1. Le Yehova umonanga bika mu bantu bandi?

YEHOVA LEZA “uloelelwe bantu bandi.” (Ñim. 149:4) Kino kitusangajanga bininge! Yehova umonanga ngikadila miyampe yotudi nayo, motukekadila mu mafuku a kumeso, kadi witukokelanga kwadi. Shi tumukōkele nyeke, nandi ukekala nyeke pabwipi netu!​—Yoa. 6:44.

2. Mwanda waka bantu bamo bakomenwanga kwitabija’mba Yehova wibasenswe?

² Bantu bamo babwanya kunena’mba, ‘ndyukile amba Yehova usenswe bantu bandi mu kikonge, ino le i bika binkulupija’mba Yehova unsenswe ne ami?’ Le i bika padi bibwanya kulengeja muntu eipangule kino kipangujo? Oksana, * wasusukile bininge pa bwanuke unena’mba: “Nasangele bininge ponabatyijibwe, nashilula ne kwingila bu pania. Ino myaka 15 pa kupita’po, nashilula kuvuluka byaumfikīle pa bwanuke. Nashilula kulanga’mba Yehova kakingitabijepo, ne amba nkifwaninwepo kuswibwa nandi.” Yua, kaka umo pania wasusukile nandi pa bwanuke unena’mba: “Napēne būmi bwami kudi Yehova, mwanda nadi nsaka kumusangaja. Inoko nadi nkulupile amba kabwanyapo kunsanswa nansha dimo.”

3. Le i bika byotusa kwisambila’po mu kino kishinte?

³ Pamo bwa bano bene Kidishitu ba kikōkeji botwatela, nobe usenswe Yehova bininge, inoko padi utatananga buswe bwakusenswe. Mwanda waka ufwaninwe kukulupila’mba ukutele mutyima bya binebine? Le i bika bibwanya kukukwasha ulwe na milangwe mibi? Tutalei malondololo a bino bipangujo.

4. Mwanda waka kutatana buswe bwitusenswe Yehova i kyaka?

⁴ Buswe bwitutononanga tulonge bintu. Shi tukulupile amba Yehova witusenswe ne amba witukwashanga, buno buswe buketutonona tumwingidile na mutyima umo nansha ke mu makambakano. Inoko shi tutatana kuta kwitutele Leza mutyima, ‘bukomo bwetu bukatyepa.’ (Nki. 24:10) Kadi shi tubatyumukwa mutyima ne kuleka kwitabija’mba Leza witusenswe, Satana ukapēlelwa kwitutamba bulwi.​—Ef. 6:16.

5. Le kutatana buswe bwitusenswe Leza, kwafikije bantu bamo ku kulonga bika?

⁵ Bene Kidishitu bamo ba kikōkeji ba mu ano etu mafuku, bazozele ku mushipiditu mwanda’tu wa kutatana. Mukulumpe umo witwa bu James unena’mba: “Nansha byonaingile ku Betele ne kusapula pamo na kipwilo kya ludimi lweni, nadi neipangula shi Yehova wadi usangedile byonso byonadi mulongela. Kyaba kimo nadi neipangula shi Yehova wivwananga milombelo yami.” Eva, kaka udi mu mwingilo wa kitatyi kyonso nandi unena’mba: “Namwene amba kutatana buswe bwitusenswe Yehova i kyaka, mwanda kukakulengeja utatane bintu byonso byomulongela. Kino kikakupwa buya bwa bintu bya ku mushipiditu ne kukupwa nsangaji ya kwingidila Yehova.” Michael, pania wa lonso kadi mukulumpe unena’mba: “Shi kwitabijepo amba Leza ukutele mutyima, ukamupaluka.”

