1. Lelo i bika bifwaninwe kujingulula bambutwile bene Kidishitu kumeso kwa wabo mwana kubatyijibwa?

“NADI nsapwila ba Tata ne Mama mu bula bwa myeji amba nsakanga kubatyijibwa, nabo badi kebesambila nami divule pa myanda ya lubatyijo. Badi basaka kujingulula shi kendi mwivwanije amba butyibi bwami i busumininwe. Mu mafuku 31 Kweji 12, 1934, mu dino difuku dya kasekuseku mu bwami būmi ye monabatyijibwe.” Ino i nsekununi ya Blossom Brandt ya bintu byalongekele paepēne ne kubatyijibwa. Dyalelo nadyo, bambutwile bafwaninwe kukwasha babo bana bakwate butyibi bwa tunangu. Shi mwana ulejaleja pa kubatyijibwa pampikwa bubinga bwendele’mo, nabya kino kibwanya kōna kipwano kyandi na Yehova. (Yakoba 4:17) Kumeso kwa mwana kubatyijibwa, bambutwile ba tunangu bafwaninwe kujingulula’mba wabo mwana i mubwanye bisakibwa bya kwikala mwanā bwanga wa Kidishitu.

2. (a) Lelo i myanda’ka yajingulwile batadi ba bipindi bamo? (b) Lelo i bika byotusa kubandaula mu kino kishinte?

 ² Batadi ba bipindi bamo bajingulwile amba bankasampe bavule ba myaka isenselela ku 13 kutūla ne ku 20 ne musubu kebaikele kubatyijibwa, nansha byobatamīne mu bubine. Kyaba kyonso bano bankasampe batanwanga ku kupwila, batambila mu busapudi, ne kwimona abo bene bu Batumoni ba Yehova. Inoko, pa bubinga kampanda kebaikele kwipāna abo bene kudi Yehova ne kubatyijibwa. Kyaba kimo, i bambutwile balañanga’mba babo bana kebabwenye bisakibwa bya kubatyijibwa. Mu kino kishinte tusa kwisambila’mo pa myanda iná, mine ilengeja bambutwile bamo baleke kukankamika babo bana mwanda wa kubatyijibwa.

3. Lelo i bika byadi bilangalanga bambutwile ba Blossom?

³ Bambutwile ba Blossom utelelwe mu musango mubajinji, badi balangalanga shi wabo mwana ke mutame pa kwivwanija mvubu ya lubatyijo ne molwikadile bu mwanda musumininwe. Lelo bambutwile babwanya kuyuka namani amba wabo mwana ke mubwanye bisakibwa bya kwipāna aye mwine kudi Yehova?

4. Lelo musoñanya wa Yesu udi mu Mateo 28:19, 20 ubwanya kukwasha namani bambutwile dyalelo?

⁴ Tanga Mateo 28:19, 20. Bible katelelepo myaka ya kubatyijibwa nayo muntu. Inoko i biyampe bambutwile balangulukile na katentekeji pa mushintulwila kulonga bana ba bwanga. Bishima bya Kingidiki “mukalonge bana ba bwanga” bingidijibwe mu Mateo 28:19 bifunkila pa kufundija muntu na kitungo kya kumukwasha ekale mwifundi, nansha mwanā bwanga. Mwanā bwanga i muntu wifunda ne kwivwanija byobya byāfundije Yesu, ne usaka kumukōkela. O mwanda tamba’tu kitatyi kibutulwa babo bana, bambutwile bafwaninwe kwibafundija na kitungo kya kwibakwasha bepāne abo bene kudi Yehova ne kwikala bana ba bwanga ba Kidishitu. Na bubine, bana ba lukeke kebabwanyangapo bisakibwa bya kubatyijibwa. Inoko, Bible ulombola’mba enka ne bana batyetye bene babwanya kwivwanija ne kusanswa bubine bwa mu Bible.

5, 6. (a) Lelo myanda itala Temote ilembelwe mu Bible itulengeja tufule ku kunena bika pa lubatyijo lwandi? (b) I muswelo’ka mulumbuluke ubwanya bambutwile ba tunangu kukwasha’mo babo bana?

