Bubela 3: Bayampe Bonso Bendanga Mūlu

Le buno bubela butambile kwepi? Batumibwa ba Yesu pa kupwa kufwa, ku ngalwilo kwa myaka katwa ka bubidi K.K., Bashandya Bipwilo babajinji bātumbile bininge. Dibuku New Catholic Encyclopedia (2003), Volime 6, paje 687, dilombola bufundiji bwabo amba: “Kikatampe kyādi kimanine’po bufundiji bwabo i nsangaji ya mūlu ipebwanga muya ushile umbidi wao pa kupwa’tu kupita mu kikendelo kinondanonda na lufu.”

Lelo Bible unena’po bika? “Dyese dyo dyabo bakōkele, ke-bantu boba bakapyana ntanda yonso.”—Mateo 5:5.

Nansha Yesu byaālaile bana bandi ba bwanga amba naenda “kwimulongolwela kuntu kwenu” momwa mūlu, ino wālombwele amba ke bolokepo bonso bendanga’mo. (Yoano 3:13; 14:2, 3) Mwene wālombele amba kiswa-mutyima kya Leza kilongeke “mūlu ne panopantanda”? (Mateo 6:9, 10) Na bubine, kudi bīkalo bibidi bitengele kwikala’mo boloke. Batyetye bo bakabikala na Kidishitu momwa mūlu, ino bavule bene bo bakekala nyeke ne nyeke pano pa ntanda.—Kusokwelwa 5:10.

Mu bula bwa myaka, kipwilo kibajinji kyāshintyile mumweno wa mwingilo wakyo pano panshi. Byāfula kwepi? Dibuku The New Encyclopædia Britannica dinena’mba: “Kipwilo kyāshimikilwe kyāpingakenye bityetye Bulopwe bwa Leza bwādi butengelwe.” Kipwilo kyāshilula kukomeja lupusa lwakyo na kwikuja mu politike, ne kupumpunya binenwa bya patōkelela bya Yesu byaānene balondi bandi amba “kemudi ba mu bapanopantanda.” (Yoano 15:19; 17:14-16; 18:36) Mu lupusa lwa Koshitante, Mbikavu Mwine Loma, kipwilo kyātunine nkulupilo imoimo, kubadila’mo ne lukulupilo lwa mwine mwikadile Leza.

Dingakanya na ano mavese a mu Bible: Mitōto 37:10, 11, 29; Yoano 17:3; 2 Temote 2:11, 12

NA BUBINE:

Bantu bavule bayampe bakekala pano pa ntanda nyeke ne nyeke, ke mūlupo

[Kifwatulo pa paje 6]

[Kutambile Kifwatulo pa paje 6]

Art Resource, NY