1. Lelo mukanda wa Levi ubwanya kwitukwasha namani?

MU MUKANDA wa Levi, buujila bwisambilwe’mo bininge kupita mikanda mikwabo ya mu Bible. Uno mwikadilo byoulombelwe ku batōtyi bonso ba bine ba Yehova, nanshi kwimvwanija ne kusangela mukanda wa Levi kuketukwasha twikale bajila.

2. I myanda’ka imoimo idi mu mukanda wa Levi?

² Mukanda wa Levi wālembelwe na mupolofeto Mosesa ubadilwa mu “Kisonekwa kyonso” kya kamweno pa kufundija. (2 Tm. 3:16) Dijina Yehova ditanwa’mo kintu kya misunsa dikumi mu shapita ne shapita wa uno mukanda. Kwimvwanija mukanda wa Levi kuketutonona twepuke kulonga kintu kyo-kyonso kibwanya kufutulwija dijina dya Leza. (Levi 22:32) Kupituluka kupitulukilwe binenwa “amiwa ngidi Yehova” mu uno mukanda, kufwaninwe kwitutonona tukōkele Leza. Mu kino kishinte ne mu kilonda’ko tusa kubandaula’mo byabupeta bilēme bidi mu mukanda wa Levi, ke byabuntu bitamba kudi Leza kadi, bitukwasha twipāne mu butōtyi bujila.

3, 4. Lelo kusubulwa kwa Alone ne kwa bandi bana kwelekeja bika? (Tala kifwatulo kidi ku ngalwilo.)

³ Tanga Levi 8:5, 6. Yehova wātongele Alone amwingidile bu  kitobo mukatampe wa Isalela, bana bandi bana-balume nabo bu babitobo ba muzo. Alone welekeja Yesu Kidishitu kadi bana ba Alone bana-balume belekeja balondi bashingwe māni ba Yesu. Penepo le koijibwa kwa Alone kwelekeja kusubulwa kwa Yesu? Aa, mwanda Yesu kādipo na bubi nansha “kakoba,” kalomba kusubulwa, mhm. (Bah. 7:26; 9:14) Ino ngikadilo ya bu muntu musubulwe ya Alone yo ifunkila pa butōki ne bululame bwa Yesu. Le koijibwa kwa bana ba Alone nako le?

⁴ Koijibwa kwa bana ba Alone kufunkila pa kusubulwa kwa boba batongelwe kukekala bu babitobo momwa mūlu. Le kubatyijibwa kwa bashingwe māni kufunkila pa kusubulwa kwa bana ba Alone? Aa, lubatyijo kelutōkejangapo bubi; ino i kyelekejo kya kwipāna kwa muntu mwine kudi Yehova Leza. Bashingwe māni basubulwanga “na kinenwa,” ne kino kibalomba kulonda na mutyima onso bufundiji bwa Kidishitu mu būmi bwabo. (Ef. 5:25-27) Shi abalonda’bo, nabya abatōkejibwa ne kusubulwa. Le tunena namani pa “mikōko mikwabo”?—Yoa. 10:16.

5. Mwanda waka tukokeja kunena amba mikōko mikwabo isubulwanga na Kinenwa kya Leza?

⁵ Bana ba Alone kebelekejapo “kibumbo kikatampe” kya mikōko mikwabo ya Yesu. (Kus. 7:9) Lelo boba babatyijibwa batōkejibwanga ne kusubulwa na Kinenwa kya Leza? En-en, batōkejibwanga! Boba badi na lukulupilo lwa pano panshi pobatanga byobya binena Bible pa mvubu ne kamweno ka mashi āmwangile Yesu, betabijanga bino binenwa kadi “bamwingidilanga mingilo ikola dyuba ne bufuku.” (Kus. 7:13-15) Bipa bitamba ku kusubulwa kwa nyeke kwa bashingwe māni ne kwa mikōko mikwabo bimwekanga kitatyi ‘kyobalama mwikadilo wabo mulumbuluke.’ (1 Pe. 2:12) Bine, Yehova usangalanga pa kumona butōki ne bumo bwa bashingwe māni ne mikōko mikwabo, bateja ne kulonda na kikōkeji, Yesu Mukumbi wabo!

