Bulopwe bwa Leza Le Bukafika Kitatyi’ka?

“ABE Mfumwetu! lelo kōsake kujokeja bulopwe panopano ponka ku bene Isalela’ni?” (Bilongwa 1:6) Batumibwa bādi bakimba kuyuka kitatyi kikashimika Yesu Bulopwe bwandi. Dyalelo, kepadi kintu kya myaka 2 000, bantu bakisaka’nka kuyuka shi Bulopwe bwa Leza bukafika kitatyi’ka?

 Yesu byaādi wisambila pa mutwe wa mwanda wa Bulopwe mu busapudi bwandi, ukokeja kumona amba wātengele ne uno mwanda. Bine wātengele’o! Wānenēne misunsa mivule pa kitatyi kimo kya pa bula kyaādi utela bu “kwikala’po” kwandi. (Mateo 24:37, NW) Kuno kwikala’po i kukwatañane na kushimikwa kwa Bulopwe bwa Meshiasa. Lelo kwikala’po kuno i bika? Ivwana tubandaule’tu bidi bubine buná bwa mu Bible bulombola kwikala’po kwa Kidishitu.

1. Kwikala’po kwa Kidishitu kukekala’ko myaka mivule kupwa kwa lufu lwandi. Yesu wāelele lukindi amba aye udi bwa muntu “waendele ku ntanda kulampe akamoneko bulopwe, ebiya kāluka.” (Luka 19:12) Le luno lukindi lwa bupolofeto lwāfikidile namani? Bine Yesu wāfwile ne kusanguka; ebiya wāenda “ku ntanda kulampe,” ke mūlu kadi. Monka mwālaile Yesu mu lukindi lwandi, kwaluka kwandi na bulopwe kwālombele papite “kitatyi kikatampe kīne.”—Mateo 25:19.

Myaka ibala-inga Yesu ke mwende kala mūlu, mutumibwa Polo wāsoneka’mba: “Aye [Yesu] uno, byāelele kitapwa kimo kyonka kya nyeke kya pa mambo, washikete ku lundyo lwa Leza; ko konka kwākulupile, poso bidi bakumushikwa balongibwe ke kitulo-kya-maulu andi.” (Bahebelu 10:12, 13) Nanshi Yesu pa kupwa kufika mūlu pāpityile myaka mivule wilaija na kikulupiji. Kwilaija kwāfikile ku mfulo pabikikile Yehova Leza wandi Mwana bu Mulopwe wa Bulopwe bwa Meshiasa bwālailwe tamba pa kala. Kino kyo kitatyi kyashilwile kwikala’po kwa Kidishitu. Lelo bantu bādi ba kumona kino kinkumenkume kikatampe?

2. Kwikala’po i kwakubulwa kumonwa na bantu. Vuluka, Yesu wēsambile pa kiyukeno kikayukanya kwikala’po kwandi. (Mateo 24:3, Myanda Miyampe ku Bonso) Shi Yesu wādi wa kumweka pa kwikala’po kwandi, penepa kiyukeno kimuyukanya kidi na kamweno’ka? Tulete kimfwa: Langa shi usa kwenda kukatala dijiba dikatampe. Padi poenda mwishinda wenda umona biyukeno bilombola kwine kudi dijiba, ino shi pano koimene ku nkula, ku milomo ya mema utala pa mema mavule kufika ne ku mfulo kumweka diulu dipone pa mema, le ukasaka kadi kumona kiyukeno kidi’po na muketo mukatampe ufunka kumeso amba “Dijiba”? Mhm, ke amopo! Le kudi kadi kisakilwa kiyukeno abe nobe ubapu kwimwena na meso obe?

Yesu wāshintulwile biyukeno bya kwikala’po kwandi, ke mwandapo wa kulombola kintu kimonwa na bantu, mhm, i kwibakwasha bajingulule byobya bikalongeka mūlu. Pa kino wānene amba: “Bulopwe bwa Leza kebukafikapo mwibumwene meso, mhm!” (Luka 17:20) Penepa kiyukeno kyādi kya kulombola namani boba badi pano panshi amba Yesu waikala’po?

