1. Le Yehova i mupe mwingidi wandi yense wa kikōkeji bika?

YEHOVA i mupe na buswe mwingidi wandi yense kifuko mu kipwilo kyandi. Nansha byotudi na mingilo mishileshile, batwe bonso tudi na mvubu kadi batwe bonso tudi na buya bwa bakwetu. Mutumibwa Polo witukwasha tuyuke buno bufundiji bwa mvubu. Namani?

2. Mungya Bene Efisesa 4:16, mwanda waka tufwaninwe kwilēmeka batwe bene na bene ne kwingidila pamo?

² Monka mokilembelwe mu kisonekwa kimanine’po kino kishinte, Polo wālombwele patōka’mba i kutupu muntu motudi ubwanya kutala mwingidi mukwabo wa Yehova ne kumunena’mba, “Nkidipo nobe buya.” (1 Ko. 12:21) Shi tusaka mu kipwilo mwikale ndoe, tufwaninwe kwilēmeka batwe bene na bene ne kwingidila pamo. (Tanga Bene Efisesa 4:16.) Shi twingidila pamo mu bumo, buswe bukavula mu kipwilo.

3. Le i bika byotusa kwisambila’po mu kino kishinte?

³ Le i mu myanda’ka motukokeja kulombola’mba tulēmekele bakwetu bene Kidishitu mu kipwilo? Mu kino kishinte, tusa kwisambila pa muswelo ubwanya kwilēmeka bakulumpe abo bene na bene. Kupwa tusa kwisambila pa muswelo otubwanya batwe bonso kulombola’mba tulēmekele batutu ne bakaka kebadipo na benē pabo. Ku mfulo, tusa kuyuka mwa kulombwela’mba tulēmekele boba kebesambepo ludimi lwetu biyampe.

4. Le i madingi’ka a Polo adi mu Bene Loma 12:10 afwaninwe kulonda bakulumpe?

⁴ Bakulumpe bonso mu kipwilo i batongwe na mushipiditu ujila wa Yehova. Inoko, badi na byabuntu ne bwino bwishileshile. (1 Ko. 12:17, 18) Padi bamo batongelwe panopano kadi badi na bwino butyetye. Padi bakwabo nabo kebakibwanyapo kulonga bivule pa mwanda wa bununu ne misongo. Inoko, i kutupu mukulumpe nansha umo ufwaninwe kutala bakulumpe bakwabo ne kwibanena’mba ‘nkidipo nenu buya.’ Ino mukulumpe yense ufwaninwe kulonda madingi a Polo adi mu Bene Loma 12:10.—Tanga.

5. Le bakulumpe balombolanga namani amba balēmekele bakulumpe bakwabo, ne mwanda waka bidi na mvubu belēmeke?

⁵ Bakulumpe balombolanga’mba balēmekele bakulumpe bakwabo shi bebateja senene. Kino kidi na mvubu bininge kitatyi kīsambila kitango kya bakulumpe pa myanda mikatampe. Mwanda waka? Kiteba kya Mulami kya Falanse kya 1 Kweji 10, 1988, kinena’mba: “Bakulumpe bayukile amba Kidishitu, kupityila ku mushipiditu ujila, ubwanya kuludika mukulumpe e-ense mu kitango kya bakulumpe alete musoñanya wa mu Bible usakibwa pa kupwija mwanda kampanda nansha pa kukwata butyibi bwa mvubu. (Bil. 15:6-15) I kutupu mukulumpe uludikwa na mushipiditu kutabuka bakulumpe bakwabo.”

6. Le i muswelo’ka ubwanya bakulumpe kwingidila pamo mu bumo, ne kipwilo kikamwena’mo namani?

⁶ Mukulumpe ulēmekele bakulumpe bakwabo kasakengapo kubadikila nyeke kwisamba mu malenyo a bakulumpe. Katādilangapo mīsambo, kadi kamonengapo amba milangwe yandi i miyampe nyeke. Inoko uletanga milangwe yandi na kwityepeja ne butūkanye. Utejanga senene binena bakwabo. Kya mvubu kutabuka i kino, usakanga kwisambila pa misoñanya ya mu Bisonekwa ne kulonda bulombodi bwa “umpika mukōkele ne mudyumuke.” (Mat. 24:45-47) Shi bakulumpe besambila pa myanda na buswe ne bulēme, mushipiditu ujila wa Leza ukekala nabo ne kwibaludika bakwate butyibi bukankamika kipwilo.—Yak. 3:17, 18.

