Le befundi ba sianse babwanya kushintulula mwāikadile’ko diulu ne ntanda ne būmi? Mu kīpi ke amopo. Bantu bamo banenanga’mba befundi ba sianse bafundile myanda ya bupangi, bo babwanya kushintulula mwāikadile’ko diulu ne ntanda. Inoko Marcelo Gleiser, polofesele umo wa ku Iniveleshite ya Dartmouth ufundijanga myanda ya imbuo, kadi utatananga kwikala’ko kwa Leza, ulondolola’mba: “Ketubwanyapo kushintulula mwāikadile’ko diulu ne ntanda.”

Muswelo umo onka, pa mwanda utala mwāikadile’ko būmi, kishinte kidi mu julunale umo (Science News) kinena’mba: “Kebibwanikapo kulombola mwāshilwidile būmi pano pa ntanda: Bilembwa bivule bya pa kala byasokwelwe, byadi bikokeja kulombola byālongekele mu mafuku a ku ngalwilo kwa ntanda, ke bijimine tamba kala.” Bino binenwa bilombola’mba, befundi ba sianse i bakomenwe kulondolola kipangujo kya amba, le diulu ne ntanda ne būmi byāikele’ko namani?

Ino padi ubeipangula’mba, ‘shi būmi bwāpangilwe pano pa ntanda, i ani wēbupangile?’ Kadi ubwanya padi ne kwiipangula bino bipangujo amba: ‘Shi kudi Umpangi wa tunangu ne wa buswe, mwanda waka ulekele bantu bapangile basusuka? Mwanda waka ulekele’ko bipwilo bivule nenki? Mwanda waka ulekele batōtyi bandi balonga bintu bibi bivule?’

Sianse keibwanyapo kulondolola bino bipangujo. Inoko ke kunenapo amba kubwanyapo kutana malondololo asangaja. Bantu bavule i batane malondololo asangaja mu Bible.

Shi ukimba kuyuka kine kyanenene befundi ba sianse bamo befundile Bible amba bakulupile mudi Umpangi, twela pa jw.org. Kimba mutwe wa mwanda unena’mba “Points de vue sur l’origine de la vie.”