6. Le i bika byotufwaninwe kulonga shi tubaikala na milangwe ya kutatana buswe bwitusenswe Leza?

⁶ Ino myanda ilombola’tu muswelo ubwanya kwitona milangwe mibi ku mushipiditu. Ino i bika byotufwaninwe kulonga shi tubashilula kwikala na milangwe ya kutatana buswe bwitusenswe Leza? Tufwaninwe kwiifundula bukidibukidi! Lomba Yehova akukwashe upingakanye ino “milangwe mivutakane” na ‘ndoe ya Leza itabukile ñeni yonso, mine ikalama mutyima obe ne mifwatakanyo yobe.’ (Ñim. 139:23; kunshi kwa dyani; Fid. 4:6, 7) Kadi vuluka’mba, kudipo bunka. Kudi batutu ne bakaka bakwabo ba kikōkeji balwa na milangwe mibi. Enka ne bengidi ba Yehova ba pa kala nabo bālwile na ino milangwe mibi. Tutalei ñeni yotubwanya kuboila ku kimfwa kya mutumibwa Polo.

7. Le Polo wādi ulwa na makambakano’ka?

⁷ Le kyaba kimo umonanga’mba mingilo ibakuvudila, ne amba kubwanyapo kwiingila yonso? Shi i amo, nabya usa kwivwanija  mwēivwanine Polo. Wādi uzumbija mutyima, ke pa mwandapo wa kipwilo kimo, ino i “pa mwanda wa bipwilo byonso.” (2 Ko. 11:23-28) Le misongo ya zenzeka ikupwanga nsangaji? Polo wāsusukile na “mwiba mu ngitu,” padi yādi i misongo mine yaādi usaka ipwe. (2 Ko. 12:7-10) Le wi mutyumukwe mutyima pa mwanda wa kubulwa kubwaninina kobe? Polo nandi wātyumukilwe’o kyaba kimo. Wēityile aye mwine bu “kimonya-malwa,” mwanda wa kulwa kwaādi ulwa nyeke na kubulwa kubwaninina kwandi.​—Loma 7:21-24.

8. Le i bika byākweshe Polo alwe na makambakano andi?

⁸ Nansha Polo byaātenwe na matompo meshileshile ne makambakano atyumuna mutyima, wāendelele kwingidila Yehova. Le i bika byāmupele bukomo endelele kulonga namino? Nansha byaādi uyukile biyampe amba i wa kubulwa kubwaninina, wādi na lwitabijo lukomo mu kinkūlwa. Wādi uyukile mulao wa Yesu wa amba, ‘ense ulombola lwitabijo mudi Yesu, ukamona būmi bwa nyeke.’ (Yoa. 3:16; Loma 6:23) Na bubine, Polo wādi ubadilwa mu bantu bālombwele lwitabijo mu kinkūlwa. Wādi ukulupile amba, Yehova usakanga kulekela enka ne boba balongele bubi bukatampe shi abesāsa.​—Ñim. 86:5.

9. Le i ñeni’ka yotuboila ku binenwa bya Polo bidi mu Bene Ngalatea 2:20?

⁹ Kadi Polo wāitabije amba Leza umusenswe, kupityila kudi Kidishitu. (Tanga Bene Ngalatea 2:20.) Tala binenwa bileta kikulupiji bidi ku mfulo kwa uno vese. Polo wānenene amba: “Mwanā Leza, waunsenswe ne kwipāna pa mwanda wami.” Polo kālangilepo amba Leza kabwanyapo kumusanswa. Kālangilepo amba, ‘mbwanya kumona kine kyobasanshilwe bakwetu kudi Yehova, ino ami kabwanyapo kunsanswa nansha dimo.’ Polo wāvulwije bene Loma amba: “Potwadi tukidi babipya-mambo, Kidishitu wetufwidile.” (Loma 5:8) I kutupu kintu kibwanya kulengeja Leza aleke kwitusanswa!

10. Le i ñeni’ka yotuboila ku kisonekwa kya Bene Loma 8:38, 39?

¹⁰ Tanga Bene Loma 8:38, 39. Polo wādi ukulupile bya bine amba buswe bwa Leza budi na bukomo. Wālembele amba i kutupu kintu nansha kimo kibwanya “kwitusansanya na buswe bwa Leza.” Polo wādi uyukile amba Yehova wātūkijije muzo wa Isalela mutyima. Kadi wādi uyukile amba Yehova wāmufwidile lusa. Tubwanya kwipipija milangwe ya Polo uno muswelo, ‘Yehova byaātumine wandi Mwana mwanda wa kumfwila, nkidipo na bubinga nansha bumo bwa kutatena buswe bwaunsenswe.’​—Loma 8:32.

