1-2. Monka mulombwela’kyo kimfwa kya Angelito, le muntu ne muntu ufwaninwe kulonga bika?

LELO wātamijibwe na bambutwile Batumoni ba Yehova? Shi i amo, vuluka’mba kebabwanyapo kukupyanika kipwano kyabo na Yehova. Nansha shi bambutwile betu bengidilanga Leza nansha kumwingidila mpika, muntu ne muntu ufwaninwe kupwana aye mwine na Yehova.

² Tulangulukilei bidi pa kimfwa kya tutu umo witwa bu Angelito. Watamīne mu kisaka kya Batumoni. Inoko, paādi nkasampe, kadipo wimona’mba udi mu kipwano kya pa bula na Leza. Unena’mba, “nadi ñingidila Yehova mwanda nadi nsaka’tu kulonga byobya byadi bilonga ba mu kyetu kisaka.” Ino, Angelito wakwete butyibi bwa kwitūdila’ko kitatyi kya kutanga Kinenwa kya Leza ne kulangulukila’po, kadi washilula kulombela kudi Yehova kitatyi ne kitatyi. Byaikala namani? Angelito unena’mba, “najingulwile amba muswelo umo kete wa kufwena kudi Yehova, Tata wami wa buswe, i kumuyuka ami mwine.” Kimfwa kya Angelito kitulengeja twiipangule bino bipangujo bya kamweno: Le kuyuka Yehova i kwishile namani na kumuyuka senene? Ne i muswelo’ka otubwanya kuyuka Yehova senene?

3. Le kuyuka Yehova i kwishile namani na kumuyuka senene?

³ Tubwanya kumona’mba muntu kampanda uyukile Yehova shi uyukile’tu dijina dya Leza nansha kuyuka’ko bintu  byanenene ne byalongele. Inoko kuyuka Yehova senene kulombanga bintu bivule. Tufwaninwe kwitūdila’ko kitatyi kya kwifunda myanda ya Yehova ne ngikadila yandi ya kutendelwa. Nabya tukashilula kwivwanija kine kimulengejanga esambe ne kulonga bintu. Kino kiketukwasha tujingulule shi witabije milangwe yetu, butyibi bwetu, ne bilongwa byetu. Shi tubajingulula byobya bitusakila Yehova kulonga, tukekala na mutyima wa kulonga’byo.

4. Le kulangulukila pa bimfwa bya mu Bible kusa kwitukwasha namani?

⁴ Potusaka kwingidila Yehova, bantu bamo babwanya kwitufutulula, ne kwitulwa bininge shi tubashilula kupwila na bantu bandi. Inoko, shi tukulupile mudi Yehova, aye kaketwelapo nansha dimo. Tukāla kyalwilo kikomo kya kupwana na Leza mu būmi bwetu bonso. Le bine tubwanya kuyuka Yehova senene? Bine, tubwanya! Bimfwa bitushidile bantu ba kubulwa kubwaninina, pamo bwa Mosesa ne Mulopwe Davida, bilombola’mba bibwanika. Potulangulukila pa bintu byobālongele, tusa kulondolola bino bipangujo bibidi: Le bāyukile Yehova namani? Ne i ñeni’ka yotubwanya kuboila ku bimfwa byabo?

5. Le Mosesa wākwete butyibi’ka?

⁵ Mosesa wāingidije byobya byaēfundile. Paādi na kintu kya myaka 40, Mosesa wākwete butyibi bwa kwilunga na bantu ba Leza, Bahebelu, pa kyaba kya kuyukana bu “mwana wa mwanā Felo mwana-mukaji.” (Bah. 11:24) Mosesa wāpelele kitenta kya ntumbo. Pa kwilunga na Bahebelu bādi bapika mu Edipito, wākelele Felo bulobo, mulopwe mukomokomo wādi umonwa bu leza. Bine, kino i kilongwa kikatampe kya lwitabijo! Mosesa wādi ukulupile mudi Yehova. Kadi kino kikulupiji kyo kyāmukweshe apwane na Leza mu būmi bwandi bonso.​—Nki. 3:5.

