kipwilo. (Mat. 13:24-27, 37-39) Bādi besamba “bintu binyengakane bya kukokela bana ba bwanga kobadi amba bebalonde.” (Bil. 20:29, 30) Kintu kimo bidi ‘kinyengakane’ kyāshilwile kufundija bene Kidishitu ba bubela i kya amba, Yesu kālambwilepo umbidi wandi “dimo kupwididile mwanda wa kusela bubi bwa bavule” na munenena Bible, ino abo amba kitapwa kyandi kyāpēnwe misunsa mivule. (Bah. 9:27, 28) Dyalelo bantu bavule ba mityima miyampe bakulupile buno bufundiji bwa bubela. Bebungilanga pamo mu bipwilo kitatyi kyonso—kyaba kimo difuku ne difuku—mwanda wa kuvuluka byobeta bu “Kitapwa kya Misa.” b Bipwilo bikwabo kebivulukangapo kyaba kyonso lufu lwa Yesu, nansha nankyo bantu bavule ba mu bino bipwilo kebayukilepo senene bulēme bwa kitapwa kya Yesu. Bamo babwanya kwiipangula’mba, ‘Le bine lufu lwa Yesu lubwanya kulengeja ndekelwe bubi bwami?’ Mwanda waka beipangulanga namino? I mwanda bamo i bongolwe na boba batatana’mba kitapwa kya Yesu kekibwanyapo kupūta bubi bwa bantu. Le balondi ba bine ba Yesu bakwashanga namani bantu bevwanije bulēme bwa kitapwa kyandi, ne muswelo muyampe wa kuvuluka lufu lwandi?

6. Le befundi ba Bible bāfudile ku mulangwe’ka dya mu 1872?

⁶ Mu 1870, kisumpi kya befundi ba Bible kyadi kimaninwe na Charles Taze Russell kyāshilwile kwifunda Bisonekwa na mushike. Bāsakile kuyuka bubine butala pa bulēme bwa kitapwa kya Yesu ne muswelo ufwaninwe kuvulukwa lufu lwandi. Dya mu 1872, bāfudile ku mulangwe wimanine pa Bisonekwa wa amba Yesu wāpēne kinkūlwa pa mwanda wa bantu bonso. Kebālaminepo buno bubine abo bene. Ino bāsapwidile’bo bantu bakwabo kupityila ku mabuku, majulunale, ne mapepala. Kadi kitatyi kityetye pa kupita’po, bāshilwile kwibunga musunsa umo ku mwaka mwanda wa kulonga Kivulukilo, na mwādi mulongela bene Kidishitu ba mu myaka katwa kabajinji.

7. Le tumwenanga namani mu bukimbi bwālongele bano befundi babajinji ba Bible?

⁷ Ne dyalelo tumwenanga mu bukimbi bwālongele bano bana-balume bene Kidishitu ba kukanina kuyampe pano kepadi myaka mivule. Muswelo’ka? Na bukwashi bwa Yehova, twivwanije biyampe bubine butala pa kitapwa kya Yesu ne bulēme bwakyo. (1 Yo. 2:1, 2) Kadi twi befunde amba Bible wisambilanga pa nkulupilo ibidi ya bantu basangaja Leza—ku bamo būmi bwampikwa kufwa momwa mūlu ne ku bakwabo midiyo ne midiyo  būmi bwa nyeke pano pa ntanda. Tufwenanga Yehova kitatyi kyotulangulukila pa muswelo waetusenswe bininge ne muswelo umwena umo ne umo mu kitapwa kya Yesu. (1 Pe. 3:18; 1 Yo. 4:9) Pamo bwa banabetu ba kikōkeji ba pa kala, twitanga bantu bakwabo bāye tuvuluke nabo lufu lwa Yesu kukwatañana na mwaāsoñaninye’byo balondi bandi.

8. Le i bika bilongele bantu ba Yehova mwanda wa kwita bantu bakwabo ku Kivulukilo? (Tala kifwatulo.)

⁸ Pano kepadi myaka mivule, bantu ba Yehova betanga bantu bakwabo batanwe ku Kivulukilo. Ku ngalwilo kwa mwaka wa 1881, batutu ne bakaka ba mu États-Unis bānenenwe kwibungila mu njibo ya tutu umo mu Allegheny, mu Pennsylvania, mwanda wa kulonga kino kinkumenkume kya pa bula. Mwenda mafuku, kipwilo ne kipwilo kyālongele akyo kine Kivulukilo. Mu Kweji 3, 1940, basapwidile basapudi bete bantu bonso ba mu wabo mwaba balombola kusangela. Mu 1960, Betele yatumīne bipwilo musunsa mubajinji tukanda twa lwito tutampe. Tamba pene’pa, twabanyanga tukanda twa lwito lwa ku Kivulukilo midiyala ne midiyala. Mwanda waka tuloñanga buno bukomo bonso mwanda wa kwita bantu bakwabo?

