Bankasampe Basangaja Mutyima wa Yehova

Bino bishinte bya kwifunda i biteakanibwe nakampata pa mwanda wa bankasampe badi umbukata mwa Batumoni ba Yehova. O mwanda tukankamika bankasampe befunde ino myanda na katentekeji ne kukaleta malondololo mavule pobikefundwa mu Kifundwa kya Kiteba kya Mulami kya pa kipwilo.

“Wami mwana, wikale wañeni ne kusangaja mutyima wami, amba nondolole yewa umpunika.”​—Nkindi 27:11.

1, 2. (a) Shintulula shi kukokwa’tu na bintu bya ino ntanda kushintulula kala kubulwa kufwaninwa kwikala mwine Kidishitu. (Loma 7:21) (b) I ñeni’ka yowaboila ku kifwa kya Asafa? (Tala kapango, pa paje 7.)

 LANGA’PO bidi shi wendele kukapota mbwija. Poenda utala ubamone kisandi kyakusangaja mpata ponka na ponka. Kidi na musombelo ne mondele osakanga, ulanga amba i bakusonene’kyo pa ngitu, ne bei ilembelwe’po nayo yonka ipēla kashā. Penepa ubafwena kutadija pabwipi. Ubazozeja mutyima pa kumona amba mbwija’ya ke mipeluke ku milomo, kadi ne misono mine i misonakanye bibi. Eyo, kisandi shakyo kisangaja meso mpata, inoko i kisone bya enda dya, wiye kesha. Lelo ukela lupeto lobe na kupota kino kisandi kifwefwefwe?

² Dingakanya uno mwanda na kyokya kibwanya kukufikila abe nkasampe mwine Kidishitu. Shi utale bintu bya ino ntanda​—bidi pamo bwa kisandi​—dibajinji bibwanya kumweka bu bintu biyampe mpata. Kifwa, bakwenu ba ku masomo bakokeja kwenda ku fetyi ya pwilai kuno, kutoma dyamba ne malwa, kwisaka’ko na ba kwisaka, ne kulonga nabo busekese kumeso kwa kwisonga. Lelo nobe ukokwanga kyaba kimo na būmi bwa uno muswelo? Le wabilanga kutompa nansha dimo ku buno bobatela bu bwanapabo? Shi wabilanga’bo, nankyo kokiyumbila kala kunena amba udi na mutyima umbi nansha amba kufwaninwepo kwikala mwine Kidishitu. Mwanda Bible unenanga amba ntanda keyo kukoka bantu na bukomo​—ipitula’nka ne yewa usaka kusangaja Leza mwine.​—2 Temote 4:10.

3. (a) Mwanda waka kulondalonda bintu bya ntanda i kupanga luvula? (b) Mwine Kidishitu umo ulombola namani bulembakane bwa kulondalonda bya ino ntanda?

³ Pano tadija biyampe, monka motadilanga kisandi kyosangedile kupota. Wiipangule amba, ‘Lelo bupunga bwa ino ngikadilo ya bintu ne musoneno wayo bidi namani?’ Bible unena amba “ntanda ipita.” (1 Yoano 2:17, NW) Bitobala byo-byonso byoileta nabyo i bya lupito. Kadi mwiendelejo wakubulwa bwine Leza keo lupoto. Na bubine keudipo na bei tyipi. Mwine Kidishitu umo ususuka na kyokya kyatela bu “malwa alupuka ku kusupakanya bunkasampe bibi,” unena’mba: “Ntanda ikokeja kumweka bu itobala, ya buya bukoka meso. Kadi kyoisaka i kukukulupija amba ukokeja kusangela mu bya buya byayo pampikwa kwangula’mo kibi nansha kimo. Ino na bubine kebibwanikapo.  Mwanda ntanda isa kukwingidija wekōla ne kwikōla, ku mfulo yakulasa.” * Penepo kyosupakenya bunkasampe bobe na būmi bufwefwefwe namino i kika?

Kukingwa Kudi “Umbi”

4, 5. (a) Yesu wālombele bika kudi Yehova kumeso’tu kwa kufwa kwandi? (b) Mwanda waka ino milombelo yādi mifwaninwe?

⁴ Bankasampe Batumoni ba Yehova bayukile amba ino ngikadilo ya bintu keidipo na kiyampe kya kwibapa, o mwanda baloñanga bukomo bwa kwepuka bulunda na ino ntanda. (Yakoba 4:4) Le nobe ubadilwa mu bano bankasampe bakikōkeji? Shi ubadilwa’mo, nankyo ufwaninwe kufwijibwa’ko. Bine, ke kipēlapo kukomena lupusa lwa balunda ne kwikala na mwimanino mwishile na wabo, ino wa kwimukwasha udi’ko.

