Bible Ubwanya Kukukwasha Utane Nsangaji ya Bine

BIBLE ke dibuku dya kiñangapo, inoko wisambilanga pa lupusa ludi na mulangilo—muyampe nansha umbi—pa bukomo bwa muntu, bwa mu ñeni nansha bwa ku ngitu. “Mutyima wa nsangaji bo bwanga bulumbuluke,” mo munenena Bible, “ino mushipiditu mutyumuke ūmija bikupa te-e.” Pakwabo kadi tutanga’mba: “Shi upungile mu difuku dya tusua, bukomo bobe i butyetye.” (Nkindi 17:22; 24:10) Malangatyima apungija akokeja kupwa bukomo bwetu, na kwitutyumuna ne kwituzozeja, uyuka twapela kushinta ne kukwashibwa kwine.

Kupungila kudi kadi na lupusa pa būmi bwa ku mushipiditu bwa muntu. Bantu bemona bu bampikwa kufwaninwa divule balañanga amba kebakokejapo nansha dimo kupwana kipwano na Leza ne kweselwa nandi. Simone, otwatelanga mu kishinte kishele kunyuma, wadi walakana amba shi “wadi nansha muntu ukokeja kwitabijibwa na Leza.” Inoko, potwela meso mu Bible, Kinenwa kya Leza, tumona amba Leza udi na mumweno muyampe wa boba balonga bukomo bwa kumusangaja.

Leza Utele Bine Mutyima

Bible witulombola amba “Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo.” Leza kafutululangapo “mutyima mutyumuke munekenibwe,” ino ulaile “kusangula mushipiditu wa wakwiubija ne kusangula mutyima wa bakwisasa.”—Mitōto 34:18; 51:17; Isaya 57:15.

Kyaba kimo Yesu Mwanā Leza wāmwene amba i biyampe akokele milangwe ya bandi bana ba bwanga pa muswelo umwene Leza biyampe bidi mu bengidi Bandi. Wāsekunwine na kuleta kimfwa amba Leza umonanga musolwe poupona panshi—ako koni kabwanya kumonwa na bavule bu kampikwa ne mvubu  mine. Kadi wānene ukoma amba Leza uyukile kamwanda ne kamwanda katala bantu, enka ne buvule bwa nywene ya ku mutwe wabo wibuyukile. Yesu wāfudija kyelekejo kyandi amba: “Papo pene po pa mwanda wakubulwa kukwatyilwa moyo o mukīdile toni tungi buleme.” (Mateo 10:29-31) * Yesu wālombwele amba bantu nansha shi bemona muswelo’ka abo bene, ino shi badi na lwitabijo nabya badi na mvubu ku meso a Leza. Bine, mutumibwa Petelo wituvuluja amba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

Lama Mumweno Mujalale

Kinenwa kya Leza kitusoñanya kutamija mumweno mujalale otwimwene batwe bene. Mutumibwa Polo wāsonekele ku bukomo bwa mushipiditu amba: “Nanena nami, ponka pa buntu bwapebwa kudi ami, ku bonso badi kwako ko mudi, na’mba: Kekwitendela bānwe bene mwakila ne mwakufwaninwa kwitendela, mhm, kadi kwitendela nako, mwikale kwitendela ne mutyima mutūkenye monka mwimwabile aye Leza bonso, ku muntu, ku muntu, kitungo kya kwitabija.”—Loma 12:3.

Bine, ketusakilepo kwitendela kutabuka ne pafwaninwe kwitendelela kutyina twakaponena mu mitatulo; koku nako kadi ketusakilepo kutabuka ku mutamba mukwabo ne kulanga amba ketudipo ne na mvubu mine. Nanshi, kitungo kyetu i kutamija mumweno mujalale wa motwimwenene, ko kunena amba kwiyuka bukomo bwetu ne mikalo yotudi nayo kumo. Mwana-mukaji umo mwine Kidishitu unena’byo uno muswelo, amba: “Nkidipo muntu umbi; kadi nkidipo kyabuntu kya Leza ku bantu. Ndi na ngikadilo miyampe ne mityani, monka mwikadile muntu ye-yense.”

Bine, kwikala na mumweno mujalale kupelanga mu kanwa, ino kukomo pa kulonga. Padi kilomba kwielela’ko pa kufundula milangwe imbi ya motwimwenene yotwatamije padi mu bula bwa myaka mivule. Inoko, na bukwashi bwa Leza, tukokeja kushinta bumuntu bwetu ne kwikala na mumweno muyampe wa būmi. Eyo, kino kyo kitusoñanya Kinenwa kya Leza kulonga. Tutanga’mba: “Vuulai bumuntu bwenu bwa kala bwadi bwimukunkuja mu bumi bwa kala bwa kusakasaka kubi kwa budimbidimbi. Kifwanyinwe mwikale bapya mu mityima yenu ne mu milangwe yenu mine. Vwalai bumuntu bupya bupangwe mu kifwa kya Leza, umboloke ne umbuujila bwa bubinebine.”—Efisesa 4:22-24, Myanda Miyampe ku Bonso.

Shi tulonge bukomo bwa kushinta ‘mityima ne milangwe yetu mine,’ ko kunena amba kukanina kwa mutyima kubikele mu milangwe yetu, nabya tukashinta bumuntu bwetu bwadi na milangwe imbi kebudi na milangwe miyampe. Lena, otwatelanga mu kishinte kishele kunyuma, wajingulwile kino, amba shi asumbule milangwe yamona amba kekudipo umuswele, ubwanya kumukwasha, nabya  kekudipo kikashinta mu malangatyima andi atala padi aye mwine. Le i madingi’ka mafwaninwe atanwa mu Bible akweshe ba Lena, Simone, ne bantu bakwabo bekale kushinta?