6. Le i ñeni’ka yotubwanya kuboila ku kimfwa kya Mosesa?

⁶ Le i ñeni’ka yotuboila’ko? Pamo bwa Mosesa, batwe bonso tudi na butyibi bwa kukwata: Le tukatonga kwingidila Leza ne kwilunga ku bantu bandi? Padi bibwanya kwitulomba kwipāna pa kwingidila Leza, ne kulwibwa na boba kebayukilepo Yehova. Ino shi tukulupile mudi Tata wetu wa mūlu, nabya uketukwasha!

7-8. Le Mosesa wāendelele kwifunda bika?

⁷ Mosesa wāendelele kwifunda ngikadila ya Yehova ne kulonga kiswa-mutyima kya Leza. Kimfwa, pobānenene Mosesa akatambije muzo wa Isalela mu bupika, wābudilwe kikulupiji ne kusapwila Yehova misunsa mivule amba kabwanyapo. Leza wāmulongela bintu na kanye, wākwasha Mosesa. (Div. 4:10-16) Mfulo mfulō, Mosesa wābwanya kusapwila Felo musapu mukomo wa butyibi. Penepo Mosesa wāmona Yehova wingidija bukomo bwandi mwanda wa kupandija bene Isalela, ino waonakanya Felo ne bibumbo byandi pa Dijiba Dityila.—Div. 14:26-31; Ñim. 136:15.

⁸ Mosesa pa kupwa kutambija bene Isalela mu Edipito, abo bādi betompwela kyaba kyonso. Nansha nabya, Mosesa wāmwene kitūkijetyima kikatampe kya Yehova mu muswelo waādi wikele na bantu baānyongolwele mu bupika. (Ñim. 78:40-43) Kadi Mosesa wāmwene kwityepeja kukatampe kwa Yehova kitatyi kyaānenene Leza ashinte milangwe yandi.​—Div. 32:9-14.

9. Mungya Bahebelu 11:27, le kipwano kya Mosesa na Yehova kyādi namani?

 ⁹ Pa kupwa kwa divilu, Mosesa wāpwene na Yehova bininge enka na aye wāmwene Shandi wa mūlu. (Tanga Bahebelu 11:27.) Bible ulombola mwine mwādi mwikadile kino kipwano kya pa bula’mba: “Yehova wesambile na Mosesa mpala na mpala, enka mwisambilanga muntu na muntu mukwabo.”​—Div. 33:11.

10. Le i bika byotufwaninwe kulonga pa kuyuka Yehova senene?

¹⁰ Le i ñeni’ka yotuboila’ko? Pa kuyuka Yehova senene, tufwaninwe kwifunda ngikadila yandi ne kulonga kiswa-mutyima kyandi. Kiswa-mutyima kya Yehova dyalelo i kino amba, “bantu ba miswelo yonso bapande ne kwikala na buyuki bwinebwine bwa bubine.” (1 Tm. 2:3, 4) Muswelo umo otuloñanga kiswa-mutyima kya Leza i kufundija bakwetu myanda ya Yehova.

11. Le kufundija bakwetu myanda ya Yehova, kwitukwashanga namani tumuyuke senene?

¹¹ Divule dine, tuyukanga Yehova senene kitatyi kyotufundija bakwetu yandi myanda. Kimfwa, twimwenanga kanye ka Yehova paetuludikila ku bantu ba mityima miyampe. (Yoa. 6:44; Bil. 13:48) Twimwenanga bukomo bwa Kinenwa kya Leza potumona boba botwifunda nabo baleka bibidiji bibi, bashilula kuvwala bumuntu bupya. (Kol. 3:9, 10) Kadi twimwenanga kitūkijetyima kya Leza kitatyi kyapa bantu bavule ba mu wetu mwaba mikenga ya kwifunda yandi myanda amba bapande.​—Loma 10:13-15.

12. Mungya Divilu 33:13, le Mosesa wālombele bika, ne mwanda waka?

¹² Mosesa kādipo umwene kipwano kyandi na Yehova bu kintu kya bituputupu. Nansha paālongele bingelengele mu dijina dya Leza, Mosesa wālombele na bulēme bamukwashe ayuke Yehova senene. (Tanga Divilu 33:13.) Mosesa wādi na myaka 80 ne musubu paālombele bamukwashe, ino wādi uyukile amba ukisakilwa kwifunda bivule padi Shandi wa buswe udi mūlu.

