1. Le kisonekwa kya 2 Bene Kodinda 3:1-3, kitukwasha namani tusangele dyese dyotudi nadyo dya kwendeja kifundwa kya Bible kufika ne ku lubatyijo? (Tala kifwatulo pa kibalu.)

LELO wiivwananga namani shi ubamone muntu wadi wifunda Bible mu mwaba wa kyenu kipwilo ubatyijibwa? Na bubine mutyima obe usangalanga. (Mat. 28:19) Kadi shi i abe wadi wifunda na uno mwanā bwanga mupya, ukasangala bininge pa kumumona ubatyijibwa! (1 Ts. 2:19, 20) Bana ba bwanga bapya babatyijibwe, i ‘mikanda ya kuyukanya’ boba befundile nabo ne kipwilo kyonso.​—Tanga 2 Bene Kodinda 3:1-3.

2. (a) Le i kipangujo’ka kyotufwaninwe kulondolola, ne mwanda waka? (b) Le kifundwa kya Bible i bika? (Tala kunshi kwa dyani.)

² I biyampe’po kashā kumona mu lapolo yatuminwe myaka iná yapityile’i, amba twaendeje bifundwa bya Bible * kintu kya 10 000 000 kweji ne kweji kujokoloka ntanda yonso. Kadi enka mu ino myaka, kwadi mwayene wa bantu 280 000 ne kupita babatyijibwe mwaka ne mwaka, ke Batumoni ba Yehova kadi bana ba bwanga bapya ba Yesu Kidishitu. Le i muswelo’ka otubwanya kukwasha bano bantu midiyo ne midiyo befunda Bible amba babatyijibwe? Yehova byapele bantu na kitūkijetyima kitatyi ne mukenga wa kwikala bana ba bwanga ba Kidishitu, tufwaninwe kulonga bukomo bwa kwibakwasha bendelele bukidibukidi kufika ne ku kubatyijibwa. Bine, kitatyi kyendanga kityepa bininge!​—1 Ko. 7:29a; 1 Pe. 4:7.

3. Le i bika byotusa kwisambila’po mu kino kishinte pa mwanda utala kwendeja bifundwa bya Bible?

 ³ Pa kulombola’mba mwingilo wa kulonga bana ba bwanga i wa kampeja-bukidi, baipangwile makomite a misambo mwa kulongela pa kukwasha bantu bavule botwifunda nabo Bible bendelele kufika ne ku lubatyijo. Mu kino kishinte ne mu kilonda’ko, tusa kumona’mo ñeni yotubwanya kuboila kudi bapania ba bwino, bamishonele, ne batadi ba bipindi. * (Nki. 11:14; 15:22) Makomite nao alombwele bintu bibwanya kulonga bafundiji ba Bible ne boba bobefunda nabo mwanda wa kifundwa kya Bible kikale kya kamweno. Mu kino kishinte, tusa kwisambila’mo pa bintu bitano bifwaninwe kulonga muntu ense wifunda Bible amba endelele kufika ne ku kubatyijibwa.

4. Le i bika byotufwaninwe kuyuka pa mwanda utala kifundwa kya Bible kya pa kibelo?

⁴ Batutu ne bakaka bavule bendejanga bifundwa bya Bible bya pa kibelo. Nansha byoudi muswelo muyampe wa kukwasha muntu asangele Bible, ino mīsambo ikalanga mīpi bininge kadi kemubwanyapo kwisamba yenga ne yenga. Pa kusaka kukwasha muntu asangele bininge, bamo bamulombanga nimelo ya telefone, kupwa bamwita ku telefone nansha kumutumina mu musapu mulangwe wa mu Bisonekwa kufika’nka ne byobakemona nandi dikwabo. Babwanya kwisamba nandi uno muswelo mu myeji mivule pampikwa kushilula kifundwa kya Bible kyendelela. Le bine yewa wifunda Bible ukendelela kufika ne ku kwipāna ne kubatyijibwa shi kalongapo bukomo bwa kwifunda Kinenwa kya Leza mu kitatyi kilampe? Padi kebibwanikapo.

