‘A Leza, Mwanda Waka Walekele Kino?’

RICARDO uvulukanga’nka kuvuluka mwaadi ushikatyile na mukajandi Maria mu kyumba kya kikungilo ku lupitalo belaija dokitele. * Abo bonso kebadipo na bukomo bwa kutanga papye ulembelwe’po bipimo bya mfulo bya Maria. Ino Ricardo wapūtula amvelope, baela diso bukidi pa bishima bya kiñanga bilembelwe’po. Bamona’po kishima “dyaya,” bashilula abo bonso kudila mwanda bayukile biyampe buluji bwa kino kishima.

“Dokitele wadi muntu muyampe kashā,” ye Ricardo uvuluka, “ino mobimwekela wadi uyukile muningile ino misongo, o mwanda wadi witulombola kyaba kyonso amba mufwaninwe kukulupila mudi Leza.”

Dokitele wadi undapa Maria wajingulwile kumeso kwa kumundapila ku ladiyo amba kulu kwa lundyo kwa Maria kujinanga aye kuyuka mpika. Kupwa bipimo bikwabo byalombola amba dyaya ke ditenge ne ku bongolo. Yenga’tu umo wa bundapi upwa, baleka’byo kumundapila ku ladiyo. Maria wapungila, myeji ibidi pa kupita’po wafwa. “Nasangele na’mba masusu andi abapu,” ye Ricardo ushintulula, “inoko bushiyena bonadi nabo bwapita, kengabila amba i biyampe ne būmi bwami bwine nabo bufule. Divule dine nadi ndidila Leza amba: ‘Mwanda waka walekele kino kimfikila?’”

Shi Kinkumbulu Kibetutana, Bipangujo Bivulanga

Bantu bavule kujokoloka ntanda batanwanga na masusu pampikwa kusaka’o, mwataninwe nao Ricardo. Divule dine, i bantu bampikwa ne mwanda mwine bo basusukanga. Langa’tu bidi njia isansa mutyima itamba ku malwi a kwisobwela bidyanga keadi mpwilo akubija bantu. Nansha tala musanshila mutyima wa boba bajilulwa ku bukomo, kōnwa kwa bana, bikupilwa bya mu bisaka, ne bibi bikwabokwabo bilonga bantu. I bimwekelele’tu amba mu mānga yonso mboloji ne masusu esusula bana-balume ne bana-bakaji kebidipo na mfulo. (Musapudi 4:1-3) Kudi kadi imbinzo ya boba bafikilwa na bimpengele bya ntanda nansha na misongo ya kikona mulá, ya mu ñeni, ne ya ku ngitu. Nanshi ke kya kutulumuka’po shi bavule beipangula’mba, “Mwanda waka Leza ulekele’ko masusu a uno muswelo?”

Nansha ke ku boba bakulupile mu myanda ya Leza, masusu ke mwandapo upēla kutyumwina umanwi. Nobe ubwanya padi kwiipangula kine kilekele Leza wa buswe kadi mwinē bukomo bonso bantu basusuka namino i kika. Kuyuka malondololo otutondwa kadi abine ku kino kipangujo kibazula mitwe kuleta ndoe ku mutyima ne kwitupwanya kipwano na Leza. Bible udi na kino kilondololwa. Tubakulombe ubandaule byobya binena’po Bible monka mobilombwedilwe mu kishinte kilonda’ko.

[Kunshi kwa dyani]

[Bifwatulo pa paje 3]

Muñanga wadi witulombola kyaba kyonso amba mufwaninwe kukulupila mudi Leza