11. Nansha Polo byaālongele buno bubi bulembelwe mu 1 Temote 1:12-15, mwanda waka wādi ukulupile amba Leza umusenswe?

 ¹¹ Tanga 1 Temote 1:12-15. Padi kyaba kimo Polo wādi ukambakanibwa na bintu bya pa kala byaālongele. Ke kya kutulumukapo shi wētelele bu kipya-mambo “mutabuke bonso”! Kumeso kwa kuyuka bubine, Polo wāpangilepangile bene Kidishitu mu bibundi bivule, wāeleja bamo mu bifungo ne kwitabija bakwabo bepaibwe. (Bil. 26:10, 11) Fwatakanya’po mwādi mwiivwanina Polo shi wetana na nkasampe mwine Kidishitu wa bambutwile bāipailwe pa mwanda wa aye. Polo wēalakenye pa bilubo byandi, inoko wādi uyukile amba kabwanyapo kushinta bilubo bya pa kala. Wādi witabije amba Kidishitu wāmufwidile, ebiya wālemba na kikulupiji amba: “Pa kanye ka ku buntu bitupu ka Leza kendi mongikadile’mu.” (1 Ko. 15:3, 10) Le i ñeni’ka yotuboila’ko? Itabija’mba Kidishitu wākufwidile, wākushitwila mukenda wa kupwana na Yehova. (Bil. 3:19) Bintu bya mvubu ku meso a Leza i byobya byotulonga pano ne byotukalonga mu mafuku a kumeso, ke bilubopo byotwalongele pa kala, ekale twadi ketudi Batumoni ba Yehova, nansha shi ketwadipo Batumoni.​—Isa. 1:18.

12. Lelo binenwa bidi mu 1 Yoano 3:19, 20 biketukwasha namani kitatyi kyotwimona bu babitupu nansha kebafwaninwepo kusanshibwa?

¹² Kitatyi kyolangulukila pa kufwa kwāfwile Yesu mwanda wa kukupūtyila bubi, ubwanya padi kunena’mba, ‘ami nkifwaninwepo kino kyabuntu kilēme.’ Mwanda waka ubwanya kwiivwana uno muswelo? Mwanda mutyima wetu wampikwa kubwaninina ubwanya kwitongola, kwitulengeja tulange amba twi bantu babitupu, nansha’mba ketufwaninwepo kusanshibwa. (Tanga 1 Yoano 3:19, 20.) Mu bitatyi bya uno muswelo, tufwaninwe kuvuluka’mba “Leza i mukatampe kupita mityima yetu.” Nansha byotubwanya kulanga’mba Yehova ketusenswepo  ne kaketulekelapo, ino Tata wetu wa mūlu witusenswe kadi uketulekela. Tufwaninwe kulonga bukomo bwa kwitabija muswelo witumona Yehova. Pa kino, tufwaninwe kwifunda kinenwa kyandi kitatyi ne kitatyi, kumulomba kitatyi kyonso, ne kupwana na bantu bandi ba kikōkeji. Le i kika kinenenwa’mba kulonga namino kudi na mvubu?

13. Le kwifunda Kinenwa kya Leza, kubwanya kwitukwasha namani? (Tala kapango kanena’mba “ Muswelo Wibakwashanga Kinenwa kya Leza.”)