⁵ Yesu wālombele kumeso’tu kwa kufwa kwandi amba Yehova ‘ukalama’ bandi bana ba bwanga “pa mwanda wa umbi.” (Yoano 17:15, NW) Yesu wādi na bubinga bwa kulombela namino. Kādipo widilwe amba kulama bululame kekukekalapo kunekene ku balondi bandi, nansha shi badi na myaka’ka. Mwanda waka? Mwanda dibajinji, monka mwānenene’kyo Yesu, bandi bana ba bwanga bādi ba kwikonda na walwana mukomokomo wampikwa kumweka​—“umbi,” ke Satana Dyabola kadi. Bible unena amba uno umbi wa nshikani, kipangwa kya mushipiditu, “unangakana bwa ntambo ubuluma, ukimba wakubokota.”​—1 Petelo 5:8.

6. Le tuyukile namani amba Satana kadipo kafuku na bankasampe?

⁶ Mu bula bwa mānga yonso, Satana witobelwe bibi kumwesha bantu dyemo dya kashā. Tala’po byamalwa bilenga nzuba byaāpapamwinine Yoba ne kisaka kyandi. (Yoba 1:13-19; 2:7) Padi ukivulukile binkumbulu byowimwenine mu būmi bobe bilombola mushipiditu wa butapani udi na Satana. Dyabola ulēle lukwaba, kyafwila i enka kubokotañana, kadipo amba bano i bankasampe nebafwile’ko lusa. Kifwa, ku ngalwilo ya myaka katwa kabajinji K.K., Heloda wākutyile nkuku ya kwipaya bana bonso bana-balume ba mu Betelema bādi na myaka ibidi ne kwika munshi. (Mateo 2:16) Mwine wātonwene Heloda kulonga kino ke ungipo, i Satana​—kwaādi ufwila konakanya mwana wādi wa kwikala mwenda mafuku ke Meshiasa wālailwe na Leza, mwine wa kufikidija butyibi Bwandi padi Satana! (Ngalwilo 3:15) I kimweke patōka amba Satana kadipo kafuku na bankasampe nansha dimo. Kyandi’tu kyafwila i kubokota bantu bavule bene. Pano papangilwe mūlu waelwa  pano panshi po pene padi na “bukalabale bukatampe bwine, pa kuyūka’mba: Ngidi ne kakitatyi katyutyu.”​—Kusokwelwa 12:9, 12.

7. (a) Le Yehova i mwishile kulampe kwine namani na Satana? (b) I bika bikusakila Yehova umone kusangela būmi?

⁷ Yehova aye i mwishile kulampe kwine na Satana wa “bukalabale bukatampe,” mwanda Yehova udi na “mutyima wa lusa.” (Luka 1:78) Aye ye kifwa kīsokwele kya buswe. I amo, ino yo ngikadilo ivwele Umpangi wetu, o mwanda utelwa na Bible amba: “Leza i buswe.” (1 Yoano 4:8, BB) Bine, leza wa ino ngikadilo ya bintu i mwishile kulampe na Leza oeselwe dyese dya kutōta! Satana aye ukimbanga kubokotañana, ino Yehova aye “kasakilepo’mba, nansha umo ōneke, mhm.” (2 Petelo 3:9) Umwene būmi bwa muntu ye-yense​—ne bobe bwine kumo​—bu kintu kilēme. Shi Yehova ukwisashila mu Kinenwa kyandi uleke kwikala wa ntanda, kakimbangapo kukubudija nsangaji umbūmi nansha kukadila bwanapabo bobe mikalo, ehe. (Yoano 15:19, NW) Ino ukulamanga mwanda wa yewa umbi. Bine Shobe wa mūlu ukusakila kintu kinengele kutabuka bitobala bya lupito bya ino ntanda. Kyafwila i ukamone “bumi bwa binebine”​—būmi bwa nyeke mu paladisa pano pa ntanda. (1 Temote 6:17-19, MB) Yehova ukusakilanga kunekenya umbūmi, o mwanda ukukankamika ufikile pa kino kitungo. (1 Temote 2:4) Ne kadi Yehova ukwita lwito lwa pa bula. Lelo i lwito’ka?

“Wikale . . . Kusangaja Mutyima Wami”

8, 9. (a) I kyabuntu’ka kyobwanya kupa Yehova? (b) Monka mokilombwedilwe mu mwanda wātene Yoba, Satana upunikanga Yehova muswelo’ka?

