Lelo Bafu Babwanya Kukwasha Bōmi?

TAMBA i nsongwalume wikalanga mu Afrika wa Kunshi, wadi wilongolola kukalonga maekizame. * Inandi wamuningile akalombe bukwashi ku babutule bandi bafwile mwanda wa kubinga’o. Mu Palermo, mu Sicily, bañenda bapempulanga bibundu biyengelwe panshi mulaminwe senene imbidi ya bantu bavule. Bamo bakulupile amba ino imbidi milamwe ilamanga ku mushipiditu boba bōmi. Mwaka ne mwaka, bantu bendanga ku Musanza wa Lily Dale, kibundi kidi kushika kwa New York, mu États-unis, kuyukene amba ko kuvudile mishipiditu ya bayakalunga bashikete’ko. Bantu bāya kupempula bakulupile amba basa kwitana’ko na babutule ne balunda babo bafwile amba bebakwashe.

Kujokoloka ntanda yonso, bantu bakikulupile amba bafwe babwanya kukwasha bōmi. Le abe ulanga’po namani? Padi nobe wafundijibwe namino nansha padi ulamete ku boba badi na ino milangwe. Kwabila kwimona dikwabo na baswe betu bafwile i kipangila kyetu. Bilumbu bikulupijanga bantu amba bibwanika kwimona na bafu. Julunale Time utelele kilumbu umo unene amba kīkalo kya mishipiditu “kidi’ko nyeke mwanda wa kukwashañana.” Lelo i bya bine? Le bine bafu babwanya kukwasha bōmi? Malondololo mapotoloke a mu Bible asa kukutulumuna.

Lelo Bafwe I Bōmi mu Kifuko Kampanda?

Bible ushintulula mu kīpi, ne mu bishima bipēla kwivwana ngikadilo idi’mo bafwe. Tala binena Musapudi 9:5 amba: “Bōmi bayukile’mba bakafwa; nanshi bafwe kebayukilepo nansha kimo kine.” Lelo bibwanika bantu bafwe kwikala na malango? Vese 6 ulondolola’mba: “Lusa lwabo nalo pano i loneke, ne nshikani yabo mine mo monka, ne kwabila kwabo kwine kumo; nansha abo kwikala monka nyeke na kyepelo kya bintu bilongwa munshi mwa dyuba, nansha kimo kine.” Tala kadi binena vese 10 wa uno shapita amba “kekudipo mingilo nansha kusambakanya bintu pamo miswelo ne miswelo, nansha kuyukidija, nansha ñeni mu kibundu koenda’kwa.” “Kibundu” kitelelwe pano i kishima kyalamwinwe ku kishima kya Kihebelu “Sheole.” I biyampe kuyuka amba kishima kikwabo kya Kingidiki kya buluji bumo na Sheole i “Hadese” kingidijibwe mu Bisonekwa mwanda wa kulombola kwāendele Yesu Kidishitu paāfwile.—Bilongwa 2:31.

Yesu wākweshe bantu bavule paādi kafwile, ino wādi uyukile amba ukafwa. Lelo wādi ulanga’mba ukendelela na kukwasha bantu shi kadi mu kibundu? Mhm? Wādingakenye lufu lwandi wa kampeja-bukidi na kitatyi kya bufuku kikalanga kikomo kwingila. (Yoano 9:4) Yesu wādi uyukile biyampe amba shi bantu abafu ‘bafwididilanga.’—Isaya 26:14.

Kadi Yesu wāletele kyelekejo kilombola ngikadilo imo yonka idi’mo bafu. Yesu wādingakenye lufu na tulo kitatyi kyāfwile mulunda nandi Lazalasa. (Yoano 11:11-13) Ketukalangapo amba muntu ulēle ubwanya kwitukwasha, mwene i amo? Muntu ulēle kayukilepo nansha kimo kine, kabwanyapo kukwasha muntu nansha umo.

Lelo Muya Ushalanga Mūmi Pafwa Muntu?

Bantu bavule bafundijibwe amba muya i kintu kekimweka kishalanga kyūmi shi muntu  wafu. Bible kafundijangapo namino. Ngalwilo, mukanda umbajinji wa mu Bible, witusokwela mwikadile muya. Ngalwilo 2:7 unena amba muntu umbajinji kupangwa, waālamukile “ke muya mumi.” Muntu yense mutuntulu i muya; banyema nabo kadi i myuya. (Ngalwilo 1:20-25) Na bubine nanshi, shi muntu nansha nyama wafu, i muya wafwa. Bible ubingija kino.—Ezekyele 18:4.

Inoko, bamo babwanya kwiipangula amba, ‘Lelo myanda mivule yotwimvwananga amba muntu wasambakana mufu, waimvwana ne diwi dyandi, kadi wemone nandi, le i ya bubela?’ Ino myanda imvwanwanga kuvule pano pa ntanda. Ino myanda ikulupijanga boba bafwidilwe babutule ne balunda nabo bende kukakimba kilumbu kitela amba kibwanya kwita ufwile.

Lelo ino mānga i ya bine? Shi i ya bine, nankyo ibulwe kupatanya binenwa bya Bible bidi kūlu’bi? Yesu Kidishitu wātelele Mwanda wa Leza amba kyo kya binebine. (Yoano 17:17) Bubinebine kebwipatanyangapo. Eyo, mu Bible mudi bulombodi bupotoloke bwitulombola muswelo otufwaninwe kumona binena bantu amba bafu bakokeja kukwasha bōmi. Bible i mwitusapwile muntu umo wāpimine kukimba bukwashi ku bafu. Shi utange na katentekeji ino mānga, ukasokola bubinebine.

Mulopwe Ulomba Bafu Bukwashi

Tudi mu kitatyi kya divita kungala kwa Isalela. Mulopwe Solo ne basola bandi abatambwe na bibumbo bilenga moyo bya Bene Fidishitia. Solo pa kumona kibumbo kya Bene Fidishitia, “mutyima wandi wazakala byamwiko’tu.” Papo Solo mu bulopwe bwandi ke muvundamine mutōtelo wa bine. Ku mfulo, milombelo yandi kudi Yehova keikilondololwapo. Le Solo usa kukimba bukwashi kwepi? Samwele, mupolofeto wa Leza nandi ke mufwe kala.—1 Samwele 28:3, 5, 6.

Solo wākakimbile bwendeji kudi kilumbu kya mu Ene-dola. Wēkilomba amba: “Ntambijije Samwele” ku bafu. Kilumbu wātentama kaite. Uno “Samwele” wāmwekele wāsapwidile Solo amba Bene Fidishitia bakamunekenya ne amba Solo ne bandi bana bakafwa mu divita. (1 Samwele 28:7-19) Lelo bine i Samwele wālangukile mu bafu?

Languluka’po bidi. Bible unena amba shi muntu wafu “[walukilanga] ku biloba byandi” ne amba “mifwatakanyo yandi ībaoneka.” (Mitoto 146:4) Ba Solo ne Samwele bādi bayukile amba Leza i mupeleje kwisamba na mishipiditu imbi. Shi utale biyampe, Solo ye umbajinji kwenda kukakimba bantu ba majende!—Levi 19:31.

Imana’po bityetye. Shi Samwele, muntu wa kikōkeji wādi mūmi mu bīkalo bya mishipiditu, le ulanga wādi wa kujilula kijila kya Leza ne kwingidila pamo na kilumbu mwanda wa kukemona na Solo? Yehova wāpelele kwisamba na Solo. Lelo kilumbu wādi wa kubwanya bine, kuningila Leza Mwine bukomo bonso esambe na Solo kupityila kudi Samwele wādi ke mufwe? Mhm, kijila! Na bubine uno Samwele kādipo nansha dimo yewa mupolofeto wa kikōkeji wa Leza. Wādi i mushipiditu umbi—demona wādi wiinanya bu Samwele wāfwile’wa.

Bademona i bamwikeulu bātombokēle Leza ku ngalwilo kwa mānga ya muntu. (Ngalwilo  6:1-4; Yude 6) Bademona bajingululanga bantu pobakidi bōmi; bayukile mobanenena, mobatadila, ne mobalongela bintu. Bakankamene kuleta mulangwe wa amba binena Bible i bya bubela. Ke kya kutulumukapo shi Bible witudyumuna ku kwiepeja ku bukomo bwa mishipiditu! (Kupituluka 18:10-12) Ino mishipiditu imbi ingilanga ne dyalelo.

Pano nanshi, tubayuka kinenena bantu bavule amba “bemvwananga” nansha “kumona” bakena babo bafwile. Nansha kuno kumweka kumweka bantu byokumonwa bu kuyampe, ako’ko i mishipiditu imbi isaka’tu kongola bantu. * (Efisesa 6:12) Kadi, ela milafwe pa kino: Yehova i Leza wa buswe witutele mutyima. Shi byadi’mba bafu i bōmi mu kifuko kampanda ne babwanya kukwasha balunda ne bisaka byabo, lelo Umpangi wetu wa buswe wadi wa kupeleja kwisamba nabo ne kwikutela amba i “byamunyanji”? Ehe, nansha dimo! (1 Petelo 5:7) Penepo, le i kutupu nsulo ikulupilwa nansha imo ya bukwashi?

Bukwashi bwa Bine ku Bōmi ne ku Bafwe

Tubapu kwimvwana kala amba bafu kebadipo na bukomo bwa kukwasha bōmi. Ne kadi, bukomo bulongwa bwa kukimba bukwashi ku bafu i bweleyombo bitupu; i kyaka kikatampe, mwanda i kujilula kijila kya Leza ne kwitutūla mu kyaka kya kumunwa na bademona.

Bible witutuma ku Nsulo milumbuluke ya bukwashi—ke kudi Yehova, Mupangi wetu kadi. Ubwanya kwitunyongolola mu lufu. (Mitōto 33:19, 20) Dyalelo Yehova udi’ko wa kwitukwasha. O mwanda i mwitupe lukulupilo lwa bine, lupite nkulupilo ya bubela iletwanga na bilumbu.

Tamba, utelelwe ku ntwelelo, wayukile aye mwine kwishila kudi pa bukata bwa nkulupilo ya bubela itamba ku bilumbu na yoya ya bine itupa Yehova. Bilumbu byamulombwele amba shi kalambwilepo bankambo bandi bafwile milambu, usa kupona ekizame. Tamba washilwile kwifunda Bible na Batumoni ba Yehova. Wayukile ngikadilo mine idi’mo bafwe ne kwine kutambile boba beinanyanga bu bankambo bafwile. Nansha byadi bimuningila inandi akakimbe bukwashi ku bilumbu, Tamba wapelele ne kunena’mba “Nansha shi napone, nsa kushilula na bukomo mwaka wiya’ko.”

Le byafula namani? Wabingile bu mubajinji ku ekizame! Inandi watulumuka waleka ne kukulupila bilumbu bine, ne kakidipo kadi usaka monka kutela myanda ya milambu yobadi balambula. Tamba wayukile amba Yehova witudyumuna twiepeje ‘kukepangula bafu pa mwanda wa bōmi.’ (Isaya 8:19) Kwifunda Bible kwakweshe Tamba akulupile amba shi mutyima umutōkele mu bijila bya Leza, nankyo usa kubinga.—Mitōto 1:1-3.

Le tunena namani pa baswe betu bafwile? Lelo kudi’po lukulupilo pobadi? Kutentekela pa bukwashi botukwashibwa batwe bōmi, Yehova i mulaye kukwasha ne boba badi mu bibundu. Pa kupwa kulombola amba bafwe kebadipo na bukomo, tala kadi binena Mupolofeto Isaya mu Shapita 26, vese 19 amba: “Bafwe bobe bakekala bōmi, . . . langukai mwimbei banwe bekalanga mu luvumbi!” Bupolofeto bubweja’ko amba i boba “bafwe” bakekala ke bōmi monka.

Langa’po bidi! Midiyo ne midiyo ya bantu bampikwa bukomo balēle mu bibundu bakajokela ku būmi! Na bubine Bible unena’mba Yehova ‘uloelelwe’ kusangula bafwe. (Yoba 14:14, 15) Lelo umona’mba ino milao i miyampe mpata keikokejapo kufikidila? Yesu Kidishitu wādi witabije luno lukulupilo pa kutela bafwe bu bōmi kudi Yehova.—Luka 20:37, 38.

Lelo usaka kwikala na luno lukulupilo? * Endelela kwikala na buyuki bwa bine budi mu Bible. Powifunda, ukakulupila amba Yehova ubwanya kukwasha bōmi ne bafwe ne amba milao yandi i “ya binebine, milumbuluke.”—Kusokwelwa 21:4, 5.

[Kunshi kwa dyani]

[Bushintuludi pa paje 11]

Kwabila kwimona dikwabo na baswe betu bafwile i kipangila kyetu

[Kifwatulo pa paje 12]

Lelo mupolofeto Samwele wālangukile mu bafu ne kwisamba na Mulopwe Solo?