1-2. Le i bāni babwanya kukwasha yewa wifunda Bible endelele kufika ne ku kubatyijibwa?

KAKA Ami, ushikatanga mu Fidji unena’mba, “nadi nsenswe byonadi nefunda mu Bible. Nadi ndyukile amba i bubine. Inoko, nabwenye kushinta ne kwendelela kufika ne ku kubatyijibwa, enka kitatyi kyonashilwile kupwana na batutu ne bakaka.’’ Uno mwanda wa kaka Ami ubingija buno bubine bwa mvubu bwa amba: Muntu wifunda Bible pa kusaka endelele kufika ne ku kubatyijibwa, ufwaninwe kukwashibwa na bantu bakwabo mu kipwilo.

² Musapudi yense ubwanya kukwasha’ko kipwilo kyendelele. (Ef. 4:16) Leilani, pania umo ushikatanga mu Vanuatu unena’mba: “Kudi lukindi lumo lunena’mba pa kutamija mwana bilombanga bukwashi bwa muntu ense mu kibundi. Luno lukindi lutala ne mwingilo wa kulonga bana ba bwanga. Divule dine pa kukwasha muntu atwele mu bubine, bilombanga bukwashi bwa kipwilo kyonso.” Mwana pa kutama, ba mu kisaka, balunda ne badimu bonso bakwashanga’ko. Bakwashanga’ko na kukankamika mwana ne kumufundija bintu bya kamweno. Mu muswelo umo onka, basapudi babwanya kudingila yewa wifunda Bible, kumukankamika ne kumushila kimfwa kiyampe. Bino bikamukwasha endelele kufika ne ku kubatyijibwa.​—Nki. 15:22.

3. Lelo myanda inenene ba Ana, Dorin, ne Leilani ikufundija bika?

³ Mwanda waka musapudi wendeja kifundwa kya Bible, ufwaninwe kwitabija basapudi bakwabo bakwashe yewa wafundija? Tala binena Ana, pania wa pa bula wa mu Moldova amba, “muntu  umo kabwanyapo kuvuija bisakibwa byonso bya yewa wifunda Bible pa kusaka’mba endelele.” Dorin pania wa pa bula wingidilanga nandi enka mu ino ntanda unena’mba, “divule dine, basapudi bakwetu banenanga bintu bimo byonkyadipo nangila, ino byatenga mutyima wa yewa wifunda.” Leilani otwatelanga ubweja’ko bubinga bukwabo amba: “Shi banabetu balombola yewa wifunda buswe ne kumuta mutyima, nandi ukayuka’mba twi bantu ba Yehova.”—Yoa. 13:35.

4. Le i bika byotusa kwisambila’po mu kino kishinte?

⁴ Ino ubwanya kwiipangula’mba, ‘shi ke amipo wifundanga na muntu Bible, mbwanya kumukwasha namani endelele?’ Tutalei byotubwanya kulonga shi muntu wetwite tukamutūle ku kifundwa kya Bible, ne byotubwanya kulonga shi muntu wifunda Bible washilula kutanwa ku kupwila. Kadi tusa kumona muswelo ubwanya kukwasha bakulumpe, boba befunda Bible bendelele kufika ne ku kubatyijibwa.

5. Le ufwaninwe kwimona namani shi muntu wakwite ukamutūle ku kifundwa kya Bible?

⁵ Potwifunda Bible na muntu, yewa umufundijanga ye udi na kiselwa kikatampe kya kumukwasha evwanije Kinenwa kya Leza. Shi yewa umufundijanga wakwite ukamutūle, ufwaninwe kwimona bu muntu wa kumukwasha’ko. Abe wi wa kumukwatakanya. (Mus. 4:9, 10) Le i bika byobwanya kulonga pa kusaka amba kifundwa kya Bible kipite biyampe?

6. Shi abakwite kukatūla muntu ku kifundwa kya Bible, i muswelo’ka obwanya kwingidija musoñanya udi mu Nkindi 20:18?

⁶ Teakanya myanda ya kukefunda. Dibajinji, ipangula yewa umufundijanga akulombole myanda imoimo itala yewa waefundanga nandi. (Tanga Nkindi 20:18.) Ubwanya kumwipangula’mba: “Le omwifundanga nandi ukulupile bika, udi na myaka inga, ne kisaka kyabo kidi namani? Le i myanda’ka yomukefunda nandi? Le i bika byosaka omwifundanga nandi ayuke mu kino kifundwa? Le kudi bintu byonkifwaninwepo kulonga nansha kunena potwifunda? Le mbwanya kukankamika omwifundanga nandi namani endelele?’’ Shako, yewa umufundijanga kakakulombolapo myanda yandi mifyame, inoko byakakulombola bibwanya kukukwasha. Mishonele umo witwa bu Joy, ulombolanga bantu bakamutwala ku kifundwa kya Bible ino myanda. Unena’mba: “Kulombola yewa usa kukantūla ino myanda, kumukwashanga ate muntu otwifundanga nandi mutyima, kadi ayuke ne muswelo wabwanya kukwasha’ko potwifunda.”

