1. I bika bikukulupija’mba Kinenwa kya Leza kidi na bukomo? (Tala kifwatulo ku ngalwilo.)

BANTU ba Yehova bakulupile amba Kinenwa kyandi, ko kunena’mba musapu wandi ku bantu, “i kyūmi kadi kidi na bukomo.” (Bahebelu 4:12) Twibemwene bukomo bwa Bible mu būmi bwetu ne mu būmi bwa bantu bakwabo. Kumeso kwa kwikala Batumoni, bamo badi bangivi, bamunwe na dyamba, nansha na busekese. Bakwabo badi batumbe nansha kwikala na lupeto, inoko bamwene amba kudi kintu kibabudilwe mu būmi bwabo. (Musapudi 2:3-11) Na bya dyese, bantu bavule badi bajimine kadi bampikwa lukulupilo, pano badi nalo kadi baludikwanga senene. Mu Kiteba kya Mulami, tutañanga’mo ne kusangela myanda mimweke mu bishinte “Bible Ushintanga Būmi.” Nansha ke pa kupwa kwikala bene Kidishitu, bantu bafwaninwe kwendelela na kuningija kipwano kyabo na Yehova kupityila ku bukwashi bwa Bible.

2. Le i muswelo’ka wāikele bukomo bwa Kinenwa kya Leza na lupusa pa bantu ba mu myaka katwa kabajinji?

² Ke kya kutulumukapo shi bantu bavule bashintanga bininge pobayuka bubine. Batutu ne bakaka ba mu myaka katwa kabajinji bādi na lukulupilo lwa kwenda mūlu nabo bāshintyile  uno muswelo. (Tanga 1 Kodinda 6:9-11.) Polo paādi wisambila pa boba kebādipo ba kupyana Bulopwe bwa Leza, wābwejeje’ko amba: “E mo mwadi mwikadile ne bamobamo umbukata mwenu.” Kinenwa kya Leza ne mushipiditu wandi ujila byo byākweshe bano bantu bashinte. Nansha ke pa kupwa kwikala bene Kidishitu, bamo mobadi bālongele bilubo bikatampe bine byāonene kipwano kyabo na Yehova. Kimfwa, Bible utela tutu umo mushingwe māni wādi ufwaninwe kupangwa. Ino, mwenda mafuku wāshinta bininge ne kujokejibwa mu kipwilo kya bwine Kidishitu. (1 Kodinda 5:1-5; 2 Kodinda 2:5-8) I kikankamika pa kumona batutu ne bakaka bashinta bininge kupityila ku bukomo bwa Kinenwa kya Leza.

3. Lelo i bika byotusa kwisambila’po mu kino kishinte?

³ Kinenwa kya Leza kidi na bukomo bukatampe. Yehova byaetupele’kyo, nanshi tufwaninwe kwikingidija senene. (2 Temote 2: 15) Kino kishinte kisa kwisambila pa byobya byotubwanya kulonga pa kusaka’mba bukomo bwa Bible bwingile (1) mu būmi bwetu, (2) mu mwingilo wetu wa busapudi, ne (3) potufundija ku lukala. Byotusa kwifunda pano bisa kwitukwasha tulombole buswe ne kufwija’ko Tata wetu wa mūlu, mwine witufundijanga pa mwanda wa kamweno ketu.​—Isaya 48:17.

4. (a) I bika byotubwanya kulonga pa kusaka’mba Kinenwa kya Leza kitukwashe? (b) Le wimwitūdile’ko kitatyi’ka kya kutanga Bible?

⁴ Pa kusaka’mba Kinenwa kya Leza kitukwashe, tufwaninwe kwikitanga kitatyi ne kitatyi. Tufwaninwe kulonga bukomo bwa kwikitanga difuku ne difuku. (Yoshua 1:8) Bavule motudi badi na bivule bya kulonga, ino ketufwaninwepo kuleka kintu nansha kimo, kubadila’mo’nka ne biselwa byetu, bitukankaje kutanga Bible. (Tanga Efisesa 5:15, 16.) Tubwanya kwitūdila’ko kitatyi kya kumutanga lubanga, mu dyuba, nansha ku kyolwa. Twitabije binenwa byāsonekele mulembi wa Ñimbo ya Mitōto amba: “Ē! mo nswelele mukanda-obe-wa-bijila! I kufwatakanya kwami dyuba dyonso.”​—Ñimbo ya Mitōto 119:97.

5, 6. (a) Mwanda waka tusakilwa kulangulukila pa Kinenwa kya Leza? (b) I muswelo’ka muyampe wa kulangulukila’po? (c) Le kutanga Bible ne kulangulukila’po i kukukwashe namani?

