LWITABIJO ludi na bukomo bukatampe. Kimfwa, nansha bisakanga Satana kwitwipaya ku mushipiditu, lwitabijo lwitukwashanga tubule “miketo yonso ya mudilo ya yewa mubi.” (Ef. 6:16) Na lwitabijo, tubwanya kukomena makambakano adi pamo bwa lūlu. Yesu wānenene bandi bana ba bwanga’mba: “Shi mudi na lwitabijo lwa bukata bwa luze lwa mutade, mukanena luno lūlu amba, ‘Taluka pano enda kokwa,’ nalo lwataluka.” (Mat. 17:20) Lwitabijo byolubwanya kwitukomeja ku mushipiditu, i biyampe tulangulukile pa bino bipangujo: Le lwitabijo i bika? Le mutyima wetu udi na lupusa’ka pa lwitabijo lwetu? Le tubwanya kukomeja lwitabijo lwetu namani? Ne i mudi bāni motufwaninwe kwitabija?​—Loma 4:3.

Lwitabijo ke kukulupilapo’tu bubine nansha kwibwitabija bitupu, mwanda “ne bandemona nabo betabije [amba Leza udi’ko] kadi batetema ne kutetema.” (Yak. 2:19) Penepa lwitabijo i bika?

Bible ushintulula lwitabijo mu miswelo ibidi. Mubajinji, “lwitabijo i kutengela na kikulupiji byobya bikulupilwe.” (Bah. 11:1a) Shi udi na lwitabijo, ukulupile bininge amba byonso binena Yehova i bya bine kadi bisa kufikidila. Kimfwa, Yehova wālombwele bene Isalela’mba: “Shi banwe mwadi mubwanya kutyiba kipwano kyami kya dyuba ne kipwano kyami kya bufuku, kukankaja dyuba ne bufuku bileke kwiya pa kitatyi kyabyo kifwaninwe, longa kipwano kyami na mwingidi wami Davida kyadi kya kutyibika.” (Yel. 33:20, 21) Lelo udi na moyo wa amba dyuba disa kuleka kutamba ne kupona mu makumbi, ebiya kuleke kwikala bufuku ne dyuba? Shi witabije amba bijila bya kipangila bilengejanga ntanda ijokoloke pa ayo mine ne ku dyuba, le ukatunya kwitabija’mba Mupangi wa bino bijila ubwanya kufikidija biyampe kinenwa kyandi? Nansha dimo!—Isa. 55:10, 11; Mat. 5:18.

Wa bubidi, lwitabijo “i kilomboji kimweke patōka kya bintu bya bine byampikwa kumweka.” Lwitabijo lubatelwa bu “kilomboji kimweke patōka,” nansha bu “bubinga bukulupilwa” bwa bintu kebibwanyapo kumweka na meso abyo’ko bikele’ko. (Bah. 11:1b; kunshi kwa dyani) Namani? Langa’po shi mwana wakwipangula’mba, ‘Le ubayuka namani amba luvula ludi’ko?’ Nansha byokwamwene luvula, ubwanya kukwasha mwana alangulukile pa kilomboji kilombola’mba ludi’ko​—kwesa, kujina kwa bintu, ne bikwabokwabo. Shi mwana waitabija buno bubinga, waitabija kwikala’ko kwa kintu kyakamwenepo. Mu muswelo umo onka, ne lwitabijo nalo lwimanine pa bubinga bukulupilwa.​—Loma 1:20.