⁵ Temote i mwanā bwanga wākwete butyibi bwa kwingidila Yehova tamba’tu ukidi nkasampe. Mutumibwa Polo wānenene amba Temote wāshilwile kwifunda bubine bwa mu Kinenwa kya Leza “tamba ku bwanuke.” Shandya Temote kādipo wingidila Yehova, inoko inandi ne nkambo wandi bākweshe Temote asanswe Kinenwa kya Leza. Mfulo mfulō, wāikala na lwitabijo lukomo. (2 Temote 1:5; 3:14, 15) Bimweka bu wādi na myaka isenselela ku 20 nansha ne musubu paābwenye bisakibwa bya kupebwa madyese a pa bula mu kipwilo.​—Bilongwa 16:1-3.

⁶ Bana bonso i beshile. Ke bonsopo batamanga ku mushipiditu na myaka imo. Bana bamo bevwanijanga bubine, bakwata butyibi bwa tunangu, ne kusaka kubatyijibwa pobakidi bankasampe. Bakwabo kebabwanyangapo bisakibwa bya kubatyijibwa kufika’nka ne byobatama’ko. Bambutwile ba tunangu kebaningilangapo babo bana babatyijibwe. Inoko, bakwashanga mwana ne mwana endelele pampikwa kumusukuma. Bambutwile basangalanga palonda babo bana madingi adi mu Nkindi 27:11. (Tanga.) Inoko kebafwaninwepo kwilwa’mba kitungo kyabo i kya kukwasha babo bana bekale bana ba bwanga. Na uno mwanda mu ñeni, bafwaninwe kwiipangula’mba, ‘Lelo wetu mwana ke mubwanye bisakibwa bya kwipāna aye mwine kudi Leza ne kubatyijibwa?’

7. Lelo muntu ufwaninwe kuyuka kanda ne kanda ka bufundiji bwa mu Bible ebiya kabatyijibwa? Shintulula.

⁷ Bambutwile pobafundija babo bana, bebakwashanga bayuke senene bubine. Buno buyuki bukatonona bana bepāne abo bene kudi Leza. Inoko kino kekishintululapo amba mwana ufwaninwe kuyuka kanda ne kanda ka bufundiji bwa mu Bible kumeso kwa kwipāna ne kubatyijibwa. Mwanā bwanga yense wa Kidishitu ufwaninwe kwendelela na kwifunda enka ne pa kupwa kubatyijibwa pene. (Tanga Kolose 1:9, 10.) Penepa, le muntu ufwaninwe kwikala na buyuki bwa ludingo’ka kumeso kwa kubatyijibwa?

8, 9. Lelo i bika byāfikile mulami umo wa kifungo mu Fidipai, ne i ñeni’ka yotubwanya kuboila ku ino myanda?

⁸ Myanda yēmwenine kisaka kimo kya pa kala ibwanya kukwasha bambutwile dyalelo. (Bilongwa 16:25-33) Mu mwaka wa 50, Polo wāendele mu kibundi kya Fidipai mu lwendo lwandi lwa bubidi lwa bu mishonele. Pobāfikile mu kino kibundi, aye ne Shilasa bāponejibwe bya bubela, bākutwa ne kwelwa mu kifungo. Pa bukata bwa bufuku, kwāikala kutenkana kukatampe kwa ntanda, kwine kwālengeje bibelo byonso bya kifungo bishituke. Mulami wa kifungo pa kulanga’mba bakutwa bonso abanyema, wādi kasake kwiipaya. Inoko Polo wāmukankaja. Penepa ba Polo ne Shilasa kebafundija mulami wa kifungo’wa ne ba mu kisaka kyandi bubine butala padi Yesu. Bāitabije myanda itala padi Yesu yobēfundile ne kujingulula mvubu ya kumukōkela. O mwanda bābatyijibwe pampikwa kulejaleja. Le i ñeni’ka yotubwanya kuboila ku ino myanda?

⁹ Bimweka’mba uno mulami wa kifungo wādi sola mwine Loma mupebwe pasho. Kādipo uyukile Kinenwa kya Leza. O mwanda pa kwikala mwine Kidishitu, wādi ufwaninwe kwifunda bubine bwa kyalwilo bwa mu Bible, kwivwanija byobya bisaka Yehova ku bengidi bandi, ne kukōkela bufundiji bwa Yesu. Byobya byāefundile mu kitatyi’tu kityetye byāmukweshe asake kubatyijibwa. Na bubine, wādi unenwe kwifundila’ko myanda mikwabo pa kupwa kubatyijibwa. Penepa le ukalonga namani shi obe mwana wakusapwila’mba usakanga kubatyijibwa pa mwanda wa buswe bwaswele Yehova ne kusaka kumukōkela? Ubwanya kumuleka akasapwile’mo bakulumpe pa kusaka’mba bakwate butyibi shi i mubwanye bisakibwa bya kubatyijibwa. * (Tala kunshi kwa dyani.) Pamo enka bwa bene Kidishitu bonso babatyijibwe, nandi ukendelela kwifundila’ko myanda mikwabo itala padi Yehova mu būmi bwandi, ne nyeke ne nyeke.​—Loma 11:33, 34.

