Lukulupilo Lwandabile Konso

“Nadi ndota kalunganyembo ka mudilo! Ndota bangela mu nkelwa ya mudilo, nasantamuka kendila bininge. Na bubine, nkyāsakilepo monka kulonga bubi.”—Arline.

LELO ukulupile amba kalunganyembo i kifuko kisusuka’mo babi? Bavule bakulupile uno muswelo. Kimfwa mu 2005, mufundi umo wa ku Inivelesite St. Andrews ya mu Ekose wamwene amba mwendeji umo pa basatu mu Ekose ukulupile amba boba bapaluka kudi Leza bakamona “malwa a mu ñeni a nyeke mu kalunganyembo.” Ino mwendeji umo pa batano ukulupile amba mu kalunganyembo mudi masusu a ku ngitu.

Lukulupilo lwa kalunganyembo i lwandabile mu matanda mavule. Kimfwa mu États-Unis, bwipangudi bwaipangwilwe mu 2007 bwalombwele amba bantu 70 pa katwa bakulupile amba kalunganyembo ka mudilo kadi’ko. Mu bwipangudi bwa mu 2004 mu Kanada, bantu 42 pa katwa nabo baitabije amba kadi’ko. Mu Beletanye namo, bantu 32 pa katwa bakulupile amba kalunganyembo ka mudilo kadi’ko.

Bifundija Bendeji ba Bipwilo

Bendeji ba bipwilo bavule ke baleke kufundija amba kalunganyembo i kifuko kisusulwa’mo bantu. Pano baletanga bushintuludi bwiifwene na byobya binenenwe mu dibuku Katekeshimo ka Kipwilo kya Katolika (Angele), dyalupwilwe mu 1994 amba: “Mfuto mikatampe ya mu kalunganyembo i kusansanibwa nyeke na Leza.”

Nansha nankyo, bantu bakikulupile amba kalunganyembo i kifuko kya masusu a mu ñeni nansha a ku ngitu. Boba bakankamika luno lufundijo banenanga amba i lutambe mu Bible. Albert Mohler, mwimaniji wa Seminele ya Kipwilo kya ba Batiste ba Kunshi unena’mba: “I mwanda’tu utala Bisonekwa.”

Mwanda Waka Byokulupile Bidi na Mvubu?

Shi bine kalunganyembo i kifuko kya masusu, nabya ufwaninwe kwikatyina. Inoko shi luno lufundijo i lwa bubela, nankyo bendeji ba bipwilo belufundija baletanga kavutakanya ne kususula boba bobafundija mu milangwe. Ne kadi bafutululanga Leza.

Lelo Bible, Kinenwa kya Leza, kinena bika pa uno mwanda? Mu bishinte bilonda’ko tusa kutanga mu Mabible alamwinwe na Bene Katolika ne Bene Mishoni pa kulondolola ku bino bipangujo bisatu: (1) Lelo shi muntu wafu wikalanga namani? (2) Le Yesu wāfundije bika pa mwanda utala kalunganyembo? (3) Kuyuka bubinebine butala pa kalunganyembo kukutala namani?