“Kebo ba Nsangaji Shabo Boba Beyukile Bisakibwa Byabo bya ku Mushipiditu”

TONI shi tubalanguka lubanga, divule tudilanga kakitatyi kampanda kupwa twatumbuka ketukakimbe byakudya. Ku kyolwa twajoka ku manswa ato, twadila monka bityetye kupwa twalāla. Mu bitatyi bimo, twitentekanga, twaela mai, ne kutamija twana. Banyema bakwabo nabo baloñanga uno muswelo muyukane kala.

Ino batwe bantu twi beshile. Shako tudyanga, tulāla, ne kwibutula, inoko bavule motudi kebasangelangapo enka bino bintu. Tusaka kuyuka kine kyotwikadile’ko. Tukimba kuyuka buluji bwa būmi bwetu. Ne kadi twabilanga kuyuka bintu bya kumeso. Bino bisakibwa bikatampe byo bintu bishiyañanya bantu ke bipangwa bya pa bula—ke būmi bwabo bwa ku mushipiditu kadi, nansha kusaka bintu bya ku mushipiditu ne bukomo bwa kuyuka’byo.

Balongwe mu Kyelekejo kya Leza

Bible ushintulula kine kikadile muntu na mutyima wa kusaka bintu bya ku mushipiditu, amba: “Leza wapanga muntu monka mu bu-kyelekejo kya Leza mwine, i monka mu bu-kyelekejo kya Leza mwine mwāmupangile, webapanga ba-mulume ne mukaji.” (Ngalwilo 1:27) Kulongwa kotulongelwe mu “kyelekejo kya Leza” kushintulula’mba tudi na bwino bwa kwiula ngikadilo kampanda ya Leza nansha byotutādilwe na bubi ne kubulwa kubwaninina. (Loma 5:12) Kimfwa, tukokeja kulonga bintu. Kadi tudi na tunangu, boloke, ne bukomo kampanda bwa kwilombola buswe bwampikwa kwisakila batwe bene na bene. Tukokeja kadi kulanguluka pa byapityile kala ne pa bikāya kumeso.—Nkindi 4:7; Musapudi 3:1, 11; Mika 6:8; Yoano 13:34; 1 Yoano 4:8.

Bukomo bwa ku mushipiditu botudi nabo bumwekanga divule mu kyaka kyetu kya kusaka kutōta Leza. Shi ketubwenyepo senene kino kisakibwa kya kupwana na Umpangi wetu, nabya ketukokejapo kwikala na nsangaji ya bine ne ya endaenda. “Kebo ba nsangaji shabo boba beyukile  bisakibwa byabo bya ku mushipiditu,” mo mwānenene Yesu. (Mateo 5:3, New World Translation) Inoko tufwaninwe kuta mutyima wa kusokola bino bisakibwa na kuyuka bubinebine bwa ku mushipiditu—ko kunena’mba myanda ya bine itala padi Leza, misoñanya yandi, ne mpango yakwatyile’ko bantu. Le i kwepi kwa kutana buno bubinebine bwa ku mushipiditu? I enka mu Bible kete.

‘Binenwa Byobe I Bubinebine’

Mutumibwa Polo wāsonekele amba: “Bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi.” (2 Temote 3:16) Binenwa bya Polo i bikwatañane na bya Yesu wālombele Leza amba: “Binenwa byobe i bubine bine.” Dyalelo, tuyukile amba bino Binenwa i Mukanda Ukola, o mwanda i biyampe kutala shi nkulupilo ne misoñanya yotulonda ikwatañene nao.—Yoano 17:17, Bisonekwa Bitokele.

Shi tudingakanye nkulupilo yetu na Kinenwa kya Leza, nabya tubaiula bantu ba mu Belea wa kala, bādi batala shi bufundiji bwa Polo bukwatañene na Bisonekwa. Bine, Luka kātopekelepo bene Belea, ino wēbaninye pa kino. Amba “batambwile mwanda wa Leza ne mityima too ke bakimbekimbe mafuku onso mu Bisonekwa amba bayuke shi byo badi bebasapwila’bya i byendele’mo.” (Bilongwa 17:11, MB) Byokudi dyalelo kwipatanya kwa bufundiji bwa bipwilo mu myanda ya kulonda mu mwikadilo, i kipite buya twiule kimfwa kya bene Belea batabukile bulēme.

Muswelo mukwabo wa kujingulula bubinebine bwa ku mushipiditu i kutala mobwalamwina būmi bwa bebulonda. (Mateo 7:17) Kimfwa, shi muntu ulonda bubinebine bwa mu Bible mu būmi bwandi, ukekala mulume muyampe, shabana muyampe, mukaji muyampe, nansha inabana muyampe, kadi kino kikaletela kisaka nsangaji ne kubutula kuloelelwa. “Badyese ne dyese, i bakwivwana uno mwanda wa Leza, ne kulama balame’o,” mo mwānenene Yesu.—Luka 11:28.

