Lelo Leza I Ani?
Bantu bavule banenanga’mba bakulupile mudi Leza. Ino shi ubebepangula’mba lelo Leza i ani, balondololanga mu miswelo mishileshile. Bamo amba, Leza i mutyibi wa mutyima mūmu ukimba’nka kupa bantu mfuto pa mwanda wa bubi bwabo. Bakwabo nabo amba, aye i wa buswe ne lulekelo, nansha shi abalonga bintu’ka. Ino bangi nabo bakulupile amba Leza udi kulampe bininge kadi ketutelepo mutyima. Byobadi na uno mumweno mwishileshile, bavule balañanga’mba i bikomo’tu kuyuka Leza mwine i ani.
Le kumuyuka kudi na kamweno? Bine kudi nako. Kuyuka Leza senene kukalengeja būmi bobe bwikale na kitungo ne kamweno. (Bilongwa 17:26-28) Poenda ufwena kudi Leza, po pene nandi ukakusanswa ne kukukwasha. (Yakoba 4:8) Dibajinji, kuyuka Leza bya binebine kubwanya kukutwala ku kwikala na būmi bwampikwa mfulo.—Yoano 17:3.
Le i muswelo’ka obwanya kuyuka Leza? Langulukila’po bidi pa muntu umo oyukile senene, kimfwa mulunda nobe wa pa mutyima. Lelo mwasambile bulunda namani? Padi wayukile bidi dijina dyandi, bumuntu bwandi, byasenswe ne byashikilwe, byakadi mulonge ne byalanga kulonga, ne bikwabokwabo. Bino ye byakulengeje ufwene uno muntu—wayukile myanda imutala.
Mu muswelo umo onka, ubwanya kuyuka Leza na kubandaula ino myanda ilonda’ko:
Dino dipepala i dilupulwe mwanda wa kulondolola bino bipangujo kupityila ku Bible. Bishinte bidi’mo bisa kukukwasha uyuke Leza mwine i ani ne byokamwena’mo shi upwane nandi.
Tala'po Bidi ne Bino:
KITEBA KYA MULAMI
Le Dijina dya Leza I Ani?
Le uyukile amba Leza udi na dijina dya bunka dimuyukanya?