10, 11. (a) Le i bika bilañanga bambutwile bamo? (b) Lelo na bubine i bika bikakinga mwana?

¹⁰ Bambutwile bamo balañanga’mba i biyampe babo bana babatyijibwe shi abapu masomo ne kusokola kaji kayampe. Padi bano bambutwile bebasakilanga biyampe, ino bafwaninwe kwiipangula’mba: ‘Le kino kikakwasha wami mwana ekale na nsangaji ya bine? Le i kikwatañane na byobya byotwifunda mu Bible? Lelo Yehova witusakilanga twingidije bwetu būmi namani?’​—Tanga Musapudi 12:1.

¹¹ I biyampe kuvuluka’mba ino ntanda ne bintu bidi’mo kebikwatañenepo na byobya bisaka Leza ne na mulangilo wandi.  (Yakoba 4:7, 8; 1 Yoano 2:15-17; 5:19) Kipwano kikomo na Yehova kikakinga mwana ku lupusa lwa Satana, lwa ino ntanda, ne ku mulangilo mubi wa ino ntanda. Shi bambutwile batangidije masomo ne kaji pa kifuko kibajinji, nabya wabo mwana ubwanya kumona’mba bintu bya mu ino ntanda bidi na mvubu mpata kupita kipwano kiyampe na Yehova. Kino i kyaka. A bambutwile ba buswe, lelo musakanga ino ntanda ifundije wenu mwana byobya byoimona’mba byo bikamuletela nsangaji? Muswelo umo kete wa kuloelelwa ne kutana nsangaji ya bine i kutūla Yehova pa kifuko kibajinji mu būmi bwetu.​—Tanga Ñimbo ya Mitōto 1:2, 3.

12. Mwanda waka bambutwile bamo balañanga’mba i biyampe wabo mwana elaije’ko bidi kumeso kwa kubatyijibwa?

¹² Inabana umo washintulwile kine kyakadipo usakila wandi mwana mwana-mukaji abatyijibwe. Wanenene amba, “Bubinga bukatampe, nadi ntyina wami mwana wakapangwa.” Pamo bwa uno kaka, bambutwile bamo balañanga’mba i biyampe wabo mwana elaije’ko bidi kumeso kwa kubatyijibwa kufika ne byatama mwa kwepukila kulonga bilubo bikatampe. (Ngalwilo 8:21; Nkindi 22:15) Bano bambutwile bamonanga’mba shi wabo mwana kabatyijibwepo, nabya kakapangwapo. Ino mwanda waka uno mulangilo i mubi?​—Yakoba 1:22.

13. Shi muntu kabatyijibwe, le kino kilombola’mba kadipo na mambo kudi Yehova? Shintulula.

¹³ Shako, bambutwile kebasakengapo wabo mwana abatyijibwe shi kabwenye bisakibwa bya kupāna būmi bwandi kudi Yehova. Inoko i kilubo kikatampe kulanga’mba mwana kadipo na mambo kudi Yehova shi kabatyijibwe. Mwana wikalanga na mambo kudi Leza tamba’tu kitatyi kyayuka byobya bimonwa na Yehova bu biyampe ne bibi. (Tanga Yakoba 4:17.) Bambutwile ba tunangu kebazozejangapo wabo mwana aleke kubatyijibwa. Nansha shi mwana ukidi mwanuke, bamufundijanga kusanwa byobya bimona Yehova amba i byoloke ne kushikwa byobya byamona’mba i bibi, enka na mobalongela abo bene. (Luka 6:40) Buswe bwa obe mwana bwaswele Yehova bukamukinga ku kulonga bubi bukatampe, mwanda ukekala na mutyima wa kulonga byobya bimona Yehova amba i byoloke.​—Isaya 35:8.

