1. Enka na mokilombwedilwe mu 3 Yoano 3, 4, le i bika bitusangajanga?

LANGA’PO bidi mwāsangedile mutumibwa Yoano pawāivwene amba, bantu baakweshe bayuke bubine badi bendelela kwingidila Yehova na kikōkeji! Bēkondele na makambakano mavule, kadi Yoano wālongele bukomo bwa kukomeja lwitabijo lwa bano bene Kidishitu ba kikōkeji baādi umwene bu bandi bana ba ku mushipiditu. Muswelo umo onka, netu tusangalanga shi betu bana, ba ku mushipiditu nansha ba ku ngitu, bepāna kudi Yehova ne kumwingidila nyeke.​—Tanga 3 Yoano 3, 4.

2. Le mikanda yālembele Yoano yādi na kitungo’ka?

² Mu 98 Yesu Ke Mwiye, Yoano wādi padi ushikete mu Efisesa nansha kubwipi na Efisesa. Padi wāvilukīle’ko pa kupwa kukutululwa pa kisanga kya Patamosa. Dya mu kine kitatyi’kya, mushipiditu ujila wa Yehova wāmukweshe alembe mikanda isatu. Kitungo kya ino mikanda kyādi kya kukwasha bene Kidishitu ba kikōkeji balame nyeke lwitabijo lwabo mudi Yesu ne kunangila nyeke mu bubine.

3. Le i bipangujo’ka byotusa kulondolola?

³ Yoano ye mutumibwa wa mfulo wāshele’ko mūmi, kadi wādi utele mutyima bininge ku lupusa lubi lwādi na bafundiji ba bubela mu bipwilo. * (1 Yo. 2:18, 19, 26) Bano batupondo bādi banena’mba bayukile Leza, ino kebādipo bakōkele mbila ya Yehova. Twisambilei pa madingi a ku bukomo bwa mushipiditu āletele Yoano. Potwisambila’po, tusa kulondolola  bino bipangujo bisatu: Le kunangila mu bubine kushintulula bika? Le i bikoleja’ka byotwikondanga nabyo pa kunangila mu bubine? Ne i muswelo’ka otubwanya kwikwasha batwe bene na bene mwa kwikadila nyeke mu bubine?

4. Mungya 1 Yoano 2:3-6 ne 2 Yoano 4, 6, le i bika byotufwaninwe kulonga pa kunangila mu bubine?

⁴ Pa kunangila mu bubine, tufwaninwe kuyuka bubine bwa mu Kinenwa kya Leza, Bible. Ne kadi, tufwaninwe ‘kulama mbila ya Yehova,’ ko kunena’mba, tufwaninwe kwiikōkela. (Tanga 1 Yoano 2:3-6; 2 Yoano 4, 6.) Yesu wāshile kimfwa kibwaninine kya kukōkela Yehova. Nanshi muswelo umo muyampe wa kukōkela Yehova i kulonda senene mu mayo a Yesu.​—Yoa. 8:29; 1 Pe. 2:21.

5. Le i bika byotufwaninwe kukulupila?

⁵ Pa kunangila nyeke mu bubine, tufwaninwe kukulupila’mba Yehova i Leza wa bubine, ne amba bintu byonso byaetulombola mu Kinenwa kyandi, Bible i bya bine. Ne kadi tufwaninwe kukulupila’mba Yesu ye Meshiasa wālailwe. Bantu bavule dyalelo batatananga’mba Yesu ke Mulopwepo mushingwe māni wa Bulopwe bwa Leza. Yoano wādyumwine amba kwadi kwa kwikala “bañongojani bangi,” badi babwanya kongola boba kebadipo beteakenye kubingija bubine bwa myanda ya Yehova ne Yesu. (2 Yo. 7-11) Yoano wālembele amba: “Lelo mbepai i ani, le ke yewapo utuna’mba Yesu ke Kidishitupo?” (1 Yo. 2:22) Muswelo umo kete otubwanya kuleka kongolwa i kwifunda Kinenwa kya Leza. Tukayuka ba Yehova ne Yesu enka shi tubefunde’kyo. (Yoa. 17:3) Kadi tukakulupila’mba tudi na bubine enka shi tubefunde’kyo.

