1. Le Yehova i mukulongele bika?

LELO waikele Kamoni wa Yehova namani? Dibajinji, waivwene padi “myanda miyampe” ku bambutwile bobe, kudi mulunda nobe wa ku kaji nansha wa ku masomo, nansha kupityila ku busapudi bwa ku njibo ne njibo. (Mako 13:10) Kupwa muntu umo wetūdila’ko kitatyi ne kulonga bukomo bwa kukufundija Bible. Pomwadi mwifunda, wasenswe Yehova ne kuyuka’mba nandi ukusenswe. Yehova wakukokēle ku bubine, kadi pano pokodi mwanā bwanga wa Yesu Kidishitu, udi na dyese dya kukekala’ko nyeke. (Yoa. 6:44) Na bubine, ufwijanga’ko Yehova pa kwingidija muntu wakufundije bubine ne pa kukwitabija bu mwingidi wandi.

2. Le i bika byotusa kwisambila’po mu kino kishinte?

² Pano potuyukile bubine, tudi na dyese dya kukwasha bakwetu belunge netu mu dishinda ditwala ku būmi. Padi tusapulanga biyampe ku njibo ne njibo, inoko padi tukomenwanga kushilula bifundwa bya Bible ne kwibyendeja. Le nobe ukomenwanga? Shi i amo, padi madingi amo adi mu kino kishinte asa kukukwasha. Tusa kwisambila pa bintu bitulengejanga tukwashe ku mwingilo wa kulonga bana ba bwanga. Kadi tusa kwisambila pa muswelo otubwanya kunekenya makambakano akokeja kwitulengeja twikake kwendeja kifundwa kya Bible. Dibajinji, twisambilei bidi pa kine kyotufwaninwe kwikadila basapudi ne bafundiji ba myanda miyampe.

3. Mwanda waka tusapulanga?

³ Yesu paādi pano pa ntanda, wāpele balondi bandi mwingilo ulomba bintu bibidi. Kibajinji, wēbanenene kusapula myanda  miyampe ya Bulopwe kadi wēbalombola mwa kwiisapwila. (Mat. 10:7; Luka 8:1) Kimfwa, wēbasapwidile bya kulonga shi bantu abapele musapu wa Bulopwe ne bya kulonga shi abewitabija. (Luka 9:2-5) Kadi wālaile amba bakasapwila bantu bavule bininge, ne amba balondi bandi bakasapula “bukamoni ku mizo yonso.” (Mat. 24:14; Bil. 1:8) Ekale shi bantu bāpelele nansha kwitabija musapu, bana ba bwanga bādi banenwe kwibasapwila myanda ya Bulopwe bwa Leza ne byobukalonga.

4. Mungya Mateo 28:18-20, kutentekela pa kusapula myanda ya Bulopwe, le i bika bikwabo byotufwaninwe kulonga?

⁴ Le Yesu wāsoñenye bandi bana ba bwanga kulonga kintu’ka kya bubidi? Wāsapwidile balondi bandi bafundije bantu bakokeja kwikala bana ba bwanga, balame bintu byonso byāebasoñenye. Ino le uno mwingilo wa kusapula ne kufundija wādi utala’nka bene Kidishitu babajinji na munenenanga bantu bamo? Aa, Yesu wālombwele amba uno mwingilo wa kamweno wādi wa kwendelela kwingilwa enka ne mu ano etu mafuku, “kufika ne ku mvuyo ya ngikadilo ya bintu.” (Tanga Mateo 28:18-20.) Mobimwekela, Yesu wāletele uno mwingilo kitatyi kyaāmwekēle bandi bana ba bwanga 500 ne kupita. (1 Ko. 15:6) Kadi mu kusokwelwa kwaāpele Yoano, Yesu wālombwele’mo patōkelela amba bandi bana ba bwanga bonso bafwaninwe kukwasha bantu bakwabo befunde myanda ya Yehova.​—Kus. 22:17.

5. Mungya 1 Bene Kodinda 3:6-9, le Polo wāletele kimfwa’ka kilombola kukwatañana kukwatañene kusapula ne kufundija?

⁵ Mutumibwa Polo wādingakenye mwingilo wa kulonga bana ba bwanga na kukuna nkunwa, kintu kilombola’mba tufwaninwe kulonga bivule kupita’ko kukuna nkunwa bitupu. Wāvulwije bene Kodinda amba: “Ami nakunine, Apolosa nandi wasangila . . . Banwe mwi budimi bwa Leza bukidimwa.” (Tanga 1 Bene Kodinda 3:6-9.) Byotudi bengidi mu “budimi bwa Leza,” ketukunengapo’nka nkunwa kete, ino twiisangilanga mema ne kubandaula kitatyi ne kitatyi moitamina. (Yoa. 4:35) Ne kadi, tuyukile amba i Leza utamijanga’yo.

