Byabuyabuya Bilupuka ku Myanda Miyampe

“Yehova wanshingile māni kusapwila myanda-miyampe ku [batūkanye]; wantuma kūndapa ba mityima mityumuke, . . . kusenga bonsololo badila.”—ISAYA 61:1, 2.

1, 2. (a) Yesu wēyukenye amba i ani, ne wēyukenye muswelo’ka? (b) I byabuyabuya’ka byālupukile ku myanda miyampe yāsapwile Yesu?

 DIFUKU dimo dya Sabado, Yesu wādi mu shinakoka ya mu Nazala, ku ñanjilo ya mwingilo wandi. Nsekununi inena’mba “bamufikijija mukanda wa mupolofeto Isaya; ebiya pa kuvungulula mukanda watēne po kisonekelwe’mba: Mushipiditu wa Yehova wangikadilako, ke-muntu wanshingile mani ngikale wakusap[u]la myanda-miyampe.” (Luka 4:16-19) Yesu wāendelela na kutanga uno musapu wa bupolofeto. Kupwa wāshikata, kanena’mba: “Kino kisonekwa kyo mubaimvwana ntanga kino, kibafikidila dyalelo dino’di.”—Luka 4:20, 21, MB.

² Mu uno muswelo, Yesu wēyukanya amba ye aye mwedi wa lubila wālailwe na bupolofeto, musapudi wa myanda miyampe, wa kwiya na busengi. (Mateo 4:23) Bine, Yesu wāsapwile myanda miyampe’po kashā! Wālombwele bādi bamuteja’mba: “Ami uno ne mwinya wa [ino n]tanda. Yewa wakunonda nankyo kakendapo mu fukutu, aye ukamona mwinya wa būmi.” (Yoano 8:12) Kadi amba: “Wivwane mūminine mu mwanda wami, nankyo binebine mwi bāna-bami-babwanga, ne kuyūka kwine mukayūkidijanga [bubinebine, nabo bu]kemukūlanga ke mudi bāna-pabo.” (Yoano 8:31, 32) Eyo, Yesu wādi na “binenwa bya [būmi bwa] nyeke ne nyeke.” (Yoano 6:68, 69) Mwinya, būmi, bwanapabo—bino byo byabuyabuya byotufwaninwe kuzakela!

3. I myanda miyampe’ka yāsapwile bana-babwanga?

 ³ Kupwa kwa Pentekosa wa mwaka 33 K.K, bana-babwanga bāendeleje mwingilo wa Yesu wa kusapula. Bāsapula ‘myanda miyampe ya Bulopwe’ ku bene Isalela ne ku bantu ba mizo. (Mateo 24:14; Bilongwa 15:7; Loma 1:16) Boba bāitabije’yo bāyukile Yehova Leza. Bānyongololwa mu bupika bwa mitōtelo, bekupa ku muzo mupya wa ku mushipiditu, “Isalela wa Leza,” wa bantu bakulupile kukabikala nyeke momwa mūlu na Yesu Kidishitu Mfumwabo. (Ngalatea 5:1; 6:16, MB; Efisesa 3:5-7; Kolose 1:4, 5; Kusokwelwa 22:5) Bine, bino byādi byabuyabuya bilēme kashā!

Busapudi mu Ano Mafuku

4. Mwingilo wa kusapula myanda miyampe uvuijibwanga namani mu ano mafuku?

⁴ Mu ano mafuku, bene Kidishitu bashingwe-māni, bakwatakanibwe na “kibumbo kikatampe” kyenda kivudila’ko, bendelelanga na kuvuija mwingilo wa bupolofeto wāpelwe Yesu dibajinji. (Kusokwelwa 7:9; Yoano 10:16) Pa kino, myanda miyampe isapulwanga pano mu ludingo kelwamwekele kashā. Mu matanda ne myaba 235, Batumoni ba Yehova bendelelanga na “kusap[u]la myanda-miyampe ku [batūkanye]; . . . kūndapa ba mityima mityumuke, ne kwela lubila lwa bu-mwanapabo ku boba bakwetwe bu-misungi, ne kushitula kifungo kya boba bakutwe; kwela lubila mwaka wa buntu bulumbuluke bwa Yehova, ne difuku dya kulubwila kinongo kya Leza wetu; kusenga bonsololo badila.” (Isaya 61:1, 2) I bine, mwingilo wa bene Kidishitu wa kusapula ukileta byabuyabuya ne busengi bwabinebine ku “boba badi mu byamalwa, shi bika, shi bika.”—2 Kodinda 1:3, 4.

