Bankasampe—Le Mwendelelanga ku Mushipiditu?

“NANSHA byonadi ntanwa ku kupwila kwa bwine Kidishitu, nkyadipo na mutyima wabila mpata kwingidila Yehova,” ye Hideo uvuluka myaka yaadi ukifunda ku sekondele. “Divule dine nadi nanga kwikala nami mutumbe mutumbile bana ba masomo bakwetu, ñenda nefyela mu kipito na kami kakaji. Bitungo byami kebyadipo bishilakane kadi nkyadipo na mutyima wa kusaka kwendelela kumeso ku mushipiditu.” Bankasampe bavule baloñanga bintu bulongelonge pampikwa mutyima wa kusaka kufikila pa bitungo bifwaninwe nansha kukimba kwendelela kumeso.

Shi wi nkasampe, kubudilwepo padi kusangela makayo kampanda a kwitamuna ngitu nansha kwipwija mukose. Ino shi ke myanda itala bintu bya ku mushipiditu, padi ujijiñanga’po. Le muntu ubwanya kusangela bitungo bya ku mushipiditu? Ivwana bino binenwa bya mulembi wa mitōto: “Busapudi bwa Yehova i busumininwe, budyumuna bendalale ke badyumuke. . . . Kusomanya kwa Yehova i kutōke, tō, kutōkeja ne meso.” (Mitōto 19:7, 8) Kinenwa kya Leza kiludikanga “bendalale” kebalonga bya tunangu, ‘kibatōkeja meso.’ I amo, ukokeja kuloelelwa ne kusangela bintu bya ku mushipiditu. Ino i bika bikusakilwa pa kusaka usangele’byo? Le ukashilwila pepi?

Ikala na Mutyima Ukutonona Kwingidila Leza

Dibajinji, ufwaninwe kwikala na mutyima ukutonona. Ivwana mwanda wa Yoshia Mulopwe nkasampe wa Yuda. Pobāsokwele mukanda wa Bijila wa Yehova mu tempelo, Yoshia wātangije’o, pa kwivwana byātangilwe’bya, wāmutenga mpata ku mutyima. Penepo “Yoshia wafundula byamunyanji byonsololo mu matanda onso ādi ku bāna ba Isalela.” (2 Bilongwa 34:14-21, 33) Butangi bwa Kinenwa kya Leza bo bwātonwene Yoshia wālonga bintu bivule bya kutubulula mutōtelo utōka.

Nobe ubwanya kutamija mutyima wa kusaka kwingidila Yehova shi utanga Bible kitatyi ne kitatyi ne kulanguluka pa byotanga. Kino kyo kyatonwene Hideo. Washilwile kwinangila bininge na pania mutame, Kamoni wa Yehova mwingidi wa kitatyi kyonso. Uno pania wadi mwifundi mwipāne wa Bible, kadi wadi ulonga bukomo bwa kulonda bufundiji bwa Bible mu būmi bwandi. Kifwa kyandi kyakankamika Hideo bikatampe mpata, nandi washilula kumwiula ne kutamija watamija mutyima wa kusaka byabinebine kwingidila Leza pamo na bantu bakwabo. Kwendelela kwandi ku mushipiditu kwamwikadija na būmi budi na kitungo.

Kutanga Bible difuku ne difuku kubwanya kukunka bankasampe ku mutyima. Takahiro ushintulula’mba:  “Kitatyi kyonso kyonadi nkanda ku butanda, shi navuluka amba nkyatangile Bible mu dine difuku’dya, nadi mbuka’po nakatanga. Kino kyamfikije ku kwimona amba ndudikwanga na Yehova. Butangi bwa Bible bwa difuku ne difuku i bunkwashe ñendelele kutama ku mushipiditu. Byonadi nsumininwe kwingila bivule mu mwingilo wa Yehova, nakwete mwingilo wa bu pania walonso kinondanonda’tu na kupwa masomo a sekondele. Ne pano nebwingilanga na nsangaji yabine na bine.”

