Lelo Leza Witabije Mitōtelo Yonso?

Mulondolwelanga bantu:

▪ “Bipwilo byonso i mashinda atwala kudi Leza.”

▪ “Byokulupile kebidipo na mwanda, kisakwa i kwikala wa binebine.”

Le Yesu wānene’po namani?

▪ “Twelelai pa kakibelo katyetye, ke-kintu kyokya kibelo i kikatampe kyenda kukoneka, ne dishinda nadyo monka, kadi bakatwela monka i bangi bangi. Ino kabelo ka kutwala ku bumi a! a! a! butyeko! ne dishinda monka: ne bakwikamona i batyetye.” (Mateo 7:13, 14) Yesu kādipo witabije amba mashinda onso atwala kudi Leza.

▪ “Mu dyodya difuku bangi bakanena mba; Abe Mfumwetu! Abe Mfumwetu! ketwadipo tufumika mu dijina dyobe, a? Kadi mu dijina dyobe ketwadipo tupanga bademona, a? Kadi mu dijina dyobe ketwadipo tulonga byonka bikata? Ino nami nkebatentulula’mba: Mhm! Ami nkimuyūkilepo, mfundukei papo bānwe bakulonga bubi.” (Mateo 7:22, 23) Ke bonsololopo betela bu balondi ba Yesu betabijibwe na Yesu.

BANTU bavule balamete ku nkulupilo ne bisela byabo. Ino bikekala namani shi ino mfundijo keikwatañenepo na byobya bitanwa mu Bible, Kinenwa kya Leza? Yesu wālombwele kyaka kidi mu kulonda bisela bya bantu paānene bendeji ba bipwilo ba mu mafuku’a amba: “I enka namino mo mujilwila kijila kya Leza pa mwanda wa bisela byenu.” Kupwa wātela binenwa bya Leza amba: “Bano bantu bano bamfwenanga ne kyakanwa kyonka bandemeka ku milomo, ino mutyima wabo kulampe kwine na ami. Nanshi i bitupu bitupu byo bantōta, bafundija byakufundija, nanshi i bijila bya bantu byonka.”—Mateo 15:1-9; Isaya 29:13.

Bilongwa nabyo bidi na mvubu, ke enkapo nkulupilo kete. Bible wisambila pa bamo betela amba batōtanga Leza, amba: “Aku banena’mba: Tuyūkile Leza; kadi bamupela ku mīngilo yabo.” (Tetusa 1:16) Kadi Bible unenena pa bantu ba mu ano mafuku amba: “Bakusanswa byamazua pakatampe kudi Leza mpika; kwidingakanya bu-bwine Leza e ko kwabo, ino bukomo bwa bu-bwine Leza bafutulwile’bo; vundamina bene bano’ba badi namino.”—2 Temote 3:4, 5.

Kwikala wampikwa budimbidimbi i kuyampe, ino kekubwenepo. Mwanda waka? Mwanda muntu ukokeja kwikala wampikwa budimbidimbi ino aye’ko mu bubela. O mwanda buyuki bwa binebine butala padi Leza budi na kamweno. (Loma 10:2, 3) Kwikala na buyuki ne kulonga mungya byobya binena Bible kuketukwasha tusangaje Leza. (Mateo 7:21) Bine, kwikala mu mutōtelo wa bine i ne kwikala na kukanina kuyampe kwa mutyima, nkulupilo ya binebine, ne bilongwa byoloke. Kulonga byoloke ko kulonga kiswa-mutyima kya Leza difuku ne difuku!—1 Yoano 2:17.

Shi usaka kuyuka bivule bitala pa byobya binena Bible pangala pa Leza, nena Batumoni ba Yehova befunde nobe Bible ku bitupu.

[Bushintuludi pa paje 9]

Kwikala mu mutōtelo wa bine i ne kwikala na kukanina kuyampe kwa mutyima, nkulupilo ya binebine, ne bilongwa byoloke