1. Mwanda waka difuku dya Kivulukilo i dya mvubu mpata mu mwaka? (Luka 22:19, 20)

 KU BANTU ba Yehova, Kivulukilo kya lufu lwa Kidishitu i difuku dya mvubu mpata mu mwaka. Kyo kinkumenkume kimo kete kyāsoñenye Yesu balondi bandi kuvuluka. (Tanga Luka 22:19, 20.) Tutengelanga kulonga Kivulukilo pa mwanda wa bubinga buvule. Tubandaulei’ko bubinga bumo.

2. Le i bubinga’ka bumo botutengelanga kulonga Kivulukilo?

² Kivulukilo kitukwashanga tulangulukile pa mvubu ya kinkūlwa. Kitupanga mikenga ya kulombola kufwija’ko pa kitapwa kya Yesu. (2 Ko. 5:14, 15) Kadi kitupanga ne mukenga wa ‘kwikankamika’ na batutu ne bakaka. (Loma 1:12) Mwaka ne mwaka, batutu ne bakaka bavule kebakingilangapo batanwanga’ko. Bamo i bakwate’nka ne butyibi bwa kujokela kudi Yehova pa mwanda wa kutundailwa kobatundailwe na nsangaji. Kadi bantu bavule ba mityima miyampe bashilwile kwifunda Bible mwanda wa bintu byobamwene ne byobaivwene’ko. Ino myanda yonso yo ilengejanga Kivulukilo kikale kya pa bula kotudi!

3. Le Kivulukilo kitulungilanga namani mu bumo na banabetu ntanda yonso? (Tala ne kifwatulo.)

³ Langulukila ne pa muswelo witulungilanga Kivulukilo mu bumo na banabetu ntanda yonso. Kujokoloka ntanda yonso Batumoni ba Yehova bebungilanga pamo kitatyi kyenda kipona dyuba bityebitye. Tutejanga’ko mwisambo mwine ulombolanga mvubu ya kinkūlwa. Twimbanga ñimbo ibidi ya mitendelo, tupityijanga mukate ne vinyu, kadi batwe bonso tunenanga na mutyima umo ku milombelo iná amba “amena.” Mu kintu’tu kya mansá 24, bipwilo byonso bikalonga  enka namino. Fwatakanya’po musangelanga ba Yehova ne Yesu pobetumona twibungile pamo mwanda wa kwibatendela uno muswelo.

4. Le i bika byotusa kwisambila’po mu kino kishinte?

⁴ Mu kino kishinte tusa kwisambila’mo pa bino bipangujo: Le i muswelo’ka otubwanya kuteakanya mutyima wetu ku Kivulukilo? Le i muswelo’ka otubwanya kukwasha bantu bakwabo bamwene’mo? Ne i muswelo’ka otubwanya kukwasha boba kebakingilangapo? Malondololo a bino bipangujo asa kwitukwasha twiteakanye ku dino difuku dya mvubu mpata.

LE I MUSWELO’KA OTUBWANYA KUTEAKANYA MUTYIMA WETU KU KIVULUKILO?

5. (a) Mwanda waka tunenwe kulangulukila pa mvubu ya kinkūlwa? (Ñimbo ya Mitōto 49:7, 8) (b) Le i bika byotwifunda mu video inena’mba, Mwanda waka Yesu Wāfwile?

⁵ Muswelo umo mu miswelo ya mvubu mpata ibwanya kwitukwasha tuteakanye mutyima wetu ku Kivulukilo, i kulangulukila pa bulēme bwa kitapwa kya kinkūlwa kya Yesu Kidishitu. Ketubwanyapo kwikūla batwe bene ku bubi ne ku lufu. (Tanga Ñimbo ya Mitōto 49:7, 8; tala ne video Mwanda Waka Yesu Wāfwile?) a O mwanda, Yehova wātūdile’ko mpangiko ya amba Yesu apāne būmi bwandi mwanda wa kwitukūla. Mu uno muswelo, ba Yehova ne Yesu i balonge bukomo bukatampe. (Loma 6:23) Potulangulukila pa bitulongēle ba Yehova ne Yesu, po pene tufwijanga’ko pa kinkūlwa. Tusa kubandaula’ko’tu bintu bityetye byālombele kinkūlwa kudi Yehova ne Yesu. Le kinkūlwa kyālombele bika ne bika?