7. Le Yesu wādi umwene bukungulume ne bukungakaji namani?

⁷ Dyalelo mu kipwilo mudi bantu besongele ne bisaka. Ino kadi mudi ne batutu ne bakaka bavule kebadipo na benē pabo. Le i muswelo’ka otufwaninwe kumona bankungulume ne bankungakaji? Twisambilei bidi pa muswelo wādi umwene Yesu bukungulume ne bukungakaji. Mu mwingilo wandi wa pano pa ntanda, Yesu kāsongelepo. Wādi nyeke nkungulume kadi wādi wingidija kitatyi kyandi ne kuta mutyima ku mwingilo wandi. Yesu kāfundijepo nansha dimo amba bilomba’nka kwisonga nansha’mba bilomba’nka kwikala nkungulume ne nkungakaji. Inoko, wānenene amba bene Kidishitu bamo babwanya kukwata butyibi bwa kuleka kusonga nansha kusongwa. (Mat. 19:11, 12) Yesu wādi ulēmekele boba kebādipo na benē pabo. Kādipo umwene bankungulume ne bankungakaji bu bantu ba munshi nansha’mba kudi kintu kyobabudilwe.

8. Mungya 1 Bene Kodinda 7:7-9, le Polo wākankamikile bene Kidishitu babandaule bika?

⁸ Pamo bwa Yesu, mutumibwa Polo nandi wāvuije ne pa mfulo mwingilo wandi aye papo nkungulume. Polo kāfundijepo nansha dimo amba i bibi mwine Kidishitu kusonga nansha kusongwa. Wādi uyukile amba uno i mwanda utala muntu aye mwine. Inoko, Polo wākankamikile bene Kidishitu babandaule shi babwanya kwingidila Yehova bu bankungulume nansha bankungakaji. (Tanga 1 Bene Kodinda 7:7-9.) Na bubine, Polo kāfutulwilepo bene Kidishitu bankungulume nansha bankungakaji. Ino wātongele nkasampe Temote, tutu nkungulume, engile mingilo mikatampe. * (Fid. 2:19-22) Nanshi bibamweka patōka’mba, ke biyampepo kumona’mba tutu i mubwanye bisakibwa nansha’mba kabwenye’byopo mwanda’tu udi na mwinē pandi nansha’mba kadipo nandi.​—1 Ko. 7:32-35, 38.

9. Le i bika byotubwanya kunena pa kusonga nansha kusongwa ne pa bukungulume ne bukungakaji?

⁹ Ba Yesu ne Polo kēbafundijepo amba bene Kidishitu bafwaninwe kusonga nansha kusongwa, nansha’mba bafwaninwe kwikala bankungulume nansha bankungakaji. Le penepa tunene bika pa kusonga ne kusongwa, ne pa bukungulume ne bukungakaji? Kiteba kya Mulami kya Falanse kya 1 Kweji 10, 2012, kinena biyampe amba: “Na bubine, [kusonga nansha kusongwa ne bukungulume nansha bukungakaji] bibwanya kutelwa bu byabuntu bya Leza. . . . Yehova kamwenepo [bukungulume nansha bukungakaji]  bu kintu kya bumvu nansha kya bulanda.” Shi tulame bino binenwa mu ñeni, nabya tukalēmeka kifuko kya batutu bankungulume ne bakaka bankungakaji mu kipwilo.

10. Le tukalombola namani amba tulēmekele batutu bankungulume ne bakaka bankungakaji?

¹⁰ Le tukalombola namani amba tulēmekele mwiivwanino ne ngikadilo ya batutu ne bakaka bankungulume ne bankungakaji? I biyampe tuvuluke amba bene Kidishitu bamo bankungulume ne bankungakaji i bakwate butyibi abo bene bwa kuleka kusonga nansha kusongwa. Bene Kidishitu bakwabo bankungulume ne bankungakaji basakanga kusonga nansha kusongwa, ino kebasokwele muntu wa kwisonga nandi. Inoko padi bakwabo nabo i bafwilwe benē pabo. Nansha bikale namani, le boba badi mu kipwilo bafwaninwe kwipangula bene Kidishitu bankungulume ne bankungakaji kine kyokebasongēle ne kusongwa, nansha kwibakimbila wa kwisonga nandi? Shako, bene Kidishitu bamo bankungulume nansha bankungakaji babwanya kusaka bebakwashe. Ino shi kebalombelepo bebakwashe, le kukimbila batutu bankungulume ne bakaka bankungakaji bantu ba kwisonga nabo kubwanya kwibalengeja beivwane namani? (1 Ts. 4:11; 1 Tm. 5:13) Twisambilei’ko bidi pa bintu bimo byanenene batutu bankungulume ne bakaka bankungakaji ba kikōkeji.

11-12. Le i muswelo’ka otubwanya kuzozeja bankungulume ne bankungakaji?