7. Shi usa kukatūla muntu ku kifundwa, mwanda waka ufwaninwe kwiteakanya?

⁷ Shi muntu wakwite ukamutūle ku kifundwa, i biyampe kuteakanya myanda  yomukesambila’po. (Eza. 7:10) Dorin, tutu otwatelanga kala unena’mba: “Nsangalanga shi yewa ukantūla ku kifundwa i mwiteakanye. Shi i mwiteakanye ukanena bintu bikankamika.” Ne kadi yewa wifunda ukamona’mba banwe bonso bubidi mwi beteakanye biyampe kadi kino kikamushila kimfwa kiyampe. Nansha shi kubwanyapo kuteakanya myanda yonso yomukefunda, ino witūdile’ko kitatyi kya kulama mu ñeni myanda mikatampe.

8. Le ukalonga namani pa kunena bintu bipotoloke mu milombelo kitatyi kyomwifunda Bible?

⁸ Milombelo idi na mvubu kitatyi kyomwifunda Bible, nanshi langulukila kumeso kwa kitatyi pa byokanena mu milombelo shi abakunena kulombela. Nabya ukanena bintu bipotoloke mu milombelo. (Ñim. 141:2) Hanae ushikatanga mu Jampani, ukivulukanga milombelo yālombele kaka wākatūdile kaka wādi umufundija Bible. Unena’mba: “Namwene mwadi muningile kipwano kyandi na Yehova, nami nasaka kwikala pamo bwa aye. Kadi namwene amba unsenswe paatelele dijina dyami mu milombelo yaalombele.”

9. Mungya Yakoba 1:19, le i bika byobwanya kulonga pa kwikala mukwashi muyampe wa yewa okatūdile ku kifundwa kya Bible?

⁹ Kwatakanya yewa ufundija kitatyi kyomwifunda. Omamuyovbi, pania umo wa pa bula wa mu Nijeria unena’mba: “Mukwashi muyampe i yewa ulonda pomwifunda. Mukwashi uletanga milangwe miyampe, ino kanenangapo bivule mwanda uyukile amba ke ayepo wendeja kifundwa.” Le ubwanya kuyuka namani kitatyi kya kunena ne bya kunena pomwifunda? (Nki. 25:11) Wibateje senene pobesamba na waefunda nandi. (Tanga Yakoba 1:19.) Nabya ukabwanya kukwasha’ko pa kitatyi kifwaninwe. Inoko ufwaninwe kwikala na bujinguludi. Kimfwa, kukasakepo kwisamba bivulevule, kutyiba milangwe ya umufundija, nansha kutweja’mo mwanda mukwabo. Ino ubwanya kutōkeja mwanda kampanda obamufundija na kunena’tu bīpi, kuleta kimfwa kīpi nansha kwipangula kipangujo. Kyaba kimo, ubwanya kulanga’mba kudipo kyolongele pomwifunda. Inoko, shi ufwija’ko yewa omufundija ne kumuta mutyima ukamukwasha bininge endelele.

10. Le myanda yosekunwina yewa wifunda Bible ibwanya kumukwasha namani?

¹⁰ Musekunwine myanda ikutēne mu būmi. Shi i byendele’mo, ubwanya kumusekunwina mu kīpi muswelo owayukile bubine, muswelo owanekenye bikoleja, nansha muswelo wakukweshe Yehova mu būmi bobe. (Ñim. 78:4, 7) Padi yo myanda yadi isakilwa kwivwana yewa wifunda Bible. Ibwanya kuningija lwitabijo lwandi, nansha kumukankamika endelele kufika ne ku kubatyijibwa. Kadi ibwanya padi kumukwasha ayuke muswelo wa kunekenya  matompo aekonda nao. (1 Pe. 5:9) Gabriel, ushikatanga mu Brezile kadi wingilanga pano bu pania uvuluka bintu byamukweshe paadi wifunda Bible. Unena’mba: “Ponaivwene myanda yadi insekunwina banabetu, nayukile amba Yehova umwene makambakano otwikonda nao. Shi abo babwenye kwianekenya, nanshi nami mbwanya kwianekenya.”

11-12. Shi yewa wifunda waiya ku kupwila, mwanda waka tufwaninwe kumulubula na nsangaji?