 3. Kwikala’po kwa Yesu kwādi kwa kuyukena ku bitatyi bya tuvutakanya tuvule pano panshi. Yesu wānene amba aye pa kwikala’po bu Mulopwe mūlu pano panshi pādi pa kwikala mavita, nzala, bintenshi, mbá, ne kujilula kwa bijila. (Mateo 24:7-12; Luka 21:10, 11) Le i bika byādi bya kuleta uno musala? Bible ushintulula amba Satana, “mulopwe wa panopantanda,” ukakalabala bininge pa kuyuka amba kakitatyi kandi i katyetye pano pashilula Kidishitu kwikala’po bu Mulopwe. (Yoano 12:31; Kusokwelwa 12:9, 12) Buno bukamoni bumweke bwa kukalabala kwa Satana ne kwikala’po kwa Kidishitu i buvule mpata dyalelo. Kutabukidila, tamba mu mwaka wa 1914 utelwa na balembi ba mānga bu mwaka wafulamukile bintu, bukamoni bwendanga buvudila’ko ne kusambakana ntanda yonso.

Yonso ino imweka bu misapu ya bulanda, ino ke amopo. I myanda ilombola amba Bulopwe bwa Meshiasa pano i bubikale mūlu. Panopano ponka, uno umbikalo usa kuludika bintu byonso pano panshi. Shi ke pano, bantu bakayuka namani buno Bulopwe amba betabije’bo ne kwikala babikalwa babo?

4. Kwikala’po kwa Yesu kuyukenanga ku busapudi busapulwa ntanda yonso. Yesu wānene amba kwikala’po kwandi kukekala pamo bwa “myaka ya Noa.” * (Mateo 24:37-39) Noa wāubakile safini kadi wādi “mwedi wa mbila ya boloke.” (2 Petelo 2:5) Noa wādyumwine bantu amba butyibi bwa Leza kebudi pabwipi. Yesu wānene amba balondi bandi pano panshi nabo bakalonga kintu kya uno muswelo mu kwikala’po kwandi. Wālaile amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.”—Mateo 24:14, MB.

Monka motwamwenanga mu kishinte kishele kunyuma, Bulopwe bwa Leza bukonakanya imbikalo yonso ya ntanda idi’ko’i. Mwingilo wa busapudi udyumunanga bantu amba uno umbikalo wa mūlu keusa kwikwata’ko, kadi amba bonso badi na mukenga wa kupanda ku bonakani bwiya’ko na kwikala babikalwa ba buno Bulopwe. Kipangujo pano i kino: Le uketaba’po namani?

Lelo Bulopwe bwa Leza I Myanda Miyampe Kodi?

Musapu wāsapwile Yesu upānanga lukulupilo lukatampe. Myaka tununu ne tununu kupwa kwa butomboki bwa mu Edena, Yehova Leza wākwete mpango ya kutūla’ko umbikalo ukolola myanda, na kujokeja bantu mu ngikadilo yādi nayo Leza mu ñeni ku ngalwilo—būmi bwa nyeke mu paladisa pano pa ntanda. Lelo kudi’po kipityile buya na kuyuka amba uno umbikalo wālailwe tamba kala uludikanga kala mūlu? Bine, ke mulangwe wa kufwatakanyapo nansha wa kulangidija, i mwanda mumweke bine!

Pano, Mulopwe utongelwe na Leza ubikele umbukata mwa balwana nandi. (Mitōto 110:2) Mu ino ntanda myoneke ibombokele kudi Leza, Meshiasa ufikidijanga kisaka mutyima wa Shandi na kukimba boba bonso basaka kuyuka Leza na bubine i bāni, ne kumutōta “mu mushipiditu ne binebinepo.” (Yoano 4:24) Lukulupilo lwa kwikala na būmi bwa nyeke mu buludiki bwa Bulopwe bwa Leza i lupebwe misaka, nkongo, ne bantu bonsololo. (Bilongwa 10:34, 35) Tukulomba nobe witabije uno mukenga wa kutendelwa wakupebwa. Wifunde kuyuka Bulopwe bwa Leza tamba pano, kukabulwepo kwikala nyeke ne nyeke mu buludiki bwabo boloke!—1 Yoano 2:17.

[Kunshi kwa dyani]