Lelo Kudi Utele Bantu Mutyima Binebine?

Lelo kodi mwiivwane bwa abe udi bunka nsangaji mpika, pamo na kutupu muntu nansha umo wivwana binebine makambakano obe? Nansha shi bayukile’o, wamona’mba kebatele’kopo mutyima binebine.

KITATYI kya makambakano, būmi bwetu bwikalanga pamo bwa kimpumpu kimweka bu kekipupo. Kyaba kimo tukokeja’nka ne kunena’mba makambakano etutana abakoleja bininge kadi abetupite kipimo. E mobikadilanga divule kitatyi kifika kizumba, kutyumukwa mutyima, akishida itulemeka, luba lwa zenzeka, ne bikwabokwabo. Tukokeja kwimona bu bampikwa bukwashi ne kikulupiji ketwiipangula ne kwa kunyemena. Lelo kudi utele bantu mutyima binebine?

Leza wa “Kusenga Konso” Utele Bantu Mutyima

Leza i mutelwe na Bible bu “Shandya byalusa, Leza wa kanye ka kusenga konso.” (2 Kodinda 1:3) Leza wa dijina dya bu Yehova uyukile amba tusakanga kusengwa. Bible wingidija kishima “kusenga” mu mineneno palapala kintu kya katwa ne musubu, na kwitukulupija amba Leza uyukile byobya bitutana kadi udi na mutyima wa kwitusenga. Kuyuka namino kwitukulupija amba nansha shi bantu bakwabo kebamwenepo, kebemvwanijepo, nansha kuta mutyima ku makambakano etu, Yehova Leza aye umwene.

Kuta kutele Yehova mutyima muntu umo ne umo i kumweke patōka mu Bisonekwa. Bible unena’mba: “Meso a Yehova adi monsomonso pi na pi, kutala pa babi ne pa bayampe bene.” (Nkindi 15:3) Tutanga kadi mu Yoba 34:21 amba: “Mwanda meso andi adi pa mwikadilo wa muntu, ino umonanga matabula andi onso.” Yehova umonanga byotulonga—biyampe ne bibi—kadi uyukanga ne ngikadilo yotudi’mo, o mwanda ubwanya kulonga’po kintu kyamona bu kifwaninwe. Uno mwanda i mumweke mu binenwa byānene Hanania umoni, nansha mupolofeto kudi Asa Mulopwe wa Yuda amba: “Mwanda meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.”—2 Bilongwa 16:7, 9.

Kudi buluji bukwabo bwitutadila Yehova. Yesu unena’mba: “Nansha umo wakwila kwami aye mwine, poso’nka Tata wakuntuma amukokele ko ndi.” (Yoano 6:44) Yehova utalanga mobifwaninwe mwanda wa kumona shi mutyima wa muntu udi kwadi. Shi udi kwadi, nabya nandi ukamulongela bintu bitulumukwa. Kimfwa mu République Dominicaine, lolo umo wadi mu lupitalo mwanda wa kupasulwa dyaya. Wadi ulomba Leza amukwashe kutana kipwilo kya bine. Kepaijijepo, mulume wamuletela boloshile unena’mba I Kika Kisaka Leza Kotudi?  * waapebwanga na Batumoni ba Yehova bapitanga ku yandi njibo lubanga. Mwana-mukaji’wa watanga boloshile, ko kunena wanena’mba i Leza walondolola ku milombelo  yandi. Waitabije kwifunda Bible na yewa Kamoni, ne myeji isamba mine keyabwene, wepāna kudi Leza ne kubatyijibwa.

Mu mukanda wa mu Bible wa Mitōto, tutana’mo binenwa bivule bikankamika mutyima bya batuimba ba mitōto Bahebelu ba pa kala, kimfwa Davida, ulombola muswelo utala Yehova bengidi bandi. Mu Mitōto 56:8, Mulopwe Davida wabija Leza amba: “Ubīke impolo yami mu mutyibi obe; lelo keīdipo umukanda obe’ni?” Monka mulombwela kuno kudingakanya, Davida wāyukile amba Yehova umwene masusu andi, ne mobyādi bimusanshila mwine. Yehova wādi umwene misanshi ya Davida kadi kādipo widilwe byādi bilengeja Davida kudila impolo. Bine, Umpangi wetu utalanga boba bonso beelela’ko kulonga kiswa-mutyima kyandi, “boba ba mutyima mubwaninine kwadi.”

Kisonekwa kikwabo kya mu Bible kishintulula muswelo utele Leza bantu mutyima i kya Mutōto wa 23. Binenwa bibajinji bidingakanya Leza na mukumbi wa buswe, amba: “Yehova i Mukumbi wami; nkikabulwangapo, mhm.” Mukumbi wa Kutunduka utanga mutyima ku mukōko ne mukōko wamunine, wiwinika ne dijina. Difuku ne difuku wita mukōko ne mukōko weupolweja na buswe ne kutala shi i mwitape kilonda. Shi udi nakyo, weushinga māni nansha bikwabo mwanda wa kupwa’kyo. Shi mukōko ubabela, mukumbi wiutomejanga mityi ne kwiutekuna kutyina’mba wakapona ne kufwa. Bine kino i kyelekejo kilumbuluke’po kashā kya muswelo utanga Yehova mutyima boba bavundamukila kwadi.

 Milombelo ne Lusangukilo—Bilombola’mba Leza Witutele Mutyima

Ino Mitōto minengele ne mikwabo i mitulembelwe mu Bible mwanda wa tutange’yo ne kwiisangela. Ilombolanga bengidi ba Leza pa kala mo bādi bapungulwila Yehova mityima yabo mwanda wa kulomba Leza bukwashi ne kumufwija’ko pa bwendeji ne madyese aebapa. Bino binenwa bilombola patōka’mba bengidi ba Leza pa kala bādi bakulupile amba Leza wibalamine. Kutanga ne kulangulukila pa bino binenwa bitamba ku mutyima kuketulengeja netu tumone Leza mu muswelo umo. Milombelo i kilomboji kilombola’mba Leza utele bantu mutyima.

