BATWE bonso tukulupile amba Yehova uludika- nga ne kukwatakanya bantu ku mushipiditu mu ano “mafuku a mfulo.” (2 Tm. 3:1) Inoko i muntu ne muntu udi na kiselwa kya kwitaba ku luno lwito. Tubwanya kudingakanya ngikadilo yotudi’mo na yādi’mo bene Isalela mu ntanda mutuputupu. Bādi bafwaninwe kwitaba ku lwito lwa kimpungidi.

Yehova wānenene Mosesa apunge bimpungidi bibidi bya ndalama mifule mwanda wa “kwita kitango ne pa kutalula nkambi.” (Umb. 10:2) Babitobo bādi bela bimpungidi mu miswelo mishileshile mwanda wa kulombola bantu bya kulonga. (Umb. 10:3-8) Dyalelo nadyo, bantu ba Leza bapebwanga bulombodi mu miswelo mishileshile. Twisambilei’ko bidi pa miswelo isatu ituvuluja muvumino wa bimpungidi bya pa kala. Bantu ba Leza dyalelo betwanga ku bitango bikatampe, batadi batongelwe bafundijibwanga, kadi bulombodi bupebwa bipwilo byonso bushintanga ne kujadikwa.

Kitatyi kyādi kisaka Yehova “kitango kyonso” kibungile ku kibelo kya kutunduka kwa kipema, babitobo bādi bela bimpungidi misunsa ibidi. (Umb. 10:3) Bisaka byonso byādi bitūdile nkambi kufulakula kwa kipema mu bisumpi biná, byādi bivwana kuvuma kwa kimpungidi. Byobya byādi bitūdile nkambi kubwipi na kibelo, byādi padi bitaba bukidibukidi. Bikwabo byādi kulampe nabyo, byādi padi bibalomba kitatyi kilampe ne bukomo buvule pa kufika’ko. Nansha shi byādi namani, Yehova wādi usaka bonso babungakane pamo ne kufundijibwa.

Dyalelo, ketwibungilangapo ku kipema, inoko twi basoñanibwe kwibungila pamo na bantu ba Leza. Twibungilanga pamo ku bitango bya ntanda ne ku binkumenkume bikwabo bya pa bula, kwine kotufundijibwa ne kupebwa bulombodi. Ntanda yonso, bantu ba Yehova bamwenanga mu ino mpangiko. Mu uno muswelo, boba bonso betaba ku luno lwito lwa kwibungila pamo bekalanga na nsangaji. Bantu bamo bendanga ñendo milampe kupita bakwabo. Inoko, boba betaba ku luno lwito betabije amba kulonga bukomo kudi na kamweno.

Le boba badi kulampe bininge na kulongelwa bitango bikatampe nabo bamwenanga’mo? Pa mwanda wa byabusendwe bidi’ko dyalelo, bavule bamwenanga mu ino mpangiko kadi beivwana’nka na abo batenwe ku bitango bikatampe. Kimfwa, mu bupempudi bwa mukendi wa ku kité, batutu ne bakaka makumi-abidi ne kamo ne bantu basangela musapu ba mu Arlit, mu Nijer, kavile katyetye kadi mu Dilungu dya Sahara, belungile ku musambo wa Bénin mwanda wa kulonda mpangiko. Nansha bano banabetu byobadi kulampe,  bemwene bwa abo bebungile pamo na bantu 44 131. Tutu umo walembele amba: “Tubemufwija’ko na mutyima umo pa kwitulunga ku ino mpangiko. Kino kilombola’mba mwitutele mutyima bininge.”

Shi babitobo bene Isalela abaile kimpungidi musunsa umo, “i enka bamfumu, mitwe ya tununu” bādi benda ku pema wa kubungakena’ko. (Umb. 10:4) Mosesa wādi wibapa’ko bulombodi ne kwibafundija. Bino byādi bibakwasha bavuije mingilo yabo mu bisaka byabo. Shi nobe wadi mfumu, mwene wadi wa kulonga bukomo bwa kwenda’ko mwanda wa kufundijibwa?