¹¹ Mutadi wa kipindi umo kungulume wingila biyampe mwingilo wandi unena’mba, kwikala nkungulume kudi na byabuyabuya bivule. Ino kadi unena’mba byadi binzozeja kitatyi kyadi kingipangula batutu ne bakaka amba: “Mwanda waka kwasongele?” Tutu mukwabo nkungulume wingilanga ku Betele nandi unena’mba: “Kyaba kimo batutu ne bakaka banengejanga nene amba bankungulume badi bya bulanda. Kino kibwanya kulengeja bantu bamone amba bukungulume ne bukungakaji i kiselwa pa kyaba kya kwibumona bu kyabuntu.”

¹² Kaka umo nkungakaji wingilanga ku Betele wanenene amba: “Basapudi bamo balañanga’mba bankungulume ne bankungakaji bonso bakimbanga ba kwisonga nabo, nansha’mba bankungulume ne bankungakaji bonso bamonanga’mba ponso pobetana mu kibumbo kya bantu i mukenga wa kusokola ba kwisonga nabo. Difuku dimo pobantumine kukengila mu kipindi kimo kya yetu ntanda, naendele kukapwila kyolwa. Kaka konadi mfikīle wanombola’mba kudi batutu babidi mu kyetu kipwilo ba yobe myaka. Wankulupija’mba kankimbilangapo mulume. Ino batwe pa kutwela mu Njibo ya Bulopwe, wakamfikija kudi bano batutu babidi. Twakomenwa kya kunena, kadi uno mwanda wetukwata bumvu batwe bonso busatu.”

13. Le i bimfwa’ka byakankamikile kaka umo nkungakaji?

¹³ Kaka mukwabo nkungakaji wingilanga ku Betele unena’mba: “Ndyukile bapania banunu ba nkungulume ne bankungakaji bashimatyije mu lwitabijo, bepāne, basangedile mwingilo wabo kadi bakwasha kipwilo bininge. Badi na mumweno muyampe pa bukungulume ne bukungakaji bwabo, kadi kebemonengapo amba i bapite bakwabo mwanda i bankungulume nansha bankungakaji, nansha kwimona’mba kudi kyobabudilwe mwanda kebadipo na benē pabo ne bana.” Buno bo buya bwa kipwilo mowimona’mba bakulēmekele ne kukumona na mvubu. Kebabwanyapo kukumona bya bulanda nansha kukukwatyilwa mukao, kukusūla nansha kukumona bu mwibapite. Uyukile’tu amba bakusenswe.

14. Le tukalombola namani amba tulēmekele bankungulume ne bankungakaji?

¹⁴ Batutu bankungulume ne bakaka bankungakaji bakafwija’ko shi twibamona na bulēme  pa mwanda wa ngikadila yabo miyampe, ino ke pa bukungulume ne bukungakaji bwabopo. Pa kyaba kya kwibakwatyilwa bulanda, i biyampe kusangala mwanda wa kikōkeji kyabo. Nabya, batutu bankungulume ne bakaka bankungakaji kebakamonepo amba twibanenanga’mba: ‘Ketudipo nenu buya.’ (1 Ko. 12:21) Ino bakamona’mba twibalēmekele ne kusangela kifuko kyabo mu kipwilo.

15. Le bantu bamo bashintyile namani mwanda wa kutandabula mwingilo wabo?

¹⁵ Mu ino myaka, basapudi bavule betungilanga kitungo kya kwifunda ludimi lweni mwanda wa kutandabula mwingilo wabo. Kulonga namino kwibalombanga kushinta. Bano batutu ne bakaka bashiyanga kipwilo kya ludimi lwabo lwa kibutwila mwanda wa kukengila mu kipwilo kya ludimi lweni, kadi musakilwa basapudi bavule ba Bulopwe. (Bil. 16:9) Buno i butyibi butala muntu mwine, bukwatanga bano bene Kidishitu mwanda wa kwendeleja tumweno twa Bulopwe kumeso. Nansha byobibalombanga myaka mivule pa kwisamba biyampe ludimi lweni, bakwashanga kipwilo bininge. Ngikadila yabo miyampe ne bwino bwabo biningijanga kipwilo. Bine, tulēmekele bano batutu ne bakaka bepāne!

16. Le bakulumpe bakabandaula bisakibwa bya batutu ba kwingila bu bakulumpe ne bu bengidi ba mingilo kukwatañana na bika?

¹⁶ Kitango kya bakulumpe kekikalekapo kuyukanya tutu bu mukulumpe nansha bu mwingidi wa mingilo mwanda’po’tu kesambengapo senene ludimi lwa kipwilo. Bakulumpe bakabandaula tutu kukwatañana na bisakibwa bya mu Bisonekwa bifwaninwe kubwanya bakulumpe ne bengidi ba mingilo, ino kekukwatañanapo na muswelo waesamba ludimi lwa kipwilo.​—1 Tm. 3:1-10, 12, 13; Tet. 1:5-9.

