“Wi Mwana-Mukaji Mulumbuluke”

Bino byo binenwa byobātendele nabyo nsongwakaji mwine Moabu. Wādi mukaji wa kishala utelwa dya bu Luta, muko wa Naomi, mwana-mukaji mwine Isalela. Luta wāikele mu Isalela pano ke papite myaka 3 000, mu mafuku ādi aludika batyibi, kadi wādi utendelwa pangala pa bulumbuluke bwandi. (Luta 3:11) I bika byāmulengeje atendelwe uno muswelo? Ne i ñeni’ka yotukokeja kuboila ku kifwa kyandi kiyampe?

Kādipo udya “bidībwa bya mulēle,” ino wādi wingila kitatyi kilampe, na kininga bu umpaudi ku madimi, o mwanda bādi bamufwija’ko pangala pa kininga kyandi. Nansha pobamupēleleje’ko kaji, ino aye wādi uputumina’mo, ulonga bivule kutabuka ne bimulombelwe bine. Na bubine, binenwa bya Bible bisambila pa mwana-mukaji utendelwa, mulumbuluke, mukankamane byādi bimufwaninwe biyampe.—Nkindi 31:10-31; Luta 2:7, 15-17.

Ngikadilo ya ku mushipiditu ya Luta—kwityepeja, mutyima wandi wa kwipāna, ne buswe bwandi bwa dikōkeji—byo byālengeje bantu bamupe bulēme. Wāshile bambutwile bandi ne ntanda yabo, wālamata kudi Naomi, pampikwa mulangwe nansha umo amba nami kekubulwe nkamona mutyima-ntenke na kukomba bulubo buyampe. Nansha nankyo, Luta wādi na mutyima wa kwingidila Yehova, Leza wa inandi muko. Nsekununi ya mu Bisonekwa inenena pa kufwaninwa kwandi amba wādi “utabukile buyampe [kudi Naomi] bāna basamba-babidi bana-balume.”—Luta 1:16, 17; 2:11, 12; 4:15.

Eyo, Luta wātendelwe shandi bu mulumbuluke mu bukata bwa bakwabo, ino kikatampe kutabuka i kutendela kwātendele Leza ngikadilo yandi ne kupala kwaāmupadile mpalo ya kwikala nkambulula wa Yesu Kidishitu. (Mateo 1:5; 1 Petelo 3:4) Bine, Luta i kifwa kilumbuluke mpata ku bana-bakaji bene Kidishitu, ino ke ku abopo kete, i ne ku bonsololo batelwa bu batōtyi ba Yehova!