5. Pa mwanda utala busapudi bwa myanda miyampe, Batumoni ba Yehova i beshile namani na Bipwilo bya Kine Kidishitu?

⁵ Eyo, Bipwilo bya Kine Kidishitu nabyo bidi na miswelo kampanda yobisapulanga. Bivule bitumanga bamishonele mu matanda makwabo amba bakakokele bantu mu bipwilo byabo. Kifwa, dipepala dimo (The Orthodox Christian Mission Center Magazine) dilombola mwingilo waingile bamishonele ba Orthodoxe mu Madagaskar, dya kunshi kwa Afrika, mu Tanzani ne mu Zimbabwe. Inoko mu kipwilo kya Orthodoxe, ne mu Bipwilo byonso bya Kine Kidishitu, balondi bavule kebasapulangapo. Ino Batumoni ba Yehova bonso bepāne baloñanga buninge bwa kusapula. Bayukile amba kusapula myanda miyampe bo bukamoni bulombola amba lwitabijo lwabo i lwabine. Polo wānene amba: “Ku mutyima ko kwitabija muntu pa boloke, ne ku kyakanwa nako ko kune[na ku meso a bantu bonso] ku lupandilo.” I amo, lwitabijo kelutonwenapo muntu ku mingilo i lufwe.—Loma 10:10; Yakoba 2:17.

Myanda Miyampe Ileta Byabuyabuya bya Nyeke

6. I myanda’ka miyampe isapulwa dyalelo?

⁶ Batumoni ba Yehova basapulanga misapu miyampe kutabuka yonso. Bapūtulanga Mabible abo ne kulombola boba betabija musapu amba Yesu wāelele būmi bwandi bu kitapwa mwanda wa bantu bafwene kudi Leza, balekelwe bubi, bekale ne na lukulupilo lwa būmi bwa nyeke. (Yoano 3:16; 2 Kodinda 5:18, 19) Basapulanga amba Bulopwe bwa Leza ke bushimikwe kala mūlu, ke bupebwe Yesu Kidishitu, Mulopwe mushingwe-māni, ne amba panopano ponka bukafundula bubi pano panshi ne kuludika mwingilo wa kujokeja Paladisa. (Kusokwelwa 11:15; 21:3, 4) Bafikidijanga bupolofeto bwa Isaya na kusapwila bakwabo amba uno o “mwaka wa buntu bulumbuluke bwa Yehova,” mwanda muzo wa muntu ukipelwe mukenga wa kwitabija myanda miyampe. Kadi badyumunanga bantu amba panopano ponka “difuku dya kulubwila kinongo kya Leza wetu” disa kufika, kyaba kisa kutukija Yehova banonga-bibi bapela kwisāsa.—Mitōto 37:9-11.

7. I mwanda’ka mumweke ulombola bumo bwa Batumoni ba Yehova, ne mwanda waka badi mu bumo uno muswelo?

⁷ Ino yo myanda miyampe imo kete ileta byabuyabuya bya nyeke mu ino ntanda ya binkumbulu ne bimpengele byonkabyonka. Boba betabija’yo batwelanga mu kisaka kya bana na bana bene Kidishitu badi umbumo ntanda yonso, bapela kukalañanibwa na kwishila kwa mizo, tubila nansha misokwe. I ‘bavwale buswe, mwanda kyo kijimba kibwaninine kya bumo.’ (Kolose 3:14; Yoano 15:12) Kino kyamwekele ku mwaka wadi’mo  mu ntanda imo ya mu Afrika. Difuku dimo lubanga, mata adidile mwipata mwa ntanda. Badi bakimba kubikula mulopwe ku bukomo. Kupwa myanda yaalamuka ke luma lwa tubila na tubila; bantu batopeka kisaka kimo kya Batumoni mwanda kyafile mwanabo Kamoni wa kabila kangi. Kisaka kyalondolola’mba: “Mu yetu njibo mudi enka Batumoni ba Yehova.” Ku kino kisaka, kwishila kwa tubila kewadipo mwanda mukatampe; buswe bwa bwine Kidishitu—bwa kusenga bonso basakilwa kusengibwa—o wadi mwanda mukatampe. Mubutule umo wa kino kisaka, aye ke Kamonipo, wānena’mba: “Bantu ba mu bipwilo bikwabo baikele kwaba batōtyi nabo. Ino Batumoni ba Yehova abo kutupu.” Myanda mivule ya uno muswelo, ilongeka mu matanda mulwibwa malwi, ilombola amba Batumoni ba Yehova ‘baswele banababo bonso betabije.’—1 Petelo 2:17.