Lwitabijo byolwimanine pa bubinga, nanshi pa kwikala na lwitabijo muntu ufwaninwe dibajinji kwikala na “buyuki bwinebwine bwa bubine.” (1 Tm. 2:4) Inoko kekupwilepo. Mutumibwa Polo wālembele amba: “Ku mutyima ko kulombolanga muntu lwitabijo.” (Loma 10:10) Muntu kafwaninwepo kwitabija bubine bitupu, ino i ne kwibumona na mvubu. Shi ebumone na mvubu, nabya ukalombola lwitabijo,  ko kunena’mba kulonga bintu kukwatañana na bubine. (Yak. 2:20) Muntu kadipo na mutyima wa kufwija’ko pa bubine, ubwanya’nka ne kupela bubinga bwa bine shi ulamete na kibengo ku byakulupile nansha shi usaka kubingija bya kusakasaka byandi bya ngitu. (2 Pe. 3:3, 4; Yude 18) O mwanda nansha ke mu kitatyi kyālembelwe Bible, ke bonsopo bēmwenine bingelengele bālombwele lwitabijo. (Umb. 14:11; Yoa. 12:37) Mushipiditu ujila wa Leza upānanga lwitabijo enka ku bantu basenswe bubine.​—Ngt. 5:22; 2 Ts. 2:10, 11.

Mulopwe Davida ubadilwa mu bantu bādi na lwitabijo lwa kutendelwa. (Bah. 11:32, 33) Inoko, ke ensepo wa mu kisaka kya Davida wādi na luno lwitabijo. Kimfwa, difuku dimo Ediabu, tutu wandi mukulu, wābudilwe lwitabijo paāfunine Davida wādi ukimba kulwa na Ngodiata. (1 Sa. 17:26-28) I kutupu ubutulwanga na lwitabijo; kadi i kutupu upyananga’lo ku bambutwile bandi, o mwanda lwitabijo lwa Davida lwātambile ku kipwano kyaādi upwene na Leza.

Mu Ñimbo ya Mitōto 27, Davida ulombola mwawāikadile na luno lwitabijo lukomo. (Vese 1) Davida wālangulukīle pa bintu byāmutene pa kala ne muswelo wāmukweshe Yehova ku balwana nandi. (Vese 2, 3) Wādi usangedile bininge mpangiko ya Yehova ya kumutōta. (Vese 4) Davida wādi utōta Leza pamo na batōtyi bakwabo ku kipema. (Vese 6) Wādi ukimba Yehova na kininga mu milombelo. (Vese 7, 8) Kadi Davida wādi usaka kufundijibwa dishinda dya Leza. (Vese 11) Davida pa kumona’mba ino ngikadila idi na mvubu, wāipangula kino kipangujo kya bututudyatutu amba: “Le nadi wa kwikala kwepi shi nkyadipo na lwitabijo?”​—Vese 13.

Ubwanya kwikala na lwitabijo na lwa Davida shi ulangulukile pa mulangilo ne bibidiji byandi bitelelwe mu Ñimbo ya Mitōto 27. Lwitabijo byolwimanine pa buyuki bwinebwine, shi wifunde bininge Kinenwa kya Leza ne mabuku esambila pa Bible, nabya ukapēlelwa kwikala na ino ngikadila ibadilwa mu kipa kya mushipiditu wa Leza. (Ñim. 1:2, 3) Witūdile’ko kitatyi kya kulanguluka powifunda. Shi tulanguluka, tukekala nyeke na mutyima wa kufwija’ko. Potamija mutyima wa kufwija’ko Yehova, ukasaka kulombola lwitabijo na kumutōta mu kipwilo, ne kusapwila bakwenu lukulupilo lobe. (Bah. 10:23-25) Kadi tulombolanga lwitabijo potwendelela na “kulombela nyeke ne kuleka’byo mpika.” (Luka 18:1-8) Nanshi, ‘lombela kitatyi kyonso’ kudi Yehova, koku ukulupile amba ‘aye ukutele mutyima.’ (1 Ts. 5:17; 1 Pe. 5:7) Lwitabijo luketutonona tulonge’po kintu, kadi bilongwa byetu nabyo bikakomeja lwitabijo lwetu.​—Yak. 2:22.

