Bipangujo bya Batangi

Le “bāna ba Leza [wa bine] bana-balume” batelelwe mu Ngalwilo 6:2, 4 bāikele’ko kumeso kwa Dilobe bādi bāni?

▪ Bubine i buno amba, bino binenwa bifunkila pa bana ba Leza ba ku mushipiditu. Ino le i bukamoni’ka bulombola’mba i abo?

Binenwa bibajinji bya ano mavese bitangwa amba: “Bāna ba Leza [wa bine] bana-balume bamwene’mba bāna bana-bakaji ba bantu i ba buya bwa dyangi, ino basonga bakaji muswidile mityima yabo.”​—Ngal. 6:2.

Mu Bisonekwa bya Kihebelu, binenwa bya amba, “bāna ba Leza [wa bine] bana-balume” ne “bāna ba Leza” bitanwa mu Ngalwilo 6:2, 4; Yoba 1:6; 2:1; 38:7; ne mu Mitōto 89:6. Le bino bisonekwa bilombola bika pa bano “bāna ba Leza”?

“Bāna ba Leza [wa bine] bana-balume” botutanga mu Yoba 1:6 bādi bipangwa bya ku mushipiditu byādi bibungile ku meso a Leza. Satana wādi mu bukata mwabo, mwine wādi wendakana “koku ne koku panopanshi.” (Yoba 1:7; 2:1, 2) Mu muswelo umo onka, tutanga mu Yoba 38:4-7 amba, “bāna ba Leza” ‘baelele nsadi ya tusepo’ kitatyi ‘kyātūdile Leza dibwe dya difinko’ dya pano panshi. Bano bādi bamwikeulu, mwanda bantu bādi kebapangilwe. “Bāna ba Leza” batelelwe mu Mitōto 89:6 i bipangwa bya momwa mūlu bīkele pamo na Leza, ke bantupo.

Penepa “bāna ba Leza [wa bine] bana-balume” batelelwe mu nsekununi idi mu Ngalwilo 6:2, 4 i bāni? Kukwatañana na myanda ya mu Bible ibadikile, i byendele’mo kufula ku kunena’mba ino nsekununi ifunkila pa bana ba Leza ba ku mushipiditu bāile pano pa ntanda.

Bamo bakomenwanga kwitabija’mba bamwikeulu babwanya kusangela kusambakena pamo. Binenwa bya Yesu bisonekelwe mu Mateo 22:30 bilombola’mba, mūlu kebesoñenga’mopo nansha kusambakena pamo kwine. Inoko, bamwikeulu bāvwele kyaba kimo ngitu ya bumuntu, badya ne kutoma na bantu. (Ngal. 18:1-8; 19:1-3) Nanshi, i byendele’mo tufule ku kunena amba, byobāvwele ngitu ya bumuntu, bādi babwanya kulala na bana-bakaji.

Kudi bubinga bwa mu Bible bwa kukulupidila’mba, bamwikeulu bamo bālele na bana-bakaji. Yude 6, 7 udingakanya bubi bwa bana-balume ba mu Sodoma, bādi balala na bana-balume bakwabo, na bano “bamwikeulu kebalaminepo bukatampe bwine bwabo, bashīle mu kīkalo kya abo bene.” Kintu kyādi kiifwene bamwikeulu na bene Sodoma i “busekese [bwa] muswelo wabo umo onka, ne kulonda mu ngitu īngi.” Mu muswelo umo onka, 1 Petelo 3:19, 20 wisambila pa kubulwa kikōkeji kwa bamwikeulu ba mu “mafuku a Nao.” (2 Pet. 2:4, 5) O mwanda, mwiendelejo wa kubulwa kikōkeji wāikele na bamwikeulu ba mu mafuku a Noa, ubwanya kudingakanibwa na bubi bwa Sodoma ne Ngomola.

Ino mvuyo idi na buluji shi tujingulwile amba, “bāna ba Leza [wa bine] bana-balume” batelelwe mu Ngalwilo 6:2, 4 bādi bamwikeulu bāvwele ngitu ya bu muntu ne kulonga busekese na bana-bakaji.

 Bible unena’mba Yesu ‘wākasapwidile bashipiditu ba mu kifungo.’ (1 Pet. 3:19) Le bino binenwa bishintulula bika?

▪ Mutumibwa Petelo utela bano bashipiditu bu boba “badi bampikwa kukōkela, popa padi kwifula kwa Leza kukikungila mu mafuku a Nao.” (1 Pet. 3:20) Na bubine, Petelo wādi wisambila pa bamwikeulu bātongele kwilunga ku butomboki bwa Satana. Yude nandi utela bamwikeulu “kebalaminepo bukatampe bwine bwabo, bashīle mu kīkalo kya abo bene,” na kunena’mba Leza “wibalamine mu bifungo bya mu fukutu ku kidye kya dyodya difuku dikatampe.”​—Yude 6.

Le bamwikeulu ba mu mafuku a Noa bāikele bampikwa kikōkeji mu muswelo’ka? Kumeso kwa Dilobe, ino mishipiditu mibi yāvwele ngitu ya bumuntu​—kintu kekyādipo kibanene Leza kulonga. (Ngal. 6:2, 4) Kadi, bano bamwikeulu bālele na bana-bakaji balongele kintu kya kiboja. Leza kāpangilepo bamwikeulu mwanda wa kulala na bana-bakaji. (Ngal. 5:2) Bano bamwikeulu babi, bakubulwa kikōkeji bakonakanibwa pa kitatyi kitungilwe na Leza. Pano’ko bidi, enka munenene’kyo Yude, badi mu “mbao ya mfindi”​—ko kunena’mba kifungo kya ku mushipiditu.

Le Yesu wāsapwidile bano “bashipiditu ba mu kifungo” kitatyi’ka ne muswelo’ka? Petelo usoneka’mba kino kyālongekele kupwa kwa Yesu ‘kusangulwa ke mūmi mu mushipiditu.’ (1 Pet. 3:18, 19) Kadi yuka’mba Petelo unana’mba Yesu ‘wāsapwile.’ Kwingidija kwingidije Petelo kitatyi ke kipite kulombola’mba, Yesu wāsapwile kumeso kwa Petelo kusoneka mukanda wandi mubajinji. Inoko bimweka’mba, pa kupwa’tu kusanguka, Yesu wāsapwidile mishipiditu mibi mfuto ya butyibi yobafwaninwe kupebwa. Uno musapu kewebapelepo lukulupilo. Wādi musapu wa butyibi. (Yona 1:1, 2) Yesu wālombwele lwitabijo ne dikōkeji dyandi kufika’nka ne ku lufu, kupwa wasangulwa​—kintu kilombola’mba Dyabola kātenepo kantu mwadi​—Yesu wādi na bubinga bwa kusapwila uno musapu wa butyibi.​—Yoa. 14:30; 16:8-11.

Mu mafuku āya kumeso, Yesu ukakuta ne kwela Satana ne bano bamwikeulu mu lupongo. (Luka 8:30, 31; Kus. 20:1-3) Tamba kala, ino mishipiditu yampikwa kikōkeji idi mu mbao ya mfindi ya ku mushipiditu kadi bonakani bwa mfulo bwiitengele.​—Kus. 20:7-10.