KUJOKOLOKA ntanda yonso, bakulumpe basenswe dyese dyobadi nadyo dya kwingila mu bantu ba Leza. Bine, nabo i dyese dikatampe kotudi batwe bonso! Inoko, panopano ponka kwaikele kushinta. Bakulumpe banunu banenenwe kupa bakulumpe bankasampe biselwa bimo bilēma byobadi nabyo. Namani?

Kwaikele mpangiko mipya ya amba, batadi ba bipindi ne bafundiji ba ku masomo a kiteokratike kebakendelelapo na ino mingilo shi ababwanya myaka 70. Kadi bakulumpe ba myaka 80 nabo bakapa bakulumpe bankasampe mingilo mishileshile, pamo bwa kwikala mukwatakani wa Komite ya Musambo nansha mukwatakani wa kitango kya bakulumpe pa kipwilo. Le bano bakulumpe banunu baswe, balongele namani pa kuno kushinta? Balombwele lulamato lwabo kudi Yehova ne ku bulongolodi bwandi!

Ken, waingile bu mukwatakani wa Komite ya Musambo kintu kya myaka 49 unena’mba: “Naitabije buno butyibi na mutyima umo. Ponayukile uno mwanda lubanga, nalombēle kudi Yehova namulombola bisakibwa bya tutu nkasampe wa kwingila bu mukwatakani.”  Byalongele tutu Ken ye byalongele ne banunu bakwabo ba kikōkeji ba ntanda yonso. Na bubine, byobadi basenswe kwingidila banababo, batyumukilwe mutyima dibajinji.

Esperandio wadi mukwatakani wa kitango kya bakulumpe pa kipwilo unena’mba “Byaunsense bidi.” Ino ubweja’ko amba, “Nadi nsakilwa kitatyi kivule kya kuta mutyima ku bukomo bwami bwa ngitu.” Monka motubwanya padi kusakila, Esperandio wendelelanga kwingidila Yehova na kikōkeji kadi i dyese ku kipwilo kyabo.

Lelo batadi bendakana ba tamba kala bashintyile mingilo yabo nabo le? Allan wadi mutadi wendakana mu bula bwa myaka 38 unena’mba, “Ponayukile’o, mutyima wamfwa.” Inoko wajingulwile byabuyabuya bidi mu kufundija bankasampe mingilo, kadi wendelelanga kwingila na kikōkeji.

Russell wadi mutadi wendakana kadi mufundiji wa masomo a kiteokratike mu bula bwa myaka 40, unena’mba dibajinji aye ne wandi mukaji batyumukilwe mutyima. “Twadi tusangedile bininge mwingilo wetu kadi twadi tumona’mba tukidi na bukomo bwa kwendeleja’o.” Russell ne wandi mukaji bengidijanga byobafundile ne bwino bwabo mu kipwilo kyabo, mwanda wa kukwasha basapudi bobengila nabo.

Nansha shi kweivwene na mweivwanine bano botwatela’ba, nsekununi ya mu 2 Samwele ibwanya kukukwasha wivwanije bantu beivwene uno muswelo.

Langulukila bidi pa kitatyi kyātombokele Abisalome mwanā Mulopwe Davida. Davida wānyemene mu Yelusalema wāenda ku Mahanaimi, kutunduka kwa Munonga wa Yodano. Kwine’kwa Davida ne bonso baādi nabo bādi basakilwa’ko bintu bya kwibakwasha mu būmi. Le ubavuluka mobyāikadile?

Bantu basatu ba kwine’kwa balombola buntu na kwibapa bitanda, byakudya bishileshile, ne bingidilwa byobādi basakilwa. Umo bidi i Balezilai. (2 Samwele 17:27-29) Pāpwile butomboki bwa Abisalome, Davida wājokela ku Yelusalema, ebiya Balezilai wākamushindikila ku Yodano. Davida wāmunena bende nandi ku Yelusalema. Mulopwe wānena’mba ukamupa byakudya, nansha Balezilai byaādi “mpeta mukatampe” ne kadi kādipo usakilwa kupebwa byakudya. (2 Samwele 19:31-33) Inoko Davida wāsangedile padi ngikadila ya Balezilai ne madingi onso awādi ubwanya kumupa. Bine, kwikala nandi ne kwingila nandi mu kipango kya bulopwe dyādi dya kwikala dyese dikatampe!

Balezilai byaādi na mumweno muyampe kadi mutūkanye, wānenene amba udi na myaka 80. Kupwa wābweja’ko amba: “Le mbwanya kujingulula kiyampe ne kibi?” Le wādi ukimba kunena bika? Balezilai wādi na tunangu pa mwanda wa myaka yandi mivule. Kadi wādi ukokeja kuleta madingi mayampe na mobāpedile’o Mulopwe Lehaboma  kudi “bana-balume banunu.” (1 Balopwe 12:6, 7; Ñimbo ya Mitōto 92:12-14; Nkindi 16:31) Nanshi Balezilai paānenene mwanda utala kujingulula kiyampe ne kibi, wādi padi wisambila pa mikalo ya bukomo bwa ngitu yandi pa mwanda wa bununu. Wāyukile amba bununu bwandi bwāmulengeje aleke kwivwana butobaji ne kwivwana byobanena. (Musapudi 12:4, 5) O mwanda Balezilai wānenene Davida ende na nkasampe Kimehame ku Yelusalema, mobimwekela wādi mwanā Balezilai.​—2 Samwele 19:35-40.