Misoñanya ya mu Bible Ileta Nsangaji

“Ela kiselwa kyobe padi Yehova, nandi ukakulelanga.” (Mitōto 55:22) Dibajinji’tu bidi, milombelo ikokeja kwitukwasha tusokole nsangaji ya bine. Simone unena’mba: “Ponso ponadi mpungila, nadi nyemena kudi Yehova ne kumulomba bukwashi. Kekudipo mu ngikadilo yonadi ntanwa’mo monadi mbulwa bukomo ne buludiki bwandi.” Kitatyi kitusoñanya mulembi wa mitōto kwela kiselwa padi Yehova, na bubine, wituvulujanga amba Yehova witutele mutyima kadi witumwene bu bantu bafwaninwe kukwasha ne kukwatakanya. Bana ba bwanga ba Yesu mu bufuku bwa Pashika wa mu 33 K.K. bāfityilwe mwanda Yesu wēbalombwele amba usa kwibashiya. Ino Yesu wēbasoñenye amba balombele kudi Shandi, kupwa wābweja’ko amba: “Mwikale kulomba, nabya mukatambula’mba tusepo twenu tufikile ponka.”—Yoano 16:23, 24.

“Dyese dyakupana ditabukile dyakupebwa.” (Bilongwa 20:35) Monka mwāfundijije Yesu, kupāna lo lufungulo lushitula ku nsangaji ya binebine umbūmi. Kulonda buno bubinebine bwa mu Bible kwitukwasha tute mutyima ku bisakibwa bya bakwetu kutabuka kwimanina pa kwityepelwa kwetu. Potukwasha bakwetu ne potumona betufwija’ko, twikalanga na maloa munda mwetu. Lena ukulupile amba kusapwila balondakani nandi kitatyi ne kitatyi myanda miyampe ya mu Bible kumukwashanga mu mashinda abidi. “Dibajinji bidi, kumpanga nsangaji ne maloa monka mwānenene Yesu,” ye aye unena. “Ne dya bubidi, kufwija kumfwija’ko bakwetu kunkwashanga ngikale na nsangaji.” Eyo, kwipāna kwa bu kyaba bulale ku bakwetu kwitusokwejanga byobya binenwe mu Nkindi 11:25 amba: “Mūya wa kyaba-bulale ukanunijibwa: Kadi yewa usangila mema nandi ukasangilwa’o.”

“Mafuku onsololo a bakususulwa i mabi: Ino yewa wa mutyima usepelela udi ne masobo a nyeke.” (Nkindi 15:15) Batwe bonso tukokeja kutonga motusakila kwimwena batwe bene ne ngikadilo yotudi’mo. Tukokeja kwikala bwa yewa umona bintu byonso enka bu bibi, ususuka, nansha tukokeja kutonga kumona bintu mu muswelo muyampe, “wa mutyima usepelela,” ne kusangala ulanga amba tudi ku masobo. Simone unena’mba: “Noñanga buninge bwa kwikala na mumweno muyampe. Nepēne mu kifundwa kyami kya kasuku ne mu busapudi, kadi nshikilwanga mu milombelo. Ne neelelanga’ko kushikata na bantu ba mumweno muyampe, ne kwipāna mu kukwasha bakwetu.” Uno mwikadilo utwalanga ku nsangaji ya bine, monka mwitusoñaninya Bible amba: “Loelelwai mudi Yehova, musepelelei bānwe boloke; kadi elai nsadi ya tusepo bānwe bonso ba mutyima, swā!”—Mitōto 32:11.

“Mulunda usanswanga mafuku onso nyeke, mukimonya-malwa wilombola bu-mwanabo.” (Nkindi 17:17) Kwiubija mudi muswe nansha mudi  mudingidi ukulupilwa kubwanya kwitukwasha tulwe na malangatyima mabi ne kwiapwija kumeso kwa ao kwitutādila. Kwisamba na bakwetu nako kubwanya kwitukwasha tumone bintu na bujalale, na mumweno muyampe. Simone unena’mba: “Kwisamba bintu patōkelela kukwashanga. Ufwaninwe kulombola muntu kampanda mowiivwanina. Divule kusokola bidi mu mutyima i kubwane.” Kulonga uno muswelo kukakufikija ku kwimwena bubinebine bwa lukindi lunena’mba: “Njia mu mutyima wa muntu ibatadika’o: Ino mwanda mulumbuluke usangaja’o.”—Nkindi 12:25.

Byokokeja Kulonga

Tubabandaula enka misoñanya ibala-inga mu mivule mine ya kutendelwa ne mifwaninwe itanwa mu Bible ikokeja kwitukwasha tunekenye malangatyima mabi ne kutana nsangaji ya bine. Shi nobe ulwanga na ano malangatyima a kwityepelwa, tubakukankamika ubandaule na katentekeji Bible, Kinenwa kya Leza. Longa bukomo bwa kutamija milangwe mijalale ne miyampe itala moikadile ne kipwano kyopwene na Leza. Tukulupile na bubine amba buludiki budi mu Kinenwa kya Leza bukakukwasha utane nsangaji ya bine mu byonso byolonga.

[Kunshi kwa dyani]

[Kifwatulo pa paje 7]

Kwikala na būmi bulonda misoñanya ya Bible kuletanga nsangaji