⁸ Lelo kasha kwapotēle mulunda nobe wa pa mutyima kyabuntu, pa kumupa’kyo komutale bidi mu mpala mwatambwila’kyo na nsangaji ne na mutyima wa kufwija’ko? Na bubine walangulukile mpata pa kuyuka i kyabuntu’ka kimufwaninwe. Shi ke pano, langa bidi pa kino kipangujo: I kyabuntu’ka kyobwanya kupa Yehova Leza, Umpangi obe? Dibajinji, uno mulangwe ubwanya padi kukuvutakanya ñeni. Le i bika bibwanya kulomba Mwinē Bukomo Bonso ku kapwaipwai ka muntu? Lelo kine kyokamupa kyabudilwe i kika? Bible ulondolola mu Nkindi 27:11 amba: “Wami mwana, wikale wañeni ne kusangaja mutyima wami, amba nondolole yewa umpunika.”

⁹ Monka moyukile kala mu kifundwa kyobe kya Bible, Satana Dyabola ye upunika Yehova. Unena amba bonso bengidila Leza bamwingidilanga mwanda wa kusaka kumwena’mo, ke pa mwandapo wa buswe. Ulanga amba shi batanwe’tu na byamalwa kubapu, bakaleka lubilo lonka mutōtelo wabine. Ivwana kifwa binenwa bya Satana byaānene Yehova pangala pa Yoba muntu moloke, amba: “Lelo kumusailepo lusao ne ku njibo yandi kwine, ne lwa ku byonsololo byadi nabyo mitamba yonso’ni, a? ubaesela mingilo ya makasa andi ne bimunanwa byandi bibatundubuka mu ntanda’ya. Ino nanshi ōlola kuboko kobe pano, utenge byonsololo byadi nabyo, penepa abulwepo kukakutuka ku mpala yobe?”​—Yoba 1:10, 11.

10. (a) Le tuyukile namani amba Satana waālakene bululame bwa bavule ke enkapo bwa Yoba kete? (b) Nobe utalwanga namani na uno mwanda wa bubikadi?

¹⁰ Nsekununi ya Bible ilombola amba Satana kaālakenepo enka dikōkeji dya Yoba kete, ehe, i ne dya bonso bengidila Yehova​—ne abe mwine kumo. I amo, Satana wēsambīle pa bantu bonso, kanena Yehova amba: “Byonso bidi na muntu [ke enkapo Yoba kete, ehe] ukapana’byo pa būmi bwandi.” (Yoba 2:4) Mwene pano ubamone kyepelo kyobe mu uno mwanda? Monka mulombwela Nkindi 27:11, Yehova unena amba kudi kintu kyokokeja kumupa​—kintu kya kumupeja malondololo a kulondolola Satana, wa kipuni umupunika. Langa’po bidi​—Mubikadi wa diulu ne ntanda ukwita nobe wiye umwitabile mu mwanda mukatakata kupita yonso. Bine, udi na kiselwa ne madyese alenga moyo! Le ubwanya kulonga kyokya kilomba Yehova kodi? Yoba aye wābwenye kulonga’kyo. (Yoba 2:9, 10) Ne Yesu nandi wābwenye’kyo, pamo ne bakwabo kebabadika mu bula bwa mānga, ne bankasampe bavule bene kumo. (Fidipai 2:8; Kusokwelwa 6:9) Nobe ubwanya kulonga’kyo. Inoko kokilengwa’ko, mu uno mwanda i mutupu bu kibembe, koku kwenda, koku kwenda. Bilongwa byobe byo bikalombola kolēmenene, shi ku kapuni ka  Satana, shi ku malondololo a Yehova. Le i ani umo okatonga kwitabila?

Yehova Ukutele Mutyima!

11, 12. Le i mwanda utala Yehova shi ubatonge kumwingidila nansha kupela kumwingidila? Shintulula.

¹¹ Lelo butongi bo-bonso bokatonga budi na mvubu ku meso a Yehova? Mwene kudi kala bantu bavule bakōkele bamupele kilondololwa kifwaninwe kya kulondolola Satana? I amo, Dyabola wānene amba i kutupu wingidila Yehova pa buswe, ano matope ke mapwe kala kuyukana amba i a bubela. Ino Yehova usakanga nobe wilunge ku mutamba wandi mu uno mwanda wa bubikadi mwanda aye utele mutyima ne kodi kasuku kobe. Yesu wānene amba: “Ne Shenu wa momwa umadiulu nandi’nka nankyo, kasenswepo nansha umo wa bano banuke ajimine, enhe.”​—Mateo 18:14.