Kyolwa bukya ke lufu lwandi, Yesu wālombwele bandi bana ba bwanga’mba: “Lombolai lwitabijo mudi Leza; lombolai lwitabijo ne mudi ami.” (Yoa. 14:1) Nanshi tufwaninwe kulombola lwitabijo mudi Yehova ne mudi Yesu. Le  tubwanya kulombola lwitabijo mudi Yesu namani? Twisambilei’ko bidi pa miswelo isatu.

Mubajinji, mona kinkūlwa bu kyabuntu kikupele Leza. Mutumibwa Polo wānenene amba: “Būmi bondi nabo pano mu ngitu ngidi nabo pa lwitabijo mudi Mwanā Leza, waunsenswe ne kwipāna pa mwanda wami.” (Ngt. 2:20) Shi ulombole lwitabijo mudi Yesu, ukakulupila bininge amba kinkūlwa kikutala ne abe, kikukwashanga ulekelwe bubi bobe, kikupanga lukulupilo lwa kukekala na būmi bwa nyeke, kadi i kilomboji kikatampe kya buswe bukuswele Leza. (Loma 8:32, 38, 39; Ef. 1:7) Kino kikakukankamika ufundwile kulampe milangwe mibi.—2 Ts. 2:16, 17.

Wa bubidi, fwena kudi Yehova mu milombelo kupityila mu kitapwa kya Yesu. Pa mwanda wa kinkūlwa, tubwanya kulombela kudi Yehova “pampikwa kafinda, mwanda wa tufwilwe lusa ne kutambula kanye ka ku buntu bitupu ka kwitukwasha pa kitatyi kifwaninwe.” (Bah. 4:15, 16; 10:19-22) Milombelo itukwashanga tusumininwe kukomena ditompo dya kulonga bubi.​—Luka 22:40.

Wa busatu, kōkela Yesu. Mutumibwa Yoano wālembele amba: “Yewa ulombola lwitabijo mudi Mwana udi na būmi bwa nyeke; yewa kakōkelapo Mwana kakamonepo būmi, ino bukalabale bwa Leza budi nyeke pādi.” (Yoa. 3:36) Yuka’mba Yoano wālombwele kwishila kudi pa bukata bwa kulombola lwitabijo ne kubulwa kikōkeji. O mwanda, shi ubakōkela Yesu, ubalombola lwitabijo mwadi. Ukōkelanga Yesu na kulonda “kijila kya Kidishitu,” ko kunena’mba byonso byaāfundije ne byaāsoñenye. (Ngt. 6:2) Kadi ukōkelanga Yesu na kulonda buludiki bwaleta kupityila kudi “umpika mukōkele ne mudyumuke.” (Mat. 24:45) Shi ukōkele Yesu, ukekala na bukomo bwa kūminina makambakano adi pamo bwa kivula.​—Luka 6:47, 48.

Difuku dimo, muntu umo wāelele Yesu lubila’mba: “Ndi na lwitabijo! Nkwashe’ko popa ponsakilwa lwitabijo!” (Mako 9:24) Wādi na lwitabijo mu ludingo kampanda, ino uno muntu wāyukile na butūkanye amba usakilwa lwitabijo luvule. Pamo bwa uno muntu, batwe bonso tukasakilwa lwitabijo luvule mu myanda imoimo. Kadi batwe bonso tubwanya kukomeja lwitabijo lwetu tamba’nka pano. Enka na motwekimwena, tukomejanga lwitabijo lwetu shi twifunda Kinenwa kya Leza ne kulangulukila’po, bine biketulengeja twikale na mutyima wa kufwija’ko Yehova. Kadi tukekala na lwitabijo lukomo shi tutōta Yehova pamo na banabetu mu lwitabijo, tusapwila bantu lukulupilo lwetu, ne shi tulombela na kininga. Ne kadi, shi tukomeje lwitabijo lwetu, tukapalwa mpalo mikatampe mpata. Kinenwa kya Leza kitusoñanya’mba: “A baswedibwe, mwitamijei banwe bene mu lwitabijo lwenu lujila nakampata, . . . amba mwilame mu buswe bwa Leza.”—Yude 20, 21.