14. Lelo bakulumpe babwanya namani kukwatakanya bukomo bulonga bambutwile?

¹⁴ Bakulumpe babwanya kukwatakanya bukomo bulonga bambutwile na kulombola biyampe bidi mu kwitungila bitungo mu mwingilo wa Yehova. Kaka umo uvuluka byobya byamusapwidile Tutu Russell paadi na myaka isamba. Wanenene amba, “Wesambile nami mu minite 15 pa bitungo bya ku mushipiditu.” I bika byalupukile’ko? Mafuku pa kupita’po, uno kaka waikala bu pania, kadi webwingile mu bula bwa myaka 70 ne kupita! Na bubine, binenwa biyampe kadi bikankamika bibwanya kwikala na lupusa luyampe pa būmi bonsololo bwa muntu. (Nkindi 25:11) Kadi bakulumpe babwanya kwita bambutwile ne babo bana kukwasha ku mingilo ya ku Njibo ya Bulopwe. Babwanya kupa bana mingilo ikwatañene na myaka yabo ne bukomo bwabo.

15. Le bantu bakwabo mu kipwilo babwanya kukwasha bankasampe namani?

¹⁵ Le i muswelo’ka ubwanya kukwasha’ko bantu bakwabo mu kipwilo? I na kuta bankasampe mutyima bya binebine. Kimfwa, jingulula bintu bilonga nkasampe bilombola’mba kipwano kyandi na Yehova kyendanga kininga. Lelo nkasampe walondololanga  biyampe ku kupwila, nansha kupityija kipindi senene ku kupwila kwa mu bukata bwa yenga? Lelo wasapwidile muntu kampanda ku masomo, nansha kukomena ditompo dya kulonga bintu bibi? Shi i amo, nabya kokalejaleja kumufwija’ko! Tubwanya kwitungila kino kitungo kya kwisamba na bankasampe kumeso kwa kupwila ne pa kupwa kwa kupwila. Shi tulonge uno muswelo, nabya bankasampe bakemona’mba badi na mvubu “mu kipwilo kikatakata.”​—Ñimbo ya Mitōto 35:18.

16, 17. (a) Mwanda waka i kya mvubu bankasampe kubatyijibwa? (b) Lelo i nsangaji’ka ibwanya kwikala nayo bambutwile? (Tala kifwatulo ku ngalwilo.)

¹⁶ Dyese dikatampe didi na bambutwile i dya kufundija babo bana kusanswa Yehova. (Ñimbo ya Mitōto 127:3; Efisesa 6:4) Mu muzo wa bene Isalela, bana bādi bapānwa kudi Yehova enka’tu pobabutulwa’pa. Inoko betu bana kebapānwangapo uno muswelo. Nansha bambutwile byobasenswe Yehova ne bubine, kino kekishintululapo amba babo bana nabo bakalonga nabya. Tamba’tu difuku dibutulwa wabo mwana, bambutwile bafwaninwe kwitungila kitungo kya kumukwasha ekale mwanā bwanga, epāne aye mwine kudi Yehova ne kubatyijibwa. Mwanda waka bidi na mvubu kulonga namino? Mwanda muntu mwipāne, mubatyijibwe, ne wingidila Yehova na kikōkeji ukekala na mukenga wa kukapanda pa kyamalwa kikatampe.​—Mateo 24:13.

¹⁷ Kitatyi kyadi kisaka Blossom Brandt kubatyijibwa, bandi bambutwile basakile kujingulula bidi shi ke mubwanye bisakibwa. Abo pa kujingulula’mba ke mubwanye bisakibwa, bakwatakenye butyibi bwandi. Blossom ulombola byobya byalongele shandi bufuku bukya kabatyijibwa amba: “Batwe bonso twafukete mu manwi, kupwa Tata waanza kulombela. Wasapwila Yehova amba udi na nsangaji mikatampe mwanda wa wandi mwana nkasampe mwana-mukaji wakwata butyibi bwa kupāna būmi bwandi kwadi.” Myaka 60 ne musubu pa kupita’po, Blossom wanenene amba: “Na bubine, nkikelwapo nansha dimo bwine bufuku’bwa mu būmi bwami bonso!” A bambutwile, nenu mubwanya kwikala na nsangaji ne kuloelelwa kitatyi kyomumona benu bana bepāna ne kubatyijibwa bu bengidi ba Yehova.