Lelo I Kipwilo’ka Kyofwaninwe Kutonga?

‘MITŌTELO mishileshile i mashinda pala pala atwala kuntu kumo konka. Mwene kudi’nka Leza umo kete?’ Ino milangwe i mitabijibwe na bavule balanga amba kwilunga ku kipwilo kampanda kudi na kamweno shako, ino nansha shi ubatonge kipwilo’ka ke mwandapo.

Dibajinji uno mulangwe ukokeja kumweka bu muyampe, mwanda kudi enka Leza umo kete, Mwinē Bukomo Bonso. (Isaya 44:6; Yoano 17:3; 1 Kodinda 8:5, 6) Inoko, ketukokejapo kuvulaminwa kwishila—pakwabo ne kwipatanya—kudi mu bisumpi bivule bya mitōtelo ya boba betela amba bengidilanga Leza wa bine. Bilongwa byabo, nkulupilo yabo, bufundiji bwabo, ne bisakibwa byabo i bishile kulampe kwine. Kuno kwishila i kukatampe kufikija’nka ne bantu ba mu kipwilo nansha mu kisumpi kimo ku kukolelwa pa kwivwanija ne kwitabija bintu bifundija nansha bikulupile bakwabo.

Ku mutamba mukwabo, Yesu wānene amba: “Aye Leza i mushipiditu, kadi boba bakumutōta, poso nabo bamutōtele mu mushipiditu ne binebinepo.” (Yoano 4:24) Lelo kutōta Leza na bubinebine ko kulengeja kwikale kwipatanya kwa milangwe itala padi Leza, pa mpango yandi, ne pa muswelo wasaka bamutōte? Lelo i kyendele’mo kwitabija amba Leza mwinē bukomo bonso kabangilepo muswelo o-onso obamutōta?

Bene Kidishitu ba Bine pa Kala ne Dyalelo

Kyaba kimo bene Kidishitu ba mu myaka katwa kabajinji bādi bekala na milangwe mishile pa bintu kampanda. Kimfwa, mutumibwa Polo wēsambile pa ba mu Kodinda amba: “Bānwe bāna betu, bansapwidile kudi ba mu kipango kya Koloe mwanda wenu’mba: Kudi lupata kokwa ko badi. Ino kyo kino kyo nanena’mba: Banwe bonso kwako ko mudi ku muntu, ku muntu, au’mba: Ne wa Polo; au nandi’mba: Ne wa Apolosa; ungi nandi’mba: Ne wa Kefasa; mukwabo nandi’mba: Ne wa Kidishitu.”—1 Kodinda 1:11, 12.

Le Polo wāmwene kuno kwishila bu mwanda mutyetye? Le umo ne umo wādi ufwaninwe kulonda dishinda dyandi aye mwine dimutwala ku lupandilo? Nansha dimo! Polo wādyumwine amba: “Nemwisashilapo, bānwe bāna betu, ku dijina dya Mfumwetu Yesu Kidishitu, amba bānwe bonso mwisambe kyakanwa kimo kyonka, kemukīketa bānwe bene pala, pala, ehe; nanshi mwikale babambakanibwe pamo, monka umutyima umo, ne pa kutyiba-mambo napo mo monka.”—1 Kodinda 1:10.

I bine, kutūla nkulupilo umbumo kekubwanikapo shi kuningilwa bantu. Ino kubwanika shi bantu abakimbe na katentekeji myanda ne kufikila pa kwitabija milangwe imo yonka.  O mwanda kifundwa kya kasuku kya Kinenwa kya Leza ne mutyima wa kusaka kulonda byobya bifundwa o matabula a mvubu pa kusaka kwikala na bumo bwādi bwisambila’po Polo. Lelo bumo bwa uno muswelo budi’ko? Eyo, monka motwadi tubamwena, tamba kalā Leza wingilanga nyeke na bantu badi mu kisumpi. Lelo tubwanya kujiula kino kisumpi dyalelo?

Byabuyabuya Bidi mu Kwilunga Kuyampe

Davida mulembi wa mitōto wāipangwile difuku dimo amba: “Abe Yehova, le i ani, ukapempula mu kipema mobe? Lelo kadi ukēkalanga mu lūlu lobe lukola i ani?” Bine kino kyādi kipangujo kilanguluja. Davida aye mwine wālondolwele amba: “Wakunangila moloke, swā, wingila byaboloke, wisamba byabinebine mu mutyima wandi.” (Mitōto 15:1, 2) Kwivwanija bya binebine Bible ko kukwasha muntu ayuke mutōtelo ubwenye bino bintu bisaka Leza. Kupwa shi welunga na kino kisumpi, ukekala na kisense kyūbaka, na bantu batōta Leza umbumo kadi “mu mushipiditu ne binebinepo.”

Batumoni ba Yehova i balombole amba bibwanika kwikala na nkulupilo ne bilongwa bya muswelo umo mu ino ntanda mikalañane. Umbukata mwabo mudi bantu batambile mu bipwilo bivule bishileshile ne mu tubila pala pala. Batumoni bakwabo bādi bantu batatana nansha kupela kwikala’ko kwa Leza. Bangi nabo kebādipo’tu batele mutyima ku mutōtelo. Nansha byobatambile mu mitōtelo, mu bibidiji, ne mu milangilo mishileshile, bano bantu pano badi mu bumo bwa mutōtelo kebwamwekele kashā mu ino ntanda.