Binenwa bya Yesu bituvuluja byobya byānene Shandi wa mūlu kudi bene Isalela ba kala amba: “Ami ne Yehova Leza obe ukulombola kakumwenamo wakukukunkuja pa dishinda dyokōkeja kwenda. E-e, shi watejeje ku bijila byami! longa nankyo ndoe yobe yaikele’nka bwa munonga, ne boloke bobe bwa mantanki a kalunga-kamema.” (Isaya 48:17, 18) Bine, bonso baswele biyampe ne boloke kebakabulwepo kulonda luno lwito lwa kyanga!

Bamo Basakanga Kwikala na “Matwi a Luo”

Leza wāityile bene Isalela luno lwito lwa kyanga mwanda bādi bongolwa na mitōtelo ya bubela. (Mitōto 106:35-40) Netu tufwaninwe kudyumuka kutyina twakongolwa na bubela. Polo wāsonekele pangala pa boba betela bu bene Kidishitu amba: “Mwaka ukāyako o bakapela lufundijo lukomo, ino abo byo badi ne matwi a luo, bakasakanga abo bene bafundiji ba milwi na milwi, ba monka mwikadile kilokoloko kyabo; kadi bakajikanga matwi abo ku byabinebine.”—2 Temote 4:3, 4.

Bendeji ba bipwilo bakanyanga matwi a luo a bantu na kutala kilomo-nyeka bilongwa bya munyanji, kimfwa kusambakena pamo na muntu okemwisongele nandi, buladi bwa bantu ba ngitu imo, ne bunkolwankolwa. Bible unena patōkelela amba boba  betabija ne balonga bintu bya uno muswelo “kebakapyanapo bulopwe bwa Leza, mhm.”—1 Kodinda 6:9, 10; Loma 1:24-32.

Na bubine, kulonda misoñanya ya mu Bible kulomba bukankamane, nakampata shi tusepwa na kibengo, inoko tubwanya kwiilonda. Mu Batumoni ba Yehova mudi bavule bādi bamuninwe na bitomibwa bileta lunjingwe, bādi bankolwankolwa, babisekese, bantapani, bangivi, ne bambepai. Ino balamine Kinenwa kya Leza mu mityima yabo ne kuleka mushipiditu sandu ushinte būmi bwabo mwanda wa banangile “mwakufwaninwa Mfumwetu.” (Kolose 1:9, 10; 1 Kodinda 6:11) Byobapwana na Leza, badi pano na ndoe ya mutyima kadi, monka motusa kwikimwena, badi na lukulupilo lwa būmi bwa kumeso.

Lukulupilo lwa Bulopwe

Lukulupilo lwa mu Bible lwa amba bantu ba kikōkeji bakekala mu ndoe nyeke lukafikidila kupityila ku Bulopwe bwa Leza. Yesu wānene mu lulombelo lwandi lwa kulondela’po amba: “Bulopwe bobe bufike. Muswidile mutyima obe mūlu ne panopantanda pene i monka.” (Mateo 6:10) Bine, i enka Bulopwe bwa Leza kete bukalongeja kiswa-mutyima kya Leza pano pa ntanda. Mwanda waka tunena namino? Mwanda buno Bulopwe bwa mūlu—umbikalo upelwe Yesu Kidishitu—o muswelo umo ukamwekeja Leza bubikadi Bwandi boloke pano pa ntanda.—Mitōto 2:7-12; Danyele 7:13, 14.

Yesu Kidishitu mulopwe wa buno Bulopwe bwa mūlu ukanyongolola bantu ku bupika bo-bonso, kubadila’mo ne bupika bwa bubi bwa Adama ne misongo ne lufu bilupukile’ko bine. Kusokwelwa 21:3, 4 unena’mba : “Talaipo bidi, kipema kya Leza byo kidi pa bantu, . . . Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”

Ndoe ya nyeke ikekala’ko pi na pi pano pa ntanda. Mwanda waka tukulupile amba ikekala’ko? Mwanda Isaya 11:9 witusokwela amba: “[Bekadi ba mu Bulopwe] kebakasanshijapo, nansha kōna kwine, monsomonso mu lūlu lwami lwa bu-ujila; mwanda panopanshi pakayula ne kuyukidija kwa Leza’nka bwa mema ayuja kalunga-kamema.” Bine, muntu yense wa pano panshi ukekala na buyuki bwa binebine bwa Leza kadi ukamukōkela. Lelo kino kyepelo  kibakusangaja ku mutyima? Shi kibakusangaja, nankyo kino kyo kitatyi kya abe nobe kushilula kwikala na “kuyukidija kwa Leza.”

