Mary ne wandi mulume John, a bashikatanga mu ntanda mwiyanga kwingidila bengidi bavule ba mu Filipine, kadi basangelanga kwibasapwila myanda miyampe. Mu kitatyi kya kipupo kya Corona, Mary washilwile bifundwa bya Bible mu yabo ntanda ne mu matanda makwabo. Le wabwenye’byo namani?

Mary wadi wipangula baadi wifunda nabo Bible amba, “Le uyukile’ko muntu mukwabo ubwanya kusangela kwifunda Bible?” Shi abalondolola’mba en-en, wadi wibepangula shi babwanya kumukwasha esambe nabo. Kwipangula’tu kino kipangujo kipēla kwalupwile divule bipa biyampe. Mwanda waka? Mwanda divule bantu basangela Kinenwa kya Leza, basakanga kusapwila ba mu byabo bisaka ne balunda nabo myanda yobefunda. Le bantu badi befunda na Mary balongele’po namani paebepangwile kino kipangujo?

Jasmin wadi wifunda Bible na Mary wamufikije ku bantu bakwabo baná. Mary washilula kwifunda nabo Bible. Kristine, umo mu bano’ba, wasangedile bininge byaadi wifunda wanena Mary anze kwifunda nandi misunsa ibidi ku yenga. Mary paamwipangwile shi uyukile’ko muntu mukwabo ubwanya kusangela kwifunda Bible, Kristine wanena’mba, “En-en, nsa kukufikija ku balunda nami.” Mayenga matyetye pa kupita’po, Kristine wafikija Mary ku balunda nandi baná badi basaka kwifunda. Mwenda mafuku, Kristine wamufikija ku balunda nandi bakwabo, bamo mobadi nabo bamufikija ku bantu bakwabo badi basangela kwifunda Bible.

Kadi Kristine wasakile kisaka kyandi mu Filipine kīfunde myanda ya mu Bible. O mwanda wesambile na wandi mwana nsongwakaji, Andrea. Dibajinji, Andrea wadi ulanga’mba, ‘Batumoni ba Yehova i katangotango ka mutōtelo, kebetabijepo mudi Yesu. Kadi bengidijanga enka Kipwanino Kikulu.’ Inoko pa kupwa’tu kwifunda musunsa umo, wajingulula’mba byaadi ulanga i bya bubela. Kitatyi kyonso kyaadi wifunda bintu bipya mu Bible, wadi unena’mba, “Byadi i Bible unena namino, i bya bine!”

Kitatyi kampanda pa kupita’po, Andrea wafikija Mary ku balunda nandi babidi ne mwingidi nandi umo, bene bashilwile kwifunda Bible. Kadi, Mary papo kuyuka mpika, nanshi Angela mama-nkaji mpofu wa Andrea wadi uteja pobadi befunda. Ebiya difuku dimo, Angela wanena Andrea shi ubwanya kwisamba na Mary mwanda wa anze nandi kwiya kumufundija Bible. Angela wasangedile bininge byaadi wifunda. Mu kweji’tu umo, wakwatyīle bisonekwa bivule ku mutwe kadi wadi usaka kwifunda misunsa iná ku yenga! Na bukwashi  bwa Andrea, Angela washilwile kutanwa ku kupwila yenga ne yenga kupityila ku zum.

Mary paajingulwile amba Joshua mulumya Kristine wadi ushikatyila dya kubwipi kitatyi kyobadi befunda na Kristine, Mary wamwityile āye atanwe pobefunda shi uswile. Joshua wanena’mba, “Nsa kuteja bitupu, inoko kokangipangula kipangujo nansha kimo; shi ungipangule kipangujo, nsa kutaluka’po.” Papityile’tu minite itano, Joshua waipangula bipangujo bivule kupita ne Kristine kadi wasakile kwendeleja kwifunda Bible.

Kipangujo kipēla kya Mary kyamukweshe asokole bifundwa bivule. Kadi waabenye bavule mobadi ku Batumoni bakwabo mwanda wa befunde nabo Bible. Pa byonso, Mary washilwile bifundwa 28 mu matanda aná.

Jasmin, kifundwa kibajinji kyatelwanga mu uno mwanda mumweke, wabatyijibwe mu Kweji 4, 2021. Kristine wabatyijibwe mu Kweji 5, 2022 ne kujokela mu Filipine mwanda wa kwikala pamo kyabo kisaka. Bifundwa bikwabo bibidi byafikije Kristine kudi Mary, nabyo byabatyijibwe. Angela wabatyijibwe myeji mityetye pa kupita’po, kadi pano wingilanga bu pania wa lonso. Joshua mulumya Kristine ne Andrea wabo mwana nsongwakaji, pamo ne bifundwa bikwabo bivule bendelelanga biyampe.

Mu myaka katwa kabajinji, myanda miyampe yāsambakene bukidibukidi mu bantu ba mu bisaka ne balunda. (Yoa. 1:​41, 42a; Bil. 10:​24, 27, 48; 16:​25-33) Nanshi ubwanya kwipangula boba bowifunda nabo Bible ne bantu bakwabo basangela musapu amba, “Le uyukile’ko muntu mukwabo ubwanya kusangela kwifunda Bible?” Kwipangula’tu kino kipangujo kipēla kubwanya padi kukukwasha nobe usokole bantu bavule basangela kwifunda Bible.