Myanda Miyampe Yalamunanga Bantu

8, 9. (a) I kwalamuka’ka kwalamukanga boba betabija myanda miyampe? (b) I myanda’ka mimweke ilombola bukomo budi na myanda miyampe?

⁸ Myanda miyampe ikwatañene biyampe na kyokya kyātelele Polo bu “būmi bwa pano ponka, ne bwa mu mafuku akāya kumeso.” (1 Temote 4:8, NW) Keiletangapo’nka lukulupilo lwabine, lwa kutendelwa lwa būmi bwa kumeso kete, mhm, ino ilumbululanga ne “būmi bwa pano ponka.” Kamoni ne Kamoni wa Yehova uludikwanga na Bible, Kinenwa kya Leza, mwa kukwatañenya būmi bwandi na kiswa-mutyima kya Leza. (Mitōto 119:101) Bumuntu bwabo bwikalanga ke bupya ponso pobatamija ngikadilo pamo bwa boloke ne dikōkeji.—Efisesa 4:24.

⁹ Ivwana kifwa kya Franco. Kintu kyadi kimukambija i bulobo. Shi myanda ibamukoleja, kyandi kya mfulo i kukalabala byamwiko, kutyumuna ne kulala bintu. Wandi mukaji wefunda Bible na Batumoni ba Yehova, Franco pa kumona kifwa kyabo kya bwine Kidishitu, waanza kuboya ñeni amba nandi ufwaninwe kwalamuka. Wefunda nabo Bible, ku mfulo nandi washilula kulombola kipa kya mushipiditu sandu, kifwa ndoe ne kwīfula. (Ngalatea 5:22, 23) Franco i umo wa mu bantu 492 babatyijibwe mu Belejike mu mwaka wa mingilo wa 2001. Kifwa kikwabo i kya Alejandro. Uno nsongwalume wadi ke ntoma-dyamba wa mu meso fututu, wafula’nka ne ku kuboya bityakuku byelwa ku byala, byonso byaadi umona, ukapotoloja’byo mwanda’tu wa kupota dyamba. Pa kubwanya myaka 22, Alejandro wemona na Batumoni ba Yehova, bamunena kwifunda nandi Bible, nandi waitabija. Wadi utanga Bible difuku ne difuku ne kutanwa ku kupwila kwa bwine Kidishitu. Watōkeja būmi bwandi bukidibukidi, ne myeji isamba mine i mingi, washilula kutambila mu mwingilo wa busapudi—nandi ubadilwa mu bantu 10 115 baingile mu Panama mu mwaka wadi’mo.

Myanda Miyampe—Dyese ku Batūkanye

10. I bāni betabija myanda miyampe, ne i muswelo’ka obashinta mumweno wabo wa bintu?

¹⁰ Isaya wālaile mu bupolofeto amba myanda miyampe ikasapulwa ku batūkanye. Lelo bano batūkanye bene i bāni? I boba batelelwe mu mukanda wa Bilongwa amba ‘badi mu ngikadilo ya kukamona būmi bwa nyeke.’ (Bilongwa 13:48) I bantu betyepeje batanwa mu bantu ba miswelo yonso, boba bashitula mityima yabo mwanda wa kutambula musapu wa bubinebine. Bano bo bafunda amba kulonga kiswa-mutyima kya Leza ko kuleta byabuyabuya bitabukile kulampe kwine bintu byonso bipāna ino ntanda. (1 Yoano 2:15-17) Lelo Batumoni ba Yehova bateñanga mityima ya bantu namani mu mwingilo wabo wa busapudi?

