1. Le i bika bitukulupija’mba tudi mu “mafuku a mfulo”?

LELO wabutwilwe kupwa kwa mwaka wa 1914? Shi i amo, būmi bobe bonso wi mupityije’bo mu “mafuku a mfulo” a ino ngikadilo ya bintu. (2 Tm. 3:1) Batwe bonso twibevwane binkumenkume byālaile Yesu bya kulongeka mu ano mafuku. Mu bino binkumenkume mubadilwa mavita, bipupo bya nzala, kutenkana kwa ntanda, bipupo bya misongo, kuvula kwa kujilula bijila, ne kupangwapangwa kwa bantu ba Yehova. (Mat. 24:3, 7-9, 12; Luka 21:10-12) Kadi twi bamone bantu ba mwikadila wālailwe na mutumibwa Polo. (Tala kapango kanena’mba “ Mwikadile Bantu Dyalelo.”) Batwe batōtyi ba Yehova, tukulupile amba tudi “ku mfulo ya mafuku.”​—Mika 4:1.

2. Le i bipangujo’ka byotufwaninwe kulondolola?

² Byopapita kitatyi kivule tamba mu 1914, pano tuyukile amba tudi ku mfulo ya “mafuku a mfulo.” Mfulo byoyafwena, tufwaninwe kutana malondololo ku bino bipangujo bya mvubu: Le i binkumenkume’ka bisa kulongeka ku mfulo ya “mafuku a mfulo”? Ne Yehova usakanga tulonge bika pano potutengele bino binkumenkume?

3. Mungya bupolofeto budi mu 1 Bene Tesalonika 5:1-3, le mizo ikela lubila’ka?

³ Tanga 1 Bene Tesalonika 5:1-3. Polo watela’mo “difuku dya Yehova.” Mu uno mwanda, difunkilanga pa kitatyi kya tamba kutambwa kwa “Babiloni Mukatampe,” umbikalo wa ntanda yonso wa bipwilo bya bubela, kutūla ne bikapwa Amakedona. (Kus. 16:14, 16; 17:5) Kumeso kwa dino  “difuku” kushilula, mizo ikela lubila lwa “Ndoe ne mutyima-ntenke!” Kyaba kimo bendeji ba ntanda bengidijanga bino bishima pa kwisambila pa kulumbulula kipwano kipwene mizo na mizo mikwabo. * Inoko lubila lwa “ndoe ne mutyima-ntenke” lutelelwe mu Bible i lwishile. Mwanda waka? Mwanda kitatyi kyolukelwa, bantu bakalanga’mba bendeji ababwanya kwalamuna ntanda ke kifuko kya mutyima-ntenke. Inoko na bubine, “konakanibwa kwa mu kitulumukila” kukebafikila pa “kyamalwa kikatampe.”​—Mat. 24:21.

4. (a) Le i bintu’ka byoketuyukilepo pa mwanda utala lubila lwa “ndoe ne mutyima-ntenke”? (b) Le i bintu’ka byotuyukile kala pa luno lubila?

⁴ Kudi bintu byotuyukile pa lubila lwa “ndoe ne mutyima-ntenke.” Inoko kudi bikwabo nabyo byoketuyukilepo. Ketuyukilepo kine kikalengeja bendeji bele luno lubila nansha muswelo mwine obakela’lo. Kadi ketuyukilepo shi lukekala’tu lubila lumo nansha mbila mivule milondakane. Nansha bikale namani, kyotuyukile i kino amba: Ketufwaninwepo kulanga byampikwa ñeni amba bendeji ba ntanda babwanya kuleta ndoe pa ntanda. Ino, i lubila lwālailwe mu Bible lotufwaninwe kutengela. I kiyukeno kikalombola’mba “difuku dya Yehova” kedisa kushilula!

5. Le 1 Bene Tesalonika 5:4-6 witukwasha namani twiteakanye ku “difuku dya Yehova”?

⁵ Tanga 1 Bene Tesalonika 5:4-6. Madingi a Polo alombola byotufwaninwe kulonga pa kwiteakanya ku “difuku dya Yehova.” Ketufwaninwepo kulāla “tulo pamo bwa bantu bakwabo.” “Tutalei’nka kutala” kadi batengele nyeke. Kimfwa, tufwaninwe kujingulula kyaka kidi mu kwiela mu myanda ya politike ya ino ntanda. Shi twiele mu ino myanda, tukekala “ba ino ntanda.” (Yoa. 15:19) Tuyukile amba Bulopwe bwa Leza kete bo bukaleta ndoe pa ntanda.