6. Mwanda waka kwibandaula i kwa kamweno?

⁶ Butōki bwa ku ngitu bwādi bulombwa mu butobo bwa mu Isalela budi na buluji bwa binebine ku bantu ba Yehova dyalelo. Boba botwifunda nabo Bible divule bamonanga amba bifuko byetu bya kutōtela’po i bitōka kadi muvwadilo wetu nao amba i muyampe ne mufwaninwe. Kadi, butōki bwa butobo bwitukwasha tumone amba yewa yense ukanda ku lūlu luzunzulwe lwa kutōtela’po Yehova ufwaninwe kwikala na “mutyima [utōka]!” (Tanga Ñimbo 24:3, 4; Isa. 2:2, 3.) Mwingilo ujila otwingidila Leza ufwaninwe kumwingidilwa na ñeni, mityima, ne imbidi, byonso bikele bitōka. Kino kitulomba twikale kwibandaula kyaba ne kyaba, kadi ku bamo bibalomba kushinta bininge mwa kwikadila bajila. (2 Ko. 13:5) Kimfwa, muntu mubatyijibwe utala ku kusaka bifwatulo bya bantu badi mutaka ufwaninwe kwiipangula’mba, ‘Lelo ndi ujila?’ Penepa kakakimbe bukwashi bwa kuleka kino kilongwa kibi.—Yak. 5:14.

7. Mungya Levi 8:22-24, lelo Yesu wāshile kimfwa’ka?

⁷ Pātūdilwe butobo mu Isalela, mashi a mukōko mulume āshingilwe ku kutwi kwa lundyo, ku kyāla ne ku dina dya mukumo dya Alone Kitobo Mukatampe ne dya bandi bana bana-balume. (Tanga Levi 8:22-24.) Kuno kushingwa mashi kwādi kulombola amba babitobo bakalonga bukomo bwabo bonso bwa kukōkela mu mingilo yabo. Mo monka ne Yesu Kitobo Mukatampe, wāshile kimfwa kibwaninine ku bashingwe māni ne ku mikōko mikwabo. Wādi mute kutwi kwandi ku bulombodi bwa Leza. Wāingidije maboko andi mwanda wa kuvuija kiswa-mutyima kya Yehova, kadi maulu andi  keāshetemukilepo nansha dimo mu dishinda dijila.—Yoa. 4:31-34.

8. Le batōtyi bonso ba Yehova bafwaninwe kulonga bika?

⁸ Bene Kidishitu bashingwe māni ne mikōko mikwabo ya Yesu bafwaninwe kulonda bululame bwa Kitobo wabo Mukatampe. Batōtyi bonso ba Yehova bafwaninwe kukōkela ku buludiki budi mu Kinenwa kya Leza amba bepuke kufītyija mushipiditu ku mutyima. (Ef. 4:30) Bafwaninwe ‘kolola nyeke tushinda twa maulu abo.’—Bah. 12:13.

9. Le i bika byanene batutu basatu baingile pamo na batutu ba mu Kitango Kyendeji, ne binenwa byabo bibwanya kukukwasha namani wendelele kulombola buujila?

⁹ Tala binenwa bitamba ku mutyima bya batutu basatu badi na lukulupilo lwa pano panshi baingile myaka makumi pamo na batutu ba mu Kitango Kyendeji. Tutu umo unena’mba: “Dino dyadi bine dyese dya pa bula dya mingilo, kwingila pamo nabo, kwalombwele amba nansha bano batutu byobashingilwe māni a mushipiditu, nabo i bampikwa kubwaninina. Inoko, mu bitungo byami mwadi ne kya kukōkela boba betwendeja.” Tutu wa bubidi unena’mba: “Bisonekwa pamo bwa kya 2 Kodinda 10:5, bisambila pa ‘kukōkela Kidishitu,’ i binkwashe nkōkele ne kwingidila pamo na boba betwendeja. Kino i kikōkeji kya binebine.” Tutu wa busatu unena’mba: “Kusanswa byobya bisenswe Yehova, kushikwa byobya byashikilwe, kukimba nyeke bwendeji bwandi, ne kulonga bimusangaja, ko kukōkela bulongolodi bwandi ne boba baingidija mwanda wa kwendeleja mpango yandi itala ntanda.” Uno tutu wayukile amba Tutu Nathan Knorr, waingile mu Kitango Kyendeji, waitabije bukidi bonka milangwe idi mu Kiteba kya Mulami kya mu 1925, mu kishinte “Kubutulwa kwa Muzo,” nansha byatatene’yo bakwabo. Kino kikōkeji kyaikele kutulumuna bininge uno tutu. Kulangulukila pa binenwa bya bano batutu basatu, kubwanya kukukwasha wikale ujila kupityila ku kukōkela.

