Le Leza Udi na Dijina?

Mulondolwelanga bantu:

▪ “Leza, i enka Leza.”

▪ “Leza udi na majina mavule.”

Le Yesu wānene’po namani?

▪ “Mwikale kulombela’nka namino’mba: Abe Tata wetu wa mūlu, dijina dyobe dijile kijila.” (Mateo 6:9) Yesu wādi uyukile amba Leza udi na dijina.

▪ “Nami nebayūkija ne dijina dyobe, ne pano kadi nkediyūkija na’mba, lusa lōusenswe nalo lwikale monka mudi abo, ami nami monka mudi abo.” (Yoano 17:26) Yesu wāyukenye dijina dya Leza.

▪ “Kemukamonepo, mhm, poso pakāya’pa, e po mukanena’mba: Abe wadyese ne dyese, wakwiya mu dijina dya Yehova.” (Luka 13:35; Mitōto 118:26) Yesu wādi utela dijina dya Leza.

LEZA i mwitulombole dijina dyandi. Wānene amba: “Ami ne Yehova, dyo dyami dijina.” * (Isaya 42:8) Dijina Yehova i mwityilo uyukene mu Kiluba wa dijina dya mu Kihebelu dyēinikile Leza mwine. Padi ukatulumuka pa kuyuka amba dino dijina dimo kete dya Kihebelu ditanwa misunsa tununu ne tununu mu bilembwa bya Bible bya pa kala. Na bubine, i kutupu dijina dikwabo dipityile dino ku bungi mu Bible.

Shi bepangule bamo amba, “Le dijina dya Leza i ani” bakokeja kulondolola amba i “Leza.” Bine, kino kidi pamo bwa muntu obaipangula amba, “Lelo i ani obavotele,” aye nandi amba i “muntu.” Ne “Leza” ne “muntu” byonso bibidi ke malondololopo mapotoloke mwanda ke majinapo.

Mwanda waka Leza i mwitulombole dijina dyandi? I mwanda wa tumuyukidije senene. Tulete kimfwa, muntu ukokeja kwitwa bu Mukelenge, Mfumu, Tata, nansha bu Nkambo, mungya umwita. Bino bitenta biyukanya mwikadile muntu’wa. Ino dijina dyo dilombola byonso bitala pa muntu’wa. Mo monka ne bitenta pamo bwa Mfumu, Mwine Bukomo Bonso, Tata, ne Umpangi bilombola’tu miswelo palapala ya mwikadile Leza. Ino enka dijina dyandi dya bunka, Yehova, dyo dituvuluja byonso bimutala. Le ubwanya namani kuyuka Leza bya binebine pampikwa kuyuka dijina dyandi?

Kebilombepo enka kuyuka dino dijina, ino i ne kwiditela. Mwanda waka? Mwanda Bible witulombola amba: “Bonso bakwita pa dijina dya Yehova bakapandanga.”—Loma 10:13; Yoela 2:32.

[Kunshi kwa dyani]

[Bushintuludi pa paje 6]

Muntu ukokeja kwitwa bu Mukelenge, Mfumu, Tata, nansha bu Nkambo, mungya umwita. Ino dijina dyo dilombola byonso bitala pa muntu’wa