Bubela 5: Madia I Inandya Leza

Le buno bubela butambile kwepi? “Butōtyi bwa inandya Leza bwānanine . . . pātutyikile bapakano mu kipwilo. . . . Bwine Leza bwabo ne mutyima wabo wa kutōta [wa bapakano baikele ke Bene Kidishitu] byādi bitādilwe mu bula bwa tununu twa myaka na butōtyi bwa leza mukaji ‘lolo mukatampe’ ne ‘leza mujike.’”—The New Encyclopædia Britannica (1988), Volime 16, paje 326 ne 327.

Lelo Bible unena’po bika? “Talapo, byōkēmitapo mwana munda, ukabutulapo mwana, mwana-mulume, ino ukamwinika dijina dya bu-Yesu. Aye nanshi ukēkalanga mukatampe, ukatelwa dya bu-Mwana Wamūlumwine . . . Kadi kyakubutulwa kikola kikatelwa ke Mwana Leza.”—Luka 1:31-35.

Kino kisonekwa kilombola patōka amba Madia i inandya “Mwana Leza,” ke inandya Leza mwinepo. Lelo wādi wa kubwanya namani kwimita Yewa ‘kakokejapo kubwanwa mu diulu dya madiulu’? (1 Balopwe 8:27) Ne aye mwine kānenepo namino. I lufundijo lwa Busatu Busantu lo luletele kano kavutakanya katala padi Madia. Kitango kyālongelwe mu Efisesa, mu 431 K.K., pa kutela Madia bu Theotokos (kishima kya Kingidiki kishintulula “ubutwile Leza”), nansha amba “Inandya Leza,” kyāsebele dishinda dya kutōta Madia. Kibundi kya Efisesa, mwine mwālongelwe kino kitango, kyādi mu bula bwa tutwa twa myaka kité kya butōtyi bwa bankishi bwa kutōta Alatemise (Diana) leza mukaji wa bumeni.

Nanshi bintu bivule bya mu butōtyi bwa nkishi wa Diana, “kyelekejo kyaponene ku Yupita,” pamo bwa kujokoloka mu bipito baselele nkishi, byātwejibwe mu butōtyi bwa Madia. (Bilongwa 19:35) Kilongwa kikwabo kyātwejibwe mu lufundijo lwa Bwine Kidishitu i kwingidija bankishi belekeja Madia ne bantu bakwabo mu mutōtelo.

Dingakanya na ano mavese a mu Bible: Mateo 13:53-56; Mako 3:31-35; Luka 11:27, 28

NA BUBINE:

Madia wādi inandya Mwanā Leza, ke inandya Lezapo. Bubela bwa Busatu Busantu bo bwabutwile butōtyi bwa Madia amba i Inandya Leza

[Kifwatulo pa paje 8]