5. Mungya Luka 14:27-33, le Yesu wālombwele amba i bika bibwanya kwitukwasha mu mwingilo wa kulonga bana ba bwanga?

⁵ Difuku dimo, Yesu wāletele kyelekejo kya bintu bifwaninwe kulonga muntu pa kwikala wandi mwanā bwanga. Wesambīle pa muntu usaka kūbaka kiteba ne pa mulopwe usaka kukalwa divita. Yesu wānenene amba yewa usaka kūbaka ufwaninwe kushikata “bidi wabala lupeto lwasa kujimija” pa kupwa kiteba, ne amba mulopwe nandi ukashikata “bidi kukala ñeni” mwa kuyukila shi bibumbo byandi bya basola bibwanya kufikila pa byobalanga kulonga. (Tanga Luka 14:27-33.) Kadi Yesu wādi uyukile amba muntu usaka kwikala wandi mwanā bwanga, ufwaninwe kubandaula senene bintu byafwaninwe kulonga pa kumulonda. O mwanda, tufwaninwe kukankamika boba  befunda Bible, amba twifunde nabo yenga ne yenga. Le tubwanya kwibakankamika namani?

6. Le i bika byotubwanya kulonga pa kukwasha botwifunda nabo bendelele?

⁶ Shilula kulepeja’ko byowisamba pa kibelo. Padi kitatyi kyonso kyokamupempula, ubwanya kwisambila ne pa mwanda mukwabo wa mu Bisonekwa. Shi yewa omwisamba nandi wasangela kupempulwa mu kitatyi kilampe, mwipangule shi kudi kifuko kyomubwanya kushikata mwendeleje mīsambo. Byobya byasa kunena bikakukwasha uyuke shi umwene kwifunda Bible na mvubu. Mwenda mafuku, pa kukwasha omwifunda nandi endelele bukidibukidi, ubwanya kumwipangula shi witabije kwifunda misunsa ibidi ku yenga. Inoko kwifunda musunsa umo nansha ibidi yenga ne yenga kekubwenepo.

7. Le mufundiji ubwanya kuteakanya biyampe kipindi ne kipindi kya kwifunda namani?

⁷ Byodi mufundiji, ufwaninwe kuteakanya kipindi ne kipindi kya kwifunda. Ubwanya kushilula na kutanga myanda yomukefunda, ne kubandaula bisonekwa. Lama senene myanda mikatampe mu ñeni. Langulukila pa mutwe wa mwanda wa kifundwa, tumitwe twa myanda tutyetutye, bipangujo bya kifundwa, ne bisonekwa binenenwe amba “tanga,” bifwatulo, ne video yo-yonso ibwanya kushintulula mwanda omukesambila’po. Kupwa langulukila pa omwifunda nandi, ubadikile ne kulangulukila pa mwa kunenena myanda mu muswelo upēla kadi bivwanike amba omwifunda nandi eivwanije senene ne kwiingidija.​—Neh. 8:8; Nki. 15:28a.

8. Le binenwa bya mutumibwa Polo bidi mu Bene Kolose 1:9, 10, bitufundija bika pa mwanda utala kulombelela’ko boba botwifunda nabo Bible?

⁸ Powiteakanya, lombola Yehova myanda ya omwifunda nandi ne bisakibwa byandi. Lomba Yehova akukwashe ufundije myanda ya mu Bible mu muswelo utenga mutyima wa muntu. (Tanga Bene Kolose 1:9, 10.) Badikila kulangulukila pa bintu kebibwanyapo kwivwanija omwifunda nandi nansha kwibitabija. Vuluka’mba kitungo kyobe i kya kumukwasha endelele kufika ne ku lubatyijo.

9. Le mufundiji ubwanya kukwasha waefunda nandi namani ateakanye bya kwifunda? Shintulula.

⁹ Tukulupile amba shi muntu wifunda Bible kitatyi ne kitatyi, ukafwija’ko pa bintu bilongele Yehova ne Yesu, kadi ukasaka kwifundila’ko bivule. (Mat. 5:3, 6) Pa  kumwena ne pa mfulo mu kifundwa, yewa wifunda ufwaninwe kuta mutyima ku byaefunda. Pa kino, mushintulwile amba ufwaninwe kuteakanya kipindi ne kipindi kya kwifunda na kutanga kumeso kwa kitatyi bya kwifunda ne kulangulukila pa muswelo umutala myanda’ya. Le mufundiji ukamukwasha namani? Teakanya nandi pamo bya kwifunda, umulombole mulongelwanga. * Mushintulwile mwa kulondolwela bipangujo bya kifundwa, kadi mulombole mukamukwashisha kutūla tuyukeno pa bishima bikatampe nansha misemwa, amba avuluke malondololo. Kupwa munene alondolole mu byandi bishima. Shi alonge namino, nobe ukabwanya kuyuka shi wivwanije myanda’ya biyampe. Inoko kudi kintu kikwabo kyobwanya kumukankamika alonge.