6. Le i kikoleja’ka kikondanga na bankasampe bene Kidishitu?

⁶ Bene Kidishitu bonso bafwaninwe kutadija kutyina bakongolwa na tunangu twa bantu. (1 Yo. 2:26) Nakampata bene Kidishitu bankasampe bafwaninwe kudyumuka dino dikinga. Alexia, * kaka wa myaka 25 wa mu Franse, unena’mba: “Ponadi mwanuke, nadi nkambakanibwa na milangwe ya  ino ntanda, kimfwa lufundijo lwa kwialamuna ne tunangu twa bantu. Kyaba kimo, ino mfundijo yadi insangaja. Inoko namwene amba nkibwanyapo enka kwivwana bintu byadi bifundijibwa ku masomo, ndeke kupa Yehova mukenga wa kumfundija.” Alexia wefundile dibuku La vie : comment est-elle apparue ? Évolution ou création ? Mu mayenga’tu matyetye, waleka’byo kutatana. Alexia ubweja’ko amba : “Nakulupile amba mu Bible mudi bubine. Kadi najingulwile amba kulonda misoñanya idi’mo kukandetela nsangaji ne ndoe.”

7. Le i kuningilwa’ka kotufwaninwe kukomena, ne mwanda waka?

⁷ Bene Kidishitu bonso, bankasampe ne batame, bafwaninwe kukomena kuningilwa kwikala na būmi bwa mapala abidi. Yoano wānenene amba ketubwanyapo kunangila mu bubine koku kadi tulonga bubi. (1 Yo. 1:6) Shi tusaka kwitabijibwa na Leza dyalelo ne mu mafuku a kumeso, tufwaninwe kwiendeja koku tuyukile amba byonso bidi patōka. Ko kunena’mba, i kutupu bubi nansha bumo bufyeme mwanda bintu byonso byotulonga Yehova wibimwene.​—Bah. 4:13.

8. Le tufwaninwe kupela bika?

⁸ Tufwaninwe kupela muswelo umona ino ntanda bubi. Mutumibwa Yoano wālembele amba: “Shi tunene amba, ‘ketudipo na bubi,’ nabya twiongolanga batwe bene.” (1 Yo. 1:8) Mu mafuku a Yoano, batupondo bādi banena’mba muntu ubwanya kulonga bubi ku kusaka koku upwene na Leza. Dyalelo nadyo tushikete na bantu badi na uno mumweno. Bantu bavule banenanga’mba bakulupile mudi Leza, inoko bapela muswelo umona Yehova bubi, nakampata bubi bwa busekese. Byobya bimwene Yehova bu bubi abo bebimwene amba i butongi bwa muntu ne muntu, nansha’mba musakila muntu aye mwine.

9. Le bankasampe bamwenanga namani mu kulamata ku nkulupilo yabo ya mu Bible?

 ⁹ Nakampata bene Kidishitu bankasampe babwanya kwibaningila beule muswelo umona bakwabo ba ku masomo nansha bobengila nabo myanda ya busekese. Kino kyo kyafikile ne Aleksandar. Unena’mba: “Bansongwakaji bamo ku masomo badi baningila tulāle nabo. Banombwele amba shi nkidipo na abala, nabya ndalanga na bana-balume.” Shi wikondanga nobe na ano matompo, vuluka’mba shi ulamate ku nkulupilo yobe ya mu Bible, ukalama bulēme bobe, bukomo bobe bwa ngitu, bwa mu ñeni ne kipwano kyobe na Yehova. Kadi kitatyi kyonso kyokomena ditompo, ukapēlelwa kulonga byoloke. Kadi vuluka’mba mumweno munyengakane obamona busekese mu ino ntanda i mutambe kudi Satana. Nanshi shi upele kwiula bantu ba ino ntanda, ‘ukanekenya yewa mubi.’​—1 Yo. 2:14.

