Mwakoi, Mwakoi ku Dishinda Dilumbuluke dya Umbūmi!

“Shi twikale bōmi, shi twikale bafwe, nabya tudi bonka bā Mfumwetu.”—LOMA 14:8.

1. I bika byāfundije Yesu pangala pa dishinda dilumbuluke dya umbūmi?

 YEHOVA witusakilanga tusangele dishinda dilumbuluke dya umbūmi. Bantu babwanya kwikala na būmi mu mashinda meshileshile, ino kudi dishinda dimo kete dilumbuluke. Kekudipo kintu kulumbuluke kyotubwanya kulonga mu būmi kitabukile kwikala na būmi bukwatañene na Kinenwa kya Leza ne kuboila ñeni kudi Yesu Kidishitu, wandi Mwana. Yesu wāsoñenye balondi bandi kutōta Leza mu mushipiditu ne mu bubinebine, ne kwibapa mwingilo wa kulonga bana ba bwanga. (Mat. 28:19, 20; Yoa. 4:24) Tukasangaja Yehova ne kweselwa, shi twikale na būmi bulonda bufundiji bwa Yesu.

2. Lelo bavule bālondolwele namani ku musapu wa Bulopwe mu myaka katwa kabajinji, ne kutwela mu “Dishinda” kushintulula bika?

² Boba “badi mu ngikadilo mifwaninwe kukamona būmi bwa nyeke” pobetabijanga ne kubatyijibwa, twikalanga na bubinga bwa kwibemwina amba “mwakoi, mwakoi ku dishinda dilumbuluke dya umbūmi!” (Bil. 13:48; New World Translation) Mu myaka katwa kabajinji mu Kino kyetu Kitatyi, bantu tununu ne tununu bātambile mu mizo palapala bāitabije bubinebine ne kulombola kumeso a bantu bonso kwipāna kobepēne kudi Leza na kubatyijibwa. (Bil. 2:41) Bano bana ba bwanga babajinji bātwelele mu “Dishinda.” (Bil. 9:2; 19:23) Kunena namino i kwendele’mo, mwanda boba bekala ke balondi ba Kidishitu balondanga būmi bwimanine pa kwitabija mudi Yesu Kidishitu ne kwiula kimfwa kyandi.—1 Pet. 2:21.

3. Mwanda waka bantu ba Yehova babatyijibwanga, ne i banga babatyijibwe mu myaka dikumi ishele kunyuma’i?

³ Mwingilo wa kulonga bana ba bwanga wingilwanga bukidibukidi mu ano mafuku a mfulo ne pano wingilwanga mu matanda 230 ne kupita. Mu myaka dikumi ishele kunyuma’i, kintu kya bantu 2700000 ne musubu batongele kwingidila Yehova kadi babatyijibwe mwanda  wa kulombola kwipāna kwabo kwadi. Uno i mwayene wa bantu 5000 ku yenga ne yenga! Kutyiba butyibi bwa kubatyijibwa kwimaninanga pa buswe bwa kuswa Leza, pa buyuki bwa Bisonekwa, ne pa kwitabija byobya byobifundija. Lubatyijo i ditabula dikatampe mu būmi bwetu, mwanda lulombolanga ngalwilo ya kupwana bininge na Yehova. Kadi i kilomboji kya kukulupila amba usa kwitukwasha tumwingidile na kikōkeji, pamo’nka na mwaākwashije bengidi ba pa kala bānangile mu dishinda dyandi.—Is. 30:21.

Mwanda Waka Ufwaninwe Kubatyijibwa?

4, 5. Tela madyese ne byabuyabuya bimobimo bimwenwa mu kubatyijibwa.

⁴ Padi kodi mutambule buyuki bwa Leza, kodi mushinte būmi bobe, ne pano kodi musapudi wakubulwa kubatyijibwa. Tukufwija’ko pa kuno kwendelela. Ino le kodi mwipāne kudi Leza mu milombelo, ne usakanga kubatyijibwa? Byowifunda Bible, kodi padi muyuke amba būmi bobe bufwaninwe kwimanina pa kutendela Yehova, ke pa kwisangajapo’tu abe mwine nansha pa kwiumbika bintu bya ku ngitu. (Tanga Mitōto 148:11-13; Luka 12:15) Ino i madyese’ka ne byabuyabuya’ka bimwenwa mu kubatyijibwa?