I kika kikwabo, kutentekela pa kutanga Bible, kikokeja kukomeja mutyima obe wa kusaka kutendela Yehova? Tomohiro wafundijibwe bubinebine bwa mu Bible na inandi. Unena’mba: “I enka ponapwile kwifunda dibuku dyonso La vie a bien un but [Būmi Budi Bine na Kitungo], ami papo na myaka 19, ye kutengwa penepo natengwa na buswe bwa Yehova ne na kitapwa kya kikūlwa kya Yesu. Uno wami mutyima wa kufwija’ko pangala pa buswe bwa Leza o wauntonwene nonge bivule mu mwingilo wa Yehova.” (2 Kodinda 5:14, 15) Bankasampe bavule bakankamikwanga kwendelela ku mushipiditu ponso pobendelelanga na kwifunda na kininga kifundwa kya kasuku kya Bible, pamo bwa Tomohiro.

Ino ukalonga namani shi ubefunde Bible ino kwikala na mutyima wa kwingidila Yehova mpika? Le kudi muntu wa kukukwasha obwanya kunyemena’ko? Mutumibwa Polo wāsonekele amba: “Leza udi ko wimupele kya pamo kusaka ne kwingila.” (Fidipai 2:13, BB) Shi ulomba bukwashi kudi Yehova, bine ukakupa pambulwa nsengwa mushipiditu sandu wandi, ukakukomeja amba wikale na mutyima ke enkapo wa “kwingila,” ino i ne wa “kusaka” mwine kumo. Ko kunena amba mushipiditu sandu ukatamija kyaka kyobe kya kusaka kulonga bilumbuluke mu mwingilo wa Yehova, kadi ukakukwasha utame ku mushipiditu. Bine, kulupila mu bukomo bwa Yehova kadi komeja mutyima obe!

Witungile Bitungo bya Abe Mwine

Shi ubapu kusumininwa kwingidila Yehova ne pa mfulo, i biyampe witungile’ko ne bitungo mwa kwendelela biyampe ku mushipiditu. Mana, nsongwakaji mwine Kidishitu, wānene amba: “Kwitungila bitungo kwadi na bukwashi bukatampe kondi. Pa kyaba kya kujokela kunyuma, ñendelelanga kumeso na bukankamane. Nadi nombela Yehova wa kundudika koku ndamine bitungo byami mu ñeni, o mwanda nabwenye kwendelela kumeso pampikwa kulabikwa.”

Bitungo byobe bifwaninwe kwikala byenzankane, byobwanya kufikila’po. Kifwa kutanga shapita umo wa Bible ku difuku i kitungo kyendele’mo. Ubwanya ne kushilula mpangiko ya kulonga bukimbi. Kifwa, tutele’ko bidi kintu kimo kyobwanya kwingidija kidi’ko mu Falanse, ukokeja kwifunda ngikadilo ya Yehova itanwa mu dibuku Index pa mutwe wa mwanda “Jéhovah,” kutwelela pa kamutwe ka mwanda “Qualités par leur nom.” Ukamona’po kintu kya milongo 40 ya kutwelela’po yobwanya kubandaula, kadi bukimbi bobe kebukabulwepo kukufwenya pabwipi na Yehova ne kukutonona umulongele bivule. Bitungo bikwabo byokokeja kufikila’po i bino bya kulondolola nansha’tu musunsa umo ku kupwila ne kupwila kwa bwine Kidishitu mu bipindi bilomba malondololo, kulonga buninge bwa kuyuka biyampe nansha’tu mwanetu umo ku kupwila ne kupwila, ne kuleka kupityija difuku nansha dimo kulombela kudi Yehova mpika nansha kumuyukanya ku bakwetu.

Shi kwelembeje ku Masomo a Mwingilo wa Kiteokratike, nankyo kino nakyo i kitungo kiyampe kyofwaninwe kwitungila. Le kodi mwanze kutambila mu mwingilo wa kusapula ku bantu bonso? Shi kwatambile’mo, nabya longa buninge bwa kwikala musapudi wampikwa kubatyijibwa. Kadi ta mutyima bininge ku kipwano kyopwene na Yehova ne ku kwipāna kwadi, mwanda dino dyo ditabula dilonda’po. Bankasampe bavule beelelanga’ko kwikala na būmi bukwatañene na kwipāna kwabo pa kutwela mu mwingilo wa kitatyi kyonso.

 Nansha byokidi kiyampe kwikala na bitungo mu būmi bobe, ino epuka kutamija mushipiditu wa kwitāka. Ukamona nsangaji mivule mu byolonga shi kwidingakanyapo na bakwenu.​—Ngalatea 5:26; 6:4.