10. Le i muswelo’ka witukwasha 1 Yoano 1:9, twingidile Yehova na mutyima wa mundamunda utōka?

¹⁰ Twitabije amba Yehova udi na lupusa lwa kwitulombola byobya bibi. Kadi tuloñanga bukomo bwa kuleka kulonga bubi. Inoko kitatyi kyotulonga bubi, twisapulanga bilubo byetu kudi Yehova mu milombelo. (Tanga 1 Yoano 1:9.) Kadi shi tubalonga bubi bukatampe, tukimbanga bukwashi ku bakulumpe batongelwe na Yehova mwanda wa kwitutala. (Yak. 5:14-16) Inoko, ketufwaninwepo kwitopeka pa bilubo byetu bya pa kala. Mwanda waka? Mwanda Tata wetu wa buswe wētupele kitapwa kya kinkūlwa kya wandi Mwana mwanda wa tulekelwe bubi bwetu. Yehova paānenene amba ukalekela babipya-mambo besāsa, wālangulukile pa byaānenene. Nanshi i kutupu kintu kibwanya kwitukankaja kwingidila Yehova na mutyima wa mundamunda utōka.​—1 Yo. 2:1, 2, 12; 3:19, 20.

11. Le tubwanya kulama milangwe yetu namani ku bufundiji bukokeja kona lwitabijo lwetu?

 ¹¹ Tufwaninwe kupela Bufundiji bwa batupondo. Tamba ku ngalwilo kwa kipwilo kya bwine Kidishitu, Dyabola wingidijanga bañongojani bavule mwanda wa kukuna kutatana mu milangwe ya bengidi ba Leza ba kikōkeji. O mwanda, tufwaninwe kuyuka mwa kujingulwila kwishila kwishidile bubine na bubela. * Balwana netu babwanya kwingidija Entelenete nansha marezo a mīsambo pa Entelenete mwanda wa kona kikulupiji kyotukulupile mudi Yehova ne buswe botusenswe banabetu. Yuka yewa mwine usonshila luno lunsafwakanwa, ne kwilupela!​—1 Yo. 4:1, 6; Kus. 12:9.

12. Mwanda waka tufwaninwe kufwija’ko bininge pa bubine botwifunda?

¹² Pa kukomena bulwi bwa Satana, tufwaninwe kuningija kikulupiji kyetu mudi Yesu ne kwitabija mwingilo waingila mu mpango ya Leza. Kadi tufwaninwe kukulupila mukola umo kete wingidija Yehova dyalelo. (Mat. 24:45-47) Tuningijanga kikulupiji kyetu na kwifunda Kinenwa kya Leza kitatyi ne kitatyi. Shi tulonge namino, lwitabijo lwetu lukekala pamo bwa mutyi mwāle miji pa nshi. Polo wālombwele uno mwanda kitatyi kyaālembēle kipwilo kya mu Kolose. Wānenene amba: “Monka momwaitabijije Kidishitu Yesu Mfumwetu, nangilai nyeke mu bumo nandi, mwikele bāle miji, bōbakwe mudi aye, kadi bemanije mu lwitabijo.” (Kol. 2:6, 7) I kutupu kintu kibwanya kulonga Satana nansha bantu baludika kikokeja kulengeja mwine Kidishitu akomenwe kuningija lwitabijo lwandi.​—2 Yo. 8, 9.

13. Le i bika byotufwaninwe kutengela, ne mwanda waka?

¹³ Tufwaninwe kutengela kushikibwa na ntanda. (1 Yo. 3:13) Yoano wituvuluja’mba “ntanda yonsololo idi mu lupusa lwa yewa mubi.” (1 Yo. 5:19) Ino ngikadilo ya bintu byoyafwena ku mfulo, Satana wakalabala bininge. (Kus. 12:12) Wingidijanga bulwi bwa munshimunshi, kimfwa kyambo kya busekese ne bubela bwa batupondo. Kadi witupangapañanga patōkelela. Satana uyukile amba kubamushadila kakitatyi katyetye mu bukomo bwalonga bwa kukankaja mwingilo wetu wa busapudi ne kuzozeja lwitabijo lwetu. O mwanda ke kyakutulumukapo shi mwingilo wetu i mukankajibwe ne kupelwa mu matanda mavule. Nansha nankyo, batutu ne bakaka ba mu ano matanda bōmininanga. Bakulupile amba nansha shi mubi etulonge namani, tubwanya kunekenya!