Ino kitatyi kimo, tulēmenenwanga na makambakano twakomenwa kuyuka ne muswelo wa kulombela mwine. Lelo kino kikakankaja Yehova akomenwe kuyuka makambakano etu? Loma 8:26 ulondolola’mba: “Mushipiditu nandi wakwasha bukōkekōke bwetu; ke-twi-bantu ketuyūkilepo nansha mwakulombela mwitufwanine, ehe; ino Mushipiditu, aye mwine, witusengela ne imbinzo yakubulwa ne mwakunenena.” Kino kisonekwa kilombola’mba milombelo ya ku bukomo bwa mushipiditu ya bengidi ba Leza ba mafuku a kala ikokeja kwikala na binenwa bikwatañene na milangwe yetu kadi yaimvwanwa na Yehova, mwine “wivwananga kulombela.”—Mitōto 65:2.

Lukulupilo lwa lusangukilo nalo i bukamoni bulombola’mba Leza utele muntu yense mutyima. Yesu Kidishitu wānene amba: “Mwaka wiyako’wa bonso badi mu bibundu bakēvwana diwi dyandi. Ne kutamba bakatambemo.” (Yoano 5:28, 29) Kishima kya Kingidiki kyalamwinwe pano kilombola “bibundu [bivulukwa, New World Translation]” ke’nkapo “bibundu” bitupu. Kileta mulangwe wa amba būmi bwa bantu bafwile buvulukwanga na Leza.

Langa’tu kujokeja muntu ke mūmi, bilomba Leza kantu konso katala muntu’wa, mwaadi wikadile, tuyukeno tonso twaapyene ne twaafundile, ne luté lwandi lwine! (Mako 10:27) Luté lwa Leza kelukōkangapo nansha shi pabapite myaka ne myakula. (Yoba 14:13-15; Luka 20:38) Nanshi midiyo ne midiyo ya bantu bafwile balaminwe senene mu luté lwa Yehova Leza—bukamoni bulombola amba Leza utele muntu ne muntu mutyima!

Yehova Upalanga Bantu Mpalo

Lelo i bika byotufwaninwe kulonga amba Leza etulame na buswe ne kwituta mutyima? Dibajinji, tufwaninwe kulombola amba tumwitabije, na kumukulupila ne na kumukōkela. Mutumibwa Polo ulombola muswelo ukwatañene kwikala na lwitabijo ne kutebwa mutyima na Leza. Usonekele amba: “Ino kwakubulwa kwitabija kekyendelemopo kumutōkeja ku mutyima; ke-muntu yewa wakwiya kudi Leza i kimwendele’mba ētabije’mba: Eyo, udi ponka, upala mpalo boba bamukimba ne mikeketo.”—Bahebelu 11:6.

Yuka amba lwitabijo lusangaja Leza lulomba bintu bibidi. Kibajinji, tufwaninwe kwitabija’mba, “Eyo, udi ponka,” ko kunena’mba, tufwaninwe kukulupila amba Leza udi’ko ne amba i Mulopwe Mukatampe, otufwaninwe kutōta ne kukōkela. Kya bubidi, tufwaninwe kwitabija amba aye “upala mpalo boba bamukimba ne mikeketo.” Lwitabijo lwa bine lulomba kukulupila amba Leza utele mutyima boba bonso bakimba na mikeketo kulonga kiswa-mutyima kyandi ne amba wibapalanga mpalo. Nobe, shi wifunde Kinenwa kya Leza ne kumukōkela, nankyo ukabwanya kwikala na luno lwitabijo lulengeja Leza akupale mpalo ne kukuta mutyima na buswe.

Bantu bavule dyalelo balañanga’mba Leza katangapo mutyima ku bilonga bantu. Ino monka motwekimwenanga, Bible ulombola’mba Leza utele bininge mutyima boba bamwitabija bya binebine. Nansha shi būmi dyalelo i buyule bikoleja, moyo, kutyumukwa mutyima, ne misanshi, ketufwaninwepo kuzoza. Yehova witutele mutyima. Na bubine, witwitanga tuvundamukile kwadi amba etukwashe. Kaimba wa Mitōto unena’mba: “Ela kiselwa kyobe padi Yehova, nandi ukakulelanga; kakalekapo moloke kujina, nansha patyetye pene.”—Mitōto 55:22.

[Kunshi kwa dyani]

[Kapango/Kifwatulo pa paje 27]

Bisonekwa Bikomeja Lwitabijo Lobe Amba Leza Ukutele Mutyima na Buswe

“Mwanda meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.”—2 BILONGWA 16:9

“Ubīke impolo yami mu mutyibi obe; lelo keīdipo umukanda obe’ni?”—MITŌTO 56:8

“Yehova i Mukumbi wami; nkikabulwangapo, mhm.”—MITŌTO 23:1

“Ē! abe wivwananga kulombela, kudi abe ko kukāya bantu bonso.”—MITŌTO 65:2

“Shi abe ukēte, nankyo nka kwitaba; nansha ukekalanga ne mutyima wa kuloelelwa ku mīngilo ya obe makasa.”—YOBA 14:15

“Yewa wakwiya kudi Leza i kimwendele’mba ētabije’mba: Eyo, udi ponka, upala mpalo boba bamukimba ne mikeketo.”—BAHEBELU 11:6

“Ela kiselwa kyobe padi Yehova, nandi ukakulelanga; kakalekapo moloke kujina, nansha patyetye pene.”—MITŌTO 55:22