13. Le i muswelo’ka umo otubwanya kulombola’mba tukwete na bulēme kipwano kyotupwene na Leza?

¹³ Le i ñeni’ka yotuboila’ko? Nansha shi ketudi bengidile Yehova kitatyi kilampe, ketufwaninwepo kumona kipwano kyotupwene nandi bu kintu kya bituputupu. Muswelo umo otubwanya kulombola’mba tukwete na bulēme kipwano kyotupwene na Leza, i kwisamba nandi mu milombelo.

14. I kika kinenenwa’mba milombelo idi na mvubu pa kuyuka myanda mivule padi Leza?

¹⁴ Mīsambo miyampe iningijanga bulunda. Nanshi fwena kudi Leza na kulombela kyaba kyonso, kokatyina kumulombola milangwe yodi nayo munda. (Ef. 6:18) Krista, ushikatanga mu Tirki unena’mba: “Buswe bonsenswe Yehova ne kikulupiji kyomukulupile bivudilanga’ko kitatyi kyonso kyomulombola milangwe yami mu milombelo, kupwa namumona unkwasha. Kumona muswelo ulondolola Yehova milombelo yami i kunkwashe mone Yehova bu Tata kadi Mulunda nami.”

15. Le Yehova wātelele Mulopwe Davida namani?

¹⁵ Mulopwe Davida wābutwidilwe mu muzo wādi mwipāne kudi Yehova Leza. Inoko, Davida wālongele bivule kupita’ko kulonda bitupu bibidiji bya butōtyi bya kyabo kisaka. Wāpwene aye mwine na Leza, Yehova nandi wāmusanswa kisanso kikatampe. Yehova mwine  wātelele Davida bu “muntu wa mwendele mutyima [wandi].” (Bil. 13:22) Le Davida wāpwene na Yehova bininge namani?

16. Le Davida pa kubandila bupangi, wēfundile bika padi Yehova?

¹⁶ Davida wēfundile myanda ya Yehova kupityila ku bupangi. Davida paādi nkasampe, wādi upityija mansá mavule mu ntanda, ulama mikōko ya shandi. Padi i mu kino kitatyi kyaāshilwile kulangulukila pa bintu bilongele Yehova. Kimfwa, Davida paādi ubāla meso bufuku, wādi umona ñenyenye mivule, kadi wājingulwile ne ngikadila ya Mwine wiipangile. Kino kyālengeje Davida alembe amba: “Madiulu asapulanga ntumbo ya Leza; diulu dya mūlu dilombolanga mingilo ya makasa andi.” (Ñim. 19:1, 2) Davida pa kulangulukila pa muswelo upangilwe bantu, wāmwene amba Yehova udi na tunangu twa kutendelwa. (Ñim. 139:14) Davida pa kulonga bukomo bwa kwivwanija mingilo ya Yehova, wētyepeja.​—Ñim. 139:6.

17. Le i bika byotubwanya kwifunda kitatyi kyotulangulukila pa bupangi?

¹⁷ Le i ñeni’ka yotuboila’ko? Tulangulukilei pa bupangi. Kokikala bitupu mu ino ntanda miyampe ipangile Yehova; sangela’yo bininge! Mu būmi bobe bwa difuku ne difuku, langulukila pa byobya bikufundija bupangi padi Yehova, kimfwa mityi, banyema, ne bantu. Nabya difuku dyonso ukefunda bintu bivule padi Shobe wa buswe. (Loma 1:20) Kadi difuku ne difuku ukamona’mba buswe bomusenswe bwendanga buvudila’ko.

18. Mungya Ñimbo ya Mitōto 18, le Davida wāyukile bika?

¹⁸ Davida wāyukile amba Yehova umukwashanga. Kimfwa, Davida paākingile mikōko ya shandi ku ntambo ne uluse, wājingulwile amba Yehova wāmukweshe anekenye bano banyema ba budyani. Paānekenye kampangala Ngodiata muntu wa bulwi, Davida wāmwene patōkelela’mba i Yehova wāmuludikile. (1 Sa. 17:37) Kadi paādi unyema Solo mulopwe wa mukao, Davida wāyukile amba i Yehova wāmupandije. (Ñim. 18, bilembwa bya kūlu) Muntu wa mitatulo wādi ubwanya kwitumbika pa bino byonso’bi. Inoko Davida wādi mwityepeje, o mwanda wābwenye kuyuka’mba i Yehova wāmukweshe mu būmi bwandi.​—Ñim. 138:6.