14. Le i muswelo’ka umo otubwanya kukwasha batutu ne bakaka bekale nyeke mu bubine?

¹⁴ Pa kukwasha batutu ne bakaka bekale nyeke mu bubine, tufwaninwe kwibevwanina lusa. (1 Yo. 3:10, 11, 16-18) Ketufwaninwepo kwisanswa enka potudi mu biyampe ino i ne mu makambakano. Kimfwa, le uyukile’ko muntu wafwidilwe muntu wasenswe usakilwa kusengibwa ne kukwashibwa mu miswelo kampanda? Nansha le waivwene amba, banabetu mu lwitabijo bajimije bintu byabo ku kimpengele kya kipangila kadi basakilwa kūbakulwilwa Mobo a Bulopwe nansha mobo abo? Ketulombolangapo buswe ne lusa lukatampe ku batutu ne bakaka enka mu byotunena, ino nakampata i mu byotulonga.

15. Enka munenena’kyo 1 Yoano 4:7, 8, i bika byotufwaninwe kulonga?

¹⁵ Twiulanga buswe bwa Tata wetu wa mūlu shi twisenswe batwe bene na bene. (Tanga 1 Yoano 4:7, 8.) Muswelo umo  wa mvubu otulombolanga buswe i kwilekela batwe bene na bene. Kimfwa, muntu ubwanya kwitusanshija ino wetulomba lusa. Tukalombola buswe shi tubamulekela ne kwilwa kilubo kyandi. (Kol. 3:13) Tutu Aldo watenwe na uno mwanda pawaivwene tutu umo walēmekele unenena kabila kabo bibi. Aldo unena’mba, “Nadi nombela kyaba kyonso Yehova ankwashe ndeke kulangila uno tutu bibi.” Inoko Aldo walongele ne kintu kikwabo. Wanenene uno tutu bakasapule nandi. Pobadi basapula, Aldo wamushintulwila mobyamusanshile. Aldo ubweja’ko amba, “Uno tutu pa kwivwana mwaunsashile binenwa byandi, waunomba lusa. Namwene ku muswelo waadi wisamba amba, wealakanya pa byawanenene. Twaikala balunda, twailwa ne mwanda’wa.”

16-17. Le tufwaninwe kusumininwa kulonga bika?

¹⁶ Mutumibwa Yoano wādi utele mutyima na buswe ku bisakibwa bya ku mushipiditu bya banababo, kadi wālombwele kino kupityila ku madingi awāletele mu mikanda yandi isatu ya ku bukomo bwa mushipiditu. Bine, bikankamika’po kashā pa kuyuka’mba bana-balume ne bana-bakaji pamo bwa aye, bādi bashingwe māni mwanda wa kukabikala pamo na Kidishitu!​—1 Yo. 2:27.

¹⁷ Nanshi tutei mutyima ku madingi otwesambila’po’a. Tusumininwei kunangila mu bubine, na kukōkela Yehova mu myanda yonso ya mu bwetu būmi. Wifunde Kinenwa kyandi, kadi wikikulupile. Ningija lwitabijo lobe mudi Yesu. Pela tunangu twa bantu ne bufundiji bwa batupondo. Komena bantu bakuningila wikale na būmi bwa mapala abidi ne kupela kulonga bubi. Londa misoñanya ya Yehova ya mwa kwikadila. Kadi tukwashei banabetu bekale bakomo na kulekela boba betusanshija ne kukwasha boba basakilwa bukwashi. Nabya, tukanangila nyeke mu bubine nansha byotwikonda na makambakano.