Lelo diulu ne ntanda ne bintu byūmi bidi’po, byēikadile’ko abyo bine’ni nansha byāpangilwe na Leza? Binenwa bya befundi ba fizike babidi, bipitulukilwe’mo ku ngalwilo kwa kino kishinte, ne binenwa bya Bible bidi ku ngalwilo bileta malondololo meshile bininge ku kino kipangujo. Kudi bantu bakwatakenye mulangwe umo, bakwabo nabo mukwabo. Ino bantu bavule nabo kebayukilepo kintu. Bantu bepatanyanga pa uno mwanda mu mabuku matumbe ne ku matelevijo.

Badimu bobe ba ku masomo babwanya kunena na kikulupiji amba diulu ne ntanda ne bintu byūmi bidi’po byāikele’ko mu kitulumukila, ne amba kekudipo Umpangi wēbipangile. Ino le, bano badimu bakupele bubinga bulombola’mba Umpangi kadi’kopo? Pakwabo napo, padi wivwananga bendeji ba bipwilo basapula’mba kudi Umpangi. Ino lelo bakupanga bukamoni bubingija byobanena? Nansha bakunenanga’tu witabije byobanena bu kilomboji kilombola’mba udi na “lwitabijo”?

Na bubine, padi kodi mulangulukile pa kino kipangujo ne kulanga’mba i kutupu muntu ubwanya kunena na bubine shi Umpangi udi’ko. Padi ubwanya kwiipangula ne kino kipangujo: Le kuyuka malondololo kudi bine na kamweno?

Uno Langukai! usa kwisambila dibajinji pa bubinga bumo bwalengeje bantu bavule bakulupile mudi Umpangi. Kupwa usa kwisambila pa kine kinenenwa’mba, malondololo a kino kipangujo kitala pa kwine kwatambile būmi pano pa ntanda adi na kamweno.