6. Le tufwaninwe kukwasha bakwetu balonge bika, ne mwanda waka?

⁶ Kutentekela pa kutala, tufwaninwe ne kukwasha bakwetu nabo befunde byobya bilaile Bible bisa kulongeka pano pa ntanda. Tuvulukei amba shi kyamalwa kikatampe kibashilula, bantu kebakekalapo na kyaba kya kushilula kwingidila Yehova. O mwanda mwingilo wetu wa busapudi i wa kampeja-bukidi! *

7. Le Yehova usakanga tulonge bika tamba’nka pano?

⁷ Mu kino kitatyi kityetye kyashala’ko kumeso kwa “difuku” dyandi kushilula, Yehova usakanga tuvudilwe nyeke bya kulonga mu mwingilo wa busapudi. Tufwaninwe kujingulula shi twi bavudilwe “bya kulonga mu mwingilo wa Mfumwetu.” (1 Ko. 15:58) Yesu wālaile  bintu byotufwaninwe kulonga. Kitatyi kyaēsambīle pa bintu byonso bikatampe bya kulongeka mu mafuku a mfulo, wābwejeje’ko amba: “Kadi myanda miyampe ifwaninwe bidi kusapulwa mu mizo yonso.” (Mako 13:4, 8, 10; Mat. 24:14) Langa’po bidi: Kitatyi kyonso kyoenda mu busapudi, ufikidijanga buno bupolofeto bwa mu Bible!

8. Lelo mwingilo wa kusapula Bulopwe wendelelanga namani?

⁸ Le tunene bika pa kwendelela kwa mwingilo wa kusapula Bulopwe? Uno mwingilo wendelelanga kumeso mwaka ne mwaka. Kimfwa, langulukila pa kuvula kwavudila’ko basapudi ba Bulopwe ntanda yonso mu ano mafuku a mfulo. Mu 1914, kwadi basapudi 5 155 mu matanda 43. Dyalelo kudi kintu kya basapudi midiyo 8,5 mu matanda 240! Nansha nankyo, mwingilo wetu kewaimene. Tufwaninwe kusapula nyeke amba Bulopwe bwa Leza bo bukapwa makambakano onso a bantu.—Ñim. 145:11-13.

9. Mwanda waka tufwaninwe kusapula nyeke musapu wa Bulopwe?

⁹ Mwingilo wetu wa kusapula Bulopwe keukemanapo kufika’nka ne bikanena Yehova amba kubapu. Le bantu abashala na bitatyi binga bya kuyuka Yehova Leza ne Yesu Kidishitu? (Yoa. 17:3) Ketuyukilepo. Kyotuyukile i kino amba kufika ne bikashilula kyamalwa kikatampe, boba bonso “badi na mutyima muyampe wa kukamona būmi bwa nyeke” babwanya kwitabija myanda miyampe. (Bil. 13:48) Le i muswelo’ka otubwanya kukwasha bano bantu pakidi’ko kitatyi?

10. Le Yehova witukwashanga namani pa kusaka’mba tufundije bantu bubine?

¹⁰ Yehova witupanga kupityila ku bulongolodi bwandi bintu byonso byotusakilwa pa kufundija bantu bubine. Kimfwa, tufundijibwanga yenga ne yenga ku kupwila kwa mu bukata bwa yenga. Kuno kupwila kwitukwashanga tuyuke bya kunena mu kwitana kubajinji ne mu kujokela’mo. Kadi betufundijanga’ko muswelo wa kwendeja bifundwa bya Bible. Ne kadi bulongolodi bwa Yehova i bwitulupwile Bingidilwa bya Kufundija Nabyo. Bino bingidilwa bitukwashanga . . .

•   tushilule mīsambo,

• tulangule kusangela,

• tukankamike bantu bakimbe kwifundila’ko bikwabo,

• tufundije befundi ba Bible bubine, ne

• kunena boba basangela batwele pa diteba dyetu kadi bāye ne ku Njibo ya Bulopwe.

Na bubine, kwikala’tu na bino bingidilwa ke kubwenepo. Tufwaninwe ne kwibingidija. * Kimfwa, pa kupwa kwisamba senene na muntu usangela musapu, ubamushila trakte nansha dipepala, ukatanga’mo bintu bikwabo kufika ne kitatyi kyokaya kwimona nandi monka. Batwe bo badi na kiselwa kya kuvudilwa bya kulonga mu mwingilo wa kusapula Bulopwe kweji ne kweji.