¹² Pano ubamone biyampe amba Yehova utele mutyima ku butongi bobe. Kutabukidila, butongi bobe bumuteñanga. Bible ulombola patōka amba Yehova uteñwanga mpata ku mutyima na bilonga bantu, shi biyampe, shi bibi. Kifwa, bene Isalela pobādi bamutombokela misunsa ne misunsa, Yehova wādi ‘ufitwa mutyima.’ (Mitōto 78:40, 41) Kumeso kwa Dilobe dya mu myaka ya Noa, “bubi bwa bantu [bwāvudile] ke bwa ntanda ne miseke,” kino “kyamufityija [Yehova] ku mutyima.” (Ngalwilo 6:5, 6) Langa’po bidi buluji bwa kino kintu. Shi ubatonge mwiendelejo mubi, yuka amba ubafityija Umpangi obe mutyima. Ke kunenapo amba Leza i muzoze, utenekwatenekwa mutyima. Ino uteñwanga namino mwanda ukuswele ne kuta mutyima ku būmi bobe. Ku mutamba mukwabo, shi ulonga byoloke, mutyima wa Yehova usangala. Kakasangalapo’tu mwanda ubabweja ku kilondololwa kyandi kudi Satana, ino i ne mwanda pano kadi Obe wa kukupala mpalo. Ke kintu kino kyo kyasaka. (Bahebelu 11:6) Bine, Yehova Leza ye Shobe wa buswe!

Byabuyabuya Bivulevule mu Ano Mafuku

13. I muswelo’ka kwingidila Yehova okukokeja kuleta byabuyabuya tamba’nka pano?

¹³ Byabuyabuya bimwenwa mu kwingidila Yehova ke enkapo bya mu mafuku a kumeso kete, mhm. Bankasampe bavule umbukata mwa Batumoni ba Yehova i bamwene’mo nsangaji ne maloa tamba’nka pano, bine i kyendele’mo. Mwanda “bijila bya Yehova i byoloke, bitōkejanga mutyima,” mo mwāsonekele mulembi wa mitōto. (Mitōto 19:8) Yehova uyukile i kyepi kiyampe kotudi kutabuka muntu ye-yense. Wānene kupityila kudi mupolofeto Isaya amba: “Ami ne Yehova Leza obe ukulombola kakumwenamo wakukukunkuja pa dishinda dyokōkeja kwenda. E-e, shi watejeje ku bijila byami! longa nankyo ndoe yobe yaikele’nka bwa munonga, ne boloke  bobe bwa mantanki a kalunga-kamema.”​—Isaya 48:17, 18.

14. Le misoñanya ya mu Bible ikokeja kukwepuja namani makambakano a mapu?

¹⁴ Kulonda misoñanya ya mu Bible kukakwepukija makambakano mavule ne mutyima kupepa. Kifwa, Bible unena amba boba batamija mutyima wa kuswa lupeto “abapu kwitapatapa ku misongo ya ntanda ne ntanda.” (1 Temote 6:9, 10) Mwene kodi mumone bakwenu ba kisense bafikilwa na binena kino kisonekwa? Bansongwalume ne bansongwakaji bamo i betwike mapu mavulevule mobafwila’tu kupota bisandi bilembelembe’po majina nansha bipungwa bya katutu bitambile panopano. Kutyintyidilwa na nkongole keipu, ilomba kulubula na misubu kapwila, mwanda’tu wa kupota bintu bikupityile kipimo i kwimunija bupika busansa mutyima mpata!​—Nkindi 22:7.

15. Le misoñanya ya mu Bible ikulamanga namani ku misongo ilupuka ku busekese?

¹⁵ Tala kadi ne mwanda wa busekese nao. Mwaka ne mwaka kujokoloka ntanda yonso, kudi bankasampe bankungakaji bavule bemitanga memi. Bamo babutula bana ba kamabula, ne muswelo mwine wa kwibalela mukomo. Bakwabo nabo bapulumuna memi ne kushala na kyaso ku mutyima wabo wa mundamunda. Ne kadi kudi bansongwalume ne bansongwakaji bapya mba isambuka ku buenda, kifwa SIDA. Kadi ku yewa uyukile Yehova, kintu kya bulanda bukatampe i kōna kipwano kyandi na Yehova. * (Ngalatea 5:19-21) Nanshi Bible udi na bubinga panena’mba: “Nyemai busekese.”​—1 Kodinda 6:18, MB.

Kwingidila “Leza wa Nsangaji”

16. (a) Le tuyukile namani amba Yehova ukusakilanga kusangala mu bunkasampe bobe? (b) Mwanda waka Yehova utūdile’ko misoñanya yofwaninwe kulonda?