⁵ Inoko, kutanga’tu Bible bitupu ke kubwenepo. Tusakilwa kulangulukila’po, ko kunena’mba kulangulukila na katentekeji ne na mushike pa byobya byotutanga. (Ñimbo ya Mitōto 1:1-3) Shi tulonge uno muswelo, nabya tukabwanya kwingidija tunangu twa mu Bible mu būmi bwetu. Nanshi ekale tutañanga Bible mutampe  nansha shi tutanga’ye mu bingidilwa bya nshinga, tufwaninwe kuleka Kinenwa kya Leza kitushinte ne kwitutonona tulonge’po kintu.

⁶ I muswelo’ka muyampe wa kulangulukila pa Kinenwa kya Leza? Shi tutanga Bible, tufwaninwe kukunkumana ne kwiipangula’mba: ‘Le bino bibamfundija bika padi Yehova? Le i muswelo’ka okendi mwingidije kala bino byonatanga mu būmi bwami? I bintu’ka bikinsakila kushinta?’ Shi tulangulukila pa Kinenwa kya Leza ne kulombela pa kwikitanga, nabya tukasangela kwikingidija. Kupwa tukemwena bukomo bwa Bible mu būmi bwetu.​—2 Kodinda 10:4, 5.

7. I muswelo’ka otubwanya kwingidija senene Kinenwa kya Leza mu busapudi?

⁷ Kwingidija Kinenwa kya Leza kitatyi kyonso kyotusapula ne kyotufundija, kudi na mvubu. Tutu umo wanenene amba, “Shi mwadi amba musapulanga na Yehova ku njibo ne njibo, le ukanena’nka abe’ni nansha ukamuleka nandi anene’po?” Kutangila muntu Bible, i kuleka Yehova esambe nandi. Kisonekwa kitongwe senene kidi na bukomo kupita byonso byotubwanya kunena. (1 Tesalonika 2:13) Podi mu mwingilo wa busapudi, lelo utangilanga bantu Bible ponso pobibwanika?

8. Potusapula, mwanda waka tusakilwa kulonga bivule kupita’ko’tu enka kutangila muntu bisonekwa?

⁸ Inoko, kutangila’tu boba botusapwila vese wa mu Bible, ke kubwenepo. Bantu bavule kebevwanijangapo buluji bwa Bible. Ye mobyādi bikadile ne mu myaka katwa kabajinji, enka ne dyalelo dine. (Loma 10:2) Ketufwaninwepo’tu kulanga’mba mwinē njibo i mwivwanije kisonekwa kyotwamutangila. Tubwanya kumukwasha na kupituluka mu bishima nansha milangwe mikatampe idi mu  vese’wa ne kumulombola mobishitulwila. Mu uno muswelo, Kinenwa kya Leza kikatenga mityima ya bantu ne ñeni yabo mine.​—Tanga Luka 24:32.

9. I muswelo’ka otubwanya kukwasha bantu balēmeke Bible kupityila ku byotunena kumeso kwa kutanga kisonekwa? Leta kimfwa.

⁹ Kadi byobya byotunena kumeso kwa kutanga kisonekwa bibwanya kukwasha mwinē njibo alēmeke Bible. Kimfwa, tubwanya kunena’mba, “Tala binena Mupangi wetu pa uno mwanda.” Kadi shi twisamba na muntu kakulupilepo mudi Kidishitu, tubwanya kunena’mba, “Tala bitusapwila Bilembwa Bijila.” Shi i muntu kadipo mu kipwilo, tubwanya kumwipangula’mba, “Le kodi mwivwane bino binenwa bya tamba kala?” Shi tuvuluke amba muntu ne muntu udi na bibidiji ne nkulupilo yandi, nabya tukalonga bukomo bwa kwingidija ntwelelo isangaja.​—1 Kodinda 9:22, 23.

10. (a) I bika byemwenine tutu umo? (b) I muswelo’ka okodi mwimwene bukomo bwa Kinenwa kya Leza mu mwingilo wa busapudi?

¹⁰ Banabetu bavule i bamone amba kwingidija Kinenwa kya Leza kukwashanga bininge bantu bobasapwila. Kimfwa, tutu umo wadi upempula mununu umo mwana-mulume wadi utanga mapepala etu mu bula bwa myaka mivule. Difuku dimo, pa kyaba’tu kya kumushila’nka nimelo mipya ya Kiteba kya Mulami, tutu’wa wamutangile ne kisonekwa. Wamutangile 2 Kodinda 1:3, 4, mwine unena’mba: “Tata wa lusa lukatampe ne Leza wa kusenga konso, wituseñanga mu byamalwa byetu byonso.” Bino binenwa byatengele mununu’wa bininge, wanena tutu amutangile’kyo monka. Kupwa mununu’wa wanena’mba aye ne wandi mukaji basakilwa kusengibwa bya binebine. Kupityila ku kino kisonekwa, wasangedile kuyukila’ko bivule bitala pa Bible. Bine kwingidija Kinenwa kya Leza mu busapudi i kwa kamweno!​—Bilongwa 19:20.

