Basapudi ba Bulopwe bafumika

Watana kitungo umbūmi

YESU wanene’mba uyukile mikōko yandi. (Yoano 10:14) Shi muntu udi na mutyima muyampe, usenswe ndoe ne boloke, ukakokwa na bana-babwanga ba Yesu. Muntu wa uno muswelo, ukatana kitungo umbūmi, ka na mokyaikadile ku mwana-mukaji umo mu Belgique. Ivwanai mānga yandi:

“Kitatyi kyaile ba Tumoni twa Yehova kukokola ku wami mulango, nādi na njiya mikatampe mpata ku mutyima ne nādi kensake kwiipaya. Nātendele bininge byaunombwele ba Tumoni bitala pa kikapwija myanda ya mu ino ntanda yamisongo yotushiketemo, inoko nkyādipo nsenswe mulangwe wa kunena’mba Leza nandi udimo na mwingilo mikatampe. Nkyākidipo ñenda ku kipwilo myaka mwanda kunyuma, mwanda nādi nshikilwe buzazangi bonādi monamo. Ebiya, naiya kwivwana diwi dya bubinebine mu byādi binena ba Tumoni, penepo naitabija’mba bine i kikomo kwikala umbūmi pakubulwa Leza.

“Ino yoo, kupwa kwa mafuku matyetye kete obaile kumpempula, ketwādipo tukimona na ba Tumoni. Najimije kikulupiji kyonso. Nādi ntoma mapake abidi a mfwanka ku difuku, nashilula ne kwiponga dyamba. Byonādi nsaka kwisamba na nkambo mwana-mulume wādi kala kemufwe, navundamukila ku butotyi bwa mishipiditu imbi. Difuku dimo, ponādi bunka bufuku, bine naivwene luzakalo bininge pashilwile kunkambakanya bandemona pamwanda wa bino bintu! Ano makambakano aijije myeji mivule. Ku kyolwa ne kyolwa, nādi ngivwana moyo wa kwikala pakasuku.

“Penepo difuku dimo, naenda kukananga, napityila mu dishinda dingi dyonkyādipo mpitamo nyeke, ebiya najikukila pa kifuko kikatampe kya lubako. Natulumukile bininge, kwādi kibumbo kya bantu bavule. Nafwena pabwipi, namona’mba bādi ba Tumoni twa Yehova bādi bobaka Njibo ya Bulopwe. Navuluka bupempudi bwaile nkumpempula ba Tumoni ku yami njibobo, penepo nashilula kufwatakanya’mba shi bantu bonso bādi bekele uno muswelo, longa i kiyampe mpata.

“Nādi nsaka nabubinebine bonso, ba Tumoni baye nkumpempula monka kwami, penepo nesamba na bamobamo umbukata mwabo bādi bengila ku njibo. Nalombela Leza, penepo mafuku dikumi kupitapo, mwana-mulume otwetene nandi musunsa umbajinji’wa waiya kwami. Waunena twendelele na kwifunda Bible, naitabija na mutyima onso. Kapenepa, waungita ku kupwila kwādi kulongelwa ku Njibo ya Bulopwe, naitabija. Nādi nkyamwene kintu kya uno muswelo nansha dimo! Tamba pakala, nādi nkimba bantu besenswe uno muswelo ne badi na nsangaji. Pano nebatēne!

“Kupwa, nashilula kwenda ku kupwila konso. Kubwipi kwa mayenga asatu kupitapo, naleka kala kibidiji kibi kya kutoma mfwanka. Naela bitabo byami bya majende ne madiske a ñimbo ya bandemona, penepo namona bandemona bashilula kala nkushila kyaba. Naalamuna ngikadilo yami ya umbūmi kukwatakañana na misoñanya itupa Yehova mu Bible, ne myeji isatu kupitapo, nashilula kusapula mwanda muyampe. Kumfulo kwa myeji isatu mikwabo, nabatyijibwa. Mafuku abidi kupwa kwa lubatyijo lwami, nashilula mwingilo wa bu pania mukwashi.

“Nafwijako Yehova bininge pamwanda wa bino bintu byonso byaunongela. Pano būmi bwami kebudi na kitungo. Bine, dijina dya Yehova i kiteba kikomoko kyonatana’mo bulami ne kūbijibwa. (Nkindi 18:​10) Milangwe yāmi idi pamo ka na ya kaimba wa mitoto wasonekele mu Mitoto 84:10 amba: ‘Difuku dimo mu bipango byobe dipityile buyampe kanunu; nsanshilwe kwikala bu-wapakibelo mu njibo ya Leza, e nabyako, [kupitako] kwikala mu mapema a bubi.’”

Uno mwana-mukaji wa mutyima wa kwityepeja imutane kitungo umbūmi bwandi. Bantu bonso bakimba Yehova na mutyima muyampe nabo bakokeja kwikala uno muswelo.