11. Mwendele kunena kwa Polo, myanda miyampe ifwaninwe kusapulwa namani?

¹¹ Tala bidi kifwa kya mutumibwa Polo, wātumīne bene Kodinda mukanda’mba: “Amiwa, bānwe bāna betu, po naīle kwako ko mudi nkyaīlepo ne mīsambo ya lushiñanya, senene, ehe, nansha ya ñeni, kwimusapwila busapudi bwa Leza. Ke-ne-muntu nadi nsumininwe na’mba, nkikayūkapo umbukata mwenu nansha kimo, poso’nka Yesu Kidishitu, aye nandi i mwipaībwe ku [mutyi].” (1 Kodinda 2:1, 2) Polo kāsakilepo kutulumuja bemvwaniki bandi na masomo aāfundile. Kāfundijepo bintu bikwabo poso enka myanda ya Leza yabine isonekelwe ne dyalelo mu Bible. Kadi tala Polo mwaākankamikile Temote, musapudi nandi, amba: “Sapula uno mwanda, ne kupyasakana monka.” (2 Temote 4:2) Temote wādi unenwe kusapula “mwanda,” musapu wa Leza. Kadi Polo wāmulombwele amba: “Longa buninge bobe bonso wilombole kudi Leza bu mwitabijibwe, sendwe wampikwa kyafwijibwa bumvu, muyuke kwingidija kinenwa kya bubinebine monka mokyolokele.”—2 Temote 2:15, NW.

12. I muswelo’ka ulonda Batumoni ba Yehova binenwa ne kifwa kya Polo dyalelo?

¹² Batumoni ba Yehova balondanga kifwa kya Polo ne binenwa byaānene Temote bine. Bayukile amba Kinenwa kya Leza kidi na bukomo, o mwanda bengidija’kyo biyampe pobakwasha bakwabo na binenwa bifwaninwe, bipāna lukulupilo ne busengi. (Mitōto 119:52; 2 Temote 3:16, 17; Bahebelu 4:12) Eyo, bengidijanga shabo ne mabuku esambila pa Bible mwanda wa boba basangela musapu bamwene’ko buyuki bukwabo bwa Bible ponso pobatanga’o. Ino kebabulwangapo kulombola bantu binenwa bidi mu Bisonekwa. Bayukile amba Kinenwa kya Leza kya ku bukomo bwa mushipiditu kikatenga mityima ya bantu ba kwityepeja. Kadi kwingidija kobengidija’kyo kukomejanga ne lwitabijo lwabo abo bene.

“Kusenga Bonsololo Badila”

13. Mu mwaka wa 2001, i binkumbulu’ka byalengeje kwikale kisakibwa kikatampe kya kusenga boba badila?

¹³ Mwaka wa 2001 i mwaka wa bimpengele mu myaka mikwabo, o mwanda bantu bavule badi basakilwa kusengibwa. Mu Kweji wa Kitema wadi’mo, Etats-Unis watambilwe na batumbula bapomwene Kité kya Busunga bwa Ntanda Yonso (World Trade Center) mu New York ne njibo ya byabulwi itelwa bu Pentagone kubwipi na Washington, D.C. Bine, kuno kutambwa kyadi kyaso kikatampe mu Etats-Unis monso! Mu bino binkumbulu byonso, Batumoni ba Yehova baloñanga buninge bwa kuvuija mwingilo wabo wa “kusenga bonsololo badila.” Teja’tu myanda mityetye kete ilombola mobasengela bantu.

14, 15. I muswelo’ka waingidije Batumoni, pa byaba bibidi bishile, bisonekwa bifike’po bisenga boba badila?

¹⁴ Kamoni musapudi wa kitatyi kyonso wafwenene mwana-mukaji umo mu dishinda, wamwipangula mwalangila pa myanda ya kutambwa na batumbula yamwekele panopano. Mwana-mukaji washilula kudila. Kanena amba weivwene bibi mpata, ino mwa kulongela mwadi mumukomene. Kamoni wamunena amba Leza witutele batwe bonso mutyima, watanga Isaya 61:1, 2. Bino binenwa bya ku bukomo bwa mushipiditu wa Leza byatenga uno mwana-mukaji, wanena amba nanshi bonso bayoyokotanga. Waitabija trakte ne kunena Kamoni aye amupempule ku njibo.

¹⁵ Batumoni babidi badi mu busapudi, batana mwana-mulume wadi wingila kwandi mu payote. Bamulomba shi bakokeja kwisamba nandi binenwa bisenga bitamba mu Bisonekwa, bitala pa kinkumbulu kyabundwile Kité kya Busunga bwa  Ntanda Yonso. Aye pa kwitabija, batanga 2 Kodinda 1:3-7, mutanwa bishima binena’mba: ‘Kusengibwa i kuvule kupityila mudi Kidishitu.’ Uno mukelenge wafwija’ko bano Batumoni bekalwa nandi bakwasha bantu na binenwa bya kwibasenga, amba: “Leza esele mwingilo wa kutendelwa omwingila.”