19. Le i ñeni’ka yotubwanya kuboila ku kimfwa kya Davida?

¹⁹ Le i ñeni’ka yotuboila’ko? Tufwaninwe kulonga bivule kupita’ko’tu kulomba Yehova etukwashe. Tufwaninwe ne kulonga bukomo bwa kuyuka kitatyi ne muswelo waetukwasha. Shi tuyuke mikalo yetu na kwityepeja, tukamona patōkelela’mba Yehova witukwashanga tulonge bintu byoketwadipo ba kubwanya kulonga. Kadi kitatyi kyonso kyotumona Yehova witukwasha, kipwano kyotupwene nandi kikaningila’ko. Isaac, tutu wa mu Fidji ke mwingidile Yehova myaka mivule, nandi witabija uno mwanda. Unena’mba: “Kitatyi kyonangulukila pa būmi bwami, monanga munkwashishe Yehova tamba ponashilwile kwifunda Bible kufika ne dyalelo. Kadi kino i kinkwashe mone amba Yehova udi’ko bine.”

20. Le i ñeni’ka yotubwanya kuboila ku kipwano kya Davida na Leza?

²⁰ Davida wāiwile ngikadila ya Yehova. Yehova i mwitupange na bukomo bwa kwiula ngikadila yandi. (Ngo. 1:26) Potwenda twifunda ngikadila ya Yehova, tukabwanya kumwiula senene. Davida wāyukile Shandi wa mūlu senene,  o mwanda wābwenye kumwiula mu muswelo waādi wikele na bakwabo. Tala’tu bidi kimfwa kimo. Davida wālubīle Yehova paālongele makoji na Bafesheba ne kwipaija wandi mulume. (2 Sa. 11:1-4, 15) Ino Yehova wāfwidile Davida lusa, muntu wāfwidile bakwabo lusa. Davida byaādi upwene bininge na Yehova uno muswelo, wāikele ke mulopwe wa Isalela obādi basenswe bininge, kadi Yehova wāmutūla bu kimfwa kya kulondela’po balopwe bakwabo ba Isalela.​—1 Ba. 15:11; 2 Ba. 14:1-3.

21. Mungya Bene Efisesa 4:24 ne 5:1, le i bika byotukamwena mu ‘kwiula Leza’?

²¹ Le i ñeni’ka yotuboila’ko? Tufwaninwe ‘kwiula Leza.’ Ketumwenangapo’tu enka mu kumwiula, ino kadi kumwiula kwitukwashanga tumuyuke. Shi twiule ngikadila yandi, tukalombola’mba twi bandi bana.​—Tanga Bene Efisesa 4:24; 5:1.

22-23. Le bikekala namani shi twingidija myanda yotwifunda padi Yehova?

²² Monka motwekimwena, Yehova wilombolanga kotudi kupityila ku bupangi ne ku Bible, Kinenwa kyandi. Mu Bible mudi bimfwa bivule bya bengidi ba Leza ba kikōkeji botubwanya kwiula, pamo bwa ba Mosesa ne Davida. Yehova ke mwipwile’mo lwandi. Pano ke batwe ba kupūtula meso, kutebeka matwi ne kumushitwila mutyima.

²³ Ketukalekapo nansha dimo kwifunda myanda ya Yehova. (Mus. 3:11) Kintu kya mvubu ke buvulepo bwa bintu byotuyukile pādi, ino i byobya byotulonga na buyuki bwetu. Shi twingidija byobya byotwifunda ne kulonga bukomo bwa kwiula Tata wetu wa buswe, nandi uketufwena nyeke. (Yak. 4:8) Aye witukulupija kupityila ku Kinenwa kyandi amba, kakelapo nansha dimo boba bamukimba.