¹⁶ Bible utelanga Yehova amba i “Leza wa nsangaji.” (1 Temote 1:11, NW) Usaka nobe wikale na nsangaji. I amo, ne Kinenwa kyandi kine kinena’mba: “Sepelela’tu mu busongwalume bobe, kadi mutyima obe nao uk[u]sangaje mu mafuku a busongwalume bobe.” (Musapudi 11:9) Ino Yehova umonanga kulampe, ke enkapo bya dyalelo, kadi ujingululanga bipa bikalupuka mafuku mavule kumeso ku mwiendelejo muyampe nansha  mubi. O mwanda ukusoñanya’mba: “Vuluka Umpangi obe mu mafuku obe pokidi nkasampe, mafuku mabi po keafikile, ne myaka ifwena e pokanena’mba: Nkidipo ne nsangaji mu ao.”​—Musapudi 12:1.

17, 18. Nkasampe umo mwine Kidishitu walombwele namani nsangaji yandi mu kwingidila Yehova, ne nobe ukokeja namani kwikala na nsangaji ya uno muswelo?

¹⁷ Dyalelo, bankasampe bavule i batane nsangaji mikatampe mu kwingidila Yehova. Kifwa, Lina nsongwakaji wa myaka 15 unena’mba: “Ami mbwanya kulangula mutwe. Ndi mukomo nkē mwanda nkitomangapo mfwanka nansha dyamba. Ntambulanga bwendeji bwa mvubu kupityila ku kipwilo bumpa muswelo wa kulwa na mitabakano ilenga nzuba ya Satana. Mpala yami yeñenyanga nsangaji mwanda wa kisense kyubaka kyoñendanga na bantu ku Njibo ya Bulopwe. Kutabukidila, ndi na kyepelo kipityile byonso kya būmi bwa nyeke pano pa ntanda.”

¹⁸ Bankasampe bene Kidishitu bavule balwanga divita dilumbuluke dya lwitabijo ne kumwena’mo nsangaji pamo bwa Lina. Bayukile amba būmi bwabo​—nansha byobudi bwa makambakano kyaba kimo​—budi na kitungo kyabinebine ne būmi bwabinebine bwa kumeso. Shi ke pano nanshi, endelela na kwingidila Leza ukusakila biyampe. Sangaja mutyima wandi, nandi ukakusangaja tamba pano ne mu myaka yonso nyeke ne nyekeke!​—Mitōto 5:11.

[Kunshi kwa dyani]

Lelo Ukivulukile?

• Le i kyaka’ka kyowikonda nakyo kitamba kudi yewa “umbi,” Satana?

• I muswelo’ka okokeja kusangaja mutyima wa Yehova?

• Bible ulombola namani amba Yehova ukutele mutyima?

• I byabuyabuya’ka bimo bitamba ku kwingidila Yehova?

[Bifwatulo bya Kifundwa]

[Kapango\Kifwatulo pa paje 7]

Mwana-Mulume Moloke Wasa Kupona

Asafa wādi mwine Levi, kaimba mutumbe mu tempelo ya Yehova mu Isalela wa kala. Wābundile ne ñimbo yādi imbwa na bantu pa kutōta. Nansha Asafa byaādi na ano madyese a pa bula, wākokelwe kyaba kimo na mwiendelejo wakubulwa bwine Leza wa bakwabo ba kisense bādi bajilula bijila bya Leza ino kutanwa’bo na bibi mpika. “Maulu ami aswile kupona, māyo ami asakile kushetemuka,” ye Asafa wānene. “Ke-ne-muntu nadi ne kilokoloko ku bya bakibengo, po namwene katōkwe ka babi.”​—Mitōto 73:2, 3.

Kupwa Asafa wāenda ku kipandulwamo kya Leza kukalombela pa uno mwanda. Wāikala na mumweno umpya wa bintu bya ku mushipiditu, ye kwivwanija wāivwanija amba Yehova ushikilwe bibi ne amba mwenda myaka ne babi ne boloke byobya byobakuna byo byonka byobakangula. (Mitōto 73:17-20; Ngalatea 6:7, 8) Bine, babi badi pasenena. Kyabo kya mfulo i kupona pakonakanya Yehova ino ngikadilo yampikwa bwine Leza.​—Kusokwelwa 21:8.

[Bifwatulo pa paje 9]

Yehova ukusakilanga biyampe, ino Satana aye kitungo kyandi i kukubokota

[Kifwatulo pa paje 10]

Bankasampe bavule batananga nsangaji mikatampe mpata mu kwingidila Yehova pamo na bene Kidishitu bakwabo