16, 17. I myanda’ka ibidi ilombola amba Bible udi na bukomo bwa kukwasha bantu badi na bulanda nansha bavutakanibwe mityima na binkumbulu?

¹⁶ Kamoni umo wadi ukapempula bantu basangedile musapu, ko kwitana wetana na mwanā lolo umo wāsangedile musapu dibajinji ne kumulombola amba wadi usaka’tu kuyuka mwikadile bantu nandi kupwa kwa kinkumbulu kyalongekele panopano. Uno mwana-mulume watulumuka pa kumona Kamoni upityija kitatyi kyandi mu kupempula bakwabo ne kutala mobekadile. Walombola mwanetu amba nadi ñingila kubwipi na Kité kya Busunga bwa Ntanda Yonso pokyatambilwe, nemwena ne mupityila binkumenkume byonso. Kupwa wamwipangula mwanda waka Leza ulekele’ko masusu, Kamoni watanga mavese mu Bible, watanga ne kisonekwa kya Mitōto 37:39 kinena’mba: “Lupandilo lwa boloke i lwa Yehova; aye udi nsakwa yabo mikomo mu mwaka wa tusua.” Uno mukelenge waipangula Kamoni amba abe nobe ne kyobe kisaka mudi namani, kupwa wanena tutu āye amupempule dikwabo, wamufwija’ko na mutyima umo pangala pa buno bupempudi.

¹⁷ Mukwabo nandi ubadilwa mu tununu ne tununu twa badi badila baikele kusengwa na Batumoni ba Yehova kinondanonda na kutambwa na batumbula i mwana-mukaji watenwe na Batumoni badi bapempula bekalwa nabo. Wādi muvutakanibwe ñeni na byalongekele, ino wateja na katentekeji pobadi batanga kisonekwa kya Mitōto 72:12-14 kinena’mba: “Aye ukanyongolola mupando pa kwita; ne balanda ba kubulwa wakwibakwasha. Ukebafwila lusa balanda ne badi makasa, kadi ne myuya ya badi makasa ukeīpandijanga. Ukakūla muya wabo ku bongojani ne bikungulu bya bulobo; kadi mashi abo akēkalanga maleme mu meso andi.” Bine, bino binenwa byadi bilanguluja mpata! Uno mwana-mukaji wanena Batumoni batange monka ano mavese, ponka’po webeta batwele mu njibo yandi mwanda wa kwendeleja mīsambo. Ku mfulo kwa mīsambo, kifundwa kya Bible kyashilula.

18. Kamoni umo wakweshe bakwabo namani pobamunene kulombela ku meso a bonso?

¹⁸ Kamoni umo wingilanga mu leshitola idi  mu mukenza wa bantu bafuke ku makasa badi bapela kwivwana myanda miyampe ya Bulopwe. Pa kupwa kutambwa na batumbula, bantu ba mu mukenza basela mityima kūlu. Mu dya Butano kyolwa pa kupwa kutambwa, mukulumpe wa leshitola wanena umo ne umo asele buji ne kutambila panja, kupwa bonso bekale kūba talala nyā mwanda wa kuvuluka bafwile. Kamoni walēmeka milangwe yabo watamba, ino aye wekokela pafula mu dishinda kaimene talala. Mukulumpe wa kaji wadi uyukile kala amba i mwingidi Kamoni wa Yehova, o mwanda kyaba kyabo kya kulanguluka pa kupwa, wanena tutu’wa amba lombela ku meso a bonso. Kamoni waitabija. Mu milombelo yandi, watela’mo madilo asambakene pi na pi, kupwa wanena amba bene badila kebafwaninwepo kwivwana kinku pampikwa lukulupilo. Watela kitatyi kikapwa lonso bino binzengele bya bulanda ne amba bonso babwanya kufwena kudi Leza wa busengi kupityila ku buyuki bwabinebine bwa mu Bible. Pa kupwa kwitabija amba “Amena,” mukulumpe—ne bantu 60 ne kupita badi panja pa leshitola—baiya kudi Kamoni’wa, bamufwija’ko, ne kumupamba bīpa, mukulumpe wanena amba kashā nkyaivwene milombelo milumbuluke bwa ino.