6. Le kitatyi kyotufundija bantu, tufwaninwe kwibakwasha balonge bika?

⁶ Tukimbanga bantu “badi na mutyima muyampe wa kukamona būmi bwa nyeke.” (Bil. 13:48) Pa kukwasha bano bantu bekale ke bana ba bwanga, tufwaninwe kwibakwasha (1) bevwanije, (2) betabije, ne (3) bengidije bintu byobefunda mu Bible. (Yoa. 17:3; Kol. 2:6, 7; 1 Ts. 2:13) Bantu bonso mu kipwilo babwanya kukwasha boba befunda Bible na kwibalombola buswe ne kwibatundaila biyampe kitatyi kyobāya ku kupwila. (Yoa. 13:35) Yewa wendeja kifundwa ufwaninwe kwitūdila’ko kitatyi ne kulonga bukomo bwa kukwasha yewa wifunda Bible, aleke nkulupilo nansha bilongwa bidi pamo bwa “bishimikwa bikomejibwe.” (2 Ko. 10:4, 5) Padi bibwanya kulomba myeji mivule pa kukwasha muntu ashinte uno muswelo mwanda wa afikile mwenda mafuku pa kitungo kya kubatyijibwa. Inoko kulonga namino kudi na mvubu.

7. Le i bika bitulengejanga tusapule ne kulonga bana ba bwanga?

⁷ Mwanda waka twingilanga mwingilo wa kusapula ne kulonga bana ba bwanga? Dibajinji, i mwanda tusenswe Yehova. Kitatyi kyolonga bukomo bwa kukōkela musoñanya wa kusapula ne kulonga bana ba bwanga, ulombolanga’mba usenswe Leza. (1 Yo. 5:3) Langa’po bidi: Buswe bosenswe Yehova bo bwakulengeje usapule ku njibo ne njibo. Le uno musoñanya wadi upēla kukōkela? Padi kewadipo upēla.  Powasapwile’tu ku njibo mibajinji, le waivwene moyo? Bine, waivwene’o! Inoko wadi uyukile amba uno i mwingilo witusakila Yesu kwingila, ebiya wakōkela uno musoñanya. Kupwa padi mwenda mafuku, byakupēlela kusapula. Le pa mwanda utala kwendeja kifundwa kya Bible napo? Le kukukwatanga moyo? Padi. Inoko shi ulombe Yehova akukwashe uleke kwikala na moyo kadi wikale na bukankamane bwa kushilula kifundwa kya Bible, Yehova ubwanya kukukwasha wikale na mutyima wa kulonga bana ba bwanga.

8. Mungya Mako 6:34, le i bika bikwabo bitulengejanga tufundije bakwetu?

⁸ Dya bubidi, kusanswa bakwetu kwitulengejanga twibafundije bubine. Difuku dimo, Yesu ne bandi bana ba bwanga bākōkele mwanda bāsapwile bininge. Bādi basakilwa kifuko kwa kukōkolokelwa, ino kibumbo kikatampe kya bantu kyebalonda’ko. Yesu pa kwivwanina bano bantu lusa, wāshilula kwibafundija “bintu bivule.” (Tanga Mako 6:34.) Wāingile bininge mu dino difuku. Mwanda waka? Yesu wētūdile pa kyaba kya kino kibumbo kya bantu. Wāmwene amba bādi basusuka, basakilwa lukulupilo, ebiya wāsaka kwibakwasha. Dyalelo bantu badi mu ngikadilo ya uno muswelo, nansha byobamweka’mba badi biyampe mu būmi. Badi pamo bwa mikōko mijimine, yampikwa mukumbi wa kwiikumba. Mutumibwa Polo wātelele bantu ba uno muswelo amba kebadipo na Leza ne na lukulupilo lwine. (Ef. 2:12) Badi mu “dishinda ditwala ku konakanibwa”! (Mat. 7:13) Shi tulangulukile pa muswelo usakilwa bininge bantu ba mu wetu mwaba kuyuka Leza, buswe ne lusa biketulengeja twibakwashe. Kadi muswelo muyampe otubwanya kwibakwasha i kwibanena twifunde nabo Bible.

