Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Lelo kusōka umbidi wa muntu mufwe i kuyampe ku bene Kidishitu?

Kusoka nansha kuleka kusoka umbidi wa muntu i butyibi bwa muntu mwine. Nansha ke Bible kanenepo patōkelela pa bitala kino kibidiji, inoko tuyukile’tu’mba, imbidi ya ba Mulopwe Solo ne wandi mwana Yonafane yāsokelwe kupwa yājīkwa. (1 Sa. 31:2, 8-13)—15/6, paje 7.

I muswelo’ka otukokeja kukulupila’mba ke Leza po ulengejanga bintu bibi?

Mashinda onso a Leza i moloke. I wabinebine, kadi i moloke. Ne kadi Yehova i muyule kisanso kya ku mutyima ne lusa. (Kup. 32:4; Ñim. 145:17; Yak. 5:11)—1/7, paje 4..

Lelo i bikoleja’ka bitanwanga nabyo boba bavilukila mu ntanda ya bweni mwanda wa kukengidila kokwa kusakilwa basapudi bavule?

Bikoleja bisatu i bino (1) kwibidila būmi bupya, (2) kulanga kisaka, ne (3) kusamba bulunda na banabetu ba mu kibundi’mwa. Bantu bavule batenwe na bino bikoleja baeselwe bininge.—15/7, paje 4-5.

Mwanda waka banababo na Yosefa bāmushikilwe?

Kintu kimo bidi, Yakoba wāpele Yosefa katōkwe ka pa bula, pa kumupa mutwelo wa pa bula. Banababo na Yosefa bāmutelekēle kantyokolo ne kumupoteja mu bupika.—1/8, paje 11-13.

Mwanda waka matrakte mapya i malumbuluke kadi apēla kwingidija?

Ao onso adi muswelo umo. Trakte ne trakte witupa mukenga wa kutanga kisonekwa ­kampanda kya mu Bible ne kwipangula mwinē njibo kipangujo. Monso mwakalondolwela, tukokeja kwisambila pa bidi’mo, ne kumulombola byobya binena ­Bible. Kadi tukokeja kumwipangula kipangujo kiketukwasha pa kulonga kujokela’mo.—15/8, paje 13-14.

Le Peshitta muvungo wa kine shidea i kika?

Kine Shidea i kaludimi katyetye ka mu ndimi ya Kialamia, kāshilwilwe kwisambwa mu myaka katwa ka bubidi nansha katwa ka busatu K.K. Bimweka bu kine Shidea lwādi ludimi lubajinji lwine lwāalamwinwe’mo ­Bisonekwa bya Kingidiki bya bwine Kidishitu. Bible wa mu kine Shidea wāyukenwe bu muvungo wa Peshitta.—1/9, paje 13-14.

Lelo bambutwile bene Kidishitu bakokeja kulonga bika pa kukumba babo bana?

Pa kuyuka bana senene kidi na mvubu kwibateja. Wikankile’ko kwibadisha ku mushipiditu. ­Wibaludike na buswe, kimfwa, kitatyi kyomona’mba abashilula kutatana bintu bya ku mushipiditu.—1/10, paje 6-7.

Lelo i bintu’ka kebikekala’kopo mu buludiki bwa Bulopwe bwa Leza?

Misongo, lufu, kubulwa kaji, mavita, bipupo bya nzala ne bulanda kebikekala’kopo monka.—1/10, paje 6-7.

Lelo i kipwano’ka mu Bible kikwasha bantu bakwabo bakaludike na Kidishitu?

Yesu pa kupwa kudya Pashika ya mfulo na batumibwa bandi, ­wāsambile kipwano na bana bandi ba bwanga ba kikōkeji, kine ­kitēlwa bu kipwano kya Bulopwe. (Luka 22:28-30) Kino kyēbakulupije’mba bakabikala na Yesu momwa mūlu.—15/10, paje 16-17.

Leta bimfwa bibidi bilombola’mba Satana udi’ko bine.

Bisonekwa binena’mba Satana wēsambile na Yesu pa kumutompa. Kadi mu mafuku a Yoba Satana wēsambile na Leza. Ino nsekununi ilombola’mba Satana i muntu udi’ko bine.—1/11, paje 4-5.

Le “bantu ba dijina dyandi” besambila’po Yakoba na mokilembelwe mu Bilongwa 15:14 i bāni?

I Bayuda ne bampikwa kwikala Bayuda, betabije batongelwe na Leza bu muzo wa ‘kusapula pi na pi binengele’ bya Yewa webetyile. (1 Pe. 2:9, 10)—15/11, pages 24-25.

Lelo Timgad wādi kwepi ne bantu ba mu kino kibundi badi na ngikadila’ka?

Timgad kyadi kibundi kikatampe kya Loma kyadi kutunduka kwa Afrika (kitwa dyalelo bu Alijeri). Tutanga mu bilembwa bimo bya basantaudi bilombola bine byadi bikulupile’mo bantu’mba: “Kupoya Banyema, Kusumba, Kukaya, Kwipwija Mukose—Buno Būmi bo Bobadi Basenswe!” Ino yo ngikadila itelelwe ne mu 1 Kodinda 15:32.—1/12, paje 8-10.