10. Mwanda waka i biyampe tukōkele kijila kya Leza kitala pa mashi?

¹⁰ Tanga Levi 17:10. Yehova wāsoñenye bene Isalela kuleka kudya “mashi, shi a muswelo ka, shi a muswelo ka.” Kwilama ku mashi—a banyama nansha a bantu—i musoñanya utala ne bene Kidishitu. (Bil. 15:28, 29) Twimvwananga moyo wa ‘kuminijibwa mpala’ ya Leza ne wa kufundulwa mu kipwilo kyandi. Tumusenswe ne tusakanga kumukōkela. Nansha ke mu ngikadilo mikomo mwine, tupelanga kuponena mu milombelo ya boba kebayukilepo Yehova ne kebaswilepo kumukōkela. Eyo, tuyukile amba bantu baketufulula potupela mashi, nansha nankyo batwe tutongele kukōkela Leza. (Yude 17, 18) Le i mumweno’ka wa pa uno mwanda uketukwasha ‘tutūkanye’ na kupela kudya mashi nansha kwelwa’o mu ngitu?—Kup. 12:23.

11. Mwanda waka tubwanya kunena’mba Difuku dya Kipwanyo dya pa mwaka pa mwaka ke kyādipo kisela bitupu?

¹¹ Muswelo wādi wingidija kitobo mukatampe mashi a banyama mu Isalela wa kala mu Difuku dya Kipwanyo dya pa mwaka pa mwaka witukwasha twimvwanije muswelo umona Leza mashi. Mashi ādi engidijibwa mu muswelo wa pa bula. Ādi engidijibwa mwanda wa kupwanya muntu ulongele bubi ne ukimba kulekelwa mambo na Yehova. Mashi a ñombe mulume ne a mbuji ādi akuswa pangala ne kumeso kwa mputo ya dikumbo dya kipwanino. (Levi 16:14, 15, 19) Kino kilongwa kyādi kilengeja Yehova alekele bubi bwa bene Isalela. Kadi  Yehova wāletele mbila amba shi muntu waipaya nyama mwanda wa kudya, wādi ufwaninwe kumwanga mashi ne kwiatumbila mu luvumbi, “ke-buntu bumi bwa ngitu yonso i mashi ayo.” (Levi 17:11-14) Le bino byādi’tu bisela bya bitupu? Leka. Kwingidija mashi mu Difuku dya Kipwanyo ne musoñanya wa kutumbila mashi mu luvumbi, i bikwatañane na musoñanya wābadikile Yehova kupa Noa ne bandi bana utala pa mashi. (Ngo. 9:3-6) Yehova wāpeleje kudya mashi mwanda wa kulama būmi. Le kino kishintulula namani ku bene Kidishitu?

12. Mukanda wa Polo ku bene Kidishitu Bahebelu ulombola namani kukwatañana kwa mashi na kulekelwa mambo?

¹² Mutumibwa Polo pa kulembela bene Kidishitu Bahebelu bukomo bwa kusubula budi na mashi, wānene amba: “Bine, mwendele Bijila, kubwipi kwa bintu byonso bisubulwanga na mashi, kadi shi mashi keamwangikilepo i kutupu kulekelwa mambo.” (Bah. 9:22) Kadi Polo wānene amba mashi a bitapwa bya banyama, nansha byoādi na mvubu kampanda, ino ādi’tu avuluja bene Isalela amba i ba bubi ne amba basakilwa kikwabo kya kufundwididila bubi bwabo. Bine, Mukanda wa Bijila wādi “munjiñininya wa bintu bya kwiya, ino ke bintu binebinepo.” (Bah. 10:1-4) Le kufwilwa lusa kwādi kwa kubwanika namani?

13. Le wiimvwananga namani pa kuyuka amba Yesu wākapene bulēme bwa mashi andi kudi Yehova?

¹³ Tanga Efisesa 1:7. Lufu lwa bu kitapwa lwa Yesu Kidishitu mwine ‘wēpēne potudi’ ku kusaka, ludi na buluji bukatampe ku boba bonso bamusenswe ne basenswe Shandi. (Ngt. 2:20) Kunena na bubine, bine byālongele Yesu pa kupwa kufwa ne kusanguka byo bitukūdile, bilengeje tumone kulekelwa bubi. Yesu wāfikidije kine kyādi bu mujiñininya mu Bijila bya Mosesa mu Difuku dya Kipwanyo. Mu difuku’dya, kitobo mukatampe wādi uyata mashi amo a nyama welelwe kitapwa utwela nao mu Kikola Nakampata kya mu tabenakulo, ne mwenda mafuku mu tempelo ya Solomone, weatūla ku meso a Leza, na wimene’ko.  (Levi 16:11-15) Mo monka ne Yesu nandi wākatwelele mūlu na bulēme bwa mashi andi a bu muntu kumweka ku meso a Yehova. (Bah. 9:6, 7, 11-14, 24-28) Bine tudi na dyese’po kashā dya kulekelwa bubi bwetu ne kwikala na mutyima wa mundamunda utōka mwanda wa lwitabijo lotudi nalo mu mashi a Yesu!