¹¹ Pa kusaka yewa wifunda Bible endelele kufika ne ku kubatyijibwa, ufwaninwe kutanwa ku kupwila kitatyi ne kitatyi ne kumwena mu bufundiji bufundijibwa’ko. (Bah. 10:24, 25) Padi yewa umufundijanga ukamwita āye atanwe’ko musunsa wandi mubajinji. Shi waiya kutanwa’ko, batwe bonso tubwanya kumukankamika endelele kwiya ku Njibo ya Bulopwe. Le penepa tubwanya kumukankamika namani?

¹² Tumulubulei na nsangaji. (Loma 15:7) Shi yewa wifunda wamone amba abamutundaila biyampe ku kupwila, padi kino kikamulengeja endelele kwiya ku Njibo ya Bulopwe. Tumwimunei na nsangaji ne kumuyukanya ku banabetu bakwabo, pampikwa kumwangadika ngitu. Kokalanga’mba i bamute kala mutyima; mwanda yewa umufundijanga ubwanya kutyelewa, nansha kuvudilwa bya kulonga. Mute mutyima ne kuteja senene byanena. Le kumulubula na nsangaji kubwanya kumukwasha namani? Tulangulukilei bidi pa kimfwa kya Dmitrii wabatyijibwe pano ke padi’tu myaka mityetye kadi wingilanga bu mwingidi wa mingilo. Uvuluka musunsa wandi mubajinji wakatenwe ku kupwila’mba: “Tutu umo waumwene nkungile panja pa Njibo ya Bulopwe mwiumbile, ebiya wauntweja na buswe. Bantu bavule baiya kuñimuna. Bine natulumukile. Byansangeje bininge, kengabila twanze kupwila difuku ne difuku. Nadi nkyatundailwe uno muswelo kuntu kukwabo.”

13. Lelo mwiendelejo obe ubwanya kukwasha yewa wifunda Bible namani?

¹³ Mushile kimfwa kiyampe. Mwiendelejo obe ubwanya kukulupija yewa wifunda Bible amba wasokola bubine. (Mat. 5:16) Vitalii, wingila pano bu pania mu Moldova unena’mba: “Namwene mwadi mwikadile bantu bakwabo mu kipwilo, milangwe yabo ne mwiendelejo wabo. Kino kyankulupije amba na bubine Batumoni ba Yehova banañanga na Leza.”

14. Le kimfwa kyobe kibwanya kukwasha namani muntu endelele?

¹⁴ Pa kusaka kubwanya bisakibwa bya kubatyijibwa, yewa wifunda Bible ufwaninwe kwingidija byobya byaefunda. Shako kebipēlangapo. Inoko yewa wifunda Bible pamona muswelo ukukwasha kwingidija  misoñanya ya mu Bible, kino kibwanya kumulengeja akwiule. (1 Ko. 11:1) Tulangulukilei pa kimfwa kya Hanae otwatelanga kala. Unena’mba: “Batutu ne bakaka badi kala balonga byobya byonadi nefunda. Ebiya, nami naboila ñeni kobadi ya muswelo wa kukankamika bakwetu, kwibalekela ne kwibasanswa. Badi nyeke banenena bakwabo biyampe. Nami nasaka kwibeula.”

15. Le Nkindi 27:17, witukwasha namani tumone amba kupwana na yewa wifunda Bible wendelela kutanwa ku kupwila kudi na mvubu?

¹⁵ Pwana na yewa wifunda Bible. Shi yewa wifunda Bible waendelela na kutanwa ku kupwila, mute nyeke mutyima. (Fid. 2:4) Wabulwapo kwisamba nandi? Pampikwa kwikuja mu myanda imutala, ubwanya kumufwija’ko pa kushinta kwaashinta, kumwipangula mwendela kifundwa kyandi kya Bible, mwikadile kisaka kyandi ne kandi kaji. Ino mīsambo ibwanya kwimukwasha mupwane. Shi ubapwana na muntu wifunda Bible, ukamukwasha endelele kufika ne ku kubatyijibwa. (Tanga Nkindi 27:17.) Hanae, pano i pania wa lonso. Uvuluka paashilwile kupwila’mba: “Ponapwene na balunda mu kipwilo, nashilwile kusanswa kupwila kadi nadi ntanwa ku kupwila nansha shi ne mukōke. Nadi nsangela kwikala pamo na balunda nami bapya, kadi kino kyaunkweshe ntyibe kipwano na boba boketwadipo nabo nkulupilo imo. Ebiya nasaka kufwena kudi Yehova ne kudi batutu ne bakaka. Kupwa, nakwata butyibi bwa kubatyijibwa.”