9-10. Le i bāni bamwenanga mu bukomo botulonga bwa kwita bantu batanwe ku Kivulukilo? (Yoano 3:16)

⁹ Bubinga bumo bidi botwityilanga bantu bakwabo batanwe netu ku Kivulukilo, i mwanda tusakanga boba batanwa’ko musunsa mubajinji befunde bubine bwa byobya bitulongēle ba Yehova ne Yesu. (Tanga Yoano 3:16.) Tukulupilanga’mba byobya byobamona ne byobevwana ku Kivulukilo bikebalengeja basake kwifundila’ko bivule ne kwikala bengidi  ba Yehova. Ino kudi ne bantu bakwabo bamwenanga’mo.

¹⁰ Twitanga’ko ne boba kebakingidilangapo Yehova. Tuloñanga namino mwanda wa kwibavuluja’mba Leza ukibasenswe. Bavule betabijanga lwito lwetu, kadi tusangalanga potwibamona batanwa’ko. Kutanwa’ko kwibavulujanga nsangaji yobadi nayo pobadi bengidila Yehova mafuku kunyuma. Twisambilei’ko pa kimfwa kya Monica. c Washilwile kwingila monka bu musapudi mu kitatyi kya kipupo kya Corona. Pa kupwa kutanwa ku Kivulukilo kya mu 2021, wanenene amba: “Kino Kivulukilo kyaikele kya pa bula kondi. Uno o musunsa wami mubajinji kusapwila bantu ne kwibeta batanwe ku Kivulukilo pano kepadi myaka 20. Nasapwile na mutyima wami onso mwanda mfwijanga’ko ba Yehova ne Yesu pa byobanongēle.” (Ñim. 103:1-4) Bantu bapele nansha betabije lwito lwetu, batwe tuloñanga bukomo bwa kwibeta batanwe ku Kivulukilo, na kuyuka’mba Yehova usangelanga bukomo botulonga.

11. Le Yehova i mwitwesele namani pa bukomo botulonga bwa kwita bantu batanwe ku Kivulukilo? (Hakai 2:7)

¹¹ Yehova i mwitesele bininge pa bukomo botulonga bwa kwita bantu batanwe ku Kivulukilo. Nansha byokwadi bijika pa mwanda wa kipupo kya Corona mu 2021, ku Kivulukilo kwatenwe bantu 21367603. Kino kibalwa i kitabuke misunsa ibidi ne kipindi buvule bwa Batumoni ba Yehova ntanda yonso! Shako, Yehova katengapo mutyima enka pa buvule bwa bantu. Inoko utanga ne mutyima muntu ne muntu utanwa’ko. (Luka 15:7; 1 Tm. 2:3, 4) Tukulupile amba Yehova wingidijanga mwingilo wetu wa kwita bantu, mwanda wa kwitukwasha tusokole boba ba mityima miyampe.—Tanga Hakai 2:7.

12. Le i bika bibwanya kulengeja bikale bikomo kulonga Kivulukilo? (Tala kifwatulo.)

¹² Yesu wālaile amba mu mafuku a mfulo, tukatanwa na makambakano a miswelo yonso—kimfwa kulwibwa na ba mu kisaka, kupangwapangwa, mavita, bipupo bya misongo ne bikwabokwabo. (Mat. 10:36; Mako 13:9; Luka 21:10, 11) Kyaba kimo, ano makambakano alengejanga bikale bikomo kuvuluka lufu lwa Yesu. Le batutu ne bakaka i banekenye namani ano makambakano, ne Yehova i mwibakwashe namani?