9. Mungya Bene Fidipai 2:13, le Yehova ubwanya kukukwasha namani?

⁹ Padi wikakanga kushilula kifundwa kya Bible mwanda uyukile amba bikakulomba kitatyi kivule pa kwikyendeja. Shi bidi uno muswelo, lombola Yehova mowiivwanina. Mulombe akukwashe wikale na mutyima wa kusokola muntu wa kwifunda nandi Bible. (Tanga Bene Fidipai 2:13.) Mutumibwa Yoano wētukulupije amba Leza ukalondolola milombelo ikwatañene na kiswa-mutyima kyandi. (1 Yo. 5:14, 15) Nanshi ubwanya kukulupila’mba, Yehova ukakukwasha wikale na mutyima wa kwingila mwingilo wa kulonga bana ba bwanga.

10-11. Le i bika bibwanya kwitulengeja twikake kwendeja kifundwa kya Bible?

¹⁰ Tumwene na mvubu mwingilo wetu wa kufundija, nansha byotwikonda na makambakano abwanya kwitulengeja tukomenwe kulonga bintu bivule mu mwingilo wa kulonga bana ba bwanga. Pano twisambilei’ko bidi pa makambakano amoamo ne pa muswelo otubwanya kwianekenya.

¹¹ Ngikadilo yotudi’mo ibwanya kwitulengeja tukomenwe kulonga bintu bimobimo. Kimfwa, basapudi bamo i banunu nansha padi babelabelanga. Le ye moikadile? Shi i amo, tala ñeni imo yotuboila ku kipupo kya COVID-19. Twamwene amba tubwanya kwendeja biyampe bifundwa bya Bible kupityila ku bingidilwa bya busendwe! O mwanda ubwanya kushilula kifundwa kya Bible ne kwikyendeja abe papo ku yobe njibo. Kadi kudi ne byabuyabuya bikwabo. Bantu bamo badi basaka kwifunda Bible, inoko kebadipo batanwa ku njibo kitatyi kyadi kivudile kusapula banabetu. Ino badi batanwa’ko lubanga bininge nansha ku kyolwa bininge. Le ubulwepo kwifunda na muntu Bible mu kino kitatyi? Yesu wāfundije Nikodema bufuku, mwanda kyo kitatyi kyādi kisaka Nikodema.​—Yoa. 3:1, 2.

12. Le i bintu’ka bitukulupija’mba tubwanya kwikala bafundiji bayampe?

 ¹² Tubwanya padi kwityepelwa’mba ketubwanyapo kwendeja kifundwa kya Bible. Padi tulañanga’mba tufwaninwe kwikala na buyuki nansha na bwino buvule kumeso kwa kufundija muntu Bible. Shi ye molangila, langulukila pa bino bintu bisatu bibwanya kukukwasha. Kibajinji, Yehova ukumwene amba wi mubwanye bisakibwa bya kufundija bakwenu. (2 Ko. 3:5) Kya bubidi, Yesu, mwine udi na ‘lupusa lonso mūlu ne pano panshi,’ i mukusoñanye kufundija. (Mat. 28:18) Ne kya busatu, ubwanya kukulupila’mba bakwenu bakakukwasha. Yesu wādi ukulupile byamufundije Shandi kunena, nanshi nobe kulupila. (Yoa. 8:28; 12:49) Kadi, ubwanya kunena mutadi wa kyenu kisumpi, pania wa bwino, nansha musapudi wa bwino akukwashe ushilule kifundwa kya Bible ne kwikyendeja. Muswelo umo okokeja kwikala mufundiji muyampe i wa kukatanwa pendeja bano basapudi bifundwa bya Bible.

13. Mwanda waka tufwaninwe kwibidila?

¹³ Tubwanya kukomenwa kwibidila manwa mapya ne bingidilwa bipya. Muswelo otwendejanga bifundwa bya Bible i mushinte. Dibuku dyetu dine dya kwifunda’mo na bantu, Ikala Mūmi Nyeke!, ditulomba kuteakanya kifundwa, ne kwikyendeja mu muswelo mwishile na motwadi tulongela mafuku kunyuma. Tutañanga misango mityetye ne kwisamba bivule na yewa otwifunda nandi. Kitatyi kyotufundija, twingidijanga mavideo mavule ne bingidilwa bya busendwe, kimfwa JW Library^®. Shi kuyukilepo mwa kwingidijija bino bingidilwa, nena muntu kampanda ubwanya kukukwasha uyuke mwa kwibingidijija. Batwe bantu twibidile’nka kulonga bintu byotuloñanga kala. Ketupēlelwangapo kwibidila muswelo mupya wa kulonga bintu. Inoko na bukwashi bwa Yehova ne bwa bakwenu, ukapēlelwa kwibidila kadi ukasangela bininge kwifunda na bantu. Pania umo wanenene amba, ano manwa a kwifunda “asangajanga yewa wifunda ne mufundiji mwine.”

