Kino i kipangujo kya mvubu, nakampata ku boba bafwidilwe mwinē pabo obasenswe. Bano bantu babilanga padi bininge kukekala na bene pabo bakasangulwa mu ntanda mipya. Mwana mulume umo wa kishala wanene amba: “Ami ne wami mukaji ketwadipo tusaka kutyiba busongi bwetu. Twadi nyeke na mutyima wa kutōtela pamo bu ba mulume ne mukaji. Nkyashintyile ino milangwe ya kusaka kutōtela pamo.” Lelo kudi bubinga bwinebwine bwa kukulupidila amba, boba bakasangulwa bakabwanya kwisonga? Mu kīpi, malondololo i ano amba ketubwanyapo kunena’po kintu.

Pano ke padi myaka mivule, mabuku etu anene amba binenwa bya Yesu bitala pa lusangukilo ne pa kwisonga bifunkila padi pa lusangukilo lwa pano panshi ne amba, boba bakasangulwa mu ntanda mipya kebakasongepo nansha kusongwa. * (Mat. 22:29, 30; Mako 12:24, 25; Luka 20:34-36) Nansha byoketubwanyapo kunena na kusumininwa, lelo bibwanika padi Yesu wādi wisambila pa lusangukilo lwa momwa mūlu? Tubandaulei bidi byobya byānene Yesu.

Langulukila pa uno mwanda. (Tanga Luka 20:27-33.) Basadusea, bene kebadipo bakulupile mu lusangukilo, bātompele kukwata Yesu mu dikinga na kumwipangula kipangujo kitala pa lusangukilo ne pa kupyanwa kwa mwana-mukaji na banababo na mulume. * Yesu wālondolwele amba: “Bana ba ino ngikadilo ya bintu basoñanga ne kusongwa, ino boba ba kumonwa bu bafwaninwe kutambula yoya ngikadilo ya bintu ne lusangukilo mu bafwe kebasoñangapo nansha kusongwa. Kadi kebakokejapo kufwa monka, mwanda badi bwa bamwikeulu, kadi i bana ba Leza byobadi bana ba lusangukilo.”—Luka 20:34-36.

Mwanda waka mabuku etu anene amba Yesu wādi padi wisambila pa lusangukilo lwa pano panshi? Ino mvuyo yādi imanine dibajinji pa milangulukilo ibidi. Mubajinji, twadi tulanga amba Basadusea badi padi na lusangukilo lwa pano panshi mu ñeni, ne amba Yesu webalondolwele kukwatañana na byobadi balanga. Wa bubidi, Yesu wāfudije malondololo na kutela Abalahama, Izake ne Yakoba—bakulutuba ba kikōkeji bakasangwilwa ku būmi pano pa ntanda.—Luka 20:37, 38.

Inoko, bimweka bu Yesu wādi ulangila pa lusangukilo lwa momwa mūlu. Le i bika byetulengeja tufule kukunena namino? Tulangulukilei bidi pa ino misemwa ibidi mikatampe.

“Boba ba kumonwa bu bafwaninwe kutambula . . . lusangukilo mu bafwe.” Bashingwe māni ba kikōkeji bamwenwe “bu bantu bafwaninwe Bulopwe bwa Leza.” (2 Ts. 1:5, 11) Bātelelwe bu boloke bafwaninwe būmi mwanda wa kinkūlwa, mu uno muswelo, kebafungapo bu babipya-mambo bya kuponejibwa. (Loma 5:1, 18; 8:1) Bano bantu betwanga bu ‘bakatōkwe ne bajila’ ne kumonwa bu bafwaninwe lusangukilo lwa momwa mūlu. (Kus. 20:5, 6) Ino mu boba bakasangwilwa pano panshi mukabadilwa ne “bakondame.” (Bil. 24:15) Lelo tubwanya kunena’mba ‘bamwenwe bu bafwaninwe’ lusangukilo?