Dyese ku Bantu ba mu Bibundi

19. I mwanda’ka ulombola amba bamo batendelanga misoñanya milumbuluke ilonda Batumoni ba Yehova?

¹⁹ Bantu ba mu bibundi mwingila Batumoni ba Yehova bamwenanga byabuyabuya ku Batumoni bobadi nabo—mo munenena bavule, nakampata mu ano mafuku. Le bantu baleta ndoe, bampikwa budimbidimbi, ba ngikadilo yanwa babulwe kuboilwa’ko ñeni namani? Mu ntanda imo ya Azia wa pa Bukata, Batumoni batene tata umo wāingile mu Leta mu kitango kya batyifutyifu balondalonda twanda, ino pano ke mutambule pasho. Wanena amba kyaba kimo wāpelwe kiselwa kya kubandaula malongolodi a mitōtelo pala pala. Pa kubandaula Batumoni ba Yehova, wātulumukile pa kumona kwabo kubulwa budimbidimbi ne mwiendelejo wabo mulumbuluke. Wātendela lwitabijo lwabo lukomo ne mfundijo yabo mwanda imanine pa Bisonekwa. Uno tata waitabija kwifunda Bible.

20. (a) Mwingilo waingile Batumoni ba Yehova mwaka wadi’mo ulombola bika? (b) I bika bilombola amba kukidi mwingilo mukatampe wa kwingila, ne tufwaninwe kumona namani madyese a kusapula otupelwe?

²⁰ Bine myanda ya kusekununa i mivule mpata, inoko ino ibala-inga yasekununwa mu kino kishinte ilombola patōkelela amba Batumoni ba Yehova baputumine na mingilo byabinebine mu mwaka wa mingilo wa 2001. * Besambile na midiyo ne midiyo ya bantu, basenga bavule badi badila, ne mwingilo wabo wa busapudi waeselwa madyese. O mwanda kwaikele bantu 263 431 babatyijibwe mwanda wa kulombola patōka kwipāna kobepēne kudi Leza. Ntanda yonso, kibalwa kya basapudi kyelundile’ko kufika pa bantu 1,7 pa katwa. Kadi kutanwa kwatenwe bantu 15 374 986 ku Kivulukilo kya lufu lwa Yesu kulombola amba kukidi mwingilo mukatampe wa kwingila. (1 Kodinda 11:23-26) Twendelelei nanshi na kukimba batūkanye betabija myanda miyampe. I amo, mwaka wa buntu bulumbuluke bwa Yehova ukyendelela, netu twendelelei na kusenga “ba mityima mityumuke.” Bine, ano i madyese malumbuluke kashā otupelwe! Batwe bonso twitabije binenwa byānene Isaya amba: “Nkasepelela byamwiko’tu mudi Yehova, mūya wami ukekala na tusepo mudi Leza wami.” (Isaya 61:10) Tulomba Leza endelele nyeke na kwitwingidija pano pafikidija bino binenwa bya bupolofeto binena’mba: “Mfumwetu Leza [u]kameneneja boloke ne mitendelo kumeso a mizo yonso.”—Isaya 61:11.

[Kunshi kwa dyani]

Lelo Ubavuluka?

• Batūkanye bāmwenine byabuyabuya’ka mu myanda miyampe yāsapwile Yesu?

• I madyese’ka āeselwe boba bāitabile ku mwingilo wa busapudi wa bana-babwana ba Yesu mu myaka katwa imbajinji?

• I madyese’ka eselwa boba betabija myanda miyampe dyalelo?

• Lelo tumwene namani madyese etu a kwikala basapudi?

[Bipangujo bya Kifundwa]

 [Tabulo pa paje 29-32]

LAPOLO WA NTANDA YONSO WA BATUMONI BA YEHOVA WA MWAKA WA MINGILO WA 2001

(Pa kuyukila’ko bikwabo, tala dibuku)

[Bifwatulo pa paje 25]

Batumoni ba Yehova bavulukanga nyeke kiselwa kyabo kya kusapula

[Bifwatulo pa paje 27]

Boba betabija myanda miyampe bāyanga kutwela mu kisaka kya bana na bana bene Kidishitu badi umbumo ntanda yonso