Fwena Kudi Leza

Lelo Leza Ubwanya Kwialakanya?

BATYIBI 2:11-18

BYOTUDI bantu bakubulwa kubwaninina, batwe bonso twialakanyanga kyaba kimo. Kimfwa, tukokeja kutenekwa mutyima pa kupwa kuyuka’mba tubalonga kilubo. Kintu kitulumukwa, Bible unena’mba Yehova ubwanya kwialakanya. Padi ukanena’mba, ‘Ino Leza i mubwaninine, kaloñangapo bilubo!’ Penepa Leza ubwanya kwialakanya mu buluji’ka? Kilondololwa kikokeja kwitukwasha twivwanije kintu kimo kitulumukwa: Yehova udi na malango, ne ukokeja kusangala nansha kufitwa pa bilongwa byetu. Tala binenwa bidi mu Batyibi 2:11-18.

Mukanda wa mu Bible wa Batyibi udi na nsekununi isambila pa kitatyi kya tuvutakanya mu manga ya Isalela. Muzo wādi papo wikele mu Kenani, ntanda yobālaile Abalahama kudi Leza. Mu myaka tutwa yalondele’po, būmi bwa Isalela bubangwa mu kīpi bu bwa kupituluka mu bintu biná: butomboki, kususulwa, kwabija, ne kunyongololwa. *

Butomboki. Pa kwiula bya Bene Kenani, Bene Isalela “bazobolola Yehova” ne kushilula kulonda baleza bakwabo; nakampata bādi “ke bengidila Bala ne Ashetalote.” * Buno butomboki bwadi bupondo. Ke kya kutulumukapo shi Bene Isalela “bakolomona Yehova kufuna bulobo,” Leza wēbanyongolwele mu Edipito.—Vese 12, 13; Batyibi 2:1.

Kususulwa. Yehova pa kukolomonwa afune bulobo bwendele’mo, wādi uleka kukinga bantu bādi bamuvundamina. Bene Isalela bādi ba kuponena mu “maboko a balwana nabo,” bādi ba kwiya kusala ntanda.—Vese 14.

Kwabija. Mu bitatyi bya byamalwa, Bene Isalela bādi ba kwialakanya pa mwanda wa mwiendelejo wabo mubi ne kulomba Leza ebakwashe. Padi kulomba kwabo i kumwekele mu “kubinza kwabo pa mwanda wa boba bebasuswile.” (Vese 18) Kwabija Leza kubadilwa mu bintu byobādi bapituluka’mo kyaba ne kyaba. (Batyibi 3:9, 15; 4:3; 6:6-7; 10:10) Lelo Leza wādi ulonga’po namani?

Kunyongololwa. Yehova wāivwene kubinza kwa Isalela ne “webakwatyilwe lusa.” Kishima kya Kihebelu kyalamwinwe pano bu “webakwatyilwe lusa” kikokeja kadi kwalamunwa bu “kwialakanya.” (Dingakanya na Ngalwilo 6:6.) Pokyalamunwa bu “kwialakanya” kishintulula “kushinta milangwe nansha mutyima wa kulonga kintu.” Dibuku dimo dinena’mba: “Kubinza kwabo kwātonwene Yehova, āshinte mpango yandi yadi ya kufuta mfuto ke ya bunyongolodi.” Pa lusa lwandi, Yehova wāsaka “kutalula batyibi” bādi ba kunyongolola bantu bandi ku balwana nabo.—Vese 18.

Lelo ubamone kyālengeje Leza ealakanye, ne kushinta milangwe yandi? I mwanda bantu bandi bāshintyile ngikadilo yabo. Langa’po bidi: Shabana wa buswe ukokeja kufuta mfuto mwanandi watomboka, padi i na kumusuminwa bintu kampanda. Ino pa kumona’mba mwana wesāsa bya binebine, shabana wakwata butyibi bwa kufudija mfuto.

Lelo i ñeni’ka yotuboila ku ino nsekununi pa myanda itala Yehova? Nansha kulonga bubi ku kusaka byokukolomona bulobo bwandi, mutyima wa kwisāsa umutononanga afwile bantu lusa. I mwanda musumininwe pa kulanga’mba byotulonga bikokeja kusangaja nansha kufityija mutyima wa Leza. Le ubulwepo kwifunda muswelo wa “kusangaja mutyima” wa Yehova? (Nkindi 27:11) Kukealakanyapo nansha dimo.

[Kunshi kwa dyani]