Panopano ponka, buludiki bupya bwa Leza bwa momwa mūlu busa kuludika bantu bonso, ntanda isa kwikala bu kifuko kya nsangaji kikele’mo bantu mu bumo, bengila mingilo miyampe kadi isangaja. Leza i mutonge Yesu Kidishitu ekale mulopwe wa ntanda. Yesu i mwishile na baludiki bavule badi’ko dyalelo, mwanda aye ukata babikalwa bandi mutyima bininge. Aye ukaludika na buswe, kadi ukekala Mulopwe wa kanye, wa lusa kadi muyampe.​—Isaya 11:4.

Bantu bakekala mu ntanda mipya kebakakalañanapo pa mwanda wa muzo nansha kabila. Bantu bonso bakekutyila mu bumo. (Kusokwelwa 7:9, 10) Bantu bonso ba pano pa ntanda bakasanswa Leza ne bakwabo, kadi bakengidila pamo mu ndoe mwanda wa kufikidija mpango mibajinjibajinji ya Leza ya kulama ntanda kīkalo kyabo.​—Ñimbo ya Mitōto 115:16.

Bulopwe bwa Leza pobukaludika ino ntanda, Umpangi ukata mutyima ku kushinta kwa bitatyi ne kwibikadija biyampe. (Ñimbo ya Mitōto 24:1, 2) Yesu paādi pano pa ntanda, wālombwele kala byakokeja kulonga kupityila ku bukomo bwa Leza na kutalaja kimpumpu kilenga moyo. (Mako 4:39, 41) Mu buludiki bwa Kidishitu, i kutupu muntu ukatyina kimpengele kya kipangila. Kadi Bulopwe bwa Leza bukakwasha bantu bekale mu ndoe na banyema kadi baleke konakanya bifuko byobashikete’mo.​—Hosea 2:18.

Bantu bonso bakekala na bukomo bwa ngitu bubwaninine. I kutupu muntu ukabela, kununupa, nansha kufwa. (Isaya 35:5, 6) Bantu bakekala mu kifuko kilumbuluke kadi kitōka tō na kyādi’mo ba mulume ne mukaji babajinji mu budimi bwa Edena. Monka mobyādi bikadile mu Edena, mu ntanda mipya, nshi ikalupula byakudya bivule kadi bantu bonso ba pano pa ntanda bakekala nabyo bivule. (Ngalwilo 2:9) Pamo bwa muzo wa Leza wa Isalela wa kala, bantu bonso bakekala mu Paladisa ‘bakadya byakudya byabo baikuta.’​—Bene Levi 26:4, 5.

Mu buludiki bwa Leza bwa ntanda yonso, bantu bonso bakekala mu ndoe ne kwilongela bintu na kanye kadi biyampe. Kemukekalapo mavita, kwingidija lupusa bibi, kadi bantu bonso bakekala na bintu byobasakilwa. Bible i mulaye amba: “Bakashikata, muntu ne muntu munshi mwa muñanza wandi ne munshi mwa kikuyu kyandi, i kutupu muntu nansha umo ukebakwatyija moyo.”​—Mika 4:3, 4.

Kisaka ne kisaka kikekala na njibo yakyo pampikwa kutyina kwiijimija, kadi tukamwena mu mingilo yonso yotukengila. Monka munena’kyo Bible, boba bakekala mu ntanda mipya ya Leza “kebakaputumapo na mingilo bya bitupu.”​—Isaya 65:21-23.

Bible i mulaye amba: “Ntanda ikayula buyuki bwa Yehova bya binebine.” (Isaya 11:9) Bantu bakekala mu Bulopwe bwa Leza, bakaboila ñeni ku tunangu twa Yehova Umpangi wabo, ne ku bintu bilumbuluke byapangile. Kebakengidijapo buyuki bwabo mwanda wa kupunga byabulwi nansha kusanshija bakwabo. (Isaya 2:4) Ino bakefunda mwa kwikadila mu ndoe na bakwabo ne mwa kulamina ntanda.​—Ñimbo ya Mitōto 37:11.

Leza wāteakenye ntanda senene mwanda wa tusangele būmi difuku ne difuku. Usakanga bantu bekale’ko nyeke pano pa ntanda. (Ñimbo ya Mitōto 37:29; Isaya 45:18) Pa kufikidija mpango yandi mibajinjibajinji, Leza “ukamina lufu nyeke.” (Isaya 25:8) Bible i mulaye amba “lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” (Kusokwelwa 21:4) Leza ukapa bantu bonso​—boba bakapanda pakonakanya ino ntanda mibi, ne bafwe kebabadika bakasangula mu ntanda mipya, mukenga wa kwikala’ko nyeke.​—Yoano 5:28, 29; Bilongwa 24:15.

 Dyalelo, bantu midiyo ne midiyo kujokoloka ntanda yonso beteakanyanga kala mwa kukekadila mu Bulopwe bwa Leza bwafwena’bu. Nansha byobadi bantu bampikwa kubwaninina, baloñanga kala bukomo bwa kwikala bu bantu bobasaka kudi Leza mu ntanda yandi mipya. Namani? Befundanga myanda ya Yehova Leza ne ya Yesu Kidishitu waātumine.​—Yoano 17:3.

Shi usaka kuyukila’ko bintu bivule bya kulonga pa kukapanda ku mfulo ya ino ntanda ne kutwela mu ntanda milumbuluke yafwena’i, nabya itabija kwifunda Bible ku bitupu na Kamoni wa Yehova, na kwingidija dibuku Ikala Mūmi Nyeke!