6. Le kinkūlwa kyālombele bika ne bika?

⁶ Kinkūlwa i mfutwa ifutwanga mwanda wa kwaluja kintu kampanda. Kitatyi kyāpangilwe Adama muntu mubajinji, wādi mubwaninine. Ino paālongele bubi, wājimije dyese dyandi dya kwikala na būmi bwa nyeke ne dya bandi bana bonso. Pa kwaluja dyese dyājimije Adama, Yesu wāpene būmi bwandi bubwaninine bu kitapwa. Mu būmi bwandi bonso pano pa ntanda, Yesu “kalongelepo bubi, nansha bongojani kutanwa mu kyakanwa kyandi mpika.” (1 Pe. 2:22) Kitatyi kyāfwile Yesu, būmi bwandi bubwaninine bwādi bwenzankane na būmi bwājimije Adama.—1 Ko. 15:45; 1 Tm. 2:6.

7. Le i matompo’ka amo ēkondele na Yesu paādi pano pa ntanda?

⁷ Yesu wākōkele nyeke Shandi wa mūlu enka ne paātenwe na matompo mavule pano pa ntanda. Paādi ukidi mwana mutyetye, wādi unenwe kukōkela bwendeji bwa bambutwile bandi bampikwa kubwaninina, nansha byaābutwilwe mubwaninine. (Luka 2:51) Paādi ke nkasampe, wādi unenwe kukomena kuningilwa ko-konso kwaādi ubwanya kutanwa nako, kwine kwādi kubwanya kumulengeja abulwe kikōkeji ku bambutwile bandi nansha kudi Yehova. Kadi paādi ke mutame, Yesu wādi unenwe kukomena matompo a Satana Dyabola, mwine mubadilwa kutambwa bulwi kwa patōkelela pa mwanda wa kikōkeji kyandi kudi Leza. (Mat. 4:1-11) Satana wādi musumininwe kulengeja Yesu alonge bubi mwanda wa akomenwe kufuta kinkūlwa.

8. Le i matompo’ka makwabo āuminine Yesu?

⁸ Mu mwingilo wandi pano pa ntanda, Yesu wāuminine matompo makwabo. Balwana bāmupangilepangile ne kukimba kumwipaya. (Luka 4:28, 29; 13:31) Kadi wādi unenwe kūminina kubulwa kubwaninina kwa balondi bandi. (Mako 9:33, 34) Ku mfulo kwa būmi bwandi wāmweshibwe malwa ne kufutululwa. Kupwa wāfwa lufu lusansa kadi mu muswelo  wa kafutululo. (Bah. 12:1-3) Wādi unenwe kūminina dino ditompo pampikwa kukingwa na Yehova. b—Mat. 27:46.

9. Le tubeivwana namani pa kitapwa kya Yesu? (1 Petelo 1:8)

⁹ Bine, Yesu wāsusukile bininge pa kwitukūla. Kulangulukila pa muswelo wēpene Yesu pa mwanda wetu kwitulengejanga tumusanshilwe’ko bininge.—Tanga 1 Petelo 1:8.

10. Le kinkūlwa kyālombele Yehova bika?

¹⁰ Le tunene namani padi Yehova? Le Yehova wālongele bika pa kusaka’mba Yesu afute kinkūlwa? Ba Yehova ne Yesu badi mu kipwano kikomo kibwanya kwikala pa bukata bwa tata na wandi mwana. (Nki. 8:30) Nanshi, tompa kufwatakanya mobyātengēle Yehova pa kumona Yesu ūminina matompo mavule paādi pano pa ntanda. Na bubine, byāsense bininge Yehova pa kumona wāndi Mwana ususulwa, ufutululwa, ne kutompibwa.

11. Leta kimfwa kilombola muswelo wēivwene Yehova pāipailwe Yesu.

¹¹ Mbutwile yense ke mufwilwe mwana uyukile biyampe mobisanshilanga. Tudi na lwitabijo lukomo mu lusangukilo, inoko kino kekilengejangapo tuleke kwivwana misanshi kitatyi kifwa muswe wetu. Kino kimfwa kitukwasha twivwanije muswelo wēivwene Yehova paāmwene wandi Mwana muswedibwe ususuka, ne kufwa mu dine difuku’dya mu mwaka wa 33 Y.M. c—Mat. 3:17.

12. Le i bika byotubwanya kulonga mu mayenga abadikila Kivulukilo?

¹² Le wabulwa’po kwifunda tamba pano ne ku Kivulukilo, myanda itala kinkūlwa mu kifundwa kyobe kya pa kasuku nansha mu butōtyi bwa kisaka? Ingidija Dibuku dya Bukimbi dya Batumoni ba Yehova (shi didi’ko mu lwenu ludimi) nansha mabuku makwabo mwanda wa kwifunda myanda mivule itala kinkūlwa. d Kadi londa mpangiko ya butangi bwa Bible bwa ku Kivulukilo itūlwanga mu Kabuku ka ku Kupwila—Būmi ne Mwingilo Wetu wa Bwine Kidishitu. Ne kadi mu difuku dya Kivulukilo, kokelwa kulonda mpangiko ya pa bula ya Butōtyi bwa Lubanga. Shi tuteakanye mutyima wetu ku Kivulukilo, tukabwanya kukwasha bantu bakwabo nabo bamwene’mo.—Eza. 7:10.

KWASHA BANTU BAKWABO BAMWENE’MO

13. Le i kintu’ka kibajinji kyotubwanya kulonga pa kukwasha bantu bakwabo bamwene mu Kivulukilo?

¹³ Le i muswelo’ka otubwanya kukwasha bantu bakwabo bamwene mu Kivulukilo? Kintu  kibajinji, i kwibeta batanwe’ko. Kutentekela pa kwita bantu botutananga kitatyi ne kitatyi mu busapudi, tubwanya kulemba’ko mulongo wa bantu botubwanya kwita. Mubwanya kubadilwa bantu ba mu kyetu kisaka, bengidi-netu, bakwetu ba ku masomo, ne bantu bakwabo. Nansha shi ketudipo na tukanda twa lwito tutampe, tubwanya kwibatumina kashinda ka mu bingidilwa bya busendwe. Bine tubwanya kutulumunwa na buvule bwa bantu babwanya kutanwa’ko!—Mus. 11:6.

14. Leta kimfwa kilombola bukomo budi mu kupa muntu kakanda ka lwito.

¹⁴ Kokatyepeka bukomo budi mu kupa muntu kakanda ka lwito. Difuku dimo, kaka udi na mulume ke Kamonipo watulumikile paamulombwele amba usa kukatanwa ku Kivulukilo. Mwanda waka kino kyamutulumwije? Mwanda misunsa mivule kunyuma, wadi umwita akatanwe’ko, inoko kadipo utanwa’ko. Le i kika kyalengeje atanwe’ko pano? Unena’mba, “Baumpele kakanda ka lwito.” Wanenene amba, mukulumpe obeibidile nandi wa ku kifuko kobadi bashikata wamwityile. Mulume wa uno kaka watenwe ku Kivulukilo mwine mwaka’wa ne mu myaka mivule yalondele’po.

15. Le i bika byotulamanga mu ñeni kitatyi kyotwita bantu ku Kivulukilo?

¹⁵ Tulamanga mu ñeni amba boba botwita babwanya kwikala na bipangujo—nakampata shi kebatenwe ku kupwila kwetu nansha kumo. Tuloñanga biyampe na kulangulukila pa bipangujo byabo ne kwiteakanya mwa kwibalondolwela. (Kol. 4:6) Kimfwa, bamo babwanya kwiipangula’mba: ‘Le i bika bilongekanga ku Kivulukilo?’ ‘Le kikalonga mansá anga?’ ‘Le nenwe kuvwala muswelo’ka?’ ‘Le mfwaninwe kufuta pa kutanwa’ko?’ ‘Le kukekala ne kulambula lupeto?’ Kitatyi kyotwita muntu ku Kivulukilo, tubwanya kumwipangula’tu amba, “Le kudi bipangujo byodi nabyo?” Kupwa londolola ku bipangujo byabwanya kwikala nabyo. Tubwanya ne kwingidija video Vuluka Lufu lwa Yesu ne I Bika Biloñwanga ku Njibo ya Bulopwe? pa kukwasha  muntu amone motupwidilanga. Kadi kifundwa 28 kya dibuku Ikala Mūmi Nyeke kidi na myanda mikwabo mivule yotubwanya kwisambila’po.

16. Le i bipangujo’ka bikwabo bibwanya kwipangula boba batanwa ku Kivulukilo?

¹⁶ Pa kupwa kutanwa ku Kivulukilo, bapya batanwa’ko babwanya kwikala na bipangujo bikwabo. Padi babwanya kwiipangula mwanda waka i bantu batyetye kete badyanga ku mukate ne kutoma vinyu, nansha mwanda waka i kutupu muntu nansha umo wadyanga ku mukate ne kutoma vinyu. Kadi babwanya kwiipangula misunsa yotuloñanga Kivulukilo. Babwanya ne kukimba kuyuka shi kupwila konso kwa Batumomi ba Yehova kupitanga muswelo umo onka. Nansha myanda mivule mu ino byoīsambilwanga’po mu mwisambo wa pa Kivulukilo, bapya batenwe’ko babwanya kukimba kuyukila’ko bivule. Kishinte kya pa jw.org kinena’mba, “Mwanda Waka Batumoni ba Yehova Bavulukanga Bidibwa bya Kyolwa bya Mfumwetu mu Muswelo Mwishile na Bipwilo Bikwabo?” kibwanya kwitukwasha tulondolole ku bipangujo bimo byobetwingula. Tukimbanga kulonga byonso byotubwanya—kumeso kwa Kivulukilo, mu kitatyi kya Kivulukilo, ne pa kupwa kwa Kivulukilo, mwanda wa kukwasha boba ba “mutyima muyampe” bamwene mu Kivulukilo.—Bil. 13:48.

KWASHA BOBA KEBAKINGILANGAPO

17. Le bakulumpe babwanya kukwasha namani boba kebakingilangapo? (Ezekyele 34:12, 16)

¹⁷ Mu kitatyi kya Kivulukilo, i muswelo’ka ubwanya kukwasha bakulumpe boba kebakingilangapo? I na kwibalombola’mba mwibasenswe bininge. (Tanga Ezekyele 34:12, 16.) Kumeso kwa Kivulukilo, longa bukomo bwa kwita bavule ku telefone. Wibakulupije amba wibatele mutyima kadi ukimbanga kwibakwasha. Wibete ku Kivulukilo. Shi abaiya kutanwa’ko, wibatundaile na kyanga. Pa kupwa kwa Kivulukilo, endelela kupempula nansha kwita bano batutu ne bakaka ku telefone, ne kwibakwasha ku mushipiditu mwanda wa bajokele kudi Yehova.—1 Pe. 2:25.

18. Le batwe bonso tubwanya kukwasha namani boba kebakingilangapo? (Bene Loma 12:10)

 ¹⁸ Bonso mu kipwilo babwanya kukwasha boba kebakingilangapo batanwa ku Kivulukilo. Muswelo’ka? I na kwibalongela bintu na buswe, na kanye, ne na bulēme. (Tanga Bene Loma 12:10.) Vuluka’mba ino mikōko milēme ibwanya kwikaka kushilula kupwila monka. Padi bakwetwe moyo amba kebakatundailwapo biyampe. e Nashi epuka kwibepangula bipangujo bibwanya kwibakwatyija bumvu, nansha kuleta malondololo abwanya kwibatyumuna mutyima. (1 Ts. 5:11) Bano batutu ne bakaka i banabetu mu lwitabijo. Bine, tudi na nsangaji ya kupwila nabo monka!—Ñim. 119:176; Bil. 20:35.

19. Le i byabuyabuya’ka bidi mu kuvuluka lufu lwa Yesu?

¹⁹ Tufwijanga’ko Yesu pa kwitusoñanya tuvuluke lufu lwandi mwaka ne mwaka, kadi twivwanije kamweno kadi mu kulonda uno musoñanya. Potuvuluka lufu lwa Yesu, tumwenanga’mo batwe pamo ne bantu bakwabo byabuyabuya mu miswelo mivule. (Isa. 48:17, 18) Tuningijanga buswe botusenswe Yehova ne Yesu, tulombolanga kufwija’ko pa byobetulongēle, tuningijanga kijimba kyetu kya bumo na batōtyi-netu, kadi tubwanya kukwasha bantu bakwabo bemwene byabuyabuya biletelwe na kinkūlwa. Nanshi, tulongei byonso byotubwanya, mwanda wa kwiteakanya ku Kivulukilo kya uno mwaka—difuku dya mvubu mpata mu mwaka!