17. Le i bipangujo’ka bibwanya kwiipangula bisaka bimo shi bibavilukila mu ntanda-bene?

¹⁷ Bisaka bimo bya bwine Kidishitu i binyemene mu ntanda-bene nansha kuvilukila’mo mwanda wa kukakimba kaji. Mu uno muswelo, babo bana babwanya kufunda masomo mu ludimi lwine lwisambwa mu ntanda’ya. Kadi bambutwile nabo bikebalomba padi kwifunda ludimi lwisambwa’mo mwa kusokwela kaji. Le bikekala namani shi kudi kipwilo nansha kisumpi kya ludimi lwabo lwa kibutwila? Le kisaka kyabo kikenda mu kipwilo’ka? Le kikenda mu kipwilo kya ludimi lwisambwa mu ntanda’ya’ni nansha mu kipwilo kya ludimi lwabo lwa kibutwila?

18. Mungya Bene Ngalatea 6:5, le tukalombola namani amba tulēmekele butyibi bwa mutwe wa kisaka?

¹⁸ Mutwe wa kisaka ye wa kuyuka kipwilo kya kwenda’mo kisaka kyandi. Byoudi mwanda utala muntu mwine, aye ufwaninwe kujingulula shi kyandi kisaka kikamwena’mo. (Tanga Bene Ngalatea 6:5.) Tufwaninwe kulēmeka butyibi bwa mutwe wa kisaka. Nansha shi wakwata butyibi’ka, twitabijei butyibi bwandi ne kutundaila kisaka na bulēme mu kipwilo kyetu.​—Loma 15:7.

19. Le i bika bifwaninwe kubandaula senene mitwe ya bisaka?

 ¹⁹ Pa kwabo napo, bisaka bibwanya kwingidila mu kipwilo kya ludimi lwa bambutwile, inoko padi bana kebesambengapo biyampe luno ludimi. Shi kino kipwilo kidi mu kifuko kisambwa ludimi lwa ntanda, bana babwanya padi kukomenwa kwivwana bipita ku kupwila ne kukomenwa kwendelela ku mushipiditu. Mwanda waka? Mwanda padi bana bafundanga masomo mu ludimi lwa ntanda, ino ke mu ludimipo lwa bambutwile babo. Mu uno muswelo, mitwe ya bisaka ifwaninwe kubandaula senene byobafwaninwe kulonga pa kukwasha babo bana bafwene kudi Yehova ne bantu bandi. Bakatala shi babwanya kukwasha babo bana bayuke ludimi lwabo lwa kibutwila, nansha kwenda mu kipwilo kya ludimi lwivwana babo bana senene. Nansha shi mutwe wa kisaka wakwata butyibi’ka, kipwilo kyaatonga kwenda’mo kifwaninwe kwibalēmeka ne kwibamona na mvubu.

20. Le tukalombola namani amba tulēmekele batutu ne bakaka befunda ludimi lweni?

²⁰ Pa bubinga bonso botwesambila’po’bu, mu bipwilo bivule, mukekala batutu ne bakaka bavule balonga bukomo bwa kwifunda ludimi lweni. Babwanya kukomenwa kulupwila milangwe yabo patōka. Inoko shi tuleke kuta mutyima ku bwino bobadi nabo bwa kwisamba ludimi, tukamona’mba basenswe Yehova ne amba basakanga kumwingidila. Shi tumone ino ngikadila miyampe, tukalēmeka bininge bano batutu ne bakaka ne kwibamona na mvubu. Ketukanenapo amba ‘ketudipo nabo buya’ mwanda kebesambengapo biyampe ludimi lwetu.

21-22. Le i dyese’ka dikatampe dyotudi nadyo?

²¹ Yehova i mwitupe dyese dikatampe dya kwikala na kifuko mu kipwilo kyandi. Ekale shi twi bana-balume nansha bana-bakaji, bankungulume ne bankungakaji nansha basonge ne basongwe, bankasampe nansha bakulumpe, ekale twisambanga ludimi kampanda biyampe nansha kubulwa kwisamba’lo biyampe, batwe bonso twi balēme ku meso a Yehova ne a banabetu.​—Loma 12:4, 5; Kol. 3:10, 11.

²² Nanshi twendelelei kwingidija bufundiji buvule bwa mvubu botwefunda ku kyelekejo kya Polo kya umbidi wa muntu. Nabya, tukakimba miswelo mivule yotubwanya kusanswa kifuko kyetu ne kya bakwetu mu kipwilo kya Yehova.