Kyalwilo kya buno bumo i Bible, Kinenwa kya Leza. Na bubine, Batumoni ba Yehova bayukile amba kebabwanyapo kuningila bakwabo bintu bya kulonga. Ino basangelanga madyese obadi nao a kukankamika bakwabo befunde Bible mwanda wa butongi bwabo mu myanda ya mutōtelo bwimanine pa kino kyalwilo kikomo. Mu uno muswelo, bavule bakokeja nabo kumwena byabuyabuya mu kutōta Leza “mu mushipiditu ne binebinepo.”

Dyalelo kudi kyaka kikatampe kya kuponena mu mpusa imbi ne mu byongo. O mwanda i kipite buya kutonga bantu bayampe ba kwilunga nabo. Bible unena amba “nanga ne bantu bañeni, nobe ukekala wañeni” ne amba “kwinangila kubi kuboleja miswelo milumbuluke.” (Nkindi 13:20; 1 Kodinda 15:33) Kwinangila na batōtyi ba bine ba Leza kwitukiñanga. O mwanda Bible wituvuluja’mba: “Twitei mityima bātwe bene na bene ya pa kwisombela ku lusa ne mīngilo miyampe; ne kuleka’byo kubungakana mpika, pamo na muswelo wa bamobamo, poso kwikwasha bātwe bene; ne byo mwamona difuku dibafwena po pene pa kuningija.” (Bahebelu 10:24, 25) Bine i dyese ne dyese’po pa kumona balunda, batutu ne bakaka ba ku mushipiditu, bekwasha abo bene na bene mu kuvuija biselwa byabo ku meso a Leza!

Ottmar witabija kino. Watamine mu kisaka kya bene Katolika mu Alemanye, ino aye ne kwija mpika waleka’byo kwenda ku kipwilo. Ushintulula’mba: “Ponso ponadi ñenda ku kipwilo, nadi nemona amba najoka’ko makasa pamo’nka na monadi naendela’ko.” Ino wādi ukilamine lwitabijo mudi Leza. Ebiya wētana na Batumoni ba Yehova, wājingulula amba bine bano bo bengidi ba bine ba Leza. Wamona amba ufwaninwe kwilunga nabo. Pano unena’mba: “Byokendi umo wa mu bulongolodi bwingila bwa ntanda yonso, ndi na ndoe mu ñeni ne mu mutyima. Nakikwashibwa bityebitye mwa kwikadila na buyuki bwa binebine bwa Bible. Kino kyo kintu kya mvubu mpata kondi.”

Lwito ku Boba Bakikimba

Bantu bengidila pamo mu kisumpi baloñanga bivule kupita’ko bantu bengila bunka wa pandi wa pandi. Kimfwa, Yesu wāsoñenye balondi bandi kumeso kwa kwishiya’mba: “Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya mushipiditu sandu. Kadi ne kwibalombola balaminine  byonso byo nemulaīle ami mwine.” (Mateo 28:19, 20) Le bādi bakokeja namani kwingila uno mwingilo shi kekwadipo buludiki nansha bulongolodi? Lelo muntu ubwanya namani kulonda uno musoñanya wa mu Bisonekwa shi wingidila Leza pandi pa kasuku?

Batumoni ba Yehova baabenye mu mwaka wadi’mo’u bitabo 91 933 280, kubadila’mo ne maboloshile, ne tubuku twisambila pa Bible, pa bino tentekela’po ne mapepala 697 603 247, mwanda wa kufikila tutwa twa midiyo ya bantu mu matanda 235 na musapu wa mu Kinenwa kya Leza. Bine buno i bukamoni bwa kisumpi kidi umbumo ne kilongololwe kilonga bukomo butabukile bwa muntu ye-yense wingila pampikwa bukwashi bwa bakwabo!

Kutentekela pa kwabanya mabuku esambila pa Bible, Batumoni ba Yehova bendejanga ne bifundwa bya Bible ku bitupu mwanda wa kukwasha bantu bevwanije biyampe shē byobya bisaka Leza. Mwaka wadi’mo, baendeje yenga ne yenga bifundwa kintu kya 5 726 509 ku bantu ne ku bisumpi bya bantu. Bino bifundwa bya Bible i bikwashe midiyo ya bantu bekale na kyalwilo kikomo kya mwa kutongela myanda itala mutōtelo. Tubakwite nobe wiye wifunde byobya bisaka Leza, monka mobilombwedilwe mu Bible. Kupwa abe mwine uketongela butongi bobe.—Efisesa 4:13; Fidipai 1:9; 1 Temote 6:20; 2 Petelo 3:18.

Shi usaka kusangaja Leza, kwilunga ku mutōtelo kudi na mvubu—ino ke ku kipwilopo nansha ku mutōtelo o-onso osakile. Ufwaninwe kutonga na kulonda buyuki bwa binebine bwa mu Bible, ke na kulondapo mfwatakani nansha milangilo ya bantu kampanda. (Nkindi 16:25) Wifunde bisakibwa bya mutōtelo wa bine. Enzankanya’byo na nkulupilo yobe. Kupwa tonga’po biyampe.—Kupituluka 30:19.

[Kifwatulo pa paje 7]

Batumoni ba Yehova badi umbumo mu ino ntanda mikalañane