11. Mwanda waka twalupwile’ko Bifundwa bya pa Entelenete bya Kwifunda Bible?

¹¹ Muswelo mukwabo obakwasha bantu kudi Yehova befunde bubine, i kubandaula Bifundwa bya pa Entelenete bya Kwifunda Bible bidi pa jw.org^®. Mwanda waka twalupwile’ko bino bifundwa? Mwanda kweji ne kweji, bantu tununu makumi na makumi kujokoloka ntanda yonso bakimbanga bifundwa bya Bible pa Entelenete. Bino bifundwa bidi pa diteba dyetu bibwanya kukwasha bano bantu bashilule kwifunda bubine budi mu Kinenwa kya Leza. Bantu bamo bowisambanga nabo bakokeja padi kupela kwifunda Bible. Shi bidi uno muswelo, wibalombole bino bifundwa pa diteba dyetu nansha kwibatumina kashinda kebatwala’ko. *

12. Le bantu babwanya kwifunda bika mu Bifundwa bya pa Entelenete bya Kwifunda Bible?

¹² Bifundwa bya pa Entelenete bya Kwifunda Bible bīsambilanga pa ino myanda: “Bible ne Mwine Ulembeje’ye,” “Bantu Batelelwe mu Bible,” ne “Musapu wa mu Bible wa Lukulupilo.” Mu ino myanda bafundijanga’mo:

• Muswelo ubwanya Bible kukwasha muntu

• Kuyuka Yehova, Yesu, ne bamwikeulu i bāni

• Kine kyobāpangile bantu kudi Leza

• Kine kikadile’ko masusu ne bubi

Kadi bino bifundwa bilombola’mba Yehova . . .

• ukapwa masusu ne lufu,

• ukasangula bafwe, ne

• kupingakanya maludiki a bantu na Bulopwe bwa Leza.

13. Lelo bifundwa bya pa Entelenete i bipingakene pa mpangiko ya kufundija bantu Bible? Shintulula.

¹³ Bifundwa bya pa Entelenete kebipingakenepo pa mpangiko ya kufundija bantu Bible. Yesu i mwitupe dyese dya kulonga bana ba bwanga. Tukulupile amba bantu basangela bakefunda bino bifundwa bya pa Entelenete, kusangela byobefunda, ne kusaka kuyukila’ko bivule. Mu uno muswelo, padi baketabija kwifunda Bible. Ku mfulo kwa kifundwa ne kifundwa, i banene yewa utanga alombe muntu wa kwifunda nandi Bible. Kupityila ku diteba dyetu, dingidijibwa kisengele ntanda yonso, bantu 230 ne musubu balombanga’po difuku ne difuku kwifunda Bible! Kufundija muntu ne muntu uno muswelo kudi na mvubu!

14. Mungya musoñanya wa Yesu udi mu Mateo 28:19, 20, le tufwaninwe kwikankila’ko kulonga bika, ne mwanda waka?

¹⁴ Tanga Mateo 28:19, 20. Kitatyi kyotwifunda Bible na bantu, tufwaninwe kwikankila’ko ‘kulonga bana ba bwanga ne kwibafundija balame byonso byāsoñenye Yesu.’ Tufwaninwe kukwasha bantu bayuke amba kwingidila Yehova ne kukwatakanya Bulopwe bwandi i kintu kya mvubu kobadi. Kino kilomba kukankamika  bantu balonde bubine mu būmi bwabo na kwingidija byobya byobefunda, bapāne būmi bwabo kudi Yehova, ne kubatyijibwa. Shi balonge namino, bakapanda ku difuku dya Yehova.​—1 Pe. 3:21.

15. Le i bika byoketufwaninwepo kulonga, ne mwanda waka?

¹⁵ Enka motwanenenanga kala, pano kubashala kitatyi kityetye mfulo ya ngikadilo ya bintu ifike. Pa kino, ketudipo na kitatyi kya kwendelela kwifunda Bible na bantu kebadipo na mutyima wa kwikala bana ba bwanga ba Kidishitu. (1 Ko. 9:26) Mwingilo wetu i wa kampeja-bukidi! Kudi bantu bavule bafwaninwe kwivwana musapu wa Bulopwe pakidi’ko kitatyi.