 “Kebakokejapo kufwa monka.” Yesu kānenepo amba: “Kebakafupo monka.” Inoko, wānene amba: “kebakokejapo kufwa monka.” Malamuni makwabo alamuna uno musemwa’mba, “kebakiyūka kufwa pano” ne amba “lufu keludipo monka na lupusa pobadi.” Bashingwe māni bavuya lwendo lwabo lwa pano pa ntanda na kikōkeji, basangwilwanga momwa mūlu ne kupebwa būmi bwa kubulwa kufwa—ko kunena’mba būmi bwa kubulwa mfulo ne koneka. (1 Ko. 15:53, 54) Lufu kelukekalapo monka na bukomo pa boba bakasangwilwa mūlu. *

Kukwatañana na byotwapwa kunena, le tubwanya kufula ku kunena bika? Bibwanika padi binenwa bya Yesu bitala pa kwisonga ne lusangukilo, bifunkila pa lusangukilo lwa momwa mūlu. Shi bidi uno muswelo, nabya binenwa byandi biketulombola bintu bivule pa mwanda utala bakasangwilwa momwa mūlu: Kebakasongepo, kebakabwanyapo kufwa, kadi bakekala pamo bwa bamwikeulu—bipangwa bya ku mushipiditu bidi mu kīkalo kya mishipiditu. Inoko, kufula ku kunena namino kukolomona bipangujo bivule.

Kibajinji, mwanda waka Yesu wēsambīle pa lusangukilo lwa momwa mūlu pa kulondolola Basadusea, bene bādi padi balangila lusangukilo lwa pano panshi? Yesu kādipo ulondolola nyeke balwana nandi kukwatañana na milangwe yabo. Kimfwa, wālondolwele Bayuda bāmwipangwile kiyukeno amba: “Bundulai ino tempelo, kadi mu mafuku asatu nkeimika.” Mobimwekela Yesu wādi uyukile byobādi balanga pa kubakululwa kwa tempelo, “ino aye wadi wisambila pa tempelo ya umbidi wandi.” (Yoa. 2:18-21) Padi Yesu wāmwene amba kafwaninwepo kulondolola bano Basadusea babudimbidimbi, bene kebādipo bakulupile mu lusangukilo nansha mu kwikala’ko kwa bamwikeulu. (Nki. 23:9; Mat. 7:6; Bil. 23:8) Ino, wāsakile padi kusokola bubinebine butala pa lusangukilo lwa momwa mūlu pa mwanda wa kamweno ka bana bandi ba bwanga bampikwa budimbidimbi, bene bādi ba kupebwa difuku dimo luno lusangukilo.

Kya bubidi, mwanda waka Yesu wāfudije mwisambo wandi na kutela Abalahama, Izake ne Yakoba, bene bakasangwilwa ku būmi pano pa ntanda? (Tanga Mateo 22:31, 32.) Yuka amba Yesu pa kwisambila pa bano bakulutuba wābadikile kunena amba, “pa mwanda wa lusangukilo lwa bafwe.” Bino binenwa bidi pamo bwa ka kilalo, bibwanya kwitukwasha tuyuke byaādi ulanga. Kupwa Yesu pa kulupula mu bilembwa bya Mosesa bine byādi bitabije Basadusea, wāingidije binenwa byānene Yehova kudi Mosesa mu kimuna kitema mwanda wa kuleta bukamoni bwa ntentekelo bulombola’mba lusangukilo—lwa pano pa ntanda—i mpango bine ya Leza.—Div. 3:1-6.

Kya busatu, shi binenwa bya Yesu bitala pa lusangukilo ne kwisonga bifunkila pa lusangukilo lwa momwa mūlu, le kino kishintulula’mba boba bakasangwilwa pano pa ntanda bakabwanya kwisonga? Kinenwa kya Leza kekiletelepo malondololo a patōkelela ku kino kipangujo. Na bubine, shi Yesu wādi wisambila pa lusangukilo lwa momwa mūlu, nabya binenwa byandi kebilombwelepo patōkelela shi bantu bakasangwilwa pano pa ntanda bakabwanya kwisonga mu ntanda mipya.

Pano’ko bidi, tuyukile’mba Kinenwa kya Leza kinena patōkelela’mba lufu lutyibanga kijimba kya busongi. Nanshi mulume nansha mukaji mufwilwe mwinē pandi, kafwaninwepo kwitopeka shi wakwata butyibi bwa kusonga nansha kusongwa. Buno i butyibi bwa muntu mwine, kadi bano bantu kebafwaninwepo kufutululwa mwanda wa kukimba mwinē pabo mukwabo wa kwisonga nandi.—Loma 7:2, 3; 1 Ko. 7:39.

Na bubine, tubwanya kwikala na bipangujo bivule pa būmi bwa mu ntanda mipya. Pa kyaba kya kufwatakanya byampikwa kwendela’mo malondololo a bino bipangujo, batwe tukungilei’tu amba tukemwene. Inoko tubwanya kukulupila kino amba: Bantu ba kikōkeji bakekala na nsangaji, mwanda Yehova ukavuija bisakibwa byabo byonso ne kusakasaka kwabo mu muswelo mulumbuluke.—Ñim. 145:16.