Banunu bashintyilwe mingilo botwatelanga badi na mumweno na wādi na Balezilai. Na bubine, mu kino kyetu kitatyi, bintu byatelwe’ko mutyima ke’nkapo ngikadilo idi’mo muntu ne bwino bwandi, na mobyāikadile kudi Balezilai. Kwadi bisakibwa bya kubandaula biyampe bya bakulumpe ba kikōkeji ntanda yonso.

Bano bene Kidishitu banunu batūkanye bamwene bine amba bulongolodi bwa Yehova bukakomejibwa pa mwanda wa kutanta kwa mu mafuku a kumeso shi mingilo yobadi nayo ipebwe batutu bankasampe. Nansha shi bikale namani, batutu banunu bo bafundije bankasampe, na mwālongele padi Balezilai na wandi mwana, ne mutumibwa Polo nandi na Temote. (1 Kodinda 4:17; Fidipai 2:20-22) Bano batutu bankasampe balombwele amba i “bantu bu byabuntu,” babwanya kukwasha pa “kutamija umbidi wa Kidishitu.”​—Efisesa 4:8-12; dingakanya na Umbadilo 11:16, 17, 29.

Bantu bavule mu kipwilo kya ntanda yonso kya bantu ba Leza bapēne mingilo imoimo, babwanya kumwena mu mikenga mikwabo ya mu mwingilo wa Yehova.

Marco wadi mutadi wendakana mu bula bwa myaka 19 unena’mba, “Ngikadilo yondi’mo pano inkwashanga nsapwile balume bampikwa kwitabija ba bakaka ba mu kyetu kipwilo.”

Geraldo wadi mu mwingilo wa kwendakana mu bula bwa myaka 28 unena’mba, “Mu bitungo byetu bipya mubadilwa ne kukwasha boba kebakingilanga ne kwendeja bifundwa bya Bible bivule.” Unena’mba aye ne wandi mukaji bendejanga pano bifundwa bya Bible kufika ne ku 15 ne amba bantu bavule badi kebakingilanga kebāyanga ku kupwila.

Allan, utelelwe kala, unena’mba: “Pano tudi na mukenga wa kusapula ne pa mfulo. Tusenswe busapudi bwa mu bantu bavule, mu bifuko bya busunga, ne kusapwila balondakani netu, kadi babidi baile ne ku Njibo ya Bulopwe.”

Shi wi tutu mukankamane ne wa lulamato kadi washintyilwe mwingilo mu bantu ba Leza, kudi muswelo mukwabo wa pa bula obwanya kukwasha. Ubwanya kukwasha ku mwingilo wa Yehova na kupa bankasampe mu kipwilo bwino bobe. Russell, otwatelanga unena’mba: “Yehova ufundijanga bankasampe ba bwino ne kwibengidija senene. Banabetu bonso bamwenanga mu bufundiji bwabo bwa kininga ne bukumbi bwabo!”​—Tala kapango kanena’mba, “ Kwasha Bankasampe Bekale na Bwino Buvule.”

Shi watwelele panopano mu mwingilo kampanda, ikala nyeke na mumweno muyampe. Kodi kala mukwashe bantu bavule na mwingilo obe wa na mutyima umo, kadi ubwanya kwendelela na kwibakwasha. I bakuswe kadi bakendelela kukusanswa.

Kintu kya mvubu i kino, mwi basangaje mutyima wa Yehova bininge. Kakelwapo “mingilo yenu ne buswe bomwalombwele mwanda wa dijina dyandi, pa kwingidila bajila ne kadi mukyendelela kwibengidila.” (Bahebelu 6:10) Uno vese wa ku bukomo bwa mushipiditu witukulupija batwe bonso amba, uno mulao keutalepo’nka mingilo yotwaingile pa  kala. Mwi balēme mpata ku meso a Yehova byakabwanyapo kwimwilwa pa bukomo bwenu bwa pa kala ne bomwendelela kulonga mwanda wa kumusangaja!

Le bikekala namani shi kwashintyilwepo mwingilo na motwamwenanga? Ino myanda ibwanya kukutala ne abe. Mu muswelo’ka?

Shi pano wisambanga na tutu mununu wa kikōkeji washintyilwe mwingilo, ukamwena mu kutama kwandi kwa ku mushipiditu ne mu bwino bwandi bwa myaka mivule. Mulombe madingi. Mulombe milangwe. Kadi tala muswelo waingidija na kikōkeji bwino bwandi mu mwingilo wadi nao pano.

Ekale shi wi mununu wingila pano mwingilo mukwabo, nansha tutu nansha kaka umwenanga’mo, vulukai amba Yehova usangedile lulamato lwa boba kebamwingidile kitatyi kilampe kadi bakyendelela kumwingidila.