¹³ Wifunde Kinenwa kya Leza difuku ne difuku, amba uyuke ngikadila milumbuluke ya Yehova. Ukamona’mba ukusenswe bininge. Kulangulukila pa Kinenwa kya Leza difuku ne difuku, kubwanya kukukwasha ulemunune milangwe yobe, ‘ōlole bintu’ mu ñeni ne mu mutyima obe. (2 Tm. 3:16) Mukulumpe umo witwa bu Kevin wadi na milangwe ya kwityepelwa unena’mba: “Kutanga Ñimbo ya Mitōto 103 ne kulangulukila’po, kwaunkweshe ndemunune milangwe yami ne kuyuka bine binangila Yehova.” Eva otwatelanga kala unena’mba: “Ku mfulo kwa difuku, nangulukilanga pa milangwe ya Yehova. Kino kimpanga ndoe ya mutyima ne kuningija lwitabijo lwami.”

14. Le milombelo ibwanya kwitukwasha namani?

¹⁴ Lombela kitatyi ne kitatyi. (1 Ts. 5:17) Bantu babidi bapwene bininge besambanga kitatyi kyonso ne kwilombola mobeivwanina. Ne kipwano kyotupwene na Yehova nakyo, bidi uno muswelo. Kitatyi kyotumulombola motwiivwanina, milangwe yetu, ne makambakano etu mu milombelo, tulombolanga’mba tumukulupile ne amba tuyukile amba witusenswe. (Ñim. 94:17-19; 1 Yo. 5:14, 15) Yua otwatelanga kala unena’mba: “Kitatyi kyonombelanga, nkilombolangapo Yehova enka byamfikilanga mu bula bwa difuku. Nombolanga Yehova bine byonanga ne moneivwanina. Kupwa, nafula ku kumona Yehova bu Tata usenswe bandi bana bya binebine, ke bu mukulupo wa soshete.”​—Tala kapango kanena’mba, “ Le Kodi Mutange’dyo?”

15. Le Yehova ulombolanga namani amba witutele mutyima?

¹⁵ Pwana na balunda ba binebine; mwanda i kyabuntu kikupele Yehova. (Yak. 1:17) Tata wetu wa mūlu i mulombole amba witutele mutyima, i mwitupe kisaka kya ku mushipiditu kya batutu ne bakaka betulombola buswe “kitatyi kyonso.” (Nki. 17:17) Mu mukanda waālembēle bene Kolose, Polo wātelele’mo bene Kidishitu bamobamo bāmukwatakenye, wēbatela bu “nsulo ya busengi bukatampe.” (Kol. 4:10, 11) Enka ne Kidishitu Yesu nandi wākwatakanibwe na balunda nandi, bamwikeulu ne bantu, kadi wāfwija’ko ne kufwija.​—Luka 22:28, 43.

16. Le i muswelo’ka ubwanya kwitukwasha balunda ba binebine tufwene kudi Yehova?

¹⁶ Lelo umwenanga ne pa mfulo mu bukwashi  bukukwasha balunda nobe ba binebine, kyabuntu kikupele Yehova? Kulombola mulunda mutame ku mushipiditu makambakano etu, ke kilombojipo kya buzoze; ino kubwanya kwitukinga. James otwatelanga kala unena’mba: “Kupwana na bene Kidishitu batame ku mushipiditu kunkwashanga bininge. Pondēmenenwanga na milangwe mibi, bano balunda bantejanga na kitūkijetyima ne kumvuluja’mba bansenswe. Bankwashanga mone amba Yehova unsenswe, kadi untele mutyima.” Bine, i biyampe kupwana nyeke na batutu ne bakaka mu lwitabijo!

17-18. Le i ani otufwaninwe kuteja, ne mwanda waka?

¹⁷ Satana usakanga tuleke kulonga bukomo bwa kulonga byoloke. Usakanga tukulupile amba Yehova ketusenswepo, ne amba ketufwaninwepo kukūlwa nandi. Ino monka motwekimwena, buno i bubela.

¹⁸ Yehova ukusenswe. Wi mulēme ku meso andi. Shi umukōkele ukekala “nyeke mu buswe bwandi” pamo bwa Yesu. (Yoa. 15:10) Nanshi kokateja Satana nansha mutyima obe ukutopeka. Ino teja Yehova, mwine umonanga biyampe bidi motudi. Kulupila’mba aye “uloelelwe bantu bandi,” kubadila’mo ne abe!