Mu 2 Kodinda 12:2, 3, Polo wisambila’mo pa muntu umo “watekwininwe mu diulu dya busatu.” Le i ani? Polo pa kulembela kipwilo kya Kodinda, wālombwele amba Leza wādi umwingidija bu mutumibwa. (2 Kodinda 11:5, 23) Kupwa wēsambila pa ‘bimonwa ne myanda yāmusokwedile Mfumwetu.’ Mu ino myanda, Polo kādipo wisambila pa banababo bakwabo. Nanshi mungya buluji, wādi wisambila padi aye mwine bu muntu wāpelwe bimonwa ne kusokwelwa myanda.​—2 Kodinda 12:1, 5.

Nanshi Polo ye muntu “watekwininwe mu diulu dya busatu” kadi “watekwininwe mu paladisa.” (2 Kodinda 12:2-4) Wātelele kishima ‘kusokwelwa’ kine kidi na mulangwe wa kusokola byobya bikekala’ko mu mafuku a kumeso.

Le i bika byāmwene Polo bu “diulu dya busatu”?

Mu Bible, “diulu” dibwanya kufunkila pa madiulu otumwene na meso. (Ngalwilo 11:4; 27:28; Mateo 6:26) Ino kadi “diulu” i ditelwe ne mu buluji bukwabo. Kyaba kimo difunkilanga pa buludiki bwa bantu. (Danyele 4:20-22) Kadi dibwanya ne kufunkila pa buludiki bwa Leza, kimfwa bobwa bukaludikwa na Bulopwe bwa Leza.​—Kusokwelwa 21:1.

Polo wāmwene “diulu dya busatu.” Le ko kunena namani? Kyaba kimo Bible upitulukanga kintu kimo misunsa isatu mwanda wa kukomeneja nansha kutyityija. (Isaya 6:3; Ezekyele 21:27; Kusokwelwa 4:8) Bimweka’mba Polo pa kwisambila pa “diulu dya busatu,” wālombwele bukatampe bwa buludiki, mobwikadile, ne kwibuzunzula—Bulopwe bwa Meshiasa bukaludikwa na Yesu Kidishitu ne ba 144 000 bakabikala nabo. (Tala Étude perspicace des Écritures, Volime 1, p. 473, 476.) Monka mwālembele’kyo mutumibwa Petelo, tutengele “madiulu mapya” mungya mulao wa Leza.​—2 Petelo 3:13.

Le penepa “paladisa” yātelele Polo nayo le?

Kishima “paladisa” nakyo kibwanya kushintulula bintu bivule: (1) Mungya kīkalo kibajinji kya muntu, “paladisa” ibwanya kufunkila pa Paladisa imweka na meso ikekala’ko pano pa ntanda. (2) Ibwanya kufunkila pa kifuko kya ndoe kikekala’mo bantu ba Leza mu ntanda mipya. (3) Ne kadi, ibwanya kufunkila pa būmi buyampe bwa mūlu, “paladisa ya Leza” itelelwe mu Kusokwelwa 2:7.​—Tala Kiteba kya Mulami, 1 Kweji 7, 2015, p. 13 mus. 8.

Bimweka’mba Polo wādi wisambila pa bino bintu bisatu mu 2 Kodinda 12:4 pa kulombola myanda yāmutene.

Mu kīpi:

Bimweka bu “diulu dya busatu” ditelelwe mu 2 Kodinda 12:2 i Bulopwe bwa Meshiasa buludikwa na Yesu Kidishitu ne ba 144 000, ko kunena’mba “madiulu mapya.”​—2 Petelo 3:13.

I “diulu dya busatu” mwanda buno Bulopwe i umbikalo mukatampe kadi udi peulu.

Bimweka bu “paladisa” ‘mwātekwininwe’ Polo ifunkila pa (1) Paladisa imweka na meso ikekala’ko pano pa ntanda, (2) paladisa ya ku mushipiditu ikekala’ko, mine ikekala mikatampe kupita paladisa ya ku mushipiditu idi’ko dyalelo, ne pa (3) “paladisa ya Leza” ya momwa mūlu ikekala’ko mu kitatyi kimo na ntanda mipya.

Na bubine, mu ntanda mipya mukabadilwa madiulu mapya ne ntanda mipya. Ikekala mpangiko mipya ya umbikalo wa Bulopwe bwa mūlu pamo ne bantu bengidila Yehova mu paladisa ya pano pa ntanda.