16. Le i bika bikwabo byobwanya kulonga pa kukwasha yewa wifunda Bible, emone amba nandi ubadilwa mu kipwilo?

¹⁶ Shi yewa wifunda Bible waendelela kadi washinta, mukwashe emone amba nandi ubadilwa mu kipwilo. Ubwanya kumukwasha na kumulombola kizaji. (Bah. 13:2) Denis, wingilanga mu Moldova uvuluka kitatyi kyaadi wifunda Bible amba: “Banabetu badi betwita kitatyi ne kitatyi ami ne wami mukaji tukebanangile. Badi betulombola mwebakwashishe Yehova. Kino kyetukankamikile. Kwitana nabo uno muswelo kwetukweshe tukulupile amba tusakanga kwingidila Yehova, ne amba kudi bintu biyampe bitutengēle.” Shi yewa wifunda Bible waikala ke musapudi, ubwanya kumwita mwende nandi mu busapudi. Diego, musapudi wa mu Brezile unena’mba: “Banabetu bavule badi bangita twende nabo mu busapudi. Uno wadi muswelo muyampe wa kwiyuka nabo senene. Ponadi nkasapula nabo, nefundile bintu bivule, kadi nemona bu ngidi pabwipi na ba Yehova ne Yesu.”

17. Le bakulumpe babwanya kukwasha boba befunda Bible namani?

¹⁷ Witūdile’ko kitatyi kya kwisamba na boba befunda Bible. A bakulumpe, shi mutele mutyima  na buswe boba befunda Bible, mukebakwasha bendelele kufika ne ku kubatyijibwa. Le ku kupwila, ubulwepo kwisamba kitatyi ne kitatyi na boba befundanga Bible? Bakamona’mba wibatele mutyima shi uvuluka majina abo, nakampata kitatyi kyobalondolola. Le ubulwepo kujadika mpangiko yobe kitatyi ne kitatyi mwanda wa ukatūle musapudi ukefunda Bible na muntu? Ubwanya kukwasha yewa wifunda Bible bininge kupita ne mowadi ulangila. Pania umo witwa bu Jackie ushikatanga mu Nijeria unena’mba: “Bantu bavule befunda Bible batulumukanga pa kuyuka’mba tutu otwaendele nandi pa kukefunda nabo i mukulumpe. Muntu umo wifundanga Bible wanenene amba: ‘Pashitele wetu kabwanyapo kulonga namino. Upempulanga enka bampeta kadi enka shi bamufuta!’” Pano uno muntu wiyanga ku kupwila.

18. Le bakulumpe bavuijanga namani mwingilo wabo wibapelwe mu Bilongwa 20:28?

¹⁸ Fundijai boba bafundija Bible ne kwibakankamika. A bakulumpe, mudi na mwingilo mukatampe wa kukwasha basapudi basapule ne kufundija biyampe. (Tanga Bilongwa 20:28.) Shi muntu wetyepelwa kwendeja kifundwa kya Bible pomudi nandi, munene wendeje’kyo. Jackie otwatelanga kala unena’mba: “Bakulumpe bangipangulanga kitatyi ne kitatyi mwikadile bonefundanga nabo Bible. Shi kudi bikoleja kampanda byonekonda nabyo pa kwendeja kifundwa kya Bible, bampanga madingi a kamweno.” Bakulumpe babwanya kulonga bivule pa kukankamika boba bafundija Bible bafundije ne kuleka’byo mpika. (1 Ts. 5:11) Jackie ubweja’ko amba: “Nsangalanga bininge shi bakulumpe bankankamika ne kunombola’mba basangedile mwingilo oñingila. Binenwa byabo bintūkijanga mutyima pamo bwa ami watoma mema atalala potamba mu dyuba kapuwe. Kufwija kobamfwija’ko kunkwashanga ngikale na kikulupiji ne kusangela bininge mwingilo wami wa kufundija bantu Bible.”​—Nki. 25:25.

19. Le i nsangaji’ka yotwikalanga nayo batwe bonso?

¹⁹ Nansha shi pano ketwendejangapo kifundwa kya Bible, ino tubwanya kukwasha muntu endelele ku mushipiditu. Pakubulwa kunena bivulevule, tubwanya kukwasha’ko yewa otukatūdile ku kifundwa na binenwa byetu biteakanibwe senene. Tubwanya kupwana na bantu befunda Bible bāya ku Njibo ya Bulopwe. Tubwanya kwibashila kimfwa kiyampe. Kadi bakulumpe babwanya kukankamika boba befunda Bible na kwitūdila’ko kitatyi kya kwisamba nabo, ne kukankamika boba bebafundija na kwibafundija ne kwibafwija’ko. Bine, tusangalanga bininge pa kuyuka’mba netu twaingile’ko kamwingilo nansha katyetye pa kukwasha muntu asanswe Yehova, Tata wetu ne kumwingidila.