⁵ Shi wi Mwine Kidishitu mwipāne, ukekala na būmi bulonda bitungo bya peulu. Ukasangala mwanda uloñanga kiswa-mutyima kya Leza. (Loma 12:1, 2) Mushipiditu wa Yehova ukakwikadija na ngikadilo ya bwine Leza pamo bwa ndoe ne lwitabijo. (Ngat. 5:22, 23) Leza ukalondolola milombelo yobe ne kukwesela mu bukomo bolonga pa kukwatañanya būmi bobe na Kinenwa kyandi. Mwingilo obe ukekala wa nsangaji, kadi kulonda dishinda ditabijibwe na Leza kukaningija lukulupilo lobe lwa kwikala na būmi bwa nyeke. Pakwabo kadi, kwipāna ne kubatyijibwa kukalombola amba usakanga bine kwikala Kamoni wa Yehova.—Is. 43:10-12.

6. Le lubatyijo lwetu lulombolanga bika?

⁶ Kitatyi kyotwipāna kudi Leza ne kubatyijibwa, tulombolanga’mba ketudi ba Yehova. Mutumibwa Polo wāsonekele amba: “Kadi kutupu, nansha umo, wakwikadila na būmi aye mwine, kufwa nako mo monka. Wivwane shi twikale bōmi, nabya i kudi Mfumwetu ko twikadile bōmi. Shi i lufu nalo kadi, tufwilanga konka kudi Mfumwetu, penepo kadi, shi twikale bōmi, shi twikale bafwe, nabya tudi bonka bā Mfumwetu.” (Loma 14:7, 8) Leza i mwitulēmeke na kwitupa bwanapabo bwa kwitongela. Potutonga na kusumininwa kulonda dino dishinda dya umbūmi mwanda wa buswe botuswele Leza, tusangajanga mutyima wandi. (Nk. 27:11) Lubatyijo lulombolanga kwipāna kotwipēne kudi Leza ne kulombola patōkelela ku bantu amba Yehova i Mulopwe wetu. Lulombola amba tudi ku mutamba wandi mu mwanda utala bubikadi bwa diulu ne ntanda. (Bil. 5:29, 32) Yehova nandi wikalanga potudi. (Tanga Mitōto 118:6.) Kadi lubatyijo lwitushitwilanga dishinda dya kumona madyese mavule a ku mushipiditu dyalelo ne mu kitatyi kya kumeso.

 Dyese dya Kwikala mu Bubana na Bana bwa Buswe

7-9. (a) Lelo i kikulupiji’ka kyāpene Yesu kudi boba bāshile bintu byabo ke bamulonda? (b) Le mulao wa Yesu usonekelwe mu Mako 10:29, 30 ufikidilanga namani?

⁷ Mutumibwa Petelo wānene Yesu amba: “Monapo bidi, bātwe byo twashīle byonso ke tukulonda. Lelo byo tusa kukamona bātwe i bika le?” (Mat. 19:27) Petelo wādi usaka kuyuka i bika byakamona kumeso aye ne bana ba bwanga bakwabo ba Yesu. Kwielela mpata mu mwingilo wa kusapula Bulopwe, kwēbalombele kwipāna kukatampe. (Mat. 4:18-22) Lelo Yesu wēbakulupije bika?

⁸ Kukwatañana na nsekununi ya muswelo umo ya Mako, Yesu wālombwele amba bana bandi ba bwanga bakekala mu bubana na bana bwa ku mushipiditu. Wānene amba: “Kepadipo, nansha umo, wakunshīla njibo, nansha bāna babo, bāna-balume ne bāna-bakaji, nansha bashandi ne inandi bene, nansha mukaji ne bāna, nansha madimi, pa mwanda wa amiwa ne pa myanda-miyampe. Aye kabulwepo kumona ponka pano katwa ka mōbo, ne ka bāna babo bāna-balume, ne katwa ka bāna babo bāna-bakaji, ne ka bainabo, ne ka bāna, ne katwa ka madimi, ne kupangwapangwa kudi ponka, ebiya myaka ya kukāya būmi bwa kulādila nyeke na nyeke.” (Mako 10:29, 30) Bene Kidishitu ba mu myaka katwa kabajinji, kimfwa ba Didya, Akwila, Pishila, ne Ngaiusa, babadilwa mu boba bāpēne “mōbo” ne kwikala ke ‘banababo bana-balume, ne bana bana-bakaji, ne bainabo’ ba bakwabo mu lwitabijo, pamo na mwālaile’kyo Yesu.—Bil. 16:14, 15; 18:2-4; 3 Yoa. 1, 5-8.