Dyalelo, bakulumpe mu bipwilo ke ‘bamfumupo’; kadi kebatādilangapo luombe lwa Leza lobalelele. (1 Pe. 5:1-3) Inoko baloñanga bukomo bwa kukumba luombe. O mwanda bendanga lubilo shi abebete kukafundijibwa, kimfwa ku Masomo a Mwingilo wa Bulopwe. Ku ano masomo, bafundijanga’ko bakulumpe mwa kupwijija biyampe myanda mu kipwilo. Kino kibalengejanga batame bininge ku mushipiditu. Nansha shi kwatenwe ku ano masomo, padi nobe ubwanya kumwena’mo pa mwanda wa boba bakatenwe’ko.

Kyaba kimo babitobo bene Isalela bādi baleulula diwi dya kimpungidi. Kino kyādi kilombola’mba Yehova usaka nkambi yonso italuke. (Umb. 10:5, 6) Bādi batalula nkambi mu ndudi, inoko muntu ne muntu wādi ulonga bukomo bukatampe. Kyaba kimo bamo bādi padi balejaleja. Mwanda waka?

Padi bamo bādi balanga’mba lwito lwa kutaluka lwādi lwa kyaba ne kyaba kadi lwa mu kitulumukila. “Kyaba kimo dikumbi dyadi dimana’tu tamba kyolwa kutūla ne lubanga kete.” Kyaba kikwabo nakyo dyādi dilonga “mafuku abidi, kweji umo nansha kyaba kilampe” kumeso kwa kutaluka. (Umb. 9:21, 22) Le nkambi yātalwilwe misunsa inga? Mu Umbadilo shapita 33 i mutelwe bifuko kintu kya 40 kwātūdile bene Isalela nkambi.

Kyaba kimo, bamo bādi padi batūla nkambi mu kifuko kya mutalela. Kutūla mu kifuko kya uno muswelo, kwādi kwibasangaja mu “ntanda mutuputupu mikatampe kadi ilenga moyo.” (Kup. 1:19) Inoko, bādi bakokeja kwikala pa ditompo dya kulanga’mba babwanya kuvilukila pa kifuko kibi.

Ponso pādi pashilula kutaluka bisaka, bamo bādi bakomenwa kwilaija kyabo kyaba kya kutaluka. Bonso bādi bevwana kuvuma kwa kimpungidi kileululwe, inoko bonso kebādipo babwanya kutaluka mu kitatyi kimo. Kuvuma kwa kimpungidi kileululwe kwādi kudyumuna bisaka byādi bitūdile nkambi kutunduka, kimfwa kya Yuda, Isakala, ne Zebulone bitaluke. (Umb. 2:3-7; 10:5, 6) Abyo pa kupwa kutaluka, babitobo bādi bavumija bimpundi musunsa wa bubidi mwanda wa kudyumuna bisaka bisatu byādi bitūdile nkambi kunshi. Babitobo bādi bela’nka kwila enka ne bipwa bantu bonso kutaluka.

Padi nobe bikukomenanga kwitabija kushinta kumo kushintwa mu bulongolodi. Padi utyumukwanga mutyima shi kubaikala kushinta kuvule kwa mu kitulumukila. Nansha padi usenswe bintu bimobimo kadi kwadipo usaka bishinte. Nansha bikale namani, ubwanya padi kukomenwa kutūkija mutyima, kadi bilombanga kitatyi pa kwibidila. Inoko, shi tulonge bukomo bwa kwitabija kushinta, ketukabulwepo kumona’mba Leza witweselanga.

Mu mafuku a Mosesa, Yehova wāendeje midiyo ne midiyo ya bana-balume, bana-bakaji, ne bana mu ntanda mutuputupu. Shi kēbendejepo ne kwibakwatakanya, kebādipo ba kupanda. Dyalelo nadyo, tudi biyampe ku mushipiditu mwanda wa Yehova wituludika. Bine, tudi biyampe’po kashā! Nanshi tusumininwe batwe bonso kwitaba ku lwito lwa bimpungidi na mwāitabile bene Isalela ba kikōkeji!