Kekubulwe padi wimonanga amba kudipo na bwino buvule, kolanga amba i bikomo kodi kwitungila bitungo bifikile. Shi bidi namino, nankyo londa ano madingi a mu Bible anena’mba: “Fwenya kutwi wivwane binenwa bya bañeni.” (Nkindi 22:17) Lomba bukwashi kudi bambutwile bobe nansha kudi bene Kidishitu bapye. Inoko bambutwile ne banabetu bakwabo bafwaninwe nabo kwikala ba bujalale ne bakankamika mu uno mwanda. Bankasampe babulwanga nsangaji shi bangadikwa ngitu ne kutakikwa na bakwabo kufikila pa bitungo byobebatungila, kino kijimijanga ne buluji bwine bwitungilwanga bitungo. Kino kyo kyafikile nsongwakaji umo wanene amba: “Bambutwile bami badi bantungila bitungo, kupwa kyoki ke kyoki, kifwa kwilembeja ku Masomo a Mwingilo wa Kiteokratike, kutambila mu mwingilo wa busapudi, kubatyijibwa, ke kwikala pania. Nadi nonga bukomo bwa kufikila pa kimo ne kimo. Shi napu kubwanya kitungo kimo, bambutwile kebādipo bañanya, ino abo bādi bambwejeja’po kadi kitungo kikwabo kya kwikonda nakyo. Ku mfulo nemona bu muntu uningilwa nyeke kufikila pa bitungo. Penepo napungila ne kwimona amba nkidipo ne kyononga kine.” Lelo kibi pano i kika? Bitungo byonso byadi biyampe, inoko ke aye mwinepo wadi witungila’byo. O mwanda shi usaka kubwanya, abe mwine ikala na mutyima wa kuboya milangwe ya kwitungila bitungo!

Langa bidi Yesu Kidishitu. Kitatyi kyāile pano panshi, wādi uyukile byādi bimusakila Yehova Shandi kulonga. Nanshi kulonga kiswa-mutyima kya Yehova kekyādipo’tu enka kitungo bitupu kudi Yesu, ino wādi mwingilo ufwaninwe kuvuija. Le Yesu wāmwene namani mwingilo wandi wāmupelwe? Wānene amba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” (Yoano 4:34) Yesu wādi uloedilwe kulonga kiswa-mutyima kya Yehova, o mwanda wāikele na būmi bukwatañene na byādi bimusakila Shandi. Yesu wādi wibimwene pamo bwa bidibwa​—wādi usangedile ne kuloelelwa kuvuya mwingilo waādi unenwe kwingila. (Bahebelu 10:5-10) Nobe ubwanya kuloelelwa shi udi na mutyima ukutonona biyampe kwingila byobya bikukankamikila bambutwile kulonga.

Kemukikokai mu Kulonga Bilumbuluke

Shi pano ubetungila kitungo mu ñeni, longa buninge bwa kufikila’po. Ngalatea 6:9 unena’mba: “Ketukikōkai mu kulonga bilumbuluke; ke-twi-bantu tukāngulanga mwaka pa kufikila ponka, wivwane ne kupungila mpika.” Kokeubija mu bukomo nansha bwino bobe abe mwine. Bine, kukabulwepo kutana bijika, kadi kyaba kimo ukamona ne kumona amba pano bibakoma. Ino Bible witukulupija’mba: “Mu mashinda obe onso muyuke [Leza], kadi aye ukōlolanga tushinda tobe.” (Nkindi 3:6) Yehova ukakukwatakanya powielela’ko kufikila pa bitungo byobe bya ku mushipiditu.

Bine, shi utamije mutyima wa kusaka kwingidila Yehova ne shi ukimbe kufikila pa bitungo bya ku mushipiditu, kukabulwepo kumwekeja ‘kwendelela kumeso kobe ku bantu bonso.’ (1 Temote 4:15) Namino ukaloelelwa mu būmi budi na kitungo, būmi bwa kwingidila Leza.

[Kifwatulo pa paje 31]

Kutanga Bible ne kulanguluka pa byotanga kukakutonona wingidile Yehova

[Kifwatulo pa paje 32]

Yesu wāvuije byonso byādi bimusakila Shandi kulonga