14, 15. Mwanda waka twimvwanije ne kukōkela kijila kya Yehova kitala pa mashi?

¹⁴ Le pano ubamone mwanda waka Yehova witupeleje kudya mashi, “shi a muswelo ka, shi a muswelo ka”? (Levi 17:10) Lelo ubaimvwanija kine Leza kyamwenine mashi bu ajila? Umwene mashi bwa būmi. (Ngo. 9:4) Le ubaitabija amba tufwaninwe kwitabija muswelo umwene Leza mashi ne kukōkela ku musoñanya wa kwilama ku mashi? Muswelo umo kete otukokeja kwikala mu ndoe na Leza i wa kwikala na lwitabijo mu kitapwa kya kinkūlwa kya Yesu ne kwitabija amba mashi adi na buluji bwa pa bula kudi Umpangi wetu.—Kol. 1:19, 20.

¹⁵ Motudi mukokeja kwikala muntu watanwa na mwanda wa mashi mu kitulumukila. Nansha mubutule wetu nansha mulunda ukokeja mu kitulumukila kutanwa na mwanda wa kutonga kwelwa mashi nansha kupela’o. Mu byaba bikomo namino, kwikalanga ne butongi butala pa bipindi bikatampe bya mashi ne myundapilo imoimo. Pa kino, i biyampe kulonga bukimbi ne kwiteakanya ku misongo ya mu kitulumukila. Kwiteakanya namino ne milombelo ponka, kuketukwasha twimanije nshinkidingi ne kwepuka kujilula. Bine ketusakangapo kufītyija mutyima wa Yehova na kulonga kintu kipelelwe mu Kinenwa kyandi! Basendwe bavule mu kiñanga ne boba basenswe bya kwela mashi banenanga bantu balete mashi amba o a kupandija būmi. Inoko, bantu bajila ba Yehova bayukile amba Umpangi wabo udi na lupusa lwa kulombola muswelo wa kwingidija mashi. Kwadi “mashi, shi a muswelo ka, shi a muswelo ka” i ajila. Tufwaninwe kusumininwa kukōkela kijila kyandi kitala pa mashi. Kupityila ku mwiendelejo wetu ujila, tukalombola kwadi amba tusangedile bukomo bwa mashi a Yesu akūla būmi—mashi amo kete alengeje tulekelwe bubi lonso.—Yoa. 3:16.

16. Mwanda waka bantu ba Yehova bafwaninwe kwikala bajila?

¹⁶ Leza pa kukūla bene Isalela mu bupika bwa mu Edipito, wēbasapwidile amba: “Mwanda amiwa ne Yehova wemulupwije monka mu ntanda ya Edipito, amba ngikale Leza wenu; po pa mwanda kadi o mukekala bajila, ke-ne-muntu amiwa ne ujila.” (Levi 11:45) Bene Isalela bādi bafwaninwe kwikala bajila mwanda Yehova mwine i ujila. Byotudi Batumoni ba Yehova, netu tufwaninwe kwikala bajila. Mukanda wa bene Levi ubalombola uno mwanda patōka.

17. Le pano ubamone namani mukanda wa mu Bible wa Levi?

¹⁷ Kubandaula kotwabandaula bipindi bimo bya mu Levi bine kubaikala na kamweno kotudi. Bine, kino kifundwa kekibudilwepo kuningija mutyima obe wa kusangela uno mukanda wa mu Bible wa ku bukomo bwa mushipiditu. Kulangulukila pa ino myanda ya mu Levi kubalengeja wimvwanijije bubinga bwine botufwaninwe kwikadila bajila. Inoko, kukidi bilēme bikwabo bidi mu uno mukanda wa mu Kinenwa kya Leza wa ku bukomo bwa mushipiditu. Le i bilēme’ka? Le i bika bikwabo byotubwanya kwifunda’mo pa mwanda utala kwingidila Yehova mwingilo ujila? Byo byotukabandaula mu kishinte kilonda’ko.