Kuyuka Bubinebine Butala pa Kalunganyembo Kukutala Namani?

BOBA bafundija’mba mu kalunganyembo mudi masusu bafutululanga Yehova Leza ne ngikadila yandi milumbuluke. Shako, Bible unena’mba Leza ukonakanyanga babi. (2 Tesalonika 1:6-9) Ino bulobo bwendele’mo ke ngikadilopo mikatampe ya Leza.

Leza kadipo na mutyima mubi nansha na kiji. Wāipangwile ne kwipangula’mba: “Lelo ngidi ne nsangaji mu lufu lwa mupupākane’ni, a?” (Ezekyele 18:23) Shi Leza kasangelangapo lufu lwa mupupakane, lelo ubwanya namani kuloelelwa kumubandila ususuka nyeke?

Ngikadila ya Leza mikatampe i buswe. (1 Yoano 4:8, BB) Bine, “Yehova i muyampe ku bonso; kadi lusa lwandi lwa kikōkeji ludi peulu pa mīngilo yandi yonso.” (Mitōto 145:9) O mwanda, Leza usaka netu tumusanswe na mutyima wetu onso.—Mateo 22:35-38.

Le I Kika Kikutonona—I Moyo wa Kalunganyembo’ni, I Buswe Boswele Leza?

Lufundijo lwa amba myuya isusulwanga mu kalunganyembo lupanga bantu moyo wampikwa kwendela’mo wa kutyina Leza. Ino shi muntu wayuka bubinebine bwa Leza ne wamusanswa ukamwakamwa mu muswelo mufwaninwe. Mitōto 111:10 ushintulula’mba: “Kwakamwa Yehova e ngalwilo ya ñeni; bonso balonga bīne bino’bi badi ne kuyūkidija kulumbuluke.” Kuno kwakamwa Leza, ke moyopo wa kuzakala, ino i kityino ne bulēme bukatampe kudi Umpangi. Kwakamwa kuyampe kwitutyinija kumufityija mutyima.

Tala Kathleen, wa myaka 32 wadi wingidija bikolwañana, mwaikadile pa kupwa kuyuka bubinebine butala kalunganyembo. Wadi witobelwe mafetyi, ñuma, mushikwa, ne busekese. Wanene amba: “Ponadi ntala wami mwana mwana-mukaji wa mwaka umo, nadi nanga’mba, ‘Tala’po byonamulonga. Kino e kyonkatēmenanga mu kalunganyembo.’” Kathleen walongele bukomo bwa kuleka bitomibwa bikolwañana, ino bweleyombo. Wanene monka’mba: “Nadi nsaka kwikala muntu muyampe, ino bintu byonso mu būmi bwami ne pano pa ntanda byadi enka bibi. Kebyadipo binomba ngikale muntu muyampe.”

Kupwa Kathleen wetana na Batumoni ba Yehova. Wanena’mba: “Nayukile amba kalunganyembo ka mudilo kekadi’kopo. Naivwanija buluji bwa binena Bisonekwa. Kuyuka konayukile amba nkikatēmapo mu kalunganyembo ka mudilo bwadi busengi kondi.” Ino kadi wafundile ne milao ya Leza ya kupa bantu būmi bwa nyeke pano pa ntanda misubulwe ku bibi. (Mitōto 37:10, 11, 29; Luka 23:43) Wesamba amba: “Bine, pano ndi na lukulupilo  lwa bine—lwa kwikala’ko nyeke mu Paladisa!”

Lelo Kathleen wabwenye kuleka kutoma bikolwañana pampikwa kutyina kwelwa mu kalunganyembo ka mudilo? Wasekunwine amba: “Ponadi ngivwana kyumwa kya kutoma bikolwañana, nadi nombela, nzenza Yehova ankwashe. Nadi nanga mwamwena bino bibidiji bibi, ne nkyadipo nsaka kumufityija mutyima. Nandi wadi ulondolola ku milombelo yami.” (2 Kodinda 7:1) Kuno kutyina kufityija Leza mutyima kwakweshe Kathleen enyongolole mu bibidiji byandi bibi.

Bine, kutamija buswe bwa kuswa Leza ne kumwakamwa kwendele’mo—pa kyaba kya kutyina masusu a kalunganyembo—ko kuketutonona tulonge kiswa-mutyima kya Leza ne kukamwena’mo nsangaji ya nyeke. Mulembi wa mitōto wālembele amba: “Kebo ba katōkwe kabo, shabo! bonso bakaminwe Yehova, banañanga mu mashinda andi.”—Mitōto 128:1.

[Kapango/Kifwatulo pa paje 9]

LELO I ANI UKANYONGOLOLWA MU KALUNGANYEMBO?

Malamuni amo a Bible aletanga kavutakanya pa kwalamuna bishima bibidi bya Kingidiki—Geʹen·na ne Haiʹdes—na kishima kimo kyonka, “kalunganyembo.” Mu Bible kishima Geʹen·na kishintulula bonakani bwa lonso, kwampikwa lukulupilo lwa kusanguka. Inoko boba badi mu Haiʹdes, nansha Hadese, bakulupile kukasanguka.

O mwanda Yesu pa kupwa kufwa ne kusanguka, mutumibwa Petelo wākulupije bemvwaniki bandi amba Yesu “kakashibwapo mu kalunganyembo.” (Bilongwa 2:27, 31, 32; Mitōto 16:10) Kishima kyalamwinwe bu “kalunganyembo” mu uno vese i kishima kya Kingidiki Haiʹdes. Yesu kāendelepo mu kifuko kya mudilo, mhm. Hadese, nansha “kalunganyembo” i kibundu. Ino ke enkapo Yesu wānyongolwelwe na Leza mu Hadese.

Bible unena pangala pa lusangukilo amba: “Lufu ne Kalunganyembo nabo balubula bafu badi monka.” (Kusokwelwa 20:13, 14) Kushiya “kalunganyembo” mutupu i kujokeja ku būmi boba bonso bamwenwe na Leza bu bafwaninwe kusanguka. (Yoano 5:28, 29; Bilongwa 24:15) Bine, luno i lukulupilo lwa kumeso luyampe’po kashā lwa kumona baswe betu bafwile batamba mu bibundu! Yehova, Leza wa buswe bwa endaenda ukalonga’kyo.