Le kodi mubele mu kakitatyi katyetye? Padi wakomene bukidibukidi wailwa ne misongo yo wabelele. Inoko, bulanda abo kebudipo nankyo. Dokitele Alan Wolfelt i mulembe mu dibuku dyandi Kusenga Mwinē Pobe Udi na Kyaso ku Mutyima, mu Angele amba, “Kekudipo kintu kisansa bwa kufwilwa.” Ino ubweja’ko amba: “Bulanda bubwanya kupwa mu bula bwa mafuku ne na bukwashi bwa bakwenu.”

Tala kimfwa mwālongēle mukulutuba Abalahama paāfwidilwe mukaji. Bible unena’mba “Abalahama waiya [washilula] kutulula muyoa ne kumudila Sala.” Bishima ‘washilula kutulula’ bilombola’mba papityile kitatyi pa kusaka’mba bulanda bumupwe. * Kimfwa kikwabo i kya Yakoba, obabepēle amba wandi mwana Yosefa wadibwa na nyama wa ntanda. Wāimvwene bulanda “mafuku mangi mangi,” kadi wapela kusengibwa na ba mu kisaka. Lufu lwa Yosefa lwāmusense mafuku mavule.—Ngalwilo 23:2; 37:34, 35; 42:36; 45:28.

Ye mobikadile ne ku bavule dyalelo bafwidilwe bantu bobasenswe. Tala bino bimfwa bibidi.

• “Mulumyami Robert, wafwile mu mafuku 9 Kweji 7, 2008. Lubanga lwa difuku dyalongekele akishida lwadi’nka na lwa mafuku onso. Twalongele’nka motulongelanga nyeke, kumeso kwa aye kwenda mu kaji, twadya kupwa tweshadika na kwififya ku matama ne kwinena’mba, ‘Nkuswele.’ Nansha byopapita myaka isamba, nakidi na kyaso ku mutyima. Nkilangapo amba nkelwa lufu lwa Robert.”—Gail, wa myaka 60.

• “Nansha byafwile mukajami muswe pano ke padi myaka 18, nekimulañanga kadi nakidi na bulanda. Ponso pomona kintu kisangaja kya mu bupangi, muvulukanga, nañanga muswelo waadi wa kusangala pa kumona bintu byonamona’bya.”—Etienne, wa myaka 84.

Bine, ke bibipo kwimvwana bulanda bwija mafuku mavule. Muntu ne muntu wimvwananga bulanda mu muswelo wandi, ne ke biyampepo kutopeka mukwenu pa muswelo weimvwana pa kyamalwa kyamutana. Koku kadi, tufwaninwe kwepuka kwitopeka batwe bene shi lufu lubetusansa bininge. Le tukalwa namani na bulanda?