11. Lelo batutu bafundijanga ku lukala badi na kiselwa’ka?

¹¹ Tusenswe kutanwa ku kupwila, ku bitango bityebitye ne bikatampe. Bubinga bukatampe botutaninwanga’ko i mwanda wa kutōta Yehova. Kadi tumwenanga ne mu byobya byotwifunda’ko. Pa kino, batutu bafundijanga ku lukala badi na dyese ne kiselwa kikatampe. (Yakoba 3:1) Nanshi, bufundiji bwabo bufwaninwe kwimanina pa Kinenwa kya Leza. Shi udi na dino dyese, le i muswelo’ka okengidija bukomo bwa Bible pa kutenga mityima ya bevwaniki bobe?

12. Lelo muneni ukalonga namani pa kusaka’mba mwisambo wandi wimanine pa Bisonekwa?

¹² Bisonekwa byo bidi na mvubu mikatampe mu mwisambo o-onso. (Yoano 7:16) Nanshi tadija pa muswelo onena mwisambo, myanda mimweke nansha bimfwa byoleta, kebifwaninwepo kumweka bu ye bya mvubu kupita Bible. Kadi vuluka’mba kutanga Bible i kwishile na kufundija’ye. Na bubine, shi utanga bisonekwa bivule, bantu bavule bakebilwa. O mwanda nanshi tonga na katentekeji bisonekwa byosaka kukengidija. Penepa ukatanga’byo, kwibishintulula, kwibyelekeja na bimfwa, ne kulombola kamweno kabyo mu būmi. (Nehemia 8:8) Shi mwisambo udi pa mwadijo, wifunde mwadijo’wa ne bisonekwa byonso bidi’po. Longa buninge bwa kwivwanija muswelo ukwatañene mwadijo’wa na bisonekwa. Kupwa ingidija bisonekwa bimo pa kufundija myanda idi pa mwadijo. (Ubwanya kutana madingi mayampe mu Mwena Byabuyabuya mu Bufundiji bwa Masomo a  Mwingilo wa Kiteokratike mu kifundwa 21 kutūla ku 23.) Kadi kya mvubu nakampata, lomba Yehova akukwashe ulombole milangwe yandi ya kamweno idi mu Bible.​—Tanga Ezela 7:10; Nkindi 3:13, 14.

13. (a) I muswelo’ka watengelwe kaka umo na kisonekwa ku kupwila? (b) Lelo kodi mutengwe namani na muswelo wingidijibwa Bible ku kupwila kwetu?

¹³ Kaka umo wa mu Ostrali watenwe na makambakano mavule pa bwanuke, nansha byaayukile Yehova mwenda mafuku, kadipo ukulupile ne pa mfulo amba Yehova umusenswe. Difuku dimo ku kupwila, uno kaka waivwana kisonekwa kimo kine kyamutengele bininge. Walangulukīle’po ne kulonga bukimbi, bwine bwamufikije ku kutanga mavese makwabo a mu Bible. Penepa wakulupila’mba Yehova umusenswe. * (Tala kunshi kwa dyani.) Lelo nobe kodi mutengwe uno muswelo na kisonekwa kampanda ku kupwila, ku bitango bityebitye nansha bikatampe?​—Nehemia 8:12.

14. I muswelo’ka otukalombola’mba tusenswe Kinenwa kya Yehova ne kwikikwata na mutyika?

¹⁴ Tubulwe’po kufwija’ko Yehova pa kwitupa Bible, Kinenwa kyandi kisonekelwe? Wālaile amba kikekala’ko nyeke ne kadi i mufikidije uno mulao. (1 Petelo 1:24, 25) O mwanda tufwaninwe kulonga bukomo bwa kutanga Bible kitatyi ne kitatyi, kulonda madingi andi mu būmi bwetu, ne kumwingidija mwanda wa kukwasha bantu bakwabo. Shi tulonge uno muswelo, nabya tubalombola’mba tusenswe bya binebine kadi tukwete na mutyika kino kya bulēme, ne kya mvubu nakampata tulombolanga’mba tusenswe Mulembi wandi, Yehova Leza.