14. Le i bika byotufwaninwe kuvuluka kitatyi kyotusapula mu mwaba mupela bantu musapu, ne 1 Bene Kodinda 3:6, 7 witukankamika namani?

¹⁴ Padi tudi mu kifuko mukomene kushilula bifundwa bya Bible. Bantu bamo bapelanga musapu wetu nansha kwiulwa. Le i bika bibwanya kwitukwasha twikale nyeke na mumweno muyampe mu mwaba wa uno muswelo? Vuluka’mba ngikadilo idi’mo bantu ibwanya kushinta lubilo lonka mu ino ntanda ya kavutakanya, kadi boba badi bapela dibajinji musapu babwanya kuyuka mwenda mafuku amba basakilwa kuludikwa na Leza. (Mat. 5:3) Bantu bamo badi bapela mabuku etu pa kala, betabijanga kwifunda Bible mwenda mafuku. Kadi tuyukile amba Yehova ye Mwinē mwangulo. (Mat. 9:38) Usakanga twendelele kukuna ne kusangila mema, ino i Aye wa kutamija’byo. (1 Ko. 3:6, 7) Bine, bikankamika’po kashā pa kuyuka’mba nansha shi ketubwanyapo kwendeja kifundwa kya Bible pano, Yehova witupalanga mpalo pa bukomo botulonga ino ke pa byobyapo bilupuka’ko! *

15. Le Yehova wiivwananga namani kitatyi kitabija muntu kwifunda Bible ne kwingidija byaefunda?

¹⁵ Yehova usangalanga shi wamone muntu witabija bubine bwa mu Bible kadi ufundija’bo bantu bakwabo. (Nki. 23:15, 16) Bine, Yehova usangalanga pamona bantu bandi basapula ne kufundija na bupyasakane dyalelo! Kimfwa,  nansha byokwaikele kipupo ntanda yonso mu mwaka wa mingilo wa 2020, twaendeje bifundwa dya Bible 7 705 765, kadi twakweshe bantu 241 994 bepāne kudi Yehova ne kubatyijibwa. Bano bana ba bwanga bapya nabo bendejanga bifundwa bya Bible ne kulonga bana babwanga bavule. (Luka 6:40) Na bubine, kitatyi kyotwingila mwingilo wa kulonga bana ba bwanga, tusangajanga Yehova.

16. Le i kitungo’ka kiyampe kya kwitungila?

¹⁶ Mwingilo wa kulonga bana ba bwanga i mwingilo mukomo, inoko na bukwashi bwa Yehova tubwanya kufundija bano bapya basanswe Tata wetu wa mūlu. Le tubulwepo kwitungila kitungo kya kushilula kifundwa kya Bible ne kwikyendeja? Kitatyi kyotunena boba botwitana nabo amba twifunde nabo Bible, tubwanya kutulumuka pa bintu bikalongeka. Tukulupilei amba Yehova uketwesela pa bukomo botulonga.

17. Le tukeivwana namani shi tubabwanya kwendeja kifundwa kya Bible?

¹⁷ Bine, tudi na dyese dya kusapula ne kufundija bakwetu bubine! Uno mwingilo witusangajanga bininge. Mutumibwa Polo, mwine wākweshe bantu bavule mu Tesalonika bekale bana ba bwanga, ulombola mwawēivwanine amba: “Le lukulupilo lwetu nansha nsangaji yetu nansha kilukwa kyetu kya kusepelela ku meso a Mfumwetu Yesu mu kitatyi kya kwikala’po kwandi i byepi? Le na bubine ke banwepo? Bine banwe yo ntumbo ne nsangaji yetu.” (1 Ts. 2:19, 20; Bil. 17:1-4) Bantu bavule dyalelo beivwananga uno muswelo. Kaka Stéphanie pamo ne wandi mulume, wakweshe bantu bavule bafikile pa kubatyijibwa. Unena’mba, “i kutupu nsangaji mikatampe itabukile yoya idi mu kukwasha bantu bepāne kudi Yehova.”