10. Mwanda waka i biyampe kutanga Bible difuku ne difuku, ne i bika bya kulonga pa kumwena bininge mu butangi bwa Bible?

¹⁰ Kutentekela pa kwifunda yenga ne yenga na umufundijanga, yewa wifunda ufwaninwe ne kulonga aye mwine bintu bimobimo difuku ne difuku. Ufwaninwe kwisamba na Yehova. Namani? Na kuteja ne kwisamba na Yehova. Ubwanya kuteja Leza shi utanga Bible difuku ne difuku. (Yos. 1:8; Ñim. 1:1-3) Mulombole muswelo wa kwingidija “Mpangiko ya Butangi bwa Bible” idi pa jw.org. * Bine, pa kumukwasha amwene bininge mu butangi bwa Bible, mukankamike alangulukile pa byobya bimufundija Bible padi Yehova ne pa muswelo wabwanya kwingidija byaefunda mu būmi bwandi.​—Bil. 17:11; Yak. 1:25.

11. Le yewa wifunda ubwanya kwifunda kulombela biyampe namani, ne mwanda waka i biyampe alombe Yehova kitatyi kyonso?

¹¹ Kankamika omwifunda nandi esambe na Yehova kupityila ku milombelo ya difuku ne difuku. Lombela milombelo itamba ku mutyima ku ngalwilo ne ku mfulo kwa kifundwa ne kifundwa, lombela nandi ne kumulombelela’ko. Paivwana milombelo yobe, nandi ukayuka muswelo wa kulombela milombelo itamba ku mutyima, ne kulombela kudi Yehova Leza kupityila mu dijina dya Yesu Kidishitu. (Mat. 6:9; Yoa. 15:16) Bine, kutanga Bible difuku ne difuku (kuteja Yehova) ne kulombela (kwisamba na Yehova) kukakwasha omwifunda nandi afwene kudi Leza! (Yak. 4:8) Kwikala na kino kibidiji kukakwasha omwifunda nandi ekale na kintu  kikwabo kibwanya kumulengeja epāne ne kubatyijibwa.

12. Le mufundiji ubwanya kukwasha waefunda nandi namani apwane na Yehova?

¹² Byobya bifunda muntu mu Bible kebifwaninwepo’nka kutenga ñeni yandi, ino i ne mutyima wandi. Mwanda waka? Mwanda mutyima wetu​—mwine mubadilwa kusakasaka kwetu, malango, ne mwiivwanino​—witulengejanga tulonge bintu. Yesu wādi ulanguluka mu muswelo ukoka milangwe ya bantu. Inoko bantu bāmulondele mwanda wātengele ne mityima yabo. (Luka 24:15, 27, 32) Yewa omwifunda nandi ufwaninwe kumona Yehova bu muntu udi’ko bine, muntu wabwanya kupwana nandi, ne kumumona bu Shandi, Leza wandi, ne bu Mulunda nandi. (Ñim. 25:4, 5) Pomwifunda nandi Bible, kokela milangwe pa ngikadila ya Leza. (Div. 34:5, 6; 1 Pe. 5:6, 7) Nansha shi mwisambila pa mwanda’ka, kokela milangwe pa mwine mwikadile Yehova. Kwasha omwifunda nandi amone ngikadila miyampe ya Yehova ya buswe, kanye ne lusa. Yesu wānenene amba “mbila itabukile bukatampe kadi . . . mibajinji” i kusanswa “Yehova Leza obe.” (Mat. 22:37, 38) Longa bukomo bwa kukwasha omwifunda nandi asanswe Leza bininge.