⁹ Bino binenwa byānene Yesu bifikidilanga nakampata dyalelo. “Madimi” āshilwe na balondi bandi afunkila bintu bivule bishilwe na mutyima tō na bamishonele, bengidi ba ku Betele, bengidi ba ntanda yonso, ne bakwabo mwanda wa kwendeleja tumweno twa Bulopwe kumeso mu matanda palapala. Batutu ne bakaka bavule i bashiye mobo mwanda wa kupēleja būmi, ne kino kituletelanga nsangaji pa kwimvwana būmi bwabo bulombola mwibalamine Yehova ne mwingilo wandi mowibasangeja. (Bil. 20:35) Kadi, bengidi bonso ba Yehova babatyijibwe bamonanga madyese adi mu kubadikila “bidi kusaka bulopwe bwa Leza, ne boloke bwandi kumo,” bu ba mu bubana na bana bwa Bwine Kidishitu bwa ntanda yonso.—Mat. 6:33.

Ikala “Pafīta”

10, 11. Lelo “pafīta pa Mwinemukatakatamwine” i paka, ne tubwanya namani kwikala’po?

¹⁰ Kwipāna ne kubatyijibwa kuletanga dyese dikwabo dikatampe—dyese dya kwikala “pafīta pa Mwinemukatakatamwine.” (Tanga Mitōto 91:1.) Kino i kifuko kya kyelekejo kidi’po mutyima-ntenke, ngikadilo ya kulamwa ku bibi bya ku mushipiditu. I “pafīta” mwanda kepayukilwepo na bantu ba ino ntanda bakubulwa meso a ku mushipiditu kadi bampikwa kukulupila Leza. Shi twikale na būmi bukwatañene na kwipāna kwetu ne kukulupila Yehova na kusumininwa konso, na bubine tudi na batwe bamunena amba: “I mpakala yami, i munsakwa mwami; wami Leza mo nkulupile.” (Mit. 91:2) Yehova Leza wikalanga ke kifuko kyetu kya kwikala’mo na mutyima-ntenke. (Mit. 91:9) Le kudi kifuko kikwabo kitabukile kino?

¹¹ Kwikala “pafīta” pa Yehova kuletanga kadi madyese a kwikala mu kipwano kya pa bunka nandi. Kino kishilulanga na kwipāna ne kubatyijibwa. Kupwa, tuningijanga kipwano kyetu na Leza ne kufwena kwadi kupityila ku kifundwa kya Bible, milombelo ya ku mutyima, ne kikōkeji kibwaninine. (Yak. 4:8) I kutupu upityile Yesu ku kufwena Yehova, mwanda wādi ukulupile pampikwa kutelententa mudi Umpangi. (Yoa. 8:29) Nanshi kekudipo kyotutatena Yehova nansha mutyima ne bukomo bwandi bwa kwitukwasha tufikidije kwipāna kwetu. (Mus. 5:4) Mpango ya ku mushipiditu itūdile’ko Leza pa mwanda wa bantu bandi ilombola na bubine amba wituswele ne usaka tubwanye kumwingidila.

Tusangelei Paladisa Yetu ya ku Mushipiditu

12, 13. (a) Lelo paladisa ya ku mushipiditu i bika? (b) Le tubwanya namani kukwasha bapya?

¹² Kwipāna ne kubatyijibwa kwitushitwilanga  kadi dishinda dya kwikala mu Paladisa ya ku mushipiditu mudi madyese. I kifuko kya ku mushipiditu kimo kete kidi’mo banabetu mu lwitabijo, badi mu ndoe na Yehova Leza ne abo bene na bene. (Mit. 29:11; Is. 54:13) Mu ino ntanda kemudipo kintu kibwanya kudingakanibwa na Paladisa ya ku mushipiditu. Kino kimwekanga nakampata ku bitango bya ntanda, pāyanga batutu ne bakaka batamba mu mizo mivule, ndimi, ne bisaka kubungakana mu ndoe, bumo ne mu buswe bwa bubana na bana.