13. Le Yehova waesele namani tutu Artem pa bukankamane ne kusumininwa kwandi kwa kulonga Kivulukilo paadi mu kifungo?

¹³ Kukutwa. Banabetu bakutyilwe mu buloko pa mwanda wa lwitabijo lwabo, baloñanga byonso byobabwanya mwanda wa kuvuluka lufu lwa Yesu. Twisambilei’ko pa kimfwa kya tutu Artem. Mu kitatyi kya Kivulukilo mu 2020, wadi mukutwe mu kaso ka mametele 17 mu mitamba yonso iná, mwine mobadi butano na bakutwa bakwabo. Nansha byaadi mu buloko, wabwenye kukongakanya bintu kampanda bya kwingidija bu byelekejo bya Kivulukilo, ne kuteakanya’ko aye mwine mwisambo wa Kivulukilo. Ino bana-balume baadi nabo mu kifungo badi batoma mfwanka kadi ba muneneno wa kiboja. Le walongele’po namani? Webalombele shi babwanya kuleka muneneno wabo wa kiboja ne kutoma mfwanka mu nsá’tu umo. Tutu Artem watulumukile pa kumona bano bakutwa baleka kutoma mfwanka ne kwisamba binenwa bya kiboja kitatyi kya Kivulukilo. Tutu Artem unena’mba, “Nebasapwidile amba nsa kwibalombola myanda itala Kivulukilo.” Nansha byobanenene  amba kebasakilepo kwivwana myanda ya kino kinkumenkume, pa kupwa kumona ne kuteja tutu Artem paadi ulonga Kivulukilo, bamwipangwile ebalombole myanda ya kino kinkumenkume.

14. Lelo i bukomo’ka bwalongelwe mwanda wa kulonga Kivulukilo nansha byokwadi kipupo kya Corona?

¹⁴ Kipupo kya Corona. Bantu ba Yehova kebadipo babwanya kutanwa ku Kivulukilo mpala na mpala paponene kino kipupo. Inoko kino kekyebalengejepo batunye kulonga Kivulukilo. d Bipwilo bidi na muswelo wa kwilunga ku Entelenete byalongēle Kivulukilo kupityila ku bingidilwa bya busendwe. Ino le byaikele namani na bantu midiyo ne midiyo kebadipo na muswelo wa kwilunga ku Entelenete? Mu matanda amo, kwakwetwe mpangiko amba mwisambo ulondwe ku televijo nansha ku ladiyo. Kadi misambo yakwete’ko mīsambo mu ndimi 500 ne musubu mwanda wa amba ne boba badi ku bifuko bya kulampe balonge Kivulukilo. Ne kadi batutu bakwete’ko mpangiko ya kukatūla ano mawi makwate ku banabetu badi basakilwa’o.

15. Lelo i ñeni’ka yowaboila ku kimfwa kya muntu ukīfunda Bible witwa bu Sue?

¹⁵ Kulwibwa na ba mu kisaka. Ku bamo, kikoleja kikatampe pa kulonga Kivulukilo i kulwibwa  na ba mu kisaka. Twisambilei’ko pa kimfwa kimo kya muntu ukīfunda Bible witwa bu Sue. Mu difuku dibadikila Kivulukilo mu 2021, Sue wasapwidile kaka wadi umufundija Bible amba, pa mwanda wa kulwibwa ku njibo kasapo kubwanya kutanwa ku Kivulukilo. Kaka wadi umufundija Bible wamutangila Luka 22:44. Kupwa wamushintulwila’mba kitatyi kyotutanwa na makambakano, tufwaninwe kwiula kimfwa kya Yesu na kulomba bukwashi kudi Yehova mu milombole ne na kutūla kikulupiji kyetu kyonso mwadi. Pobwakile dya Kivulukilo, Sue wateakanya mukate ne vinyu, walonda ne mpangiko ya pa bula ya Butōtyi bwa Lubanga pa jw.org. Ku kyolwa, waenda mu kyumba mwa bunka, kalonda mpangiko ya Kivulukilo na kwikwika’ko kupityila ku telefone. Pa kupwa kulonda’yo, Sue walembela kaka wadi umufundija Bible amba: “Kesha waunkankamikile bininge. Naloñanga byonso byonandi mbwanya kulonga mwanda wa kutanwa ku Kivulukilo, Yehova nandi wankwasha. Bine, natunya’nka ne bya kunena pa kukulombola muswelo onsangele ne onkufwija’ko!” Lelo nobe ulanga’mba Yehova ubwanya kukukwasha shi wikondanga na makambakano a uno muswelo?

16. Mwanda waka tukulupile amba Yehova uketwesela pa bukomo botulonga bwa kutanwa ku Kivulukilo? (Bene Loma 8:31,32)

¹⁶ Yehova uteñwanga bininge paetumona tulonga bukomo bwa kuvuluka lufu lwa Yesu. Tubwanya kukulupila’mba uketwesela shi tulombola kufwija’ko pa byobya byaetulongēle. (Tanga Bene Loma 8:31, 32.) Nanshi, tusumininwei kutanwa ku Kivulukilo kya uno mwaka, ne kulonga byonso byotubwanya mwanda wa kulonga bivule mu mingilo ya ku mushipiditu mu kitatyi kya Kivulukilo.