Lelo Ukateja Musapu wa Bulopwe?

Kupityila ku buno Bulopwe, Leza ukafundula mingilo yonso ya Satana ne kufundija bantu mashinda andi moloke. Nanshi ke kya kutulumukapo shi Bulopwe owādi mwanda mwinemwine wādi wimanine’po bufundiji bwa Yesu. Wānene amba: “I kiñendelemo nsapwile myanda-miyampe ya bulopwe bwa Leza mu bibundi bikwabo namo, ke-kintu i akyo kyonka kyo natalwilwa.” (Luka 4:43) Kidishitu wāsoñenye bandi bana ba bwanga amba basapwile bakwabo uno musapu umo onka. (Mateo 28:19, 20) Wālaya’mba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” (Mateo 24:14, MB) Ino mfulo yendanga ifwena lubilo lonka. Nanshi i kipite buya bantu ba mityima miyampe bateje myanda miyampe ileta būmi!

Albert, otwatelanga mu kishinte kishele kunyuma, wāivwene musapu wa Bulopwe pashilwile kwifunda wandi mukaji ne wandi mwana Bible na Batumoni ba Yehova. Dibajinji, Albert wādi bidi utatana. Wāketa’nka ne mwendeji wa kipwilo kyabo āye apempule wandi mukaji ne mwana mwa kutulwija Batumoni. Ino mwendeji’wa wāpela kwiya. Penepa Albert wātyiba mbila ya kuteja aye mwine mīsambo ya Bible mwanda wa kuboya’mo bilubo byonso. Ku mfulo’tu kwa mīsambo imbajinji, wēlunga ku kifundwa, kasake kuyukila’ko bikwabo. Wāshintulwile mwenda mafuku kyāshintyile mumweno wandi. Amba: “Bine kino kyo kintu kyonadi nkimbanga nyeke.”

Mfulo mfulō, Albert wāshilula kuvuija bisakibwa byandi bya ku mushipiditu, ne bine kealakenyepo nansha dimo. Bubinebine bwa mu Bible bwāmupele kintu kyaadi ukimba mu būmi bwandi bonso—kine kikapwa bukondame ne bukobakane butādile muzo wa muntu ne lukulupilo lwa būmi bwa kumeso. Bubinebine bwa mu Bible bwamupele ndoe ya mutyima. Le nobe uvuijanga bisakibwa byobe bya ku mushipiditu? Ubulwe’po kwitūdila’ko kitatyi kampanda kya kutanga bipangujo byonso bidi mu kapango pa paje 6? Shi usaka kuyukila’ko myanda mikwabo, bine, Batumoni ba Yehova bakaloelelwa kukukwasha.

[Kapango/Bifwatulo pa paje 6]

LELO UVUIJANGA BISAKIBWA BYOBE BYA KU MUSHIPIDITU?

Le bidibwa bya ku mushipiditu byotambulanga bivuijanga bisakibwa byobe? Tukulomba utange bipangujo bilonda’ko, utoneke pa byobya byosa kulondolola senene.

□ Lelo Leza i ani, ne dijina dyandi i ani?

□ Le Yesu Kidishitu i ani? Ne mwanda waka wāfwile? Nobe umwenine namani mu lufu lwandi?

□ Le Dyabola udi’ko? Shi udi’ko, le wātambile kwepi?

□ I bika bitufikilanga potufwanga?

□ Mpango ya Leza itala ntanda ne bantu i mpango’ka?

□ Le Bulopwe bwa Leza i bika?

□ I misoñanya’ka ya Leza ya kulonda mu mwikadilo?

□ Mu kisaka, i mwingilo’ka obapele mulume ne mukaji kudi Leza? I misoñanya’ka imoimo ya mu Bible iletela kisaka nsangaji?

Shi ubatunya kulondolola kipangujo kimo pa bino, nabya nobe lomba boloshile obe I Kika Kisaka Leza Kotudi? Uno boloshile ulupwilwe na Batumoni ba Yehova mu ndimi kubwipi kwa 300 udi na bifundwa 16 bya myanda ya kyalwilo ya mu Bible kadi uletanga ne malondololo a bipangujo bipangwilwe kūlu’bi.

[Kifwatulo pa paje 4]

Bantu i beshile na banyema mwanda bantu badi na bisakibwa bya ku mushipiditu

[Kifwatulo pa paje 5]

“Abo byo badi ne matwi a luo, bakasakanga abo bene bafundiji ba milwi na milwi.”—2 Temote 4:3

[Kifwatulo pa paje 7]

Ndoe ya nyeke ikaletwa kupityila ku Bulopwe bwa Leza bupelwe Meshiasa