13. Leta kimfwa kilombola mwa kukwashisha muntu wifunda Bible ayuke ngikadila ya Yehova.

¹³ Pomwisamba na omwifunda nandi, mwekeja’mba usenswe Yehova bininge. Kino kikakwasha omwifunda nandi ajingulule amba nandi ufwaninwe kupwana na Leza ne kumusanswa. (Ñim. 73:28) Kimfwa, le mu dibuku dyomwifunda nansha mu kisonekwa mudi musemwa ulombola buswe, tunangu, boloke, nansha bukomo bwa Yehova wakutenga ku mutyima? Lombola’o omwifunda nandi, ayuke kine kyosanshilwe Shobe wa mūlu. Inoko kudi kintu kikwabo kifwaninwe kulonga muntu ense wifunda Bible pa kwendelela ne kufika ku kubatyijibwa.

14. Le kisonekwa kya Bahebelu 10:24, 25, kitusapwila bika pa kupwila kubwanya kukwasha otwifunda nandi endelele?

¹⁴ Batwe bonso tusakanga botwifunda nabo bendelele kufika ne ku kubatyijibwa. Muswelo umo muyampe otubwanya kwibakwasha i kwibakankamika batanwe ku kupwila. Bafundiji ba bwino banenanga’mba bantu befunda Bible batanwa bukidibukidi ku kupwila, bendelelanga lubilolubilo. (Ñim. 111:1) Bafundiji bamo bashintulwilanga bobefunda nabo amba bufundiji bumo bwa mu Bible, bakefunda’bo pobefunda, ino bukwabo nabo bakefunda’bo ku kupwila.  Tanga Bahebelu 10:24, 25 na omwifunda nandi, kadi mulombole byakamwena’mo shi utanwa ku kupwila. Mutadije video inena’mba, I Bika Biloñwanga ku Njibo ya Bulopwe? * Kwasha omwifunda nandi amone amba kutanwa ku kupwila yenga ne yenga kudi na kamweno mu būmi bwandi.

15. Le i bika byotubwanya kulonga pa kukankamika otwifunda nandi atanwe ku kupwila kitatyi ne kitatyi?

¹⁵ Le ukalonga namani shi omwifunda nandi katanwapo ku kupwila nansha shi utanwa’ko na dimodimo? Mulombole na nsangaji bintu byowefundile ku kupwila kwapityile. Kulonga namino kukamulengeja āye’ko pa kyaba’tu kya kumwita bitupu āye atanwe’ko. Mupe Kiteba kya Mulami nansha Kabuku ka ku Kupwila Būmi ne Mwingilo bisa kwifundwa ku kupwila. Mulombole bikefundwa ku kupwila kulonda’ko, kadi mwipangule kipindi kyamusangaja’mo bininge. Bintu bikemwena yewa omwifunda nandi pa katanwa’ko musunsa mubajinji, bikamusangaja kutabuka kintu kyo-kyonso kyakadi mwimwene ku bipwilo bikwabo. (1 Ko. 14:24, 25) Uketana’ko na bantu baleta kimfwa kiyampe kyabwanya kwiula, kadi bakamukwasha endelele kufika ne ku kubatyijibwa.

16. Pa kwendeja bifundwa bya Bible kufika ne ku kubatyijibwa, le bilomba bika ne bika, ne i bika byotukefunda mu kishinte kilonda’ko?

¹⁶ Le i muswelo’ka otubwanya kwendeja bifundwa bya Bible kufika ne ku kubatyijibwa? Tubwanya kukwasha muntu ense otwifunda nandi efunde na kusumininwa, shi tumukankamika efunde yenga ne yenga ne kuteakanya kipindi ne kipindi kya kwifunda. Tufwaninwe kumukankamika esambe na Yehova difuku ne difuku ne kupwana nandi. Kadi tufwaninwe kukankamika otwifunda nandi atanwe ku kupwila. (Tala kapango kadi pa paje 12 kanena’mba, “ Bifwaninwe Kulonga Boba Befunda Bible pa Kwendelela Kufika ne ku Kubatyijibwa.”) Inoko, monka musa kushintulwila’kyo kishinte kilonda’ko, kudi bintu bitano bikwabo bibwanya kulonga bafundiji ba Bible pa kukwasha bobefunda nabo babatyijibwe.