¹³ Paladisa ya ku mushipiditu yotudi’mo i mishile kulampe na ngikadilo ileta bulanda idi’mo ntanda dyalelo. (Tanga Isaya 65:13, 14.) Tudi na dyese dya kutandabula lwito ku bantu lwa kutwela mu paladisa ya ku mushipiditu, na kusapula musapu wa Bulopwe. Kadi kukwasha bapya mu kipwilo i dyese amba bamwene mu bufundiji bwa mu mingilo. Mungya bwendeji bwa bakulumpe, tubwanya kwikala na dyese dya kukwasha bapya, pamo bwa ba Akwila ne Pishila bādi “ke [bashintulwila Apolosa] bilumbuluke byonka mwendele dishinda dya Leza.”—Bil. 18:24-26.

Endelela na Kuboila Ñeni Kudi Yesu

14, 15. Lelo i bubinga’ka buyampe botudi nabo bwa kuboila ñeni kudi Yesu?

¹⁴ Tudi na bubinga buyampe bwa kuboila ñeni kudi Yesu. Kumeso kwa kwiya’ye pano panshi, Yesu wāingile pamo na Shandi mu bula bwa myaka keibadika. (Nk. 8:22, 30) Wādi uyukile amba dishinda dilumbuluke dya umbūmi didi mu kwingidila Leza ne kusapula bubinebine. (Yoa. 18:37) Yesu wādi umwene patōkelela amba dishinda dikwabo dyo-dyonso dya umbūmi i dya kwisakila ne bupofu. Wādi uyukile amba ukatompwa byamwiko ne kwipaibwa. (Mat. 20:18, 19; Bah. 4:15) Byadi Kimfwa kyetu, i mwitufundije mwa kulamina bululame.

¹⁵ Kupwa’tu kwa Yesu kubatyijibwa, Satana wāmutompele amba ashetuke mu dishinda dilumbuluke dya umbūmi—ino bweleyombo bitupu. (Mat. 4:1-11) Kino kitufundija amba tubwanya kulama bululame bwetu nansha shi Satana walonga bika. Mobimwekela, welanga diso pa boba balumba ku kubatyijibwa ne bakitamba mu kubatyijibwa. (1 Pet. 5:8) Lwana lukokeja kutamba ku ba mu kisaka betusakila biyampe ino abo na milangwe mifwe. Inoko ano  matompo etupanga mukenga wa kulombola ngikadilo milumbuluke ya Bwine Kidishitu, kimfwa bulēme ne bwino, potulondolola bipangujo ne potusapula. (1 Pet. 3:15) Kutanwa na matompo kukokeja kukunka mityima ya boba betwivwana.—1 Tem. 4:16.

Lamata ku Dishinda Dilumbuluke dya Umbūmi!

16, 17. (a) Lelo i bisakibwa’ka bisatu bya umbūmi byotutana mu Kupituluka 30:19, 20? (b) Lelo Yesu, Yoano, ne Polo bāitabije namani byālembele Mosesa?

¹⁶ Myaka 1500 kumeso kwa Yesu kwiya pano pa ntanda, Mosesa wādingile Bene Isalela kutonga dishinda dilumbuluke dya umbūmi dyādi’ko. Wānene amba: “Naite diulu ne ntanda bu-kamoni padi banwe dyalelo dino’di, na’mba: Nakubikila ku meso obe bumi ne lufu, dyese ne mafingo, ino tonga bidi bumi amba wikale mumi, abewa ne lukunwa lobe lwine; mu kusanswa Yehova Leza obe, mu kukōkela diwi dyandi, ne mu kumūminina [kumulamata].” (Kup. 30:19, 20) Isalela wābudilwe kikōkeji kudi Leza, ino bisakibwa bisatu bya pa kwikala na būmi byātelele Mosesa kebyāshintyilepo. Byāpitulukilwe’mo na Yesu ne na bakwabo.