16. Mungya Kusokwelwa 18:2, 4, 5, 8, le i bika byotufwaninwe kulonga? (Tala ne kunshi kwa dyani.)

¹⁶ Tanga Kusokwelwa 18:2, 4, 5, 8. Ano mavese alombola’mba Yehova usakila batōtyi bandi balonge kintu kikwabo. Bene Kidishitu bonso ba bine bafwaninwe kwisansanya na Babiloni Mukatampe. Kumeso kwa kwifunda bubine, padi muntu wifunda Bible wadi mu kipwilo kya bubela. Wadi wenda ku kupwila kwabo ne kwingila mingilo ya kipwilo. Nansha padi wadi ukwasha’ko na lupeto. Kumeso kwa kwitabija muntu wifunda Bible ekale musapudi wa kubulwa kubatyijibwa, ufwaninwe kutyiba kipwano na kipwilo kya bubela. Ufwaninwe kutuma mukanda wa kutamba mu kipwilo kyawadi’mo nansha kitango kyo-kyonso kidi mu kipwano na Babiloni Mukatampe. *

17. Lelo i kaji ka muswelo’ka kekafwaninwepo kwingila mwine Kidishitu, ne mwanda waka?

¹⁷ Mwine Kidishitu wa bine ufwaninwe kujingulula shi kaji kaingila kekakwatañenepo na Babiloni Mukatampe. (2 Ko. 6:14-17) Kimfwa, kafwaninwepo kwingila mingilo ya kipwilo kya bubela. Ne kadi mwine Kidishitu obangeje ku mwingilo kampanda, kakobakapo kyubakwa kikengidija kipwilo kya bubela. Kadi shi uyukile kaji kampanda, kakakimbepo kaji nansha kwitabija kwingila na Babiloni Mukatampe. Mwanda waka tubanena namino? Mwanda ketusakilepo kwiabila mingilo ne bubi na bipwilo bya disubi ku meso a Leza.—Isa. 52:11. *

18. Le tutu umo walondele misoñanya ya mu Bible namani pa mwanda utala kandi kaji?

 ¹⁸ Pano kepadi myaka, banenene mukulumpe umo wadi wiingidila kandi kaji akengile kamwingilo ka kupopa mbao ku kipwilo kimo kya mu kibundi kyabo. Mwine wamunenene wadi uyukile amba uno tutu upelanga nyeke kwingila kaji ka bipwilo. Inoko pano uno muntu kadipo ukulupile amba ukasokola muntu mukwabo wa kwingila’ko. Nansha nankyo, tutu walondele misoñanya ya mu Bible, wapela kwingila’ko. Kupwa yenga ulonda’ko, balupula mu julunale ya mu kibundi foto ya muntu mukwabo upopa musalaba ku kipwilo’kya. Shi tutu kalondelepo misoñanya ya mu Bible, longa i foto yandi yobalupwile’mo. Langa’po bidi mobadi ba kumumwena bibi kudi banababo bene Kidishitu! Langa’po bidi ne mwadi mwakwiivwanina Yehova.

19-20. (a) Lelo i bika byotwefunda? (b) Le i bika bikwabo byotufwaninwe kwifunda?

¹⁹ Mungya bupolofeto bwa mu Bible, kinkumenkume kikatampe kisa kulongeka panopano ponka pano pa ntanda, i lubila lwa “ndoe ne mutyima-ntenke” lusa kwela mizo. Yehova byaetufundijanga, tuyukile amba mizo keisapo kuleta ndoe ya bine kadi ya nyeke ne nyeke. Le i bika byotufwaninwe kulonga kumeso kwa kino kinkumenkume kulongeka ne kumeso kwa bonakani bwa mu kitulumukila kufika? Yehova usakanga tusapule bininge musapu wa Bulopwe ne kwikankila’ko kulonga bana ba bwanga bavule. Kadi tufwaninwe kwisansanya na bipwilo byonso bya bubela. Ko kunena’mba tufwaninwe kutamba’mo ne kuleka kwingila mingilo ikwatañene na Babiloni Mukatampe.

²⁰ Kadi kudi binkumenkume bikwabo bisaka kulongeka ku mfulo ya “mafuku a mfulo.” Kudi ne bintu bikwabo bitusakila Yehova kulonga. Le abyo bine i bika, ne tuketeakanya namani ku kintu kyo-kyonso kisa kufika panopano ponka? Tukabandaula ino myanda mu kishinte kilonda’ko.