¹⁷ Kibajinji, ‘tufwaninwe kusanswa Yehova Leza wetu.’ Tulombolanga’mba tusenswe Leza na kulonga bintu mwendele mashinda andi moloke. (Mat. 22:37) Kya bubidi, ‘tufwaninwe kukōkela diwi dya Yehova’ na kwifunda Kinenwa kyandi ne kukōkela ku mbila yandi. (1 Yoa. 5:3) Kino kitulomba kutanwa ku kupwila kitatyi ne kitatyi, kwine kushintululwa Bible. (Bah. 10:23-25) Kya busatu, ‘tufwaninwe kūminina nansha kulamata kudi Yehova.’ Nansha shi tubatanwa na bika, twitabijei Leza ne kulonda wandi Mwana.—2 Kod. 4:16-18.

18. (a) Lelo Kiteba kya Mulami kya mu 1914 kyashintulwile bubinebine namani? (b) Le tufwaninwe kulonga bika pangala pa mwinya ne bubine botumona dyalelo?

¹⁸ I kya dyese’po kashā kwikala na būmi bukwatañene na bubinebine bwa mu Bible! Bino binenwa bya kamweno byalupwilwe mu 1914 mu Kiteba kya Mulami amba: “Lelo ketudipo bantu ba dyese ne nsangaji’ni? Le Leza wetu ke wa binebinepo’ni? Shi muntu uyukile kintu kampanda kiyampe, nankyo etabije’kyo. Shi momudi mudi muntu wasokola kintu kiyampe, tukulupile amba uketusapwila. Batwe ketuyukilepo kintu kiyampe nansha kimo, nansha kipindi kya biyampe byotusokwele mu Kinenwa kya Leza. . . . I kutupu bishima bibwanya kulombola ndoe, nsangaji ne madyese etuletele buyuki bwimvwanike bwa Leza wa bine mu mityima ne mu būmi bwetu. Mānga ya Tunangu twa Leza, Boloke, Bukomokomo ne Buswe bwandi ibapwija ne pa mfulo kyumwa kya mu ñeni ne mu mityima yetu. Ketudipo ne kyotukakimbila kukwabo. Kekukidipo kyotwabila monka kutabuka kwimvwanija senene ino Mānga ya kutendelwa.” (Kiteba kya Mulami, 15 Kweji 12, 1914, paje 377-378, mu Angele) Ketukaleka’byopo kufwija’ko pangala pa uno mwinya ne bubinebine bwa ku mushipiditu. Na bubine, tudi pano na bubinga bukatampe bwa kusangela pa kunanga ‘kotunangila mu mwinya wa Yehova.’—Is. 2:5; Mit. 43:3; Nk. 4:18.

19. Mwanda waka boba babwenye bisakibwa bafwaninwe kukimba kubatyijibwa pambulwa kulejaleja?

¹⁹ Shi usaka ‘kunanga mu mwinya wa Yehova’ ino kwaikele Mwine Kidishitu mwipāne ne mubatyijibwe, kokalejaleja. Longa bukomo bwa kubwanya bisakibwa bya mu Bible pa kubatyijibwa—o muswelo umo kete wa kufwija’ko Leza ne Yesu Kidishitu pa byobetulongele. Mupe Yehova kintu kyobe kyodi nakyo kitabukile bulēme—ke būmi bobe kadi. Lombola’mba usakanga kulonga kiswa-mutyima kya Leza na kulonda wandi Mwana. (2 Kod. 5:14, 15) Ne kutatana mpika, dino dyo dishinda dilumbuluke dya umbūmi!

Ukalondolola Muswelo’ka?

• Lelo lubatyijo lwetu lulombola bika?

• Le kwipāna kudi Leza ne kubatyijibwa kuletanga madyese’ka?

• Mwanda waka kuboila ñeni kudi Yesu kudi na mvubu?

• I bika biketukwasha tulamate pototo ku dishinda dilumbuluke dya umbūmi?

[Bipangujo bya Kifundwa]

[Kifwatulo pa paje 29]

Lubatyijo lobe lulombola amba wi mutonge dishinda dilumbuluke dya umbūmi